I yé bés loñge le di tiige lôk kéé bebee!

1-2. Kii i nlémél Yéhôva ngandak, kii a nsômbôl le di boñ?

I NGÉDA di ñunda bôt bape gwéha, hala a nlémél Yéhôva kiyaga. Yésu a bi kal le di nlama gwés bôt bés ba libôk kiki bésbomede. (Matéô 22:​37-39) Hala a nkobla le yak i bôt ba ngwélél bé Yéhôva, di nlama éba bo loñgeñem. I ngéda di mboñ hala, di nigle Yéhôva Nyambe “nu a mpémhene bibéba bi bôt ni biloñge bi bôt hiañgaa, a nôhnege bôt ba téé sép ni ba ba téé bé sép nop.”​—Matéô 5:45.

² Yéhôva a ngwés bôt ba binam bobasôna, ndi a nlôôha gwés bôt ba ba mboñ loñge. (Yôhanes 14:21) A nsômbôl le di nigle nye. A nti bés makénd i bana “bañga bañga gwéha” inyu lôk kéé i bôlôm ni i bôda, di unda ki bo “ñem gwéha.” (1 Pétrô 4:8; Rôma 12:10) I gwéha i, i yé kiki di ngwés mut wés lihaa tole bañga yés liwanda.

3. Kii di nlama bigda inyu gwéha?

³ Gwéha i yé kiki mbônji. Inyu boñ le i nañ, di nlama kôp yo malép. Ñôma Paul a bi kal bikristen le: “Kena ni bisu i unda gwéha lisañ li bôt.” (Lôk Héber 13:1) Yéhôva a ngwés le di kônde gwés bôt bape. I yigil ini i ga éba bés inyuki di nlama tiige lôk kéé bebee, ni lelaa di nlama ke ni bisu i boñ hala.

INYUKI DI NLAMA TIIGE LÔK KÉÉ BEBEE?

4. Inoñnaga ni kaat Tjémbi 133:​1, kii i nla hôla bés i kônde gwés lôk kéé? (Béñge yak bititii.)

⁴ Añ Tjémbi 133:1. Bésbomede di ma yimbe le i tiige bebee ni lôk kéé yés i yé loñge, i yé ki “jam lilam ni li maséé.” Ndi di yé le di hôya le lôk kéé yés i yé nseñ nlélém kiki mut a nla hôya nseñ u e, i i béli ipañ ndap yé. Di mbéna tehe lôk kéé yés, bebek di yé di tehe bo ngandak ngélé ikété ngim sonde. Kii i nla hôla bés i ke ni bisu i gwés bo? Ibale di nyoñ ngéda i hoñol lelaa hiki mankéé a yé nseñ inyu likoda ni inyu yés, di ga kônde gwés lôk kéé yosôna.

5. I ngéda bôt ba ntehe gwéha ipôla yés, hala a nla tinde bo i boñ kii?

⁵ I ngéda mut a nlo i likoda ngélé bisu, ndi a tehe lelaa lôk kéé i ngwéhna, hala a yé a hélés nye. Hala a nla tinde nye i kal le, “ngo bañga base ini!” Yésu a bi kal le: “Hala nyen bôt bobasôna b’a yi le ni yé banigil bem, ibale ni ngwéhna bé ni bé.” (Yôhanes 13:35) Di béñge ndémbél i Chaithra, a yé i université, a niglak ni Mbôgi Yéhôva. Ba bi naña nye i likoda li ndôn, a ke. I ngéda a bi huu i hilo hi bisu, a kal i mut a bé niiga nye Bibel le: “Bagwal bem ba maa bé sambla me, ndi nyoo likoda i het me bak, ba nsambla me 52 ngélé inyu hilo hiada ndigi! Yéhôva a ngwélél i bôt bana inyu unda me gwéha. Yak me, me nsômbôl jôp mu lihaa li.” Chaithra a bi hol, a sôblana i nwii 2024. Di nyimbe le i ngéda bôt ba ntehe maboñok més, ba tehge gwéha i i yé ipôla yés, hala a ntinde bo i gwélél Yéhôva.​—Matéô 5:16.

6. Lelaa lôk kéé i nla tat bés?

⁶ I ngéda di ntiige bebee ni lôk kéé yés i bôlôm ni bôda, ba ntat bés. Paul a bi kal lôk kéé le: “Kena ni bisu i tina makénd bé ni bé hiki kel . . . tiga le ngui malôga i béba i lédés ñem u wada ikété nan.” (Lôk Héber 3:13) Ibale di nkahal tomb, di bôdôl baage, Yéhôva a nla gwélél mankéé inyu hôla bés. (Tjémbi 73:​2, 17, 23) Di gwé toi ngôñ ni i nya mahôla i.

