Kii sôble i nkobla, inyuki i yé nseñ?

1. Kii i ñunda le sôble i yé ikété biniigana bi bisu bi Bibel?

DI YÉ di ba maséé i ngéda bôt ba ntip sôblana! Ndi baa u yik le i maséé ma, ma bi bôdôl i likoda li bikristen li bisu, i nwii 33, i Pentékôt munu ngéda yés? Mu likoda li, bôt ba bi sôblana, yak nkwel u tiba inyu toñol inyuki i yé nseñ i sôblana. (Minson mi baôma 2:​38, 40, 41) Ñôma Paul a bi kal le yak ‘biniigana inyu mintén ni mintén mi sôble bi yé mukété biniigana bi bisu inyu Kristô.’ (Lôk Héber 6:​1, 2) To hala kiki sôble i yé ikété biniigana bi bisu di nkôhna, di nlama tibil nok kii i yé sôble. Inyuki?

2. Inyuki di nlama tibil nok kii sôble i nkobla?

² Nlélém kiki bañga hikuu hi nla boñ le ndap i kwo bañ, hala yak nyen ibale di ntibil nok biniigana bi sôble, hémle yés i ga let. Di nlama boñ kii yosôna di nla inyu tibil nok i biniigana bi, to ibale di yé i boñ biliya inyu sôblana tole di bi sôblana behee. Jon munu yigil ini, di ga timbhe i mambadga mana: Kii sôble i nkobla? Lelaa ba nlama sôble mut? Inyuki di nlama sôblana i jôl li Tata, li Man ni li mbuu mpubi?

KII SÔBLE YOÑ I NKOBLA?

3. Kii sôble i nkobla?

³ I ngéda u nsôblana, u ñunda i mbamba le u neebe maliga inyu Yéhôva Nyambe ni Yésu Kristô, le u ntam bibéba gwoñ, u nhéñha yak maboñok moñ inyu gwélél Yéhôva. Hala a ñunda ki le u neebe le Yésu nyen a yé njel Yéhôva a ngwélél inyu tohol bés ni le u nkal Yéhôva ikété masoohe le u nsômbôl boñ sômbôl yé lôñ yada ni ntôñ wé. I ngéda u nti Yéhôva i mbônga u, tole u ti wemede nkikip i mbus, u sôblana, u mbôdôl niñ ntén niñ u u nkena i niñ boga.

4. I ngéda ba nyube wensôna ikété malép, kii hala a nkobla? (Béñge yak titii.)

⁴ I ngéda ba nsôble we, ba nyube wensôna ikété malép wengoñle ba njô we; i mbus, ba pémés we mua wengoñle u ntuge. (Béñge yak Kôlôsé 2:12.) Sôble i yé yimbne le u mboñ mahéñha ma ngui i niñ yoñ. Inyuki di nkal hala? I ngéda ba nyube we ikété malép, u ñunda le u niñ ha bé kiki u bé niñ behee. I ngéda u mpam i malép, u ñunda le u mbôdôl niñ i mondo, yon i yé le u mboñ ndik sômbôl i Yéhôva.

5. Inyuki di nkal le biliya u mboñ inyu sôblana bi yé kiki nson Nôa a bi gwel inyu bañ nkuu? (1 Pétrô 3:​18-21)

⁵ Añ 1 Pétrô 3:​18-21. Di nla kal le i nson di ngwel inyu kôs sôble u yé kiki nson Nôa a bi gwel inyu bañ nkuu. Ibale u mbôdôl nigil Bibel, i nson u, u nla bane we ndutu ngandak, u nene yak nkeñi kiki nson Nôa a bi gwel inyu bañ nkuu. Ndi baa i biliya bi gwobisôna bi yé toi nseñ? Ñ. Inyuki di nkal hala? Hoñol ki, Nyambe nyemede nyen a bi ôt titii i nkuu, ndi Nôa nye a bi lama nôgôl i biniigana bi gwobisôna inyu sôñ biniñ, i ntida malép. Kiki Nôa a bé mut hémle, yak Yéhôva a nidik nye, a bi nôgôl i biniigana bi gwobisôna, a pam i bañ nkuu. Kiki Nôa, yak we u nla pam i boñ ‘mam momasôna Nyambe a nkal we.’​—Bibôdle 6:22.

6. Inyuki Bibel i nkal le sôble i ntohol bés?

⁶ I nlôñ 21, Pétrô a ntila le sôble ‘i ntohol bés.’ I maliga, hala a nkobla bé le ibale ba nyube ndik mut ikété malép, wee a ntohlana. A ta bé to wengoñle i ngéda ba nyube bés, wee bibéba gwés gwobisôna bi nséha. Matjél ma Yésu motama mon ma mboñ le bibéba gwés bi séha. (1 Yôhanes 1:7) Ndi sôble i yé nseñ ngandak inyu boñ i mam momasôna Nyambe a mbat we le u boñ, ni le i ngéda u nsôblana, ‘u mbat Nyambe loñge kiññem.’ Yéhôva a ga ba maséé ngandak i ti we i yom u mbat nye. Ni i njel i nyen sôble ‘i ntohol we,’ hala wee i nkena we i njel niñ boga.

