Estudiamequelmi, cüme hueniyenieafimi Jehová

1, 2. 1) Eluhulmi tami doi estudiayal, ¿chumaimi? 2) Filipenses 3:16 feipilei “amulepe taiñ femmequen”, ¿chem pifel?

QUIÑEQUE taiñ pu peñi pu lamngen deu entulu ñi cuarto medio, eluhuingün tañi doi estudiarpual. ¿Chemu femingün? “Femngechi niean cüdau tañi mongeluhual ca cüme cüdahuelafiñ Jehová” piqueingün. Eluucülelmi tami doi estudiayal, ¿chem quelluafeimu tami cüme hueniyenieafiel Jehová? (Sant. 4:8). Petu mülelu colegio mu eimi, ¿rupapelaimi quiñeque cüdaungechi dungu mu? Huelu püntütripalaimi Jehová mu. Tami femün colegio mu ‘amulepe tami femmequen’, femngechi serfinieafimi müten Jehová (papeltunge Filipenses 3:16).

² Feitachi versiculo feipilu “amulepe taiñ femmequen”, griego quehun mu raquiduamelafeiñmu chumquen tati pu soltau, trür amulequeingün, huitracünuuquelaingün ca huiño trecauquelaingün. Eimi ayülmi tami doi estudiayal, feitachi pu soltau reque femaimi. Trür amuleaimi tami pu peñi ca pu lamngen engün, yafüluhuaimi tami cüme hueniyenieafiel Jehová, huitracünuulayaimi, amuleaimi müten. Feitachi troquiñ mu peaiñ 4 ngülam Biblia mu mülelu tami quelluaeteu. Deu quimniepelafimi ca deu quelluquepelaeimu tami mongen mu, ca femngechi quelluafeimu doi estudialmi ca deu entulmi tami estudio.

CÜDAUCÜLEAIMI TAMI CÜME HUENIYENIEAFIEL JEHOVÁ

3. Doi estudialmi, ¿chem dungu mu cuñiutucuhuafuimi?

³ ¿Chem dungu mu cuñiutucuhuaimi? Ayülmi tami doi estudiayal, fentren duam nieaimi fill antü. ¿Ayüpelayafuimi tami cüme estudiantengeal? Huelu cuñiutucuunolmi, hunentucuafuimi tami estudio, fei ñochiquechi doyümlayafuimi tami serfiquefiel Jehová. Amulayafuimi chi quiñeque trahun mu, doi pichin amuldunguafuimi, papeltuhuelayafuimi Biblia fill antü ca müte llellipuhuelayafuimi chi (Apoc. 2:4).

4. ¿Chumngechi inayafuimi ñi feipin 1 Corintios 15:58?

⁴ (Papeltunge 1 Corintios 15:58). Quiñe bicicleta tañi amuleal, mülei tañi nengümcüleal. Ca femngechi taiñ amuleal taiñ hueniyeafiel Jehová, mülei taiñ cüdahuelnieafiel. Feimu Biblia feipi: “Rume cüdaucüleaimün Ñidol tañi dungu mu”. ¿Chumngechi inayafuimi feitachi ngülam? Falin-ngefui chumten tiempo elcünuqueimi tami serfiafiel Jehová, huelu tami hunentucufiel mu doi falin-ngei mai. Acordange, eimi estudiamequelmi rume, hunelu mu Jehová tañi cüdaufengeimi (Mat. 22:37). Quiñe üllcha lamngen Samanta pingelu feipi: “Iñche feipihun, rume cüdautuli ñi serfiafiel Jehová tañi estudiamequen mu, elcünuan tañi estudio pin”.

5. ¿Chumafuimi tami cüdahuelnieafiel ta Jehová?

⁵ ¿Chumafuimi petu tami connon tami doi estudiayal? Ngüneduamnge tami hunentucunieafiel Jehová tami mongen mu. Ramtuunge: “¿Deu raquiduamcülen tañi chumal tañi amual trahun mu, tañi amuldungual ca tañi papeltuafiel Biblia?” (Jos. 1:8; Mat. 28:19, 20; Heb. 10:25). Ca ramtuunge: “Colegiotulelu iñche, ¿chem quellueneu ñi hunentucuafiel Jehová? ¿Mülefui chi quiñeque dungu tañi femnoafel? ¿Chumafun feula tañi doi cüme femal?”. Estudiamequelmi, eluucüleaimi tami cüdahuelnieafiel Jehová. Falin-ngei tami cüme estudiantengeal, huelu doi falin-ngei tami cüme hueniyeafiel Jehová (Mat. 6:24).a

6. ¿Chumngechi ngüneduamuhuafuimi? (Ca inaduamnge ti adentun).

⁶ Deu conülmi tami doi estudiayal, fill cüyen ngüneduamuhuaimi. Ramtuhuaimi: “Chau Jehová ñi dungu, ¿hunelepei mai tañi mongen mu?”. Tami quimal, ngüneduamuhuaimi. ¿Huimtuleimi tami amunoal trahun mu cam tami tarde puhual? ¿Zoom mu müten conqueimi? Trahun mu, ¿raquiduamtucuniequefimi tami tarea müten? ¿Doi pichi llellipuqueimi cam doi pichin papeltuquefimi Biblia? Amuldungun mu, ¿re amuqueimi müten? Ca, ¿re raquiduamcülequeimi tami huiñotual? Inaduamuhulmi femngechi dungu mu tami rupamequen, cüme elcünutunge tami mongen. Tami estudio catrütuquilpe tami hunentucuafiel Jehová.

CUÑIUTUCUAFIMI TAMI RAQUIDUAMQUEEL

7. Doi estudialmi, ¿chem raquiduam mu cuñiutucuhuafuimi?

⁷ ¿Chem dungu mu cuñiutucuhuaimi? Quiñeque estudio huelulcayafeimu, quimeltungeafuimi ‘pu che ñi quimün ca coilaque raquiduam’ (Col. 2:8). Quimeltungeafuimi chi ñi mülenon ta Dios ca ñi quisu huefpan ta mongen. Ca feipingeafuimi chi tami quisutu maneluhual. Quiñe hueche peñi feipi: “Re quimelngelaiñ müten quiñe cüdau, cafei chumngechi taiñ raquiduamal. Huelu quiñeque mu chaftuquefui Jehová ñi raquiduam. Ca feipingequeiñ taiñ quisutu maneluhual taiñ rüf ayüucüleal. Huelu feitachi raquiduam famentuquefi reque ta Jehová, feimu doi cüdautun ñi maneluhual Jehová mu”.

8. ¿Chumngelu falin-ngei tami cuñiutucuafiel tami raquiduamqueel? (Proverbios 5:1, 2).

⁸ (Papeltunge Proverbios 5:1, 2). Biblia ngülamtueiñmu: “Cuñiutucuafimi tami raquiduamqueel”. ¿Chemu cuñiutucuafimi? Tati Huecüfü ca tañi pu inanieteu ayüquei tami hueluraquiduamelaeteu (1 Ped. 5:8). Tati pu che quimnofilu Jehová ca raquiduam nieingün chem ñi cümen ca chem ñi cümenon, cheu ñi tuhun ta mongen ca ñi mülen ta Chau Dios. Feitachi raquiduam mu müte maneluuhuelayafuimi chi Jehová ñi quimeltuel Biblia mu. Fei engün feipiafeimu ñi doicülen tañi quimeltuel engün, huelu feingelai, “Chau Ngünechen huedhued dungu troquiquefi mapu mülechi