Kee ni bisu i sal inyu sôblana

1. (a) Bimbe bisai di ga kôs ibale di nsôblana ibabé i lep ngéda? (b) Kii di ga tehe munu yigil ini?

BAA u ma ti wemede nkikip yak Yéhôva, u unda ki hala ni njel sôble? Ibale ñ, wee u bi bat Yéhôva le a ti we loñge kiññem. (1 Pétrô 3:21) U yé ndémbél ilam inyu ba ba yé ngi sôblana. U bi yoñ makidik malam kiyaga! A we nu u yé ngi sôblana, kii u nlama boñ? To ibale u yé ngi sôblana, ibabé pééna, yak we u ngwés Yéhôva, u gwé ki ngôñ i lémél nye. U nlama sôblana inyu boñ le Yéhôva a nwéhél we, u ba ki liwanda jé li ñem nyuu. (Minson mi baôma 2:​38-40) Ndi bebek i yoñ makidik ma, i ngi lédlak we. Kii i nla hôla we? Munu yigil ini, di ga tehe mam maa: (1) Inyuki bahogi ba nkon woñi i sôblana? (2) Inyuki di nlama bé hôya le lisuk li yé bebee? (3) Bimbe bisai di ga kôs ibale di nsôblana ibabé i lep ngéda?

INYUKI BÔT BAHOGI BA NKON WOÑI I SÔBLANA?

2. Inyuki bôt bahogi ba nkon woñi i sôblana?

² Bôt bahogi ba yé ngi sôblana inyule ba ngi konok woñi. Kiki ’héga, tolakii ba gwé yaga ngôñ i gwélél Yéhôva, ba nkon woñi le ba ga la bé nôgôl matiñ ma Yéhôva momasôna inyu lémél nye. Ibale hala nyen u nhoñol, wan minlôñ mi Bibel mi mi nkwés we nkaa le Yéhôva a mbem bé le u ba peles, ndi a yé maséé i ngéda u mboñ kii yosôna u nla inyu lémél nye. (Tjémbi 103:​13, 14; Kôlôsé 3:23) Ibale ngolba i nkônha we woñi, soohe Yéhôva le a ti we ñem ngui kiki ntôp tjémbi nu a bi kal le: “Yéhôva a yé ni me; m’a kon bé me woñi. Mut binam a nla boñ me kii?”​—Tjémbi 118:6.

3. Kii ipe i nla kéñ bôt bahogi i sôblana? (Béñge yak titii i )

³ Bôt bape ba ntiñha sôblana inyule ba nhoñol le ba yé ngi yi ngandak mam ikété Bibel. Ndi baa, u nlama yi hiki jam ikété Bibel inyu boñ le u sôblana? To jam. Di wan le ngim ñañ u Bibel. U wada, Yéhôva a bi boñ le hisi hi nyeñg inyu pémés Paul ni Silas i ndap mok. A bi gwélél i pôla i inyu hôla ntat ndap mok ni lihaa jé i yi maliga inyu Yésu. Nye ni lihaa jé ba bi nôgda le Yéhôva nyen a mboñ i manyaga ma inyu pémés Paul ni Silas i mok. Hala a bi ti bo pôla i nigil ngandak mam inyu Yéhôva bo Yésu. I mam ba bi nigil i u u, ma bi tinde bo “i kôs sôble ibabé i lep ngéda.” (Minson mi baôma 16:​25-33) Ibale u ngwés Yéhôva ni ñem woñ wonsôna, ibale u nok biniigana bi bisu bi Bibel, u tam ki bibéba gwoñ, u ban-ga toi ngôñ i nôgôl Yéhôva, wee u yé bebee i sôblana.​—Markô 12:30.

