“ U yé mut nu a nlôôha ba nseñ”!

1-2. Kii i nla hôla bés i nok le di yé nseñ i mis ma Yéhôva?

BAGWÉLÉL ba Yéhôva bahogi ba nhoñol le ba ta bé nseñ. Bebek, bôt bape bon ba mboñ le ba hoñol hala. Baa yak we u gwé i ndutu i? Kii i yé le i hôla we i nok le u yé nseñ mis ma Yéhôva?

² U nla béñge miñañ mi Bibel mi mi ñunda lelaa Yéhôva a nsômbôl le di tehe bôt. Man wé Yésu a bé ti bôt lipém ngandak. A bi unda le i bet bôt bape ba nyan ba yé nseñ inyu yé ni inyu Isañ. (Yôhanes 5:19; Lôk Héber 1:3) Munu yigil ini, d’a tehe: (1) lelaa Yésu a bi hôla bôt i nok le ba yé nseñ, (2) kii i nkwés bésbomede nkaa le di yé nseñ ngandak i mis ma Yéhôva.​—Hagai 2:7.

LELAA YÉSU A BI HÔLA BÔT I NOK LE BA YÉ NSEÑ?

3. Kii Yésu a bi bôñôl bôt ba Galiléa ba ba bééna ngôñ ni mahôla?

³ Ngélé yônôs aa Yésu a bi ke likalô i Galiléa, mamut ma bé lôl bahoma bahoma, a niigaga mo, a mélhak makon map. Yésu a bi yimbe le ‘ba bé tét i mamut ma, ba bé yôi ki mo kiki mintômba mi mi gwé bé ntééda bémba.’ (Matéô 9:36) Baéga base ba bé yan i bôt ba, ba kalak le ba “yé ntiihege.” (Yôhanes 7:​47-49) Ndi Yésu a bé ti bo lipém, a yoñok ngéda i niiga bo ni i mélés makon map. (Matéô 9:35) Jam lipe li yé le a bi niiga baôma bé lelaa ba nlama añal ñañ nlam, a ti ki bo ngui i mélés makon inyu boñ le ba laa hôla ngandak bôt.​—Matéô 10:​5-8.

4. I ngéda di nhoñol lelaa Yésu a bé tehe i bet bôt bape ba nyan, kii hala a niiga bés?

⁴ I ngéda Yésu a bé ti bôt lipém, a bé éba le i bet bôt bape ba nyan ba yé nseñ inyu Isañ ni inyu yé. Ibale u nhoñol le u ta bé nseñ, bigda lelaa Yésu a bé tehe bôt ba ba bé kôôge nye bebee. Ibale u mboñ hala, w’a tehe le u yé toi nseñ i mis ma Yéhôva

5. Kii i bé tééñga i muda Yésu a bi boma i Galiléa?

⁵ Yésu a bé niiga ndik bé mamut, ndi a bé yoñ yak ngéda ni hiki mut. Kiki hihéga, i ngéda a bé añal ñañ nlam i Galiléa, a bi boma muda nu matjél ma bé pam, hala a bé 12 nwii. (Markô 5:25) Mbén Môsi i bé kal le i nya mut i, i bé nyega, jon i mut a bé a tihba nye, yak nye a bé a yila nyega. Bebek, i muda nu a bé la bé yén ni bôt bape. A bé bé to le a ke i makoda makeñi, to i mangand. (Lôk Lévi 15:​19, 25) I kon u, u bé boñ le a nok ndutu ngandak.​—Markô 5:26.

6. Lelaa i muda matjél ma bé pam a bi mbôôp?

⁶ I muda nu a bé sômbôl le Yésu a mélés nye, ndi a bé bé le a telep nye i bisu. Inyuki? Bebek, inyule kon wé u bé wéha nye nyuu tole bebek, a bé hoñol le Yésu a bé le a unbene nye, inyule a bi lo i homa bôt ba bé a yik le a yé nyega. Inyu hala nyen a bi tihba mbot i Yésu bisôsôli a yik le hala a bé le a boñ le kon wé u mal. (Markô 5:​27, 28) Yéhôva a bi sayap nye inyu hémle yé, a mbôôp. Ha nyen Yésu a bi bat le: “Njee a ntihba me?” Muda a kal le nyen a ntihba nye. Ndi kii Yésu a bi boñ?

7. Kii Yésu a bi boñ inyu hôla i muda matjél ma bé pam? (Markô 5:34)

⁷ Yésu a bi unda i muda nu loñgeñem, a ti ki nye lipém. A bi yimbe le i muda nu a bé ‘kon woñi, a sehlaga.’ (Markô 5:33) Inyu hala nyen Yésu a bi lédés nye ni bibuk gwé. A bi sébél yak nye le: “A ngond yem.” Yésu a bi gwélél bibuk bi inyu ti nye lipém ni inyu unda nye loñgeñem ni gwéha. (Añ Markô 5:34.) Ikété Bibel yosôna, ndik hana i homa nunu nyen Yésu a nsébél muda le: “A ngond yem.” I mpôna le a bi pot bibuk bi, inyule a bi yimbe le i muda nu a bé kon woñi ngandak. Di noode hégda lelaa bibañga bi Yésu bi bi lédés nye. Ibale Yésu a pôdôs bé nye hala, ki a bi ke a bak mbôô, ndi kiññem i bé le i kéés nye. Yésu a bi hôla nye i nok le a yé nseñ ngandak i mis ma Yéhôva.

