Quiñe fütra anümca

Ca quiñe rupa, Nabucodonosor peumai, fei rume llicai. Mütrümfi pu quimche ñi quimelaeteu ñi chem pifel, huelu inei no rume adümlafi ti peuma. Feimu ti lonco ülmen mütrümfi ta Daniel.

Nabucodonosor feipifi ta Daniel: “Peumalu iñche, pefiñ quiñe fütra anümca, huenu mu puhui tañi huechuñ. Huall mapu püle pengequefui, hulquefui fentren fün, ca adelcalefui. Pu culliñ llaufeñ mu ürcütuquefuingün, pu üñüm ellcauquefuingün ti anümca mu. Huelu quiñe cüme püllü nagpai huenu mu, fei nehuentu feipi: ‘¡Catrüfimün ti anümca, entuñmayafimün tati rou! Huelu elcünuafimün tañi mutrung ca folil. Traricünuafimün pañillhue ca cobre mu. Caletuai ñi piuque, raquiduamhuelayai, doi mai huapo culliñ reque feleai. Fei, 7 tripantu rupayai. Com che quimürpuai Chau Dios ñi Ngünechen ngen, feimu dulliafui inei ñi gobiernayal’”.

Chau Jehová quimelelfi ta Daniel ñi chem pifel ti peuma. Quimürpulu Daniel, llicai. Feipi: “Ahuem, lonco ülmen, cümeafui tüfa ñi femtripayal tami pu caiñe mu, huelu eimi mu femtripayai. Feichi fütra anümca tami peumael eimi tati. Müntuñmangeaimi tami lonco ülmencülen, fei cachutuaimi culliñ reque. Huelu ti cüme püllü feipi ñi elcünungeal ti mutrung, fei tüfa adentulei tami huiño lonco ülmencületual”.

Rupalu 1 tripantu, Nabucodonosor trecayaulu tañi ruca mu, adquintufi Babilonia, fei afmatulehuei ca feipi: “¡Ahuem, afmatufali tachi huaria iñche tañi deumael! ¡Afmatufalngen, anai!”. Petu dungumequelu, allcüi quiñe dungun huenu mu tripalu: “¡Nabucodonosor! Feula lonco ülmen-ngehuelaimi”.

Feichi mu, Nabucodonosor huedhued raquiduam nietui, huapo culliñ reque felerpui. Quechanentungei tañi ülmen ruca mu, fei ñi müleal pu huapo culliñ engün. Rume tremi tañi lonco, fei pichuñ ñamcu reque felefui. Cafei, alü tremi tañi huili, üñüm reque.

Rupalu 7 tripantu, Nabucodonosor quimcontui, fei Chau Jehová huiñoleltueyu ñi lonco ülmencületual Babilonia mu. Feimu Nabucodonosor feipi: “Püramyefiñ Chau Jehová, tati Huenu Chau. Fei yehuelcaquefi pu mallma che. Fei tati Ngünechen, feula queta quimniefiñ. Pile, eluafui ta inei rume ñi lonco ülmencüleal”.