Хіакъикъияб дин кин батилеб

Дуе Аллагьасул гьудуллъун вукІине бокьун батани, дуца гьабизе ккола Аллагь тІад рекъолеб дин. ГІисаца абуна: «унго-унгояб сужда-тІагІат гьабулез», Аллагьасе тІагІат гьабизе бугилан гьесул «хІакъикъаталда» рекъон (Иоанница 4:23, 24). ГІицІго цо буго Аллагьасе битІараб сужда-тІагІат гьабизе бегьулеб къагІида (Эфесазде 4:4—6). ХІакъикъияб диналъ абадияб гІумруялде рачуна, гьересияб диналъ абуни хвалде рачуна (Матфейица 7:13, 14).

БитІараб дин батІа бахъизе лъазе буго дуда, гьеб дин гьабулел гІадамазда хадуб хал-шал гьабуни. Иегова лъикІлъи тІокІав Аллагь вугелъул, гьесие унго-унгояб сужда-тІагІат гьабулелги рукІине ккола лъикІлъи тІокІал гІадамаллъун. ЛъикІаб апельсиналъул гъотІол пихъ — лъикІал апельсинал рукІунеб гІадин, хІакъикъияб диналъул хІасиллъунги — лъикІал гІадамал рукІина (Матфейица 7:15—20).

Иеговал гьудулзабаз гъваридго хІурмат гьабула РухІаниял ТІахьазул. Гьезда лъала РухІаниял ТІахьал Аллагьасдаса рукІин. Гьез рес кьола гьениб жаниб хъваралъе, гьезул гІумруялъе нухмалъи кьезе, масъалаби рорхизе ва Аллагьасул хІакъалъулъ лъазе жидее кумек щвезе (2 Тимофейихъе 3:16). Гьез жигар бахъула, жидеца малълъулелда рекъон гІумру гьабизе.

Иеговал гьудулзабаз цоцазде рокьи загьир гьабула. ГІисаца гІадамазде рокьи загьир гьабулаан, Аллагьасул хІакъалъулъ гьезда малълъулаго ва унтарал сахлъизарулаго. ХІакъикъияб диналъул рахъ ккуразги, цогидазде рокьи загьир гьабула. ГІисаго гІадин, гьел чІухІун ралагьуларо мискинчагІазухъ ялъуни цогидаб миллаталъул гІадамазухъ. ГІисаца абуна, цоцазде загьир гьабулеб рокьудалъун лъалин гІадамазда жиндир мутагІилзабиян (Иоанница 13:35).

Аллагьасул гьудулзабаз кІодо гьабула Аллагьасул цІар — Иегова. Нагагь, лъица бугониги дур цІар рехсезе инкар гьабулеб бугони, вукІинадай гьев чи дур гьудул-гьалмагълъун? ВукІинаро. Нилъер гьудул вугони, нилъеца гьесул цІар рехсола ва гьесул хІакъалъулъ лъикІаб бицуна цогидазда. Гьединго, Аллагьасул гьудуллъун вукІине бокьарасги, гьесул цІар рехсезе ккола ва гьесул хІакъалъулъ бицине ккола цогидазда. Иеговае бокьун буго, нилъеца гьедин гьабизе (Матфейица 6:9; Румазде 10:13, 14).

ГІисацаго гІадин, Аллагьасул гьудулзабазги малълъула цогидазда Аллагьасул ПарччахІлъиялъул хІакъалъуль. Аллагьасул ПарччахІлъи ккола — зодоб бугеб хІукумат. Гьелъ ракь Алжаналде буссинабизе буго. Иеговал гьудулзабаз Аллагьасул ПарччахІлъиялъул рохалил хабар ракІ-ракІалъ бикьула цогидалгунги (Матфейица 24:14).

Иеговал НугІзаз хІаракат бахъула Аллагьасул гьудулзабилъун рукІине. Гьез хІурмат гьабула РухІаниял ТІахьазул ва гьезда гьоркьоб рокьи букІуна. Гьединго гьез рехсола ва кІодо гьабула Аллагьасул цІар ва цогидазда малълъула Аллагьасул ПарччахІлъиялъул хІакъалъулъ. Жакъа ракьалда хІакъикъияб дин гьабулеб буго Иеговал НугІзаз.