Tati Gobierno rumel mülealu

Ti lonco ülmen Nabucodonosor peumai, huelu adümlafi tañi peuma. Huiño umautulafui rume, fente ñi raquiduamcülen tañi chem pifel. Feimu “cüpape pu calcu” pi, fei feipifi engün: “Quimelmuan tañi peuma”. Pu calcu feipingün: “Saquin lonco ülmen, ¿chem peumaimi?”. Huelu Nabucodonosor feipi: “¡Feipilayan! Eimün feipimuan chem dungu ta peuman iñche. Femnolmün, langümngeaimün”. Fei ca huiño feipingün: “Huelu feipimuiñ chem dungu peumaimi, fei hula feipihuaiñ ñi chem pifel”. Ti lonco ülmen feipi: “Re ngünencachequeimün, ¡feipimun chem anta peuman!”. Pu calcu feipingün: “Inei no rume feipilayafui. Pepilfal-lai”.

Fente ñi lladcülen Nabucodonosor, feipi ñi langümngeal com pu quimche ca pu calcu feichi mapu mu. Feimu ca mülefui ñi langümngeal Daniel, Sadrac, Mesac ca Abednego. Huelu Daniel feipifi ti lonco ülmen: “Eluen pichin tiempo ñi quimürpual chem tami peuman”. Feimu Daniel ca tañi pu hueni llellipufingün Chau Jehová tañi quelluaeteu. ¿Chumi cai Chau Jehová?

Chau Jehová pengelelfi ta Daniel chem ñi peuman Nabucodonosor ca ñi chem pifel. Ca antü, Daniel feipi: “Langümlayafimün inei no rume. Iñche quimelelafiñ chem tañi peuman tati lonco ülmen ca ñi chem pifel”. Feimu yengei ñi pemeafiel, fei feipifi: “Chau Dios pengeleimu chem ñi rupayal. Tüfa tami peuma: pefimi quiñe fütra adentun, niefui oro lonco, plata rücu ca lipang, cobre pütra ca chang, pañillhue matra, ca pañillhue engu fotra deumangefui tañi namun. Fei hula, huincul mu tripai quiñe cura, fei nehuentu troncüi ti adentun ñi namun meu. Feimu ti adentun trafoi ca trufürngetui, cürüf mu amui com ti trufür. Ti cura fütra huinculngetui, apolfi com ti mapu”.

Daniel ca feipi: “Tami peuma feipilei tüfa: ti oro lonco adentulei tami lonco ülmencülen Babilonia mu. Ti plata troquiñ adentulei cangelu lonco gobiernayalu. Ca quiñe lonco ülmen mülerpuai cobre reque felealu, ngünenieafi com ti mapu. Cangelu gobierno pañillhue reque feleai. Ca inan lonco ülmen mülerpuai, huelu hudamcüleai tañi gobierno, feimu müte nehuen-ngelayai pañillhue engu fotra reyüleai reque. Feiti cura, fütra huinculngetualu, adentulei ñi lonco ülmen-ngetual Chau Dios. Fei apümafi com pu lonco ülmen ca rumel müleai”.

Nabucodonosor lucutunagi, fei pochongnagi Daniel ñi adquiñ mu, ca feipifi: “Tami Dios pengeleimu ti peuma. Trürümfalngelai tami Dios”. Femngechi Daniel langümngelai, doi mai Nabucodonosor elufi ñi loncoleal com pu quimche mu ca gobernadorcünufi Babilonia mu. Chau Jehová allcütufi ñi llellipuel Daniel, fei quellufi, ¿inaduamimi?