Yésu a yé Prisi Keñi i i nok bés

1-2. (a) Inyuki Yéhôva a bi ep Man wé hana ’isi? (b) Kii d’a tehe munu yigil ini? (Lôk Héber 5:​7-9)

HALA a yé bebee le 2 000 di nwii le Yéhôva a bi ep Man wé nu a ngwés ngandak hana ’isi. Inyuki? Inyu boñ le a kobol bôt ba binam i mok mi béba ni mi nyemb, ni le a mélés mandutu momasôna Satan a bi lona. (Yôhanes 3:16; 1 Yôhanes 3:8) Yéhôva a bé yi ki le niñ i Yésu hana ’isi, i bé lama hôla nye i yila loñge Prisi Keñi, i i bé lama kônôl bés ngoo. Yésu a bi yila Prisi Keñi i mbus sôble yé, i nwii 29 N.Y.a

² Munu yigil ini, di ga tehe lelaa niñ i Yésu hana ’isi i bi hôla nye i yila Prisi Keñi, i i nkônôl bés ngoo. I ngéda d’a tibil nok lelaa Yésu “a bi témb peles” hala a ga ba jam li ntomb i tiige bebee ni Yéhôva, to ibale bibéba di mboñ bi ntômbôs bés.​—Añ Lôk Héber 5:​7-9.

MAN NU GWÉHA NU NYAMBE A BI LO HANA ’ISI

3-4. Niñ i Yésu i bé lelaa i ngéda a bi lo hana ’isi?

³ Ngandak ikété yés i ma nyodi ngim homa inyu ke homa numpe, di yék ndap yés, bôt bés ba lihaa, ni mawanda més. Bun a ta bé ha to ndék. Ndi mut nye ki nye a mboñok bé i jam Yésu a bi boñ. I ngéda a bé i ngii, a bé loo biañgel gwobisô. Yéhôva a bé gwés nye, a bé ki maséé inyule a bé sal ni Yéhôva. (Tjémbi 16:11; Bingéngén 8:30) Ndi kaat Filipi 2:7 i nkal le “a bi tjôô mam momasôna a bééna,” a nwas tel yé ikeñi nyoo ngii, a lo i niñ hana ’isi ni bôt ba binam.

⁴ Di hoñol ki lelaa niñ i Yésu i bé i ngéda a bi lo i niñ hana ’isi. Bisesema bagwal bé ba bi ti Yéhôva bi ñunda le ba bé yep. (Lôk Lévi 12:8; Lukas 2:24) I ngéda Kiñe Hérôdé a bi nok le Yésu a ngwéé, a kahal yéñ manjel i nol nye. Lihaa jé li bi ke i Égiptô inyu ngim ngéda, inyu boñ le Hérôdé a nol bañ nye. (Matéô 2:​13, 15) Niñ i Yésu hana ’isi i bé pôna bé niñ ilam a bééna nyoo ngii!

5. Kii Yésu a bi tehe i ngéda a bi lo hana ’isi; lelaa i mam ma, ma bi hôla nye i ba loñge Prisi Keñi? (Béñge yak titii.)

⁵ I ngéda Yésu a bé hana ’isi, a bé tehe mandutu homa nyensôna. A bi lama tehe bôt bé ba nwo, bebek yak papa yé Yôsep. I ngéda a bé gwel nson wé, a bi boma bôt ba lô, bôt ba ndim, bibôk bi bôt, ni bagwal ba ba bi nimis bon bap; a bé kônôl bo ngoo. (Matéô 9:​2, 6; 15:30; 20:34; Markô 1:​40, 41; Lukas 7:13) I ngéda a bé nyoo i ngii, a bé tehe bôt ba binam ba nok ndutu. Ndi i ngéda a bi lo hana ’isi, a bi kônde nok i yom ba nsébél le ndutu. (Yésaya 53:4) Niñ i Yésu hana ’isi i bi hôla nye i nok mandutu bôt ba binam ba mboma. Nyemede a bi boma mandutu kiki bo waa ni nduña.

YÉSU A NKÔNÔL BÔT NGOO

6. Kii bibuk bi Yésaya bi niiga bés inyu konangoo i Yésu? (Yésaya 42:3)

⁶ I ngéda Yésu a bé gwel nson wé hana ’isi, a bé kônôl bôt ngoo. Hala a bi yônôs mbañ i Bibel. Ngim mangéda, Bitilna bi Lôk Héber bi nkal le mut nu a gwé hémle ngui a yé kiki wom u ba nkôp malép hiki ngéda, tole e i i nañ, i ban-ga ngui. (Tjémbi 92:12; Yésaya 61:3; Yérémia 31:12) Ndi i bôt ba nkônha ngoo inyule bôt bape ba ntééñga bo, ba yé kiki likai li li sédi, tole kiki nsiñga lambe u u yé bebee ni lém. (Añ Yésaya 42:3; Matéô 12:20) Yéhôva a bi tinde mpôdôl Yésaya i gwélél dihéga dini inyu unda le Yésu a bé lama gwés i bet bôt bape ba nyan, a kônôl ki bo ngoo.

