1 Korintô

7 Inyu mam ni bi tila, i yé loñge le munlôm a tihba bañ* muda; 2 Ndi kiki malal ma nyega* ma yé nnayak homa nyensôna, hiki munlôm a bana wé nwaa, yak hiki muda a bana wé nlôm. 3 Nlôm a ti nwaa i jam a kôli kôhna, yak nwaa a boñ nlélém inyu nlôm. 4 Nwaa a gwé bé kunde i ngii nyuu yé nyemede, ndik nlôm; nlélém jam, to nlôm a gwé bé kunde i ngii nyuu yé nyemede, ndik nwaa. 5 Nunu wada a nim bañ nuu numpe handugi le ni nôgla hala inyu ntéak ngéda, inyu boñ le ni bana ngéda inyu masoohe; i mbus, ni témb ni adba kayéle Satan a ke bañ ni bisu i noode bé inyu ngi hôtnyuu nan. 6 Me mpot ndik hala i kémhe le ni nla boñ hala, ndi me ta bé i téé ngim mbén. 7 Ndi me gwé ngôñ le bôt bobasôna ba ba kiki me. To hala, hiki mut a gwé jé likébla Nyambe a bi ti nye; wada ni i njel ini, numpe ni njel ipe.

8 Ndi me nkal i bôt ba ta bé mbiibaga ni biyik bi bôda le, i yé loñge inyu yap le ba yén kiki me. 9 Ndi ibale ba nla bé bana hôtnyuu, wee ba biibaga, inyule i yé loñge i biiba iloole mut a loñok ni ngôñ malal.

10 Me nti biniigana inyu bôt ba yé mbiibaga, ha memede bé, ndi Nwet, le nwaa a nlama bé bagla ni nlôm. 11 Ndi ibale a mbagla yaga, a yégle ngibiiba, tole a sañgla lôñni nlôm; yak nlôm a nlama bé yék nwaa wé.

12 Ndi me nkal bana bape, ñ, memede yaga, ha Nwet bé: Le ibale mankéé a gwé nwaa nu a nhémle bé, ndi nwaa a neebe i yén lôñni nye, a yék bañ nwaa; 13 ibale yak muda a gwé nlôm nu a nhémle bé, ndi nlôm a neebe i yén lôñni nye, a yék bañ nlôm. 14 Inyule nlôm nu a nhémle bé a mpubhana inyu nwaa wé, yak nwaa nu a nhémle bé a mpubhana inyu mankéé; ibale hala bé, ki bon banan ba yé nyega, ndi nano ba yé bapubhaga. 15 Ndi ibale nu a nhémle bé a mpohol i bagla,* a baglaga; ha ngéda i, mankéé nu munlôm tole nu muda a ta bé nyégsaga i yén ni nye, ndi Nyambe a bi sébél bé inyu nsañ. 16 Inyule a muda, kii i nyis we too w’a tohol bé nlô woñ? Tole a munlôm, kii i nyis we too w’a tohol bé nwaa woñ?

17 Ndi to hala, inoñnaga ni libak Yéhôva* a bi ti hiki wada, hiki mut a kilak mu kiki Nyambe a bi sébél nye. Hala nyen me nti maéba mana ikété makoda momasôna. 18 Baa mut a bé nkweebaga ngéda a bi kôhna nsébla? A yégle nkweebaga. Baa mut a bé ngikweeba ngéda a bi kôhna nsébla? A kweeba ha bañ. 19 Likwee li ta bé to jam, yak ngikweeba i ta bé to jam, ndi i noñ mambén ma Nyambe yon i yé bañga jam. 20 To limbe libak mut a bééna ngéda a bi kôhna nsébla, a tééda jo. 21 Baa u bi kôhna nsébla ngéda u bé nkol? U nwas bañ le hala a tééñga we, ndi ibale u mbana pôla i ba kunde, boñ hala. 22 Inyule i mut a bi kôhna nsébla ikété Nwet ngéda a bé nkol a mal ba kunde, a nyila mut Nwet; nlélém jam, i mut a bi kôhna nsébla a bak kunde, a yé nkol u Kristô. 23 Ba bi somb bé ni ndamba, ni yila ha bañ minkol mi bôt ba binam. 24 A lôk kéé, to limbe libak mut a bééna ngéda a bi kôhna nsébla, a tééda jo i bisu bi Nyambe.

