Гьересияб диналдаса инкар гьабе!

ШайтІаналъе ва гьелъул жундузе бокьун гьечІо, дуца Аллагьасе гІибадат гьабизе. Гьез жигар бахъулеб буго, щивго чияс Аллагьасе гІибадат гьабичІого букІине. Кинаб къагІидаялъ гьез гьеб гьабулеб? Гьединал къагІидаздаса цояб — гьересияб дин хІалтІизаби буго (2 Коринфазде 11:13 — 15). РухІаниял ТІахьаздаса хІакъикъат малълъулареб дин — гьересияб дин ккола. Гьересияб дин релълъуна халпаб гІарцуда; балагьараб мехалъ унго-унгояблъун бихьулеб, амма хІакъикъаталда абуни къимат гьечІеб, ва гьелъ гІемерал захІмалъаби рачІине бегьула.

Динияб гьересиялда киданиги ракІ рекъоларо Иеговал, хІакъикъаталъул Аллагьасул. ГІиса ракьалда вугеб мехалъ, букІана цо динияб къокъа, гьезие гьев чІвазе бокьун букІана. Гьезда кколаан, жидеца Аллагьасе битІун икрам гьабулеб бугилан. Гьел гІадамаз абулаан: «Нилъер цо Эмен — Аллагь вуго» — ян. Разилъанадай гьелгун ГІиса? РазилъичІо. Гьес гьезда абуна: «Нуж нужерго инсудаса, Илбисалдаса руго» — ян (Иоанница 8:41, 44). Жакъа гІемерисел гІадамазда ккола, жидеца Аллагьасе сужда-тІагІат гьабулеб бугилан, амма унго-унголъун абуни гьез ШайтІаналъе ва гьелъул жундузе лагълъи гьабулеб буго (1 Коринфазде 10:20)

Турараб гъветІалъ турараб пихъ кьолебго гІадин, гьересияб диналъги квешлъи гьабизе куцала гІадамал. Дуниял къварилъабаз цІун буго, щай гурелъул гІадамаз квешлъи гьабулеб бугелъул. Гьанир рехсезе бегьула: пасикълъи, рагъал, цІогьоди, хъахІбалъи-зиначилъи, зулму-хІал, чІвай-хъвей ва инжитлъи-пасалъи. Гьел, квешал ишазулъ гІахьаллъулел гІемерисел гІадамаз, кинаб бугониги дин гьабула, амма гьезул диналъ гьесизаруларо гьел лъикІлъи гьабизе. Гьабулеб квешлъиялдаса инкар гьабизегІан, гьезда кІвезе гьечІо Аллагьасул гьудулзабилъун лъугьине (Матфейица 7:17, 18).

Гьересияб диналъ гІадамазда малълъула ганчІил сипатазда ва суратазда цере гьари-дугІаялда чІезе. Аллагьас разилъи кьоларо сипатазе ва суратазе гьари-дугІа гьабизе. Гьеб гІакъилаб тІалаб буго. Бокьилаанищ дуе, щив вугониги кидаго дудаги кІалъачІого, дур суратгун гаргадулев вукІине? ВукІинадай гьединав чи дур унго-унгояв гьудуллъун? Гуро, вукІинаро. Жиндилъ рухІ гьечІел истуканазда ва суратазда гурел, живгун гаргадизе бокьун буго Иеговае гІадамал (2 Мусал 20:4, 5).

Гьересияб диналъ малълъула, гІадамал рагъда чІвазе бегьулилан. ГІисаца абуна, Аллагьасул гьудулзабазда гьоркьоб рокьи букІине бугилан. Нилъеца нилъее рокьулел гІадамал чІваларо (Иоанница 13:35). Квешал гІадамалцин чІвазе бегьуларо нилъеца. ГІисал тушманзаби гьев туснахъ гьавизе рачІараб мехалъ, гьес рес кьечІо жиндирго мутагІилзабазе, живго цІунун цере рахъине (Матфейица 26:51, 52).

Гьересияб диналъ малълъула, квешал гІадамал жужахІалъул цІадулъ гІазабалда рукІинилан. РухІаниял ТІахьаз абуни малълъулеб буго, мунагьалъ хвалде рачунилан (Румазде 6:23). Иегова — рокьи цІикІкІарав Аллагь вуго. ГІадамал рокьулев Аллагьас кьеладай гІазаб-гІакъуба абадиялъго? Узухъда, кьеларо! Алжаналда букІине буго цохІо дин — Иегова тІад рекъолеб (Откровение 15:4). Киналго ШайтІаналъ кьучІ лъун рижарал динал тІагІине руго.