LELAA BA NLAMA SÔBLE MUT?

7. Lelaa sôble i nlama tagbe?

⁷ Bibel i nkal le inyu kôs sôble, ba nlama yube mut nyensôna ikété malép. Handugi i jam li, Bibel i ntoñol bé dini disii di mam dipe. Ndi i ñunda kii i yé loñge le bôt ba boñ i kel sôble. Kiki hihéga, matiñ ma Bibel ma ñunda lelaa i bôt ba nkôs sôble ba nlama haba, ni kii i bôt ba yé ha yokel ba nlama boñ. (1 Korintô 14:40; 1 Timôtéô 2:9) I len ini, mimañ nwon mi mbéna sôble bôt, ndi di nti bé bo bibégés bi tôbôtôbô inyu nsima ba gwé. (1 Korintô 1:​14, 15) Sôble i ntééda mahee mé, to ibale bôt ba yé ngandak i kel i tole to.​—Minson mi baôma 8:36.

8. Mambe mambadga ba mbat bakôs sôble, inyuki? (Minson mi baôma 2:​38-42) (Béñge yak titii.)

⁸ Bibel i nkal le di ‘pahal hémle yés inyu tohi.’ (Rôma 10:​9, 10; béñge note d’étude ni hop Pulasi le “déclares publiquement.”) Jon, i nlôôha ba loñge le di boñ hala i ngéda di nsôblana, inyule hala a yé nseñ inyu tohi yés! Ba yé ba bat bakôs sôble mambadga ima. Mbadga i bisu i yé le “Baa u ntam bibéba gwoñ, u ti wemede nkikip inyu boñ sômbôl i Yéhôva, u neebe ki le Yésu Kristô a yé njel Nyambe a ngwélél inyu tohol we?” I mbadga i, i mpôdôl i mam mut a mboñ ilole a nkôs sôble. I nhôñlaha ki bés i yom Pétrô a bi kal bôt i hilo hi Pentékôt, a bi ti bo makénd le ba hielba, ba sôblana ki. Mbadga i nyônôs iba i yé le “Baa u ntibil nok le i ngéda u mal kôs sôble, u nyila Mbôgi Yéhôva, u jôp ki i ntôñ Yéhôva?” I mbadga i, i nhôñlaha bés likak di bi ti le d’a nôgôl biniigana ntôñ u Yéhôva w’a ti bés, di gwéélak Yéhôva ni lôk kéé yés i bôlôm ni i bôda ndik kiki lôk kéé i hiai bisu i bé boñ. (Añ Minson mi baôma 2:​38-42.) I bôt ba ntimbhe ni ñem wap wonsôna le: “Ñ,” bon ba kôli sôblana.

9. Mambe mam hiki wada wés a nlama boñ inyu lémél Nyambe?

⁹ Bebek le ilole u nyi maliga, niñ yoñ i bé ilam i ngim likala, u bé boñ bé bibéba bikeñi, tole ibale bagwal boñ ba yé bikristen, ba bi hôla we i gwés Yéhôva. Ndi baa yak we u nlama hiel ñem, u sôblana ki inyu lémél Djob? Ñ, yak we u nlama boñ hala. Too di bi niñ umbe ntén niñ, di nlama bé hôya le bésbobasôna di bi kôdôl béba i i bi kena bés haa ni Yéhôva. (Tjémbi 51:5) I ngéda di nigil i yi Yéhôva, di mpohol i boñ sômbôl yé, he sômbôl yés bé. Hala a ntinde bés i tam bibéba di bi boñ behee, di hiel ñem wés, di waa boñ i mam ma mbébél Tata wés nu ngii, di bôdôl niñ kiki a ngwés, ha ni nyen di nla sôblana.​—Minson mi baôma 3:19.

10. Kii u nlama boñ ibale u bi bôk u sôblana i base ipe?

¹⁰ Ibale u bi bôk u sôblana i base ipe, u nlama tiimba sôblana, inyu yila Mbôgi Yéhôva. Inyuki? Inyule u bé yi bé maliga inyu Yéhôva bo Yésu. To ibale u bi ti wemede nkikip yak Nyambe ikété masoohe, u bé tibil bé yi sômbôl yé i ngéda u bi boñ i mbônga u. I ngéda ñôma Paul a bi boma bôt i Éfésô ba ba bi bôk ba sôblana bo ngi bana bañga yi i Bitilna, a bi yoñ bitelbene le ba tiimbab sôblana. (Minson mi baôma 19:​1-5) I len ini, Nyambe a neebe sôble yés ibale di ntibil yi sômbôl yé.

