A mimañ mi bôt, ni yé nseñ ngandak ikété likoda

Bebek yak we, hala a ma pémél we, u nla ha bé boñ i mam u bé boñ i ngéda u bé mañge wanda. To ibale hala a yé ngandak nwii le u ntéñbe ni Yéhôva, i ngéda u mbéñge i mam u bé boñ behee ni ma u mboñ nano, hala a nla tômbôs we. Ibale hala nyen u nhoñol, kii i nla ni hôla we i ba maséé?

KII YÉHÔVA A NSÔMBÔL LE U BOÑ?

Badba le: ‘Kii Yéhôva a nsômbôl le me boñ?’ Kaat Ndiimba Mbén 6:5 i nla hôgbaha we, i nkal le: “Ni nlama gwés Yéhôva Nyambe nan ni ñem nan wonsôna, ni niñ nan yosôna, ni ngui nan yosôna.”

I nlôñ kaat u, u ñunda le u nlama sélél Yéhôva ni ñem woñ wonsôna, ni niñ yoñ yosôna, ni ngui yoñ yosôna. Hala a nla hôla we le u hégha bañ nson woñ ni u bôt bape, tole u hégha bañ nson u ngwel nano ni u u bé gwel i ngéda u bé mañge wanda.

Di yoñ le hihéga: I ngéda u bé mañge wanda, u bé sal lelaa? U bé sal ni ngui ngandak. U bé la boñ ngim mam ha ngéda i. Nano, bebek u ngi boñok kii yosôna u nla tolakii u ñun. Ibale hala nyen u ntehe mam, u ga nok le u ngi gwéélak Yéhôva ni ñem woñ wonsôna kiki u bé boñ behee. I ngéda u bé mañge wanda, u bé boñ kii yosôna u bé la, yak i len ini, u mboñ kii yosôna u nla.

U NLA HÔLA BÔT BAPE

Jam lipe u nla boñ li yé le u hoñol ndik bañ i mam u nla ha bé boñ, hoñol ngandak manjel u nla gwélél inyu hôla bôt bape. Kiki u yé ñunuk, u nla boñ ngim mam nano u bé bé le u boñ i ngéda u bé mañge wanda. Kiki hihéga, u nla boñ i mam mana:

Kal bôt bape i mam ma bi pémél we mu niñ yoñ. Wan le dihéga di Bibel dini:

Kiñe David: “Me bé mañge, nano me ñun, ndi me maa bé tehe Nyambe a ntjôô mut a téé sép, to tehe bon bé ba nyagal bijek.”​—Tjémbi 37:25.

Yôsua: “Nano ni, emblana me! Me yé bebee ni wo. Bébomede ni nyi yaga ni ñem nan wonsôna, yak ni niñ nan yosôna le jam to jada li bi set bé ikété mam malam momasôna Yéhôva Nyambe nan a bi bôn bé. I mimbônga mi nwominsôna mi bi yônôl bé. Bañga to yada i bi set bé.”​—Yôsua 23:14.

Bebek hala nyen yak wemede u ma boñ. David bo Yôsua ba bé pot i mam ma bi pémél bo mu niñ yap. Ba bi tehe, ba nok ki ngandak mam mu niñ yap kayéle i ngéda ba bé ti bôt maéba, ma bé yét ngandak.

Ibale hala a yé ngandak nwii le u ngwélél Yéhôva, u nla kal bôt i mam u bi tehe Yéhôva a mboñ mu niñ yoñ. Baa u ngi hoñlak jam li tôbôtôbô Yéhôva a bi bôñôl bagwélél bé? Ibale ñ, kal jo bôt bape. Hala a nla hôla lôk kéé ngandak, a ti ki bo makénd i ke ni bisu i gwélél Yéhôva.​—Rôma 1:​11, 12.

