Poyelafingün ti adentun

Pichiñma ñi peuman Nabucodonosor, feipi ñi deumangeal quiñe fütra oro adentun, elcünungei Dura pingechi laf mapu mu. Fei üye mu trahuluhui pu ülmenque che, feimu ca mülerquefui Sadrac, Mesac ca Abednego. Ti lonco ülmen feipi: “Dungulngele ti trompeta, arpa ca gaita mülei tamün pochongnagal ti adentun mu. Inei rume femnole, ütrüftucungeai cütral mu”. ¿Chumi cai Sadrac, Mesac ca Abednego? ¿Chem pimi? ¿Poyefingün ti adentun, cam Chau Jehová müten?

Ti lonco ülmen feipi ñi dungulngeal musica. Com che poyefingün ti adentun. Huelu Sadrac, Mesac ca Abednego femlaingün. Quiñeque huentru peeyu, feimu feipifingün tati lonco ülmen: “Feichi 3 hebreo huentru poyelafingün tami estatua”. Nabucodonosor mütrümfi feichi 3 hueche ca feipifi: “Ca huiño dungulngeai ti musica, fei lucutunagaimün. Femnolmün, ütrüftucungeaimün cütral mu. Chem dios no rume montul-layaimünmeu”. Pu 3 hueche feipingün: “Lucutunaglayaiñ. Taiñ Chau Dios montulafeiñmu llemai. Huelu montulnoeliyiñmu rume, poyelayafiyiñ ti adentun”.

Nabucodonosor rume lladcülefui. Feimu feipifi tañi pu cüdaufe: “¡Doi cofilepe ti cütral!”. Fei ca feipifi tañi pu soltau: “Trariafimün ca ütrüftucuafimün cütral mu”. Pu soltau laingün fülmafilu müten ti cütral, fente ñi cofilen. Pu 3 hueche ütrüftucungeingün cütral mu. Huelu Nabucodonosor adquintumefilu, feula 4 huentru mülerquefui feiti fütra horno reque felelu. Ti lonco ülmen rume llicai ca ramtufi tañi pu quelluqueteu: “¿Cüla huentru no am ütrüftucungei cütral mu? ¡Feula 4 huentru mülei! ¡¿Cüme püllü no am feiti cangelu?!”.

Nabucodonosor doi pülleconlu ti horno mu ca nehuentu huirari: “¡Tripamün, eimün pu poyequefilu tati Fütra Huenu Chau!”. Tripalu pu 3 hueche, com pu che afmatulehuei pefilu ñi cümelcalen engün. Allfülai tañi cuerpo ca tañi tacun lüflai, nümü fitrun nielaingün rume.

Nabucodonosor feipi: “¡Sadrac, Mesac ca Abednego ñi Dios rume afmatufali! Fei huercüfi quiñe cüme püllü tañi montulafiel engün. Trürlai chem dios no rume, fei ca lle müten”.

Tüfachi 3 hueche huentru poyefingün Chau Jehová chem rupalu rume. ¿Eimi cai? ¿Ca femngechi poyeafimi Chau Jehová müten?