Di tééda maada malam ni bôt bés ba lihaa ba ba ngwélél bé Yéhôva

1-2. Kii i bi lama ôbôs maada moñ malam ni lihaa joñ i ngéda u bi yi maliga?

YÉSU a bi kal mut wada nu a bé sômbôl yila nnigil wé le: “Témb i mbai yoñ ni i lihaa joñ, añle bo mam momasôna Yéhôva a mboñ inyu yoñ.” (Markô 5:19) I bibañga bi, bi ñunda le Yésu a bé yi lem yada bôt ba binam ba gwé: ba ngwés ba ñañle bôt bap ba lihaa manwin malam.

² Baa u ngi bigdaga i yom u bi nôgda i ngéda ba bi añle we ñañ nlam ngélé bisu? Ibabé pééna, u bi la bé tééda i jam li inyu yoñ wetama! Ndi bebek, bôt boñ ba lihaa ba bi leege bé i ñañ nlam u. Tole bibuk u bi gwélél gwon bi bi lona mindañ ipôla nan. To kii i leñek, lelaa u nla bana maada malam ni bôt boñ ba lihaa tole lelaa u nla tiimba bana maada malam ni bo ibabé le u bôk matiñ ma Bibel?

3. Kii di ga tehe munu yigil ini?

³ Munu yigil ini, di ga tehe: (1) Lelaa ñem ngôô u nla hôla bés i tôñ bôt bés ba lihaa ba ba ngwélél bé Yéhôva,a to ibale ba ñemble bé bés? (2) Lelaa di nla hôla bo to ibale maboñok map ni bibuk gwap bi mbabaa bés? (3) Lelaa hônba yés ni libak le di nlehel bé ñem bi nla hôla bôt bés ba lihaa i gwélél Yéhôva? (4) Lelaa di nla unda bo le di ngwés bo?

BANA ÑEM NGÔÔ

4. Lelaa Yésu a bi boñ ni i bet ba bé emble bé nye?

⁴ Yésu a bi pala bé waa hôla i bet ba bé tjél emble nwin wé. A bi kal le a bé kiki nsal wom nu a bé boñ kii yosôna a bé la inyu hôla e faigé i i bé num bé matam i num matam. (Lukas 13:​6-9) I ngéda Yésu a bi ti hihéga hi, a bé a ma tégbaha iloo nwii maa i hôla Lôk Yuda i hémle nye. Ndi inyuki a bi waa bé hôla bo? Yésu a bé kônôl bôt ngoo, inyu hala nyen a bé hônba bo.

5. Kii i bi tinde Yésu i kônôl Lôk Yuda ngoo?

⁵ Yésu a bé kônôl lôkisañ Lôk Yuda ngoo inyule baéga base ba bé hôla bé bo i bana bañga hémle ipañ Djob. A bi hégha bo ni “mintômba mi mi gwé bé ntééda bémba.” (Markô 6:34) Ndék ngéda ilole a nwo, Yésu a bi ee inyu Yérusalem inyule a bé yi le libim li bôt li li bé yééne mu li ga wo ibale li nhémle bé nye ni Isañ. (Lukas 19:​41-44) Ibale yak bés di gwé ntén ñem ngôô u inyu bôt bés ba lihaa, hala a ga tinde bés i bana ngôñ i hôla bo.

6. Inyuki di nlama hônba bôt bés ba lihaa ba ba ngwélél bé Yéhôva? (Galatia 6:9)

⁶ Añ Galatia 6:9. To ibale bôt bés ba lihaa ba gwé bé ngôñ i emble bés, di hônba bo; di waa bañ to “boñ loñge.” Di nyi le ibale mut a nhémle ngim biniigana bañga bañga, i mbéda nye ngéda inyu boñ le a héñha mahoñol mé, a neebe ki ñañ nlam. I maliga, baa wemede u bé bé mu nsoñgi u bôt ba ‘bééna bé botñem, ba ba bééna bé to Nyambe munu nkoñ ’isi unu’? (Éfésô 2:12) Ibale hala, ibabé pééna, wee ngim mankéé yon i bi hôla we. Baa hala a nlama bé tinde we i boñ kii yosôna u nla inyu hôla bôt boñ ba lihaa i yi Yéhôva?

