QUIMELTUN 93
Jesús huiñotui huenu mu
Jesús trahuluhui tañi pu discipulo engün Galilea mu. Feipifi ñi femal engün quiñe falin dungu: “Amumün com troquiñ mapu mülechi pu che meu. Quimeltuafimün chem tañi quimeltuel, fei ñi inayaeteu engün. Fei fautizayafimün engün”. Cafei feipicünufi engün: “Loncontucumün: iñche mülean eimün mu”.
Jesús amulei ñi peufaluhual fentren tañi pu inanieteu 40 antü mu Galilea ca Jerusalén mu. Quimeltulelfi falinque dungu ca femi fentren afmatun dungu. Ti inan rupa ñi peufaluhun, trahuluhui tañi pu apostol engün Olivo huincul mu. Jesús feipi: “Jerusalén mu mülenagcülemün. Üngümniemün chem ñi feipicünuel tañi Chau”.
Pu apostol cüme adümlaingün ñi chem pifel Jesús, feimu ramtufingün: “¿Famülque mu ngünenieaimi Israel mu?”. Jesús feipi: “Chau Jehová petu feipilai tañi ngünenieal mapu. Huelu pichiñma mu llohuaimün Chau Dios ñi nehuen, fei huldunguaimün iñche meu. Feimu quimeltucheaimün Jerusalén püle, com Judea, Samaria ca huall mapu püle”.
Jesús amulelu huenu mu, fei tacueyu quiñe tromü. Tañi pu inanieteu leliniehuefi ti huenu, huelu pehuelafingün.
Pu discipulo tripaingün Olivo huincul mu, fei ñi huiñotual Jerusalén mu. Huimtulefuingün ñi trahuluhual quiñe ruca mu ñi llellipual engün. Üngümcülefuingün Jesús ñi doi quimeltuaeteu chem tañi femafel engün.
“Tati cümeque dungu Chau Dios ñi ngünenietual ta mapu amuldungungeai huall mapu püle, femngechi com troquiñche ñi quimal engün. Fei hula afai mapu meu müleyechi dungu” (Mateo 24:14).