7-8. Lelaa mbañ i Yésaya i i bé pôdôl Yésu i bi yon?

⁷ Matéô a bi unda le mbañ i Yésaya i mbeñge Yésu, a bi kal le: ‘A ga bôk bé likai li li sédi, a ga lém bé to nsiñga lambe u u ntu hiida.’ Yésu a bi boñ bihélha bi mam inyu hôla bôt ba bé kiki likai li li sédi, tole ba ba bé kiki nsiñga lambe u u ntu hiida inyule ba bé nok ndutu ngandak. Wada wap a bééna lô nyuu yosôna. Bebek, a bééna bé botñem yo ki yo le kon wé u nla mal, le a nla ki yén ni bôt bé ba lihaa, yak ni mawanda mé. (Lukas 5:​12, 13) Mut wada a bé ki ha, a bé ndok, a bé la bé ki to pot loñge. Di nla hégda le i ngéda a bé a tehe bôt bape ba mpot, hala a bé tééñga nye inyule a bé la bé pot ni bo. (Markô 7:​32, 33) Yésu a bi boñ ki mam mape.

⁸ I ngéda Yésu a bé hana ’isi, ngandak bon ba Lôk Yuda ba bé hoñol le i ngéda mut a nok ndutu, wee a yé i kôs kogse inyu bibéba gwé, tole inyu bibéba bi bagwal bé. (Yôhanes 9:2) Hala a bé le a boñ le i bôt ba, ba kahal hoñol le ba ta bé nseñ. Kiki mbañ i Yésaya i bi bôk i kal, Yésu a bi mélés makon map, a hôla ki bo i yi le Nyambe a ntôñ toi bo. Hala a niiga kii bés?

9. Lelaa kaat Lôk Héber 4:​15, 16 i ñunda le Yésu a yé Prisi Keñi i i nok toi bôt ba binam?

⁹ Añ Lôk Héber 4:​15, 16. Di nyi le Yésu a nok bés hiki ngéda. Hala a nkobla le kii? Mut nu a nok we a yé mut nu a nok njôghe i ngéda u nok ndutu. I buk Grikia ba nkobol hana le “nok” i nkobla le i ndutu u nok, yak mut numpe a nok yo. (Béñge yak kaat Lôk Héber 10:​34, i het Paul a ngwélél nlélém buk.) I ngéda di ñañ miñañ mi mi mpôdôl bihélha bi mam Yésu a bi boñ, di ntehe le a bé nok toi i ndutu bôt bape ba bé nok. A bé mélés bé bakokon ndik inyule a bé lama boñ hala. Ndi a bé tôñ yaga bo, a bé sômbôl hôla bo. Kiki hihéga, i ngéda a bi mélés mut lô, a bé le a boñ hala a bak haa, ndi a bi lo a tihba nye. Bebek, hala a bé ngandak nwii le mut a bi sôga tihba nye! Yésu a bi yoñ i mut a bé ndok, a kena nye haa ni limut li bôt, a mélés nye. Yak mut Farisai wada a bé yan muda wada nu a bi tam béba yé, a jôwa Yésu makôô ni gwiiha gwé, a sas mo ni tjôñ tjé; Yésu a bi sôñ i muda nu, a kodol i mut Farisai nu. (Matéô 8:3; Markô 7:33; Lukas 7:44) Yésu a bé yan bé i bôt ba bé kon tole i bôt ba bi boñ bibéba bikeñi. Ndi a bé tiige bo bebee, a tinak bo makénd. Hala nyen Yésu a mboñ yak ni bés.

LELAA DI NIGLE PRISI YÉS KEÑI I LEN INI?

10. Bimbe bisélél di gwé len inyu hôla bôt ba ndim ni bôt ba ndok? (Béñge yak bititii.)

¹⁰ Bés banigil ba Yésu, di mboñ kii yosôna di nla inyu gwés bôt ni i kônôl bo ngoo. (1 Pétrô 2:21; 3:8) Di nla bé mélés bôt ba ndim, to bôt ba ndok, ndi di nla hôla bo i yila mawanda ma Yéhôva. Kiki hihéga, di ma kobol bikaat ikété iloo 100 mahop ma moo. Bikaat gwés bi yé ki nkoblak ikété iloo 60 ma dilémb inyu bet ba ntehna bé loñge, ni bôt ba yé ndim. Di gwé ki bividéô inyu bôt ba ndim tole i bôt ba noga bé loñge ikété iloo 100 dilémb. Hala a nhôla bôt ba ndim ni i bet ba yé ndok i yila mawanda ma Yéhôva ni Man wé Yésu.