Njel ipe u nla gwélél inyu hôla bôt bape i yé le u kee i makoda i ndap Ane kiki nyuu i nti we. I ngéda u mboñ hala, u nti lôk kéé yoñ makénd, yak wemede u nkôhna makénd. Connie, nu di mbôk pôdôl, a nkal le: “I ngéda me nke i makoda, hala a mboñ le me tomb bañ. Lelaa me yé le me tomb i ngéda lôk kéé i ñunda le i ngwés me? Yak me, me yé me nti bo bon ba makébla inyu unda bo le me ngwés bo. Hiki ngéda, me mboñ biliya le me yoñ ngaba i mam ma mbuu ni lôk kéé yem i bôlôm ni i bôda.”

YÉHÔVA A NDIIHE NSON WOÑ

Bibel i gwé ngandak dihéga di bagwélél Yéhôva a bé gwés ngandak tolakii ba bé la ha bé boñ mam ba bé boñ behee. Di yoñ le hihéga hi Siméôn, nu a bé ñunuk man Lôk Israel wada, a bé niñ i ngéda Yésu a bi gwéé. I ngéda Siméôn a bé a lo i témpel, bebek le a bé a tehe boñge ba wanda ba nsal nyoo. Ndi kii ni di nla kal inyu Siméôn nyemede? I bitéé bi mis, a bé le a hoñol le kiki a ñun, a ta ha bé nseñ i mis ma Yéhôva. Ndi hala bé nyen Yéhôva nye a bé tehe mam. Yéhôva a bé tehe le Siméôn a bé ‘a téé sép, a konok Nyambe woñi,’ a ti yak nye nsima nkeñi i tehe nkéñéé man le Yésu. Siméôn a bi kôhna ki nsima i pot mbañ inyu Mésia, nu a yé Yésu! (Lukas 2:​25-35) I ngéda Yéhôva a bé béñge Siméôn, a bé tehe ndik bé mañ mut, ndi a bé tehe le a bééna “hémle i ngui, yak mbuu mpubi u bé i ngii yé.”

Ba nkwoog nkaa le Yéhôva a ndiihe nson woñ to ibale u nla ha bé sal kiki behee. ‘Likébla joñ li ga lémél toi nye ibale u nti inoñnaga ni i mam u gwé, handugi ni i mam u gwé bé.’​—2 Korintô 8:12.

Jon, béñge mam u nla boñ. Kiki hihéga, béñge manjel u nla gwélél inyu téé likalô, to ibale u nla ha bé téé likalô ngandak. U nla ki sébél lôk kéé i bôlôm ni i bôda inyu ti bo makénd tole u nla tilna bo. U nla tehe le disii di mam di, ndi di nla ti lôk kéé makénd téntén i ngéda wen u mboñ tjo inyule hala a yé ngandak nwii le u ngwélél Yéhôva.

Mimañ mi bôt mi nla ha bé boñ ngim mam i nson u Yéhôva. Ndi di béñge hihéga hi muda wada i Afrika munu minkéñék mi matila mini le “A bi sôñ niñ yé.”

Bigda le kiki u ngwélél Yéhôva nwii di nwii, u kenek ni bisu i gwélél nye, hala a nla ti lôk kéé makénd ngandak. Kiki u gwé i lem lam ini le wongut, u yé loñge ndémbél inyu yap; u nla ki ba nkwoog nkaa le ‘Nyambe a ta bé mut a téé bé sép le a hôya nson woñ ni gwéha u bi unda inyu jôl jé, hala kiki u bi gwélél bapubhaga nson, u nke ki ni bisu i gwélél bo nson.’​—Lôk Héber 6:10.

KEE NI BISU I HÔLA BÔT KIKI LA YOÑ

Bayimam ba nkal le mimañ mi bôt mi mi nhôla bôt bape mi yé mbôô, mi nyi jam, mi nom ki ngandak.

I yé maliga le i bôñôl bôt bape loñge i nla bé héya biuni gwoñ, ndik Ane Nyambe yotama yon i ga héya biuni ni nyemb béba i bi lona.​—Rôma 5:12.

I nson ni ngwel inyu hôla bôt i yi Yéhôva nano u nhôla bé i bana botñem i ngui, u mboñ ki le ni ba mbôô. A mimañ mi bôt, soho yina le Yéhôva a ndiihe i mam ni mboñ, yak likoda li ngwés bé ngandak inyule ni gwé hémle i ngui.