“I JÔL LI TATA NI LI MAN NI LI MBUU MPUBI”

11. I sôblana “i jôl i Tata, ni li Man, ni li mbuu mpubi” i nkobla le kii? (Matéô 28:​18-20)

¹¹ Yésu a bi kal le banigil bé ba lama sôblana “i jôl li Tata, ni li Man, ni li mbuu mpubi.” (Añ Matéô 28:​18-20.) Kii a bé yéñ kal? Ikété Bibel, i buk ini le “jôl” i mbéna gwéélana inyu pôdôl libak li mut. I nla ki gwéélana inyu pôdôl tel mut a gwé tole inyu éba le mut numpe nyen a nti nye kunde i boñ ngim jam. Jon ibale di mboñ jam “i jôl li” ngim mut tole “i jôl li” ngim jam, wee di neebe le i jam li tole i mut nu nyen a nti bés kunde i gwel i nson u. (Béñge Matéô 10:41; béñge yak note d’étude ni hop Pulasi le “parce que c’est un prophète.”) Di tehe lelaa u nla yi tel ni kunde i Tata ni i Man, di tehe yak kii i yé mbuu mpubi ni lelaa u nla hôla bés.

12. Lelaa di nsôblana i jôl li Tata? (Masoola 4:11) (Béñge yak bititii.)

¹² I jôl li Tata. Di neebe le Yéhôva nyen a yé Tata wés nu ngii, hala wee nyen a bi ti bés niñ. Nyen a yé Nu ngui yosôna, Nhek mam momasôna. (Añ Masoola 4:11.) Di neebe le nyen a ñemble masoohe. I ngéda di nsoohe nye tole i ngéda di mpôdôl nye bôt bape, di ngwélél jôl jé, di tinak nye lipém. Di nsoohe nye ni ñem wés wonsôna, di hôlga bape i yi nye. (Tjémbi 65:2) Ndi inyu sôblana i jôl li Tata, di nlama bé telbene ha. I bôt ba bé emble Pétrô i kel Pentékôt ba bé yi Yéhôva. Ndi ba bé lama nok le Yéhôva a nti ndik bés niñ boga ni njel Yésu Kristô.​—Rôma 5:8.

13. Lelaa di nsôblana i jôl li Man? (Béñge yak bititii.)

¹³ I jôl li Man. Di neebe le Yésu nyen a yé mpom Man Nyambe. A yé “njel,” hala wee, ni njel yé ndik nyen di nla bana maada malam ni Yéhôva. (Yôhanes 14:6) Yésu a yé yak Nkobol wés, nyen a bi wo inyu yés inyu boñ le di niñ. Kiki di nyi hala, hala a ntinde bés i noñ ndémbél yé hiki kel, he ndik bé i kel sôble yés. (1 Yôhanes 2:6) Jon kiki nye, di ntéé likalô ni makénd, di nwas bé le yom yo ki yo i kéñ bés i gwel nson u. (Lukas 4:43) Di yé yak bebee i nihbe ndééñga inyule di gwé ngôñ i téñbe ni Yéhôva. (2 Timôtéô 3:12) Di nti Yésu lipém inyule nyen a yé “ñane likoda,” jon di yé maséé i suhus bésbomede isi i bet a bi téé inyu éga ni i tééda banigil bé.​—Éfésô 4:​8, 11, 12; 5:23.

14. (a) Lelaa di nsôblana i jôl li mbuu mpubi? (Béñge yak bititii.) (b) Imbe sôble ipe minhook mi nkôhna? (Béñge minkéñék mi matila mini le “Sôble minhook mi nkôhna.”)

¹⁴ I jôl li mbuu mpubi. Di neebe maliga inyu mbuu mpubi. Mbuu mpubi u ta bé ngim mut, u ta bé to nyambe wada inoñnaga ni biniigana bibe bi Trinitas, ndi u yé ngui i Nyambe. Di neebe le mbuu mpubi u bi éga bapôdôl ni i bet ba bi tila Bibel. Jon di gwé lem i añ Bibel ni i nôgôl biniigana gwé. (2 Pétrô 1:​20, 21) Di ntjél yak boñ bibéba bikeñi inyule i nya maboñok i, i nla kéñ le di bana mbuu u Nyambe, i nla ki kéñ le mbuu Nyambe u sal ikété likoda jolisôna.​—Éfésô 4:30.

15. Mambe makidik di nlama yoñ?

¹⁵ Ibale u bi sôblana, kee ni bisu i bigda inyuki sôblec i yé nseñ kiyaga, u niñ ki inoñnaga ni mbônga u bi ti Yéhôva i ngéda u bi ti wemede nkikip, u sôblana ki. Ndi ibale u yé ngi sôblana, kii u nla boñ? Baa ngim jam i nkéñ we i boñ hala? Yigil i noñ i ga unda we kii u nla ke ni bisu i boñ inyu sôblana.