Baa u ngi hoñlak?

Baa ni nyoñ ngéda i añ ba Nkum Ntat ba mpam munu nwii unu? Wee ni béñge ibale ni nla timbhe mambadga mana:

Inyuki di mbégés Yéhôva?

Di mbégés Yéhôva inyule di nlôôha ti nye lipém, di ngwés ki nye ngandak. Di mbégés yak nye inyule di nsômbôl le bôt bape ba yi nye.​—w25.01, lipep 3.

Inyuki di nlama nwéhél mut a mbabaa bés?

Di nla unup ndi di nwas bañ le hiun hi yémbél bés. I ngéda di nwaa unbene i mut a mboñ bés béba, di mboñ bésbomede loñge. Hala a mbuubaha bés, a nhôla ki bés i ke ni bisu.​—w25.02, mapep 15-16.

Inyuki Markô a yéne boñge bôlôm ndémbél ilam?

Markô a bé bebee i gwel minson ba bé ti nye. Tolakii ngim minyañ i bi tééñga nye, Markô a bi somol bé. A bi témb a nôgla bo Paul ni bikristen bipe.​—w25.04, lipep 27.

Kii Yésu a bé sômbôl kal i ngéda a bi soohe le: “Me bi boñ le ba yi jôl joñ, m’a kônde ki boñ le li yiba”? (Yôhanes 17:26)

Banigil bé ba bé yi jôl li Djob. Ndi Yésu a bi toñle bo kii i jôl li, li nkobla. A bi boñ le banigil bé ba kônde yi Yéhôva, hala wee sômbôl yé, minson nwé, bilem gwé.​—w25.05, mapep 20-21.

Ibale di neebe le di nyi bé mam momasôna, hala a ntinde bés i nok le kii?

Di ga tibil nok le di nyi bé mam momasôna. Kiki hihéga, di nyi bé kekii lisuk li nkoñ ’isi li ga lo, di nyi bé to mam momasôna Yéhôva a ga boñ inyu yés ha ngéda i. Di nyi bé lelaa kel i ga ye, di nla bé to hégda lelaa Yéhôva a nyi bés.​—w25.06, mapep 15-18.

Lelaa di yé le di ôt nseñ ni mimbamble tole ni minkwel mi mbamba?

Di nla badba le: ‘Kii me nigil hana i i nla hôla mut i tibil nok Bibel? Himbe hihéga hilam me yé le me gwélél inyu nôgha mut biniigana bi? Njee a nla ba maséé ni i biniigana bini?’​—w25.07, lipep 19.

Yéhôva a bi nwéhél David, kii hala a niiga bés?

David a bi boñ bibéba bikeñi, ndi Yéhôva a bi nwéhél nye inyule a bi tam toi bibéba gwé. (1 Bikiñe 9:​4, 5) I ngéda Yéhôva a nwéhél bés, a mbéñge ha bé béba di bi boñ, ndi a mbéñge lelaa a nla sayap bés.​—w25.08, lipep 17.

Ibale ngim jam i nlédél nnigil Bibel, kii u nla boñ?

Ibale u nyimbe le ngim jam i nlédél nye, u nla tagbe, ni tiimba ki pôdôl mu lisañ lipe.​—w25.09, lipep 24.

Bibel i nkal le béba i gwé “ngui malôga.” (Lôk Héber 3:13) Lelaa?

I béba i yé bés i nyuu i nla tinde bés i ndogbene Yéhôva, i nla ki boñ le di kahal pééna le Yéhôva a ngwés bés.​—w25.10, lipep 16.

Mambe mam maa di nla boñ inyu boñ le di kônde lémés masoohe més?

(1) Di hoñol bilem bi Yéhôva. (2) Di ôt pék inyu yi kii d’a kal mu masoohe més. Kii ’héga, di nla badba le: ‘Baa ngim mut i yé le me nlama nwéhél? (3) Di yible Yéhôva ñem wés. Hala a mboñ le di kal toi Yéhôva i yom i yé bés ikétékété mahoñol.​—w25.10, mapep 19-20.

Lelaa di nla hôla mimañ mi bôt?

Di nla yuuga mimañ mi bôt tole di sébél bo. Di nla yéga bo i dokta, di téé likalô ni bo ni kak bikaat, tole ni téléfôn. Di nla yak tégbaha yigil Bibel i ndap yap.​—w25.11, mapep 6-7.

Kii i nla boñ le libii li tagbe loñge?

Nôglana mambén ma ngomin. Boña biliya le maboñok mabe ma nkoñ ’isi unu ma nene bañ mu libii linan, ndik litam li mbuu. Ni haba mambot ma ma kôli, ni boñ bañ mam Bibel i nsôña. Ni kwelek loñge, ni tin-ga lipém i ngéda ni nkôôba libii.​—w25.12, mapep 21-24.