Дуда лъазе ккола Аллагьасул хіакъалъулъ

Аллагьасул гьудуллъун вукІине ккани, дуда лъазе ккола гьесул хІакъалъулъ. Дур гьалмагъзабазда дур цІар лъалебищ ва гьеб цІар рехсон гьел кІалъалелищ дуда? Аллагьасеги бокьун буго, дуда гьесул цІар лъазе ва дуца гьеб цІар рехсезе. Аллагьасул цІар Иегова буго (2 Мусал 15:3; Матфейица 6:9). Гьеб гуребги, дуда лъазе ккола, гьесие щиб бокьулеб, щиб бокьулареб. Дуда лъазе ккола, щал ругел гьесул гьудулзаби ва щал — тушманзаби. Щив вугониги лъазе ккани, заман къваригІуна. РухІаниял ТІахьаз абулеб буго, Иегова лъазе нилъеца заман бати — гІакъилаб иш бугилан (Эфесазде 5:15, 16).

Аллагьасул гьудулзабаз гьесул рекІее къабулабщинаб гьабула. Дурго гьудулзабазул пикру гьабе. Гьездехун квешаб бербалагьи бугони ва гьез хІехьоларел ишал гьаруни, хутІиладай хадурккунги гьел дур гьудулзабилъун? БичІчІула, хутІиларо! Дуе Аллагьасул гьудуллъун вукІине бокьани, гьединго дуцаги гьабизе ккола гьесие къабулабщинаб (Иоанница 4:24).

Киналго диназ гуро рачунел Аллагьгун гьудуллъиялде. ТІадегІанав Аллагьасул бищун цевесев гьудул ГІиса аварагас бицун букІана кІиго нухалъул хІакъалъулъ. Цо нух — гІатІидаб, гьелдасан гІемерисел гІадамал унел руго. Гьеб нухалъ хвалде рачуна. Цогидаб нух — къваридаб. ГІицІго цІакъ дагьал унел руго гьелдасан. Гьеб нухалъ рачуна абадияб гІумруялде. Гьелъул магІна ккола; дуе Аллагьгун гьудуллъи кквезе бокьани, дуда тІадаб буго лъазе, кин битІараб къагІидаялъ гьесие икрам гьабулебали (Матфейица 7:13, 14).