1 Korintô

6 Baa mut ikété nan nu a gwé hop ni mut numpe a mban ñem i kena wo i minkaa i bisu bi bôt ba téé bé sép, ndi ha i bisu bi bapubhaga bé? 2 Tole ni nyi bé le bapubhaga ba ga kéés nkoñ ’isi? Ndi ibale ni nlama kéés nkoñ ’isi, baa ni gwé bé ngap i kéés disii di mahop? 3 Baa ni nyi bé le di ga kéés biañgel? Bôô ni ngélé yañen ni mam ma niñ ini? 4 Ibale ni nlama ke i minkaa inyu mam ma niñ ini, baa i bôt likoda li nyan bon ni ntéé kiki bakéés? 5 Me yé i pot inyu wéha bé nyuu. Baa mut pék to wada a ta bé ipôla nan inyu bagal minkaa ipôla lôkisañ? 6 Ndi mankéé a nkena maasañ i minkaa, a boñok ki hala i bisu bi bangitophémle!

7 Ni maliga, hala a yé bañga wonyuu inyu nan ngéda ni gwé mahop bé ni bé. Inyuki ni neebe bé le ba boñ bé béba? Inyuki ni neebe bé le ba pôh bé?* 8 Ndi bé bon ni mboñ béba, bé ki bon ni mpôh bape; ngo lôkisoñ nan yon ni mbôñôl hala!

9 Tole ni nyi bé le i bôt ba téé bé sép b’a kôdôl bé Ane Nyambe? Ni yôm bañ.* I bôt ba mboñ malal ma nyega,* to babégés bisat, to bôt ba ndéñg, to bôlôm ba neebe le ba lalna bo, to bôlôm ba nlalna bôlôm,* 10 to bôt ba wip, to bôt ba huluk ñem, to bôt ba lihiua, to bôt ba nsola,* to bôt ba ngadla b’a kôdôl bé Ane Nyambe. 11 Ndi hala nyen bahogi ikété nan ba bé. Ndi ba bi nugus bé, ba pubus bé; ni kéla ki le ni téé sép i jôl li Nwet Yésu Kristô lôñni mbuu u Nyambe wés.

12 Mam momasôna ma yé me kunde*, ndi mam momasôna ma gwé bé yéñe. Mam momasôna ma yé me kunde, ndi me yé mbén i nwas le jam jo ki jo li énél me.* 13 Bijek bi yé inyu libum,* yak libum li yé inyu bijek; ndi Nyambe a’ yilha gwo biba yañga. Nyuu i ta bé inyu malal ma nyega* ndi inyu Nwet; yak Nwet a yé inyu nyuu. 14 Ndi Nyambe a bi tugul Nwet, a’ tugul yak bés ni ngui yé.

15 Baa ni nyi bé le manyuu manan ma yé bijô bi Kristô? Baa me nlama ni yoñ bijô bi Kristô inyu yilha gwo bijô bi muda libambe? To jam! 16 Baa ni nyi bé le i mut a ñadba ni muda libambe a yé nyuu yada lôñni nye? Inyule a nkal le: “Bo iba b’a ba nsôn wada.” 17 Ndi nu ni nu a ñadba ni Nwet, a yé wada lôñni nye, a ban-ga ki minlélém mi mahoñol lôñni nye.* 18 Kena malal ma nyega* ngwéé! Béba ipe yo ki yo mut a mboñ i ñôbôs bé nyuu yé, ndi nu ni nu a gwé lem i boñ malal ma nyega, a mbôñôl nyuu yé yomede béba. 19 Baa ni nyi bé le nyuu nan i yé témpel i mbuu mpubi u u yé ikété nan, u Nyambe a bi ti bé? Ni le ni ta bé banan bébomede, 20 inyule ba bi somb bé ni ndamba. Jon, gwéélana manyuu manan inyu bégés Nyambe.