‘ Di tééda adna i mbuu mpubi’

ÑÔMA Paul a bi kal lôk kéé i Éfésô le: “Ni nihbanaga bé ni bé ikété gwéha, ni boñok biliya bi ngui i tééda adna i mbuu mpubi ikété maada ma nsañ.”—Éfésô 4:2, 3.

“Adna” i i yé i ntôñ u Yéhôva i nlôl ni “mbuu mpubi.” Hala a nkobla le mbuu mpubi u Nyambe won u mboñ le i adna i, i ba. Ndi Paul a nkal le i mbéda le di tééda i adna i. Lelaa? Hiki wada wés a nlama jôp i bôlô inyu “tééda adna i mbuu mpubi.”

Di yoñ le hihéga: Ibale mut a nti we litôa, njee a nlama yoñ ngéda ni jo? U nyi ndimbhe. Ibale u mbep gwélél litôa li ndi li ôbi, w’a ôm bé i mut a nti we jo nsohi le nyen a ñôbôs jo.

Yak bés, adna yés i yé likébla li Yéhôva, ndi hiki wada wés a nlama sal inyu tééda yo. Ibale di nôgla bé ni mankéé nu muda, to nu munlôm, di badba le: ‘Baa me mboñ kii yosôna me nla inyu sañgal i ndañ u, inyu boñ le adna i ba?’

‘BOÑ BILIYA BI NGUI’ LE ADNA I BA

Kiki Paul a bi kal, ngim mangéda, i mbat yaga le di boñ biliya bi ngui inyu boñ le nsañ u ba, téntén i ngéda mankéé wada a ñunbaha bés. Baa hiki ngéda nyen di nlama ke i kal mankéé i jam a mboñ, ni njôghe di nok inyu jam li? Heni. Badba le, ‘Baa ibale me mpot i jam lini, hala a ga lona adna tole mindañ?’ Ngim mangéda, i mbéda ndik le di yan i jam ba mboñ bés tole di nwéhél.—Bingéngén 19:11; Markô 11:25.

Bititii: Mankéé wada a nkit le a nwéhél i mut a mboñ nye béba. 1. Mankéé wada a yé i nyéyéi nye. 2. A yé i hoñol i jam mankéé a ntip boñ nye. 3. A ñañ Bibel, a yoñok ngéda i hoñol mam a ñañ. — Badba le, ‘Baa ibale me mpot i jam lini, hala a ga lona adna tole mindañ?’

Ndik kiki Paul a bi kal, di kee ni bisu i ‘nihbana bés ni bés ikété gwéha.’ (Éfésô 4:2) Kaat yada i nkal le hala a nla ki kobla le “di yoñ bo kii ba yé.” Hala a nkobla le di neebe le kiki di bi gwééne ikété béba, hala nyen yak lôk kéé yés i bi gwééne ikété béba. Ñ, di njo sañ inyu haba “mut yondo.” (Éfésô 4:23, 24) Ndi to mut a ta bé peles. (Rôma 3:23) Ibale di neebe hala, d’a nihbe lôk kéé, di nwéhél ki bo; ha nyen d’a “tééda adna i mbuu mpubi.”

Ibale di nwéhél lôk kéé, di hôya i mam ba mboñ bés, d’a bana “maada ma nsañ.” I buk Grikia ba nkobol hana i kaat Éfésô 4:3 le “maada” yon i yé ki “minliiñ” i kaat Kôlôsé 2:19. Minliiñ mi gwé ngui ngandak, nwon mi ñat bihés. Hala nyen nsañ ni gwéha bi ñat bés ni lôk kéé yés to ibale di yé di bana mindañ ngim mangéda.

Jon, i ngéda mankéé a mboñ we jam, kônôl ndik nye ngoo, u kéés bañ nye. (Kôlôsé 3:12) Mut binam to wada a ta bé peles, Yak we u ma unbaha mut. Ibale u mbigda i jam li, hala a ga hôla we i jo sañ inyu “tééda adna i mbuu mpubi.”