11. Kii ntôñ u Yéhôva u mboñ inyu mintén mi bôt nwominsôna? (Minson mi baôma 2:​5-7, 33) (Béñge yak bititii.)

¹¹ Ntôñ u Yéhôva u mboñ biliya i hôla mintén mi bôt nwominsôna. Di ngi bigdaga le i mbus bitugne bi Yésu, a bi kôp mbuu mpubi inyu boñ le i bôt bobasôna ba bé i ngand i Pentékôt ba nok ñañ nlam, hiki mut a nogok ba mpot “hop wé womede.” (Añ Minson mi baôma 2:​5-7, 33.) Isi énél i Yésu, ntôñ u Yéhôva u mpémés bikaat ikété iloo 1 000 dilémb; dilémb dihogi mu, ndik ndék bôt yon i mpot tjo. Kiki hihéga, i Ñombok ni i Nwelmbok u Amérika, dilémb dihogi di yé nyoo le ndik ndék bôt yon i mpot tjo. Ndi to hala, ntôñ u mpémés bikaat nyoo, ikété iloo 160 dilémb inyu boñ le bôt ba nok ñañ nlam ni hop wap. Bikaat gwés bi yé ki nkoblak ikété iloo 20 ma dilémb di Rômani. Ngandak bôt i i mpot mahop ma, i bi bôdôl gwélél Yéhôva.

12. Kii ipe ntôñ u Yéhôva u mboñ i len ini inyu hôla bôt?

¹² Handugi i bôlô yosôna i nséla inyu boñ le ñañ nlam u añlana, ntôñ u Yéhôva u nti yak mahôla i ngéda bikuu bi nkwo. Inyu hala nyen ngandak ikété yés i nti ngéda yap inyu hôla lôk kéé i bôlôm ni i bôda. Ntôñ u Yéhôva u ñoñ ki mandap inyu boñ le bôt ba kodba inyu nigil Bañga i Yéhôva.

PRISI YÉS KEÑI I NLA HÔLA WE

13. Lelaa Yésu a nhôla bés?

¹³ Yésu a yé loñge ntééda mintômba, a nyoñ ngéda inyu boñ le hiki wada wés a ba liwanda li Yéhôva. (Yôhanes 10:14; Éfésô 4:7) Ngim mangéda, mandutu ma nla boñ le di kahal tehe bésbomede kiki likai li li sédi tole kiki nsiñga lambe u u ntu hiida. Ibale di nkon ngandak, tole di mboñ béba, tole di nôgla bé ni ngim mankéé, hala a nla lôôha tômbôs bés. Iloole di béñge mam malam Yéhôva a mbôn bés, di nla héléé i béñge ndutu yés. Ndi di bigda le Yésu a ntehe ndutu yés, a nok ki bés loñge loñge. Yésu a nkônôl bés ngoo, a ga hôla bés. A nla gwélél mbuu mpubi inyu ti bés ngui i ngéda di ntomb. (Yôhanes 16:7; Titô 3:6) A nla yak gwélél mimañ tole ini lôk kéé ipe inyu hôla bés ni i lédés bés.​—Éfésô 4:8.

14. Kii di nlama boñ i ngéda di ntomb?

¹⁴ Ibale ndutu i nai we, bigda le Yésu a yé Prisi yés Keñi. Yéhôva a bi ep nye hana ’isi le a ti niñ yé inyu tohol bés, ni le a tibil nok mandutu ma bôt ba binam. Ibale mandutu més tole bibéba di mboñ bi ntômbôs bés, Yésu a yé bebee i hôla bés i “loñge ngéda.”​—Lôk Héber 4:​15, 16.

15. Ti hihéga hi hi ñunda lelaa mimañ mi nla hôla mut i témb i ntôñ.

¹⁵ Yésu a ñéga ki banigil bé i ngéda ba nyéñ i bet ba bi ke haa ni Yéhôva. (Matéô 18:​12, 13) Di béñge ndémbél i Stefano.b Ba bi héya nye i ntôñ, a boñ 12 nwii i mbédgé; i mbus, a ke i likoda. A nkal le: “Bun a bé bé ha, ndi me bééna ngôñ i ba ni lôk kéé yem i bôlôm ni i bôda, mimañ mi bi leege me loñge le! Ngim mangéda, me bé hoñol le me gwé bé nseñ wo ki wo, me bé gwés somol. Ndi mimañ mi bi kal me le Yéhôva bo Yésu ba nsômbôl le me téñbe. I ngéda me bi témb i ntôñ, lôk kéé yosôna i bi leege me loñge ni bôt bem ba lihaa. I mbus ngéda, nwaa wem a bi bôdôl nigil Bibel, di ngwélél Yéhôva ntôñ nano.” Prisi yés Keñi i ngwés bés ngandak, jon i ngéda lôk kéé i nhôla mut nu a ntam béba yé i témb i ntôñ, hala a nkônha nye maséé ngandak!

16. Inyuki u nti Yéhôva mayéga?

¹⁶ I ngéda Yésu a bé hana ’isi, a bi hôla ngandak bôt. Yak i len ini, ibale di gwé ngôñ ni mahôla, Yésu a yé ha inyu hôla bés. Ndék ngéda, i mbok yondo, a ga boñ le bôt ba binam ba nok ha bañ ndutu. Di nti Yéhôva mayéga inyule a ngwés bés ngandak, a nkônôl ki bés ngoo, jon a bi ti bés loñge Prisi Keñi le Yésu!