1 Korintô

5 Ni maliga, bôt ba ñañal le malal ma nyega* ma yé ipôla nan, i nya nyega* i i ta bé to ikété bôt ba matén, le mut a niñ ni* nwaa isañ. 2 Baa ni ngôgôp inyu jam li? Baa ni lamga bé ee, inyu boñ le ni héya i mut a bi boñ i jam lini ipôla nan? 3 To hala kiki memede* me ta bé ha, me yé ni bé ikété mahoñol,* me mal yak kéés i mut a mboñ jam lini wengoñle me yé toi lôñni bé. 4 I ngéda ni nkodba i jôl li Nwet wés Yésu, ni yik le me yé lôñni bé ikété mahoñol, ni le ngui i Nwet wés Yésu i yé lôñni bé, 5 ni nlama ti i nya mut ini i moo ma Satan inyu tjiba i minsôn,* kayéle mbuu u tohlana* i hilo hi Nwet.

6 Ngôk nan u ta bé loñge. Baa ni nyi bé le ndék séñha i nhulus* flawa yosôna? 7 Ni héya nlômbi séñha inyu boñ le ni ba flawa mondo, hala kiki ni gwé bé séñha.* Inyule ni maliga, ba mal sem Kristô, man ntômba wés nu Pasa. 8 Jon di lôôs ngand, ha ni nlômbi séñha bé tole lôñni séñha i béba ñem ni i mam mabe bé, ndi ni bret bi ngi-séñha bi ñem u mpôp ni bi maliga.

9 Me bi tilna bé ikété kaat yem le ni kiha ha bañ* lôñni bôt ba malal ma nyega,* 10 me bé pôdôl bé bôt ba malal ma nyega* bobasôna ba nkoñ ’isi unu, to bôt ba huluk ñem, to bôt ba ngadla, to babégés bisat. Ibale hala, ki y’a béda le ni nyodi i nkoñ ’isi. 11 Ndi nano, me yé i tilna bé le ni kiha ha bañ* lôñni mut a nséblana le mankéé, ndi a bak mut malal ma nyega,* tole mut huluk ñem, tole mbégés bisat, tole mut bisol,* tole mut lihiua, tole mut ngadla, ni je bañ to lôñni i nya mut i. 12 Inyule me gwé kii i kéés bôt ba mbégdé? Baa ni nkéés bé bôt ba kété, 13 Nyambe nye a kééhak bôt ba mbégdé? “Ni héya béba mut ikété nan.”