Ti domo inafül rünganco meu

Fiestañmangelu hula ti Pascua, Jesús ca tañi pu inanieteu amutuingün ta Galilea. Fei rupaingün Samaria mu, ürcütupuhuingün Sicar huaria püle, Jacob tañi rünganco meu. Jesús anücünuhui üye mu, fei tañi pu discipulo ngillacameingün chem tañi iyal.

Fei acui quiñe domo, nentupai co. Jesús feipifi: “Eluafen co”. Ti domo feipieyu: “Iñche ta Samaria domo, ¿chumngelu am nütramcapeen? Pu judio dunguquelafi tati pu Samaria che”. Jesús feipi: “Quimfulmi ineingen ta iñche, eimi ‘eluen co’ piafuimi. Fei eluafeyu co hulquelu mongen”. Ti domo huiñoldungui: “¿Chem pimequeimi am? Nielaimi chem rume tami entual co”. Jesús feipi: “Feiti che pütocole ti co iñche ñi eluafiel, huihuhuelayai”. Fei ti domo feipieyu: “Ñidol, eluen feichi co”.

Jesús feipi: “Yemenge tami füta”. “Nielan füta” pi tati domo. Jesús feipi: “Feingei. Quechu füta niefuimi ca tati huentru tami nieel feula tami füta no tati”. Ti domo feipi: “Eimi ta Chau Dios ñi huerquen. Iñchiñ pu Samaria che tüfachi huincul meu püramyequeiñ ta Chau Dios. Huelu eimün pu judio feipiqueimün Jerusalén huaria mu mülei ñi püramyengeal. Iñche feipiquen cüpayai ti Mesías, fei quimeltuaiñmu chumngechi taiñ püramyeafiel Chau Dios”. Jesús feipi: “Iñche tati Mesías”. Turpu feipiquelafui tüfachi falin dungu.

Ti domo lefcülen amufemi ti huaria mu ñi feipimeafiel tañi pu che. Feipifi engün: “Pefiñ quiñe huentru, com quimniei iñche tañi rupan. Cüpamün tamün peafiel. ¿Ti Mesías peno tüfachi huentru?”. Fei tati pu che inafi ti domo ñi pemeafiel ta Jesús, allcütufingün tañi feipin.

Pu Samaria che feipifingün ta Jesús ñi mülenagal. Fei 2 antü mülenagi, fentren dungu quimeltufi engün. Fei fentren che feyentui, feimu feipifingün tati domo: “Tañi feipin mu quimfali, ¡tüfachi huentru fei tati Mesías montulchealu!”.