Huirintucungei ti pared

Belsasar lonco ülmen-ngerpui Babilonia meu. Quiñe rupa, mangelfi fentren che tañi ipayal, re ülmen che müten cüpai. Feipifi tañi pu cüdaufe: “Cüpalfimün oro copa, tañi chau Nabucodonosor ñi müntuñmafiel Jerusalén mu, Jehová tañi ruca mu”. Belsasar ca tañi pu huitran ñi püramyeafiel tañi pu dios pulcutuingün feitichi copa mu. ¡Fei nga peufaluhui quiñe cuhu huirintuculu pared mu! Afmatufali, adümfalngelai ti huirintucun.

Belsasar llicai. Fei mütrümfi pu calcu ca feipifi: “Tuchi feipielimu ñi chem pifel ti huirin, fei cülangechi gobernantengerpuai Babilonia mu”. Feimu papeltufuingün, huelu adümlafingün. Fei acui tati reina, feipi: “Daniel feipiafeimu ñi chem pifel tüfachi huirin. Fei quimelelquefui ta Nabucodonosor tañi peuma ca afmatufalchi dungu”.

Daniel pepufi ti lonco ülmen. Fei Belsasar feipieyu: “Feipieli ñi chem pifel ti huirintucun, eluayu quiñe falin llancatu, cafei cülangechi gobernadorcünuayu Babilonia mu”. Daniel feipi: “Duamlafiñ falinque dungu. Huelu quimelayu ñi chem pifel tüfachi huirin. Tami chau, Nabucodonosor, mallma huentrungefui. Feimu Chau Jehová norümtueyu tañi ñom chengeal. Eimi quimniefuimi com feitichi dungu, huelu yamlafimi ta Chau Jehová. Pulcutuimi fei quisu tañi oro copa meu. Feimu Chau Dios huirintucui: MENÉ, MENÉ, TEQUEL ca PARSÍN. Tüfa tañi feipin: eimi lonco ülmencülehuelayaimi, pu medo ca pu persa lefcontupayaimu, fei engün gobiernapayaingün”.

Babilonia com hualloñmalerquei fütraque cura malal meu ca quiñe fütra leufü rupaquefui. Fei rume cüdaungefui tañi lefcontungeal. Huelu mai feichi pun meu müten, Persia ñi lonco ülmen, Ciro pingelu, catrütufi ti leufü, fei cañpüle amulcünufi. Femngechi rumeingün pu medo ca persa hueichafe. Puulu engün müten, nülalerquei tati puerta, fei langümfingün ta Belsasar. Fei Ciro lonco ülmen-ngerpui.

Rupalu 70 tripantu ñi apümcangen Jerusalén, Ciro lonco ülmen-ngerpui Babilonia mu. Feichi mu, Ciro feipi: “Jehová feipieneu ñi huiño deumatuafiel fei tañi ruca. Feitichi pu judio ayüle ñi quelluntucupual, amupe”. Fentrenque engün huiñotuingün Jerusalén mu. Femngechi huechurpui Chau Jehová tañi feipicünuel. Cafei, Ciro huiñoleltueyu engün oro ca plata copa ca caquelu falinque fillem, Nabucodonosor ñi müntuñmafiel Chau Dios ñi ruca mu. Afmatufali tüfa, ¿inaduamimi? Ñi montulafiel tañi pu che, Chau Jehová adniefi ta Ciro