HÔLA BO TO IBALE MABOÑOK MAP NI BIBUK GWAP BI MBABAA WE

7. Kii i bi lama kéñ lôknyañ i Yésu i emble nye?

⁷ Ibabé pééna, lôknyañ i Yésu i bi nok le a bi boñ manyaga i Galiléa. (Lukas 4:​14, 22-24) Ndi to hala, i bibôdle, ba bé hémle bé nye. (Yôhanes 7:5) Inyuki? Bibel i nkal bé bés. Ndi i nyeelene bés mam ima ma ma bé kéñ Lôk Yuda ipe i yila banigil ba Yésu. Lôk Yuda ihogi i bé kon woñi le i ga nôgla ha bé ni bôt bap ba libôk ibale ba nhémle Yésu. (Yôhanes 9:​18-22) Bape ba bé yi Yésu ibôdôl nye mañge, jon hala a bé lédél bo i neebe le a yé Man Nyambe. (Markô 6:​1-4) I nene le i mahoñol ma mon yak lôknyañ i Yésu i bi bôdôl bana. Baa yak bôt bés ba lihaa ba gwé i mahoñol ma?

8. Kii i nla tinde bôt bés ba lihaa i babaa bés ni maboñok map tole ni bibuk gwap?

⁸ Béñge kii i ntinde bo i pot, ni i boñ ngim mam. Bilôk binyañ bi Yésu bi bé lama ba ipôla bôt bé ba lihaa ba ba bi kal le “a nkônd njék.” (Markô 3:21) Inyuki ba bi kal hala? Ñañ u ñunda le Yésu a bé a pégi ngandak i téé likalô ni i mélés bakokon kayéle a bééna bé to ngéda i je. (Markô 3:20) Baa bôt bé ba lihaa ba bé tehe wengoñle base yé i nyumus nye? I nla ba hala. Bôt bés ba lihaa ba nla tehe wengoñle base yés i nkundus bés njék. Ibale hala nyen ba nhoñol, wee bés bon di nlama unda bo ni njel maboñok més ni bipôdôl gwés le maliga bé ma.

9. Kii i nla tinde bôt bés ba lihaa i héñha mahoñol ba gwé inyu Mbôgi Yéhôva? (1 Pétrô 3:​1, 2) (Béñge yak bititii.)

⁹ Nwas le maboñok moñ mon ma pot inyu yoñ. Bibuk gwés bilam ni maboñok més malam bi nla tinde bôt bés ba lihaa i héñha mahoñol ba gwé inyu Mbôgi Yéhôva. (Añ 1 Pétrô 3:​1, 2.) Nlôm nu a ta bé Mbôgi Yéhôva a nla nôgda binyuu hiki ngéda nwaa wé a nke i makoda tole i likalô. Ibale sita i gwé bé ngôñ le nlôm a nôgda wengoñle a gwé bé ngéda yé, a nla héñha ntjega wé u mam ma mbuu inyu tégbaha ngandak ngéda ni nye. Kiki hihéga, a nla ke i likalô i ngéda nlôm a pégi tole a ta bé ha i ndap. I ngéda mankéé nu muda a ta bé ndéñ ndéñ, a noodege nok nlôm, a ga hôla nye i héñha litehge jé inyu Mbôgi Yéhôva.

10. I ngéda ba ñôm bés nsohi, lelaa di nla nigle Yésu?

¹⁰ U ta bé nyégsaga i timbhe hiki ngéda ba ñôm we nsohi. I ngéda ba bi ôm Yésu nsohi le a yé mut mbéna je ni mut nyôba, a bi yén bé ha i kaaba. Ndi a bi ti bôt makénd le ba béñge maboñok mé inyu yi maliga. (Matéô 11:19) A bi unda mu niñ yé le a bé bé ndéñ ndéñ, a bé yi kon maséé ni mam malam ma niñ. (Béñge yak Yôhanes 2:​2, 6-10.) Jon to we, u gwé bé le u kaaba i ngéda ba ñôm we nsohi. Ndi, nwas le bôt boñ ba lihaa bomede bon ba tehe le u ta bé ndéñ ndéñ, ni le u nyi kon maséé ni mam malam ma niñ. Bebek hala a ga tinde bo i tjél emble bitembee ba mpot inyu yés.