7. Mambe maada ma yé ipôla gwéha ni adna? (Kôlôsé 3:​13, 14)

⁷ Di njo sañ inyu boñ le gwéha i ba ipôla yés, inyu hala nyen Yéhôva a nkôp bés bisai. (1 Yôhanes 4:11) Kiki hihéga, gwéha i ntinde bés i ‘ke ni bisu i hônbana bés i bés,’ hala a mboñ le adna i ba ikété ntôñ. (Añ Kôlôsé 3:​13, 14; Éfésô 4:​2-6) Jon i maséé ma yé i makoda més ma ta bé i base ipe yo ki yo hana ’isi.

DI TINA LIPÉM BÉS NI BÉS

8. Lelaa Yéhôva a nhôla bés i niñ ikété adna?

⁸ I adna di ntehe ikété ntôñ u Yéhôva i yé hélha jam. Yéhôva a nhôla bés i niñ ikété adna, ki le di yé bikwéha bi bôt. (1 Korintô 12:25) Bibel i nkal le “Nyambe a mal niiga bébomede le ni gwéhna bé ni bé.” (1 Tésalônika 4:9) Hala a nkobla le ikété Bitilna, Yéhôva a ntoñle bés kii di nlama boñ inyu tiige bebee ni lôk kéé yés. Inyu boñ le Nyambe ‘a niiga bés,’ di nlama wan mambén mé, di nôglak mo. (Lôk Héber 4:12; Yakôbô 1:25) I jam li jon bés Mbôgi Yéhôva di nliya i boñ.

9. Lelaa kaat Rôma 12:​9-13 i nhôla bés i ti bôt bape lipém?

⁹ Lelaa Bañga i Nyambe i nhôla bés i tiige bebee ni lôk kéé? Di béñge lelaa Paul a bi timbhe i mbadga i, i kaat Rôma 12:​9-13. (Añ.) Ni yimbe le a bi kal le: “Ni ba bôt ba bisu i tina lipém bé ni bé.” Hala a nkobla le kii? Hala a nkobla le di nlama ba bôt ba bisu i unda bôt bape “gwéha,” di nwéhlak bo, di leegege bakén, di kabak, di boñok ki mam mape. (Éfésô 4:32) Di bem bañ le lôk kéé yon i tiige bés bebee, di nlama ba “bôt ba bisu” i tiige bo bebee. Ha nyen di ga tibil nok bibañga bi Yésu i ngéda a bi kal le: “Ti i nlona maséé iloo kôhna.”​—Minson mi baôma 20:35.

10. Lelaa di nla éba le di yé bôt ba bôlô? (Béñge yak titii.)

¹⁰ I ngéda Paul a bi kal le di ba bôt ba bisu i tina lipém bés ni bés, a bi kônde le: “Ni ba bôt ba bôlô, ni yeñgep bañ.” Hala a nkobla le di nlama bana makénd i ngéda di nsal. I ngéda ba nti bés bôlô, di nsal yo loñge. Kaat Bingéngén 3:​27, 28 i nti bés makénd i ngéda i nkal le: “I bôt ba gwé ngôñ ni mahôla, u tjél bañ bôñôl bo loñge, ibale u nla hôla bo.” Inyu hala nyen i ngéda di ntehe mut a gwé ngôñ ni mahôla, di mboñ kii yosôna di nla inyu hôla nye, di nkal bé le d’a hôla nye kel ipe tole mut numpe a ga hôla nye.​—1 Yôhanes 3:​17, 18

11. Kii i nla hôla bés i tiige bebee ni lôk kéé?

¹¹ Jam lipe di nla boñ inyu unda le di nti bôt bape lipém li yé di ba bebee i nwéhél bo i ngéda ba mboñ bés béba. Éfésô 4:26 a nkal le: “Ni nwas bañ le hiañgaa hi nañal, hiun hi bak bé i ñem.” Inyuki? Nlôñ 27 u nkal le hala a nla ‘ti Nsohop pôla.’ Yéhôva a mpot, a tiimbaga ikété Lipôdôl jé le di nlama nwéhél lôk kéé yés. Kaat Kôlôsé 3:13 i nkal le: “Kena ni bisu . . . , ni nwéhlaga ki bé ni bé ni ñem wonsôna.” I ngéda di nwéhél lôk kéé yés, hala a mboñ le di kônde tiige bo bebee, hala a mboñ ki le di “tééda adna i mbuu mpubi ikété maada ma nsañ.” (Éfésô 4:3) Hala a nkobla le i ngéda di nwéhél lôk kéé yés, di niñ ikété adna ni nsañ.