4. Mambe mam mape ma yé le ma kéñ mut i sôblana? (Béñge yak titii.)

⁴ Bôt bape ba gwé yaga ngôñ i lémél Djob ndi i ngéda ba hoñol i ngandak mam ba yé le ba nimis, hala a nla kéñ bo i sôblana. Ñ, hala a yé nseñ ngandak i yén ndugi ni i ôt nsoñgi inyu tehe mambe makidik di nlama yoñ. (Lukas 14:​27-30) Bape, i ngéda ba nhoñol bisesema ba ga boñ inyu lémél Yéhôva, ba nkon woñi i sôblana. I jam li jon li bi pémél Candace, nu a bé yi maliga ibôdôl nye mañge. I ngéda a bi yila muda, ba bi ti nye makénd le a nigil Bibel, a bi kon woñi. A nkal le: “Me bé yi kii me nlama boñ inyu lémél Yéhôva, ndi me bé top bé inyule me bé me ngwés me ntuk niñ me yik yaga le i mam me yé i boñ ma mbébél Yéhôva. Me bé yi le hala a ga ba jam li ntomb i boñ mahéñha.” Bape ki ba nkon woñi i sôblana inyule ba nhoñol le ba ta bé le ba boñ i mam Yéhôva a mbat bo. Ba nhoñol le ba yé le ba boñ béba ikeñi, ba héya bo i ntôñ. Ibale u nkon woñi, kii u yé le u boñ?

5. Ibale u nkon woñi i sôblana, dimbe dihéga di nla hôla we? (Matéô 13:​44-46)

⁵ I ngéda di nsômbôl somb yom, di mbéñge ndik bé moni nwañen di ga pémés inyu somb yo, ndi di mbéñge yak too i yom i, i ga hôla toi bés. Ibale i yom di nsômbôl somb i gwé mahee ngandak iloo ndamba yé, di ga pala somb yo. Nlélém, i ngéda u nsômbôl yoñ makidik inyu kôs sôble, u hoñol bañ mandutu momasôna u yé le u kôhna inyu lémél Yéhôva, ndi hoñol lelaa niñ yoñ i yé le i lama inyule u ga yila liwanda li ñem nyuu li Yéhôva. Yésu a bi ti dihéga diba inyu nôgha bés i jam li. (Añ Matéô 13:​44-46.) Munu dihéga dini, hiki mut a bé bebee i nuñul gwom gwobisôna a bééna inyu somb tik yom a bi léba. Yak we, u bi léba ngim yom i i nlôôha ba mahee i ngéda u bi bôdôl nigil Bibel ni Mbôgi Yéhôva. Ibale u ngi konok woñi i boñ mahéñha inyu sôblana, ôt pék mu dihéga di Yésu. U yé le u badba le: ‘Baa me yé nkwoog nkaa le ñañ nlam u Ane u yé tik yom? Baa me ndiihe toi maada mem ni Yéhôva, botñem a nti me, ni lihaa li lôk kéé li li yé i nkoñ ’isi wonsô?’ Mandimbhe moñ, ma nla hôla we i yi mambe mahéñha u nlama boñ inyu sôblana.

6. Kii i nla hôla we i bii i mam u nigil i bibôñôl?

⁶ Mu hihéga hi mut a nwes mbôô, Yésu a nsima ngim mam i i yé le i kéñ bôt i hol. Ndi, Yésu a nkal yak le bôt bahogi ba ga emble bañga ni maliga lôñni loñgeñem, ba nôgôl ki yo. (Lukas 8:​5-15) Ndi ibale u nkon woñi inyule u ta bé nkwoog nkaa le u ga bii i mam u nigil i bibôñôl, u tomb bañ. Ni mahôla ma Yéhôva u ga bana “ñem u yondo” u u ga hôla we i nôgôl nye. Soohe Yéhôva le a hôla we i gwés mam u nigil ni i bii mo i bibôñôl.​—Ézékiel 18:31; 36:26.

7-8. Kii ipe i nla kéñ boñge i sôblana? (Béñge yak titii.)

⁷ Boñge bahogi ba ba ngwés Yéhôva ba nkon woñi i sôblana inyule bôt bape ba nyoña bo. Balét bahogi nyoo i suklu ba nti boñge maéba mabe ma ma ntinde bo i boñ mam, ma ma nlémél bé Yéhôva. Ndi i maéba ma, ma nla kena bo i tjiba. (Tjémbi 1:​1, 2; Bingéngén 7:​1-5) Di nla keñgle i hiandi hi ibale di noñ ndémbél i ntôp tjémbi nu a bi kal Yéhôva le: “Me nyi jam iloo balét bem bobasôna, inyule me ñôt pék mu mabéhna moñ.”​—Tjémbi 119:99.

⁸ I nla pam le bagwal bahogi ba ba yé Mbôgi Yéhôva ba kéñ bon bap i sôblana. I bagwal ba, ba yé ba lôôha tôñ inyu suklu i boñge ni bôlô ba ga sal i mbus ngéda, tole ba nti bé bon bap makénd i téé ngim mam ba yé le ba yônôs i pes mbuu. Hala a mboñ bo le ba ke haa ni Yéhôva. Ndi ibale we u nôgda le bagwal boñ ba nit bé we, kii u nla boñ? U kon bañ woñi i kwel ni bo. Yi le to umbe nwii u gwé, to ibale u yé mañge wanda, u nla ba liwanda li ñem nyuu li Yéhôva.​—Bingéngén 20:11.

