Jesús amuldungui cümeque dungu

Jesús fautizahui, fei eluhui ñi amuldungual: “Püllelepai Chau Dios ñi ngünenietual ta mapu”. Quiñentrür miyauquefui tañi pu discipulo engün fill püle Galilea ca Judea mu. Pu che ayüniefui Jesús ñi femal afmatun dungu. Feimu, huiñotulu Jesús Nazaret mu, papeltulelfi tati pu che Isaías ñi huirintucuel: “Chau Jehová elueneu ñi nehuen tañi amuldungucheal cümeque dungu”. Femngechi quimeltufi engün ñi doi falin-ngen ti amuldungun cüdau. Fei eluhui ñi feipiafiel engün: “Fachantü femtripai tüfachi huirintucun tamün allcütupeel”.

Fei hula Jesús amui Galilea lafquen mu. Üyeu pefi 4 challhuafe tañi inanieteu: Pedro, Andrés, Santiago ca Juan. Feipifi engün: “Inamuchi, chumngechi quintuquefimün challhua, iñche pengeluhuayiñ tamün quintuafiel ta che”. Feimeu müten elcünuingün ñi cüdau, fei inafingün ta Jesús. Com Galilea mapu püle amuldunguyahuingün Chau Dios ñi ngünenietual mapu. Quimeltuyahuingün fillque ngillatuhue ruca mu, feria ca rüpü püle. Cheu rume amulelu engün, fentren che inayerpueyu engün. Fill püle allcüngei Jesús ñi dungu. Alü camapulelu rume Siria, pu che cafei quimürpufi.

Jesús elufi nehuen quiñeque tañi pu inanieteu ñi tremoltuafiel pu cutrancülelu ca huemünentual huesaque püllü. Caquelu tañi pu inanieteu compañfingün ñi amuldungual fill huaria püle. Cafei, fentren cümeque domo inaniequefui ta Jesús. Quiñeque tüfa feita María Magdalena, Juana ca Susana. Com engün quelluquefi Jesús ca tañi pu discipulo.

Jesús pepicafi tañi pu discipulo, fei huercüfi engün tañi amuldungual. Petu ñi amulen engün Galilea püle, fentren che allcütufi ta Jesús, fei fautizahuingün ñi inanieafiel. Pütrün-ngelu cai tati pu che, Jesús trürümfi engün ta fentren quetran meu, puucülelu ñi cosechangeal. Feimu feipi: “Llellipuafimün Chau Jehová, huercüpe cüdaufe tañi cosechayal”. Fei hula, Jesús dulli 70 tañi pu inanieteu, fei epuque huercüfi engün ñi amuldungual com Judea mapu mu. Quimeltufingün itrofill pu che ñi ngünenietual Chau Dios mapu mu. Huiñotulu engün, rume ayüniefui ñi nütramcayafiel Jesús chem tañi rupan. Felei, Huecüfü pepi catrütulafi ti amuldungun cüdau.

Petu ñi huiñotunon huenu mu, Jesús com pepicacünui. Femngechi tañi pu discipulo amulafui tüfachi falin cüdau. Feipifi engün: “Huall mapu püle amuldunguaimün Chau Dios ñi ngünenietual ta mapu. Quimeltuafimün ta che Chau Dios ñi Dungu, fei fautizayafimün”.