12. Lelaa Yéhôva a nhôla bés i nwéhél?

¹² I nwéhél bôt bape i nla bane bés jam li nlet. Ndi mbuu u Yéhôva u nla hôla bés i nwéhél. Paul a bi bôk a kal le ‘di bana ñem gwéha bés ni bés,’ a kal ki le ‘di ba bôt ba bôlô,’ ndi a kônde le: “Mbuu mpubi u boñ le ni bana ngandak makénd.” (Béñge note d’étude i Rôma 12:11 i Bibel i Pulasi.) Mbuu mpubi u nla hôla bés i unda gwéha ni i nwéhél lôk kéé yés. Inyu hala nyen di nlama soohe Yéhôva le a ti bés mbuu wé mpubi.​—Lukas 11:13.

“MBAGLA I BA BAÑ IPÔLA NAN”

13. Kii i nla lona mbagla ikété likoda?

¹³ “Mintén mi bôt nwominsôna” mi yé i ntôñ u Yéhôva. (1 Timôtéô 2:​3, 4) Ibale di nyoñ bé yihe, di nla kahal pééna inyu mam kiki bo haba ni nyañga, matibla ni mintuk. (Rôma 14:4; 1 Korintô 1:10) Nyambe a bi niiga bés le di gwéhna bés ni bés, jon di hoñol bañ le mahoñol més ma yé malam iloo mahoñol ma bilôk bikéé gwés.​—Filipi 2:3.

14. Kii di nlama boñ hiki ngéda, inyuki?

¹⁴ Inyu boñ le mbagla i ba bañ ikété likoda, di nlama ti lôk kéé makénd, di lédhak bo ngéda yosôna. (1 Tésalônika 5:11) I masañ mana, ngandak lôk kéé i i bi sune tole i ba bi héya i likoda, i ntémb i ntôñ. Di nlama leege bo ni liyômba! (2 Korintô 2:8) Mankéé nu muda wada, nu a bi sune yom kiki bo jôm li nwii, i mbus a lo i ndap Ane, a nkal le: “Lôk kéé i bi yéga me, i nwemlaga.” (Minson mi baôma 3:19) I ngéda lôk kéé i bi leege nye hala, kii a bi nôgda? A nkal le: “Yéhôva a bi boñ le me témb me kahal kon maséé.” I ngéda di nti lôk kéé makénd, Yésu a nla gwélél bés inyu hôgbaha i bet ba ‘ntumbba ni nson, ni i bet ba bééga mbegee i ñét.’​—Matéô 11:​28, 29.

15. Kii ipe di nla boñ inyu boñ le adna i ba ikété likoda? (Béñge yak titii.)

¹⁵ Jam lipe di nlama boñ le ndi adna i kônde ba ikété likoda li yé di nlama bana bipôdôl bilam. Hiôb 12:11 a nkal le: “Baa ôô u ñemble bé bibañga, kiki hilémb hi noode bijek?” I ngéda di nlamb bijek, di yé di bôk di noode gwo ilole di nti gwo bôt bape. Nlélém, ilole di mpot jam, i yé loñge le di yoñ ndugi ngéda i ôt pék. (Tjémbi 141:3) Ilole di mpot, di badba le: ‘Baa bibañga gwem bi ntina makénd? Baa bi yé nseñ inyu bet ba ñemble gwo?’​—Éfésô 4:29.

16. Bonjee ba nlama toi bana bibuk bi bi nlédhana?

¹⁶ Balôm ni bagwal ba nlama toi bana bibuk bi bi nlédhana. (Kôlôsé 3:​19, 21; Titô 2:4) Yak mimañ mi nlama hôgbaha bilôk bikéé, mi lédhak bo. (Yésaya 32:​1, 2; Galatia 6:1) Bibel i nkal le: “Lipôdôl i ngéda i kôli, li yé lilam kiyaga!”​—Bingéngén 15:23.

DI GWÉS LÔK KÉÉ “NI MABOÑOK LÔÑNI MALIGA”

17. Lelaa di nla unda le di ngwés lôk kéé yés i bôlôm ni i bôda ni ñem wés wonsôna?

¹⁷ Ñôma Yôhanes a nkal bés le: “Di nlama ndik bé gwéhna ni nyo to ni bibuk, ndi yak ni maboñok lôñni maliga.” (1 Yôhanes 3:18) Di nlama gwés lôk kéé yés i bôlôm ni i bôda ni ñem wés wonsôna. Kii i nla hôla bés? I ngéda di mbéna tégbaha ngéda ni bilôk bi kéé, di nkônde tiige bo bebee, yak gwéha yés inyu yap i nkônde keñep. Jon di yéñ manjel i ba ni lôk kéé i makoda, ni i likalô. Di yoñ ngéda i yuuga bo. Ibale di mboñ hala, di ñunda toi le “Nyambe a bi niiga bés i gwéhna bés ni bés.” (1 Tésalônika 4:9) Ha nyen di ga tibil nok bibañga bi ntôp tjémbi nu a bi kal le: “Kinje jam lilam ni li maséé le lôk kéé i nyén ntôñ ikété adna!”​—Tjémbi 133:1.