Jesús femi fentren afmatun dungu

Jesús huercüngei ñi amuldungual Chau Dios ñi ngünenietual ta mapu. Cafei, Chau Jehová elueyu ñi nehuen tañi femal afmatufalchi dungu. Femngechi pengeli chem tañi femal Lonco Ülmen ngele. Fill püle pu che llellipuquefi Jesús ñi tremoltuaeteu, fei com tremoltueyu chem cutran nielu engün rume. Pu trauma pelotui, pu pilu allcütui, pu cüntro trecatui. Pu che nüfilu müten Jesús ñi huechuñ tacun, tremotuquefuingün. Jesús cafei huemünentuquefi huesaque püllü. Pu che inafi ta Jesús fill püle. Fei ayünielu ñi quisuleal rume, cüme llouquefi com pu che.

Quiñe rupa, Jesús cüpalelngei quiñe huentru lañmalelu ñi cuerpo. Huelu fentren che mülefui, pepi conpulaingün ti ruca mu. Feimu nülangei quiñe troquiñ techo, fei nacümngei ti huentru. Fei Jesús feipifi: “Huitrapürange ca trecange”. Ti huentru trecatui, fei com pu che afmatulehuei.

Quiñe antü, Jesús puhui quiñe lof mu, fei 10 huentru lepra cutran nielu nehuentu feipifingün: “¡Jesús, quellumuiñ!”. Feichi antü meu, Moisés tañi ley feipi pu lepra cutran nielu ñi fülmanoafiel caquelu pu che. Ca, tremotule engün, mülefui ñi amual Chau Dios tañi ruca mu. Feimu Jesús feipifi pu 10 huentru ñi amual üyeu. Petu amulelu engün, tremotuingün. Quiñe tüfa, ngüneduamlu ñi tremotun, huiñotui ñi mañumafiel ta Jesús ca püramyeafiel ta Chau Dios. Pu 10 huentru tremotuingün, huelu 1 müten mañumtufi ta Jesús.

Mülefui quiñe domo yenielu 12 tripantu tañi cutrancülen. Müna huesa duamcülefui, fei rume ayüniefui ñi tremotual. Feimu fülcontufi ta Jesús rangi ti pu che meu, fei nüfi ñi huechuñ tacun. Feichi meu müten, tremotui. Feimu Jesús ramtui: “¿Inei am nüñmaeneu ñi tacun?”. Llicalefulu rume ti domo, feipifi ta Jesús chem tañi femün. Fei Jesús tüngduameleyu ca feipieyu: “Papai, cüme feleaimi”.

Quiñe huentru Jairo pingelu llellipufi ta Jesús: “Cüpange tañi ruca mu. Tañi pichi ñahue rume cutrancülei”. Huelu petu ñi puunon engün, lai ti pichi domo. Puulu Jesús, pei fentren che ñi ngümamequen. Jesús feipifi engün: “Fentecünumün tamün ngümamequen. Ti pichi domo umaucülei müten”. Jesús nüñmafi ñi cuhu ti pichi domo ca feipifi: “Pichi malen, ¡huitrapürange!”. Feimu müten huitratui ti pichi domo, fei Jesús feipifi ñi elungeal iyael. ¿Müna ayüucülepelai ñi chau ca ñuque?