Mambadga ma basoñgol

Imbe ngéda biloñ bi ga kal le “nsañ u yé, woñi u ta ha bé”?

Kiki di bi tehe i “Mambadga ma basoñgol” nu a bi sôk pam mu Nkum Ntat,a ndék ngéda Yéhôva a ga ha ikété ñem u “jôm li bitoñ” (hala wee baane ba nkoñ ’isi wonsôna) le bi yônôs “mahoñol mé,” le ba ti “nuga i i nkôyôp tjôôm” (Nations Unies) ngui ni kunde yap. I nuga i, i nsébla ki le “ôñgba i nuga bikai.” (Masoola 13:​14, 15; 17:​3, 16, 17) I mbus, “jôm li bitoñ” ni nuga bikai i i ntip kôs ngui bi ga tjé kwéha base ni nkoñ ’isi wonsôna. Baa biloñ bi ga legel le “nsañ u yé, woñi u ta ha bé”b i bisu bi ngéda tole i mbus le Yéhôva a ntjé kwéha base?​—1 Tésalônika 5:3.

I sem kwep, di nyi toi bé imbe ngéda ba ga boñ i nlegla u. Ibale di yik imbe ngéda i nlegla u, u ga bôña, ki di gwé ha bé le di yén péé tole di yoñ yihe. Ndi Yésu a bi waa bé kal banigil bé le “yéna péé, ibabé waa.” (Matéô 24:42; 25:13; 26:41) Nano, di tibil le béñge i mbañ ñôma Paul a bi tila i kaat Tésalônika.

Paul a bi tila le: “To imbe ngéda, bôt b’a kal le: ‘Nsañ u yé, woñi u ta ha bé!’ Ha nyen tjiba y’a kwél bo kunda yada.” (1 Tésalônika 5:​2, 3) Lana nyen bikaat gwés bi mbéna toñol bibuk bi Paul. Nlegla le “nsañ u yé, woñi u ta ha bé,” u ga bôña ndék ngéda ndigi ilole njiiha ikeñi i mbôdôl ni tjiba i Babilôn Nunkeñi, hala wee kwéha base, i nkoñ ’isi wonsôna. I nlegla u won u mba yimbne i nsôk le ndék ngéda, wee njiiha ikeñi i mbôdôl.

Ndi i ngéda di nkônde wan i jam li, i nene le di nla ki toñol jo nya ipe. Bebek le i nlegla unu le “nsañ u yé, woñi u ta ha bé” u ga bôña i mbus tjiba i kwéha base. Inyuki di nkal hala? Di wan i mambadga mana:

Imbe ngaba kwéha base i nyoñ mu gwét bi njuba ipôla biloñ? Bibel i ntoñol le: “I nyeni [“muda libambe nunkeñi,” le Babilôn Nunkeñi] nyen ba bi léba matjél ma . . . bôt bobasôna ba bi nôla hana ’isi.” (Masoola 17:​1, 5; 18:24) Nwii di nwii, muda libambe nunkeñi, hala wee kwéha base, i nyoñ ngaba ikeñi i gwét bi njuba ipôla biloñ. Ngim mangéda, kwéha base i ntinde yak bôt i nol bape. Jon kwéha base i nlona gwét, he ‘nsañ ni nwee’ bé. Hala a ntinde bés i badba i mbadga ini le: Baa biloñ bi ga legel le “nsañ u yé, woñi u ta ha bé” i mbus le bi ga mal tjé Babilôn Nunkeñi? Bebek le hala nyen mam ma ga ba, ndi di nyi toi bé.

Kii i ga noñ i mbus nlegla le “nsañ u yé, woñi u ta ha bé”? Paul a nkal le: “Ha nyen tjiba y’a kwél bo kunda yada.” (1 Tésalônika 5:3) Ndoñi nlôñ unu i nkal le: “Paul a ñéba hana le ngéda i ga ba nhubuk tole i ga ba yaga bé ipôla i nlegla unu le ‘nsañ u yé, woñi u ta ha bé,’ ni tjiba i bôt ba ga boñ i nlegla u. I tjiba ini i ga lo kunda yada, ba ga pei bé.” Ibale biloñ bi nlegel le “nsañ u yé, woñi u ta ha bé” i mbus tjiba i kwéha base, wee tjiba i biloñ gwobisôna i ga lo yaga kunda yaga.

Kii litén li Yéhôva li ga boñ i ngéda i mam ma, ma ga yon? Paul a nkal le: “Ndi a lôk kéé, bé ni ta bé ikété jiibe le hilo hini hi puhe bé kiki bôt ba wip.” (1 Tésalônika 5:4) Di tééda le: Ibale i nlegla unu le “nsañ u yé, woñi u ta ha bé” u mbôña i mbus tjiba i kwéha base, wee litén li Yéhôva li ga yi le yak tjiba i biloñ i yé bebee ndi i tjiba i, i ga puhe biloñ kiki mut wip.

Kii ni di kôli bem? Ndék ngéda, “jôm li bitoñ” ni nuga bikai i i nkôhna ngui, bi ga tjé kwéha base. Ha nyen njiiha ikeñi i ga bôdôl. Di nyi ki le ngim ngéda i ga pam le biloñ bi legel le “nsañ u yé, woñi u ta ha bé.” Hala a ga bôña imbe ngéda? Bebek i nlegla u, u nla bôña ilole kwéha base i ntjiba. I nlegla u, u nla ki bôña ndék ngéda i mbus le biloñ bi mal tjé kwéha base. Ndi di nlama bem inyu tehe lelaa mam ma ga ba. Libim li ngéda, di ntibil nok mbañ i Bibel i ngéda i yé i yon, tole i ngéda i mal yon.​—Béñge yak Yôhanes 12:16.

Ndi inyu nano, i yom i nlôôha ba nseñ i yé le di tééda maada malam ni Nyambe, he bé le di yéñ yi imbe ngéda i nlegla unu le “nsañ u yé, woñi u ta ha bé,” u ga bôña. Di nlama ba “nkôôbaga, di hiômôk ni pék,” le ndi di ba péé to mam ma mba lelaa.​—1 Tésalônika 5:6.