U WAA BAÑ HÔNBA BO, U LEHEL BAÑ TO ÑEM

11. Lelaa Yésu a bi unda le a nhônba bilôk binyañ?

¹¹ Bikaat bi Bibel bi bi mpôdôl niñ i Yésu bi ñunda le a bi waa bé hônba bilôk binyañ. Kiki hihéga, i nene le yak bo ba bé i Kana i ngéda a bi boñ manyaga mé ma bisu. (Yôhanes 2:​11, 12) Kiki di mbôk di kal, bilôk binyañ bi Yésu bi bé hémle bé nye ha ngéda i. Ndi to hala, Yésu a bi kôm bé bo mbus. Bibel i ñunda le yom kiki bo nwii maa i mbus le a bi boñ manyaga mé ma bisu i Kana, Yésu a bi ke ni bisu i pôdôs bo ni bibuk bilam.​—Yôhanes 7:​5-8.

12. Kii i nla tinde bés i bana botñem le bôt bés ba lihaa ba nla héñha?

¹² Ibale di ntibil nok ipam limbe likala Yéhôva a nkônôl bés ngoo, hala a ga hôla bés le di lehel bañ ñem. I ngéda kwéha base i ga tjiba, bebek ha nyen ba ga bigda le di bi bôk di kal bo i mam ma.b (Masoola 17:16) Ba nla yak jôp i ntôñ i ngéda njiiha ikeñi i mba i ma bôdôl! Ibale bôt bés ba lihaa ba ntégbaha mangéda mabe i len ini, di yé maséé i boñ kii yosôna di nla inyu ba ha ipañ yap. Ibale ba ntehe le di gwé loñgeñem, ba tehge le di mbôñôl bo mam ni ñem wés wonsôna, bebek hala a ga hôla bo i neebe maliga.

UNDA BO LE U NGWÉS BO

13. Tolakii di pégi i nson u Yéhôva, di nlama yoñ yihe ni kii?

¹³ I yé maliga le di pégi i gwélél Yéhôva, ndi di gwé bé ngôñ le bôt bés ba lihaa ba nôgda wengoñle di gwé ha bé ngéda yap tole di ngwés ha bé bo. (Matéô 7:12) Lelaa di nla ni unda bo le di ntôñ bo? Di wan le ndék manjel.

14-15. Imbe njel di nla gwélél inyu unda bôt bés ba lihaa ba ba ngwélél bé Yéhôva le di ngwés bo? Ti hihéga.

¹⁴ Tééda maada malam ni bo, unda ki le u ngwés bo. Di ñunda bôt bés ba lihaa le di ngwés bo i ngéda di mbéna añle bo lelaa mam ma nke i pes yés. Kiki hihéga, u nla tilna bo tole u nla éble bo ndék bifôtô u bi yoñ i ngéda u bé i noi, i liké, tole i ngéda u bi pam ni mawanda moñ. Yom yosôna ba yé le ba bémél we i nla ndik ba le u tilna bo loñge man kaat tole u ti bo man likébla. I ngeñ di nyoñ ngéda i bôñôl bo i nya mam i, di ñunda bo le di ngwés bo.

¹⁵ Di yoñ hihéga hi Anna, sita yada i loñ Arménia. Bôt bé ba lihaa ba mbéna tégbaha ngandak ngéda ntôñ, téntén i ngéda mangand ma ligwéé, ma loñ ni ma base. I ngéda Anna a bi neebe maliga, bôt bé ba lihaa ba bi bôdôl kon woñi le hala ga ôbôs maada map ni nye. Ba bé badba too mambe makidik a ga yoñ hala kiki a nyila Mbôgi Yéhôva. Lelaa Anna a bi hôla bo i nok i jam li? A nkal le “i ngéda me nyuuga bôt bem ba lihaa, me ntoñle bo lelaa me nke ni kii me mboñ, me naña ki bo i meeni, me undga bo mawanda mem. Inyu hala nyen libim li bôt bem ba lihaa li nyi mawanda mem loñge loñge, li yé ki maséé i ba ni bo.” A nkônde le: “Ngandak ikété yap i mbéna kal le ba ntehe toi le me yé maséé, ba ntôñ ha bé inyu yem.”

16. Lelaa Yésu a bi unda manyañ wé Yakôbô le a ntôñ toi nye? (Béñge yak matila isi lipep.)

¹⁶ Unda bo le u ntôñ toi bo. I ngéda Yésu a bi tuge, a bi unda manyañ wé Yakôbô le a ntôñ toi nye i ngéda a bi pémél nye. (1 Korintô 15:7) Noode le hégda i jam Yakôbô a bé le a nôgda i ngéda a bi nok le ngo, Yésu a nwaa bé gwés nye. Ngéda ba bi tégbaha ntôñ i bi lama kwés Yakôbô nkaa le Yésu nyen a yé Mésia. I mbus i jam li, i nene le Yakôbô a bi hôla bôt bé ba lihaa i yi njee Yésu a yé toi?c​—Minson mi baôma 1:14.

17. Lelaa di nla nôgôl litiñ li li yé i kaat Rôma 12:15? (Béñge yak titii.)

¹⁷ Añ Rôma 12:15. I ngéda bôt bés ba lihaa ba ntégbaha mangéda malam tole mangéda mabe ndi ba nôgdaga le di ntôñ toi bo, hala a nla tinde bo i héñha mahoñol ba gwééne bés.d Kiki hihéga, ibale mut wés lihaa a ngwal man, hala a yé nwin nlam. Di nla téédana nye likébla inyu unda nye le di yéne nye maséé. I ngéda mut a nkôs maéya, di hôgbaha nye, di hôla nye, di sébél nye tole di tilna nye. Handugi hala, bana lem i kwel ni bo inyu yi too ba yé mbôô, téntén i ngéda ba ntégbaha mangéda mabe.

18. Lelaa di nla nigle nnigil Yésu le Andréa?

¹⁸ Boñ le ba yi lôk kéé. I ngéda Andréa a bi yi le Yésu nyen a yé Mésia, a bi pala kena manyañ wé Pétrô yak Yésu. (Yôhanes 1:​40-42) Baa yak bés di nla nigle nye? Baa ngim mangéda, di yé le di naña bôt bés ba lihaa i ke i makoda tole di yé le di naña bo i je ntôñ ni lôk kéé yés i likoda? I ngéda di nhôla bôt bés ba lihaa i yi lôk kéé yés, di nhôla bo i tehe le Mbôgi Yéhôva i yé kiki bôt bobasôna, i bak biloñge bi bôt.

19. To ibale bôt bés ba lihaa ba nok bé biniigana gwés bihogi, lelaa di nla unda le di ntôñ bo? (1 Pétrô 3:15)

¹⁹ Añ 1 Pétrô 3:15. Hiki ngéda bé nyen bôt bés ba lihaa ba ga tibil nok inyuki di mboñ bé ngim mam, ndi ibale di ñunda bo loñgeñem, di tinak bo lipém, ba yé mbén i hôya hala. Ngim mangéda, di ga la bé ba ni bo, ndi ba ga diihe biliya di mboñ i somb ngéda inyu ba ni bo mangéda mape. Kiki hihéga, di nla bé ba ha i tégbaha mangand ni bo tole i noñ bilem bi loñ bi bi mbôk matiñ ma Bibel, ndi di nla yuuga bo, di je ntôñ ni bo, di téédana ki bo makébla mangéda mape.

KEKIKEL, U LEHEL BAÑ ÑEM INYU BÔT BOÑ BA LIHAA

20. Inyuki hihéga hi Yakôbô hi nti bés makénd?

²⁰ Yakôbô a bi nimis bisai i ba ni Yésu i ngéda a bé gwel nson wé, ndi, a bi sôk a yila nnigil wé. (Galatia 1:​18, 19; 2:9) Tolakii a bé bé ipôla banigil ba Yésu ba bisu, Yakôbô a bé diihe biniigana bi Yésu. Kiki hihéga, mbuu mpubi u bi tinde nye i tilna bikristen kaat, i het a mpôdôl bibañga Yésu a bi sima i nkwel wé i ngii hikôa.e

21. Inyuki di nla bana botñem le bôt bés ba lihaa ba yé le ba gwélél Yéhôva?

²¹ To di mboñ biliya gwés gwobisôna, to di ñunda le di ntôñ toi bo, i nla pam le bôt bés ba lihaa ba tjél neebe maliga, tole ba tjél héñha litehge jap inyu yés. To hala, inyuki di nlama bé lehel ñem? Inyule hiki ngéda di ñunda bôt bés ba lihaa loñgeñem, di ga unda le di nigle Nyambe wés nu konangoo le Yéhôva ni Man wé Yésu. (Lukas 6:​33, 36) Ibale di nwaa bé unda bo gwéha, kiki ngéda i ntagbe, hala a nla tinde bo i héñha mahoñol ba gwééne bés. Ba yé yak le ba bigda ngandak mam di bi niiga bo. Di ngwés bôt bés ba lihaa, jon ibale di nwaa bé bo, bebek kel yada, di ga ba maséé i tehe bahogi ikété yap ba neebe maliga!