9. Inyuki bôt bape ba ntiñha sôblana?

⁹ Bôt bape ba yé yaga bebee i sôblana ndi ba ntiñha boñ hala inyule ba mbem ngim mut. Kiki hihéga, ba gwé ngôñ i sôblana i nlélém kel ni liwanda jap tole ni mut wap lihaa. Ñ, i nla pam le u sôblana ni mut u ngwés i nlélém kel, ndi baa ndik inyu njom i nyen u ntiñha sôblana? U hôya bañ le i ngéda u bé ti wemede nkikip yak Yéhôva, u bé ndik wetama. Jon u tiñha bañ sôblana inyule u mbem mut numpe.​—Rôma 14:12.

BIGDA LE LISUK LI YÉ BEBEE

10. Inyuki bôt bape ba ntiñha hol i pes mbuu?

¹⁰ Bôt bape ba ntiñha sôblana inyule ba nhoñol le ngéda i ngi yii ngandak. Ndi baa i mahoñol ma, ma téé? Yésu a bi béhe banigil bé, a kal le: “Yéna péé ibabé waa, inyule Man mut a nlo i ngeñ ni nhégda bé le a nlôl.”​—Lukas 12:40.

11. Inoñnaga ni Tjémbi 119:60 i ngéda di nigil i yi Yéhôva, hala a ntinde bés i boñ kii, inyuki?

¹¹ Gwéha yon i nlama tinde bés i ti bésbomede nkikip yak Yéhôva. Kiki di nke ni bisu i nigil yi Yéhôva, hala nyen di nkônde tehe lelaa a ngwés bés, ni lelaa matiñ mé ma yé inyu loñge yés. (Añ Tjémbi 119:60.) Yakôbô a nti njom ipe i i nhôla bés i pala nôgôl mambén ma Yéhôva. To wada wés a nyi bé lelaa yani a ga ba. I nla pam le yani, di bana ha bé to pôla i “boñ jam li téé sép,” jon nano nyen di nlama boñ i mam Yéhôva a mbat le di boñ.​—Yakôbô 4:​13-17.

12. Kii di nla nigil mu ndémbél i nwet wom u minkôô mi wai?

¹² Di hoñol hihéga Yésu a bi yoñ inyu nwet ndap nu a gwé wom u minkôô mi wai. Baa a bi kal bé le i bet ba nsal ndik ngeñ yada ni ba ba nsal kel yosô ba ga kôs nlélém nsaa? Maliga ma. Ndi inyuki ni ba ba bi sal ndik ngeñ yada ba bi hoo bé bôdôl bôlô. Ba bi timbhe le: “Inyule mut nye ki nye a nyoñ bé bés i bôlô.” I bôt ba, ba bé yengep bé, yak bo ba bé le ba sal kel yosô, ndi mut nye ki nye a bi yoñ bé bo i bôlô. Ndik kii ba bi kôs bôlô, ba bi lep bé ngéda, ba bôdôl. (Matéô 20:​1-16) I len ini, Yésu a naña bés i ba banigil bé ni i añal ñañ nlam. Jon di lep bañ ngéda, di jôp i bôlô.

13. Kii di nigil mu ñañ u nwaa Lôt?

¹³ Nu ni nu a ntiñha hol i pes mbuu, a nla sôk léba le hala a nlet ngandak i boñ mahéñha i manut ma nsôk inyu lémél Yéhôva. Yésu a bi yi hala, jon a bi kal banigil bé le: “Bigdana nwaa Lôt.” (Lukas 17:​31-35) Nwaa Lôt a bé yi le ndék ngéda, Yéhôva a ga tjé Sôdôm ni Gômôra, ndi a bé bé bebee i tjôô nkus wé. (Bibôdle 19:​23-26) Ñañ u nwaa Lôt u niiga bés le nwemel u tohi u ga yégle bé u néhi i boga ni boga. I ngéda ngeñ yé i ga kola, Yéhôva a ga kwés likôga, njel i ga ba ha bé i jôp.​—Lukas 13:​24, 25.

14. Inyuki di nlama yoñ ngéda i ôt pék mu biyônôl bi mbañ?

¹⁴ I mam ma ntagbe munu nkoñ ’isi unu ma ñunda le mbañ i Bibel i yé i yon. To ibale i mam ma ma nlôôha bé tihba pes yés mbok, i ngéda di ntehe lelaa i mam ma ma mbôña i bahoma bape, ma tinde bés i ôt pék ni i sôblana ibabé i lep ngéda. Di béñge le i jam ñôma Pétrô a bi kal bikristen bi hiai bisu. Ñôma Pétrô a bi kal bo le ba “yén péé” tole ba “yibil mis,” inyule “lisuk li mam momasôna li nkôôge bebee.” (1 Pétrô 4:7; buk isi lipep.) Munu nlôñ kaat unu, i nene le “lisuk li mam momasôna” li bé i ngéda tison i Yérusalem ni témpel yé bi bi tjiba. I bet Pétrô a bé tilna, ba bé haa ngandak ni Yérusalem kayéle ba bé ha bé ha i ngéda Yérusalem a bé tjiba. (1 Pétrô 1:1) Jon i ngéda ba bi tehe lelaa i mbañ i, i bi yon, hala a bi kônde lédés hémle yap, ba kônde ki ba nkoog nkaa le Yéhôva a ga yônôs yak mini mimbônga mimpe. I ngéda yak we u ntehe lelaa i mam Yéhôva a bi pot ma nyon, hala a ntinde we i boñ kii yosô i mbéda inyu boñ le u sôblana.

15. Kii di nla boñ inyu unda le di yé nkôôbaga inyu hilo hi Yéhôva? (2 Pétrô 3:​10-13)

¹⁵ I kaat yé i nyônôs iba, Pétrô a bi toñol lelaa di nlama tehe hilo hi Yéhôva. Inyu bikristen bi hiai bisu, hilo hi Yéhôva hi bé hi ngii yii haa. To hala, Pétrô a bi kal bo le ba “tééda hio ikété mahoñol,” hala wee ba “ban-ga ngôñ ikeñi” inyu hilo hi. (Añ 2 Pétrô 3:​10-13; buk isi lipep.) Di ñunda le di ntééda hilo hi i mahoñol i ngéda di yé péé, di ban-ga ngôñ ikeñi le hi loo. Di ñunda i ngôñ ikeñi i, i ngéda di gwé “bihiumul bipubhaga ni maboñok ma ndéñbe i gwés Nyambe.” Hégda lelaa u yé le u lémél Yéhôva i ngéda a ntehe we u gwé “maboñok ma ndéñbe”! A ga ba maséé i tehe we u nti wemede nkikip i nyeeni, u sôblana ki.

YOÑ MAKIDIK I SÔBLANA IBABÉ I LEP NGÉDA

16. Imbe ngéda i yé loñge inyu sôblana? (2 Korintô 6:​1, 2) (Béñge yak bititii.)

¹⁶ Ngéda ini nano le u sôblana. (Añ 2 Korintô 6:​1, 2.) I nwak u Étiôpia Filipô a bi boma u bi nok le u nlama sôblana ibabé i lep ngéda. Ndik kiki a bi emble ñañ nlam, a tehe ki pôla i sôblana, a bi kal bé le: ‘Me nlama ndugi nigil ngandak mam ipe, yak lép umpe u yé nyoo bisu, to nyoo me nla sôblana.’ Ndi a bi kal Filipô le: “Kii i nkéñ me njel i kôs sôble?” (Minson mi baôma 8:​26, 27, 35-39) Kinje ndémbél ilam! I ngéda nwak u Étiôpia u bi sôblana, ‘u bi ke, u konok maséé.’

17. U nlama ba nkwoog nkaa ni kii?

¹⁷ Ibale u nkon woñi i sôblana, ba nkwoog nkaa le Yéhôva a gwé ngôñ i hôla we i bana maada malam ni nye. (Rôma 2:4) A nla hôla we i yémbél woñi woñ, nduña yoñ, yak i bôt ba nkéñ we i sôblana. I ngéda u ga sôblana, u ga bana loñge kiññem i bisu bi Yéhôva. U ga tehe ki le i “mam ma yé we i mbus” ma ga bane ha bé we nseñ. (Filipi 3:​8, 13). U ga bem i “mam ma yé we i bisu,” hala wee mimbônga Yéhôva a nti ba ba nti bomede nkikip i nyeeni, ba sôblana ki.​—Minson mi baôma 3:19.