25 Ndi me gwé bé oda i nlôl yak Nwet inyu bôt ba yé konji,* ndi me nti mahoñol mem, kiki mut Nwet a bi unda konangoo le a ba maliga. 26 Jon me nhoñol le i yé loñge le mut a kônde yén kiki a yé, inyu mandutu ma ngéda ini. 27 Baa u gwé nwaa? U yéñ ha bañ le u kobla. Baa u gwé bé nwaa? U yéñ ha bañ nwaa. 28 Ndi to ibale u mbiiba, u mboñ bé béba. Yak ibale mut nu a yé konji a mbiiba, i nya mut ini i mboñ bé béba. Ndi i bôt ba mbiiba b’a nôgda njiiha ikété minsôn nwap. Ndi me nyéñ sôñ bé.

29 Jam lipe ki, a lôk kéé, me nkal bé le, i ngéda i ngi yii i yé nhubuk. Ibôdôl nano, i bôt ba gwé baa, ba ba wengoñle ba gwé bé baa, 30 i bôt ba ñee ba ba wengoñle ba ñee bé, i bôt ba nkon maséé ba ba wengoñle ba nkon bé maséé, Yak i bôt ba nsomb ba ba wengoñle ba gwé bé, 31 i bôt ba mbôñôl nkoñ ’isi ba ba wengoñle ba mbôñôl bé wo i nya i yôni; inyule mam ma nkoñ ’isi* unu ma yé i héñha. 32 Ni maliga, me ngwés bé le ni bana nduña. I mut a ta bé mbiibaga a ntôñ inyu mam ma Nwet, lelaa a nla boñ inyu lémél Nwet. 33 Ndi i mut a yé mbiibaga a ntôñ inyu mam ma nkoñ ’isi, lelaa a nla boñ inyu lémél nwaa, 34 a yé ki nkabak. Handugi hala, i muda a ta bé mbiibaga, yak nu a yé konji, a ntôñ inyu mam ma Nwet, le a boñ le nyuu yé ni mahoñol mé bi ba bipubhaga. Ndi i muda a yé mbiibaga a ntôñ inyu mam ma nkoñ ’isi, lelaa a nla boñ inyu lémél nlôm. 35 Me ta bé i kal hala inyu ha bé nkôô joo,* ndi inyu nseñ nan bébomede, inyu tinde bé i boñ jam li kôli, ni i gwélél Nwet ngéda yosôna ibabé le ni ba nkabak.

36 Ndi ibale mut a nhoñol le a yé i boñ béba inyule a nyégle ngibiiba,* ibale a mal ki tagbe ngéda i minheña mi mañge wanda, haana nyen a nlama boñ: A boñ kiki a ngwés; a mboñ bé béba. Ba biibaga. 37 Ndi ibale mut a mal yaga yoñ makidik ikété ñem wé le a mbiiba bé,* ndi a téñbe ki ni makidik ma, a nôgda bé ngôñ i biiba, a ban-ga ki ngap i gwel ngôñ yé, wee a mboñ loñge. 38 Jon i mut a mbiiba* a mboñ loñge, ndi i mut a mbiiba bé a mboñ loñge ngandak.

39 Muda a tiñi ni nlô wé ntel wonsôna nlôm a yé i niñ. Ndi ibale nlôm a nwo,* a yé kunde i biiba ni i mut a ngwés, ndi ndik ikété Nwet. 40 Ndi mahoñol mem ma yé le a ga lôôha ba maséé ibale a nyégle kiki a yé; ngo me nhoñol yaga le yak me me gwé mbuu u Nyambe.