8. Imbe ndutu sita yada i Brésil i bi boma?

⁸ Yak i len ini, bagwélél ba Yéhôva bahogi ba gwé makon ma ma nla lona bo nduña, tole ma ma nla boñ le ba hoñol le ba ta bé nseñ. I Brésil, nsañal wada le Maria,a a bi gwééna kon u u bi boñ le a gwé bé makôô, a gwé ndik woo wada. A nkal le: “Ba bi tééñga me ngandak i suklu inyu kon wem, ba bé o me môl ma ma bé tééñga me, yak bôt bem ba lihaa ba tééñgaga me.”

9. Bonjee ba bi hôla Maria i tehe le a yé toi nseñ i mis ma Yéhôva?

⁹ Kii i bi hôla Maria? I ngéda a bi yila Mbôgi Yéhôva, lôk kéé i bi lédés nye, i hôla nye i tehe nyemede kiki Yéhôva a ntehe nye. A nkal le: “Me ta bé le me soñgol bôt bobasôna Yéhôva a bi gwélél inyu hôla me! Me nti Yéhôva mayéga inyu lihaa a bi ti me.” Lôk kéé i bôlôm ni i bôda i bi hôla Maria i tehe le a yé toi nseñ i mis ma Nyambe.

10. Imbe ndutu Maria Magdaléna a bééna? (Béñge yak bititii.)

¹⁰ Di béñge lelaa Yésu a bi hôla muda numpe, Maria Magdaléna. A bééna mimbuu mimbe minsaambok! (Lukas 8:2) Bebek le a bé boñ mam ma bé kônha bôt woñi, jon bôt ba bé ke nye ngwéé. A bé nok ndutu ngandak, i nene le a bé kon woñi a hoñlak le to mut a ngwés bé nye, to le mut a nla bé hôla nye. I mpôna le Yésu a bi luhul mimbuu mimbe mi, Maria Magdaléna a yila nigil wé. Kii ipe Yésu a bi boñ inyu unda Maria Magdaléna le a yé nseñ i mis ma Nyambe?

11. Lelaa Yésu a bi unda Maria Magdaléna le a bé nseñ i mis ma Nyambe? (Béñge yak bititii.)

¹¹ I ngéda Yésu a bé ke i añal ñañ nlam ni banigil bé, yak Maria Magdaléna a bé ni bo.b Maria Magdaléna a bé ha i ngéda Yésu a bé niiga bôt bape, hala a bi boñ le a kee ni bisu i nigil mam mape. Yésu a bi pémél yak nye i kel a bi tuge. A bé ikété bôt ba bisu Yésu a bi pôdôs i kel i. Yésu a bi kal yak nye le a kee a kal baôma bé le a ntuge. I mam ma momasôna ma bi unda le a bé toi nseñ i mis ma Yéhôva!​—Yôhanes 20:​11-18.

12. Inyuki Lidia a bé hoñol le a ta bé nseñ?

¹² Kiki Maria Magdaléna, ngandak bôt i nhoñol le mut nye ki nye a nla bé gwés bo. Sita yada i Panya le Lidia a nkal le i ngéda a bé ikété libum li mama yé, mama yé a bééna ngôñ i pémés i jém li. Lidia a ngi bigdaga le i ngéda a bé mañge, mama yé a bééna bé ngéda yé, a bé leñ ki nye bibuk bibe. A nkal le: “Me bé sômbôl le bôt ba neebe me kiki me yé, ba gwés ki me. Me bé hoñol le mut nye ki nye a ga la bé gwés me, inyule mama yem a bi mal kal me le me ta bé ngim mut.”

13. Kii i bi hôla Lidia i nok le a yé nseñ i mis ma Yéhôva?

¹³ I ngéda Lidia a bi yila mbôgi Yéhôva, masoohe, yigil Bibel, maboñok malam ma lôk kéé, ni bibuk bilam ba bé kal nye bi bi hôla nye i nok le a yé nseñ i mis ma Yéhôva. A nkal le: “Nlô wem a mbéna kal me le a ngwés me kiyaga. Hiki ngéda, a nkal me le me gwé bilem bilam. Yak mawanda mem ma mbéna kal me hala.” Baa ngim mut i yé mu likoda joñ, i u yé le u hôla i nok le a yé nseñ i mis ma Yéhôva?

KII I NLA HÔLA BÉS I TEHE BÉSBOMEDE KIKI YÉHÔVA A NTEHE BÉS?

14. Lelaa kaat 1 Samuel 16:7 i nhôla bés i yi lelaa Yéhôva a ntehe bagwélél bé? (Béñge minkéñék mi matila mini le “Inyuki Yéhôva a ngwés bagwélél bé?”)

¹⁴ Bigda le Yéhôva a ntehe bé we kiki bôt ba nkoñ ’isi ba ntehe we. (Añ 1 Samuel 16:7.) Su woñ bé won a mbéñge, a mbéñge bé to too u yé ngwañ, too u nyep, too u bi ke i suklu tole u bi ke bé. (Yésaya 55:​8, 9) U nok bañ i yom bôt ba nkal we, ndi bigda lelaa Yéhôva a ntehe we. U nla añ ngim miñañ ikété Bibel inyu tehe lelaa Yéhôva a bi hôla ngim bôt i i bé hoñol le i bé bé nseñ kiki bo Éliya, Naômi, ni Hana. U nla ki tila ngim mam Yéhôva a ma bôñôl we, i i ñunda le a ngwés we ni le u yé nseñ i mis mé. U nla ki nigil bikaat bi ntôñ bi bi ñunda lelaa Yéhôva a ntehe bagwélél bé.c

15. Inyuki Yéhôva a bi kal le Daniel a bé “mut nu a nlôôha ba nseñ”? (Daniel 9:23)

¹⁵ Bigda le i ngéda u ntéñbe i gwélél Yéhôva, u yé nseñ i mis mé. Lisañ jada, i ngéda Daniel a bééna 90 ma nwii ni jam, a bé “nwaak ngandak,” a bak ntombok. (Daniel 9:​20, 21) Lelaa Yéhôva a bi lédés nye? A bi ep añgel Gabriel i kal nye le a “yé mut nu a nlôôha ba nseñ,” ni le a nok masoohe mé. (Añ Daniel 9:23.) Inyuki Yéhôva a bé gwés Daniel hala? Inyule Daniel a bé a téé sép, a téñbege i gwélél nye. (Ézékiel 14:14) Yéhôva a bi boñ le i ñañ u, u tilba ikété Bibel inyu hôgbaha bés. (Rôma 15:4) Yak we, Yéhôva a ñemble masoohe moñ, a nkônôl we maséé inyule u mboñ mam ma téé sép, u téñbege i gwélél nye.​—Mika 6:​8, bibuk isi lipep; Lôk Héber 6:10.

16. Kii i nla hôla we i tehe le Yéhôva a ngwés we?

¹⁶ Bigda le Yéhôva a ngwés we. A nsômbôl ndik hôla we, a ta bé ha inyu béñge dihôha tjoñ. (Tjémbi 130:3; Matéô 7:11; Lukas 12:​6, 7) I jam li, li bi hôla ngandak bôt i i bé hoñol le i ta bé nseñ. Kiki hihéga, sita yada i Panya le Éliana, a bé hoñol le a ta bé nseñ inyule nlôm a bé lôôha leñ nye bibuk bibe. A nkal le: “I ngéda me nhoñol le me ta bé nseñ, me mbigda lelaa Yéhôva a mbegee me i moo mé, a undga me gwéha.” (Tjémbi 28:9) Sita yada i Afrique du Sud le Lauren a nkal le: “Ibale Yéhôva a bi ôt me i ntôñ wé, a hôla me i ba liwanda jé munu nwii mini nwominsôna, a gwélél yak me inyu niiga bôt bape, hala wee a ntehe le me yé nseñ.”​—Hôséa 11:4.

17. Kii i nyis we le u nlémél Yéhôva? (Tjémbi 5:12) (Béñge yak titii.)

¹⁷ Yi le u nlémél Yéhôva. (Añ Tjémbi 5:12.) David a bi kal le Yéhôva yé “soso ben” inyu bet ba ngwélél nye. I ngéda u nlémél Yéhôva, u yik le a yé ni we, hala a mboñ le u nhoñol ha bé le u ta bé nseñ. Kii i nyis we le u nlémél Yéhôva? Di ntehe munu yigil ini le Yéhôva a ngwélél Bañga yé inyu unda bés le di nlémél nye. Handugi hala, a ngwélél yak mimañ, mawanda més, ni bôt bape inyu yis bés le di yé nseñ. Hala a nlama tinde bés i boñ kii?

18. Inyuki u nlama emble bibuk bilam bi lôk kéé?

¹⁸ I ngéda lôk kéé i mbégés we, yoñ ngéda i emble bibuk gwap bilam. Bebek, Yéhôva nyen a yé gwélél bo inyu yis we le a ngwés we, ni le u nlémél nye. Éliana, nu di mbôk di mpôdôl, a nkal le: “Me bi nigil i neebe bibuk bilam lôk kéé i nkal me. Hala a ta bé jam li ntomb inyu yem, ndi me nyi le Yéhôva a ngwés le me boñ hala.” Mimañ mi bi hôla Éliana ngandak. Nano, a yé nsañal, a nti yak mahôla i Bétel.

19. Kii i nyis we le u yé nseñ i mis ma Nyambe?

¹⁹ Yésu a nyoñ ngéda i unda bés le di yé nseñ ngandak i mis ma Yéhôva. (Lukas 12:24) Jon, di péénaga bañ le Yéhôva a ngwés bés. Di hôiga bañ i jam li. Di hôla ki bôt bape i nok le ba yé nseñ i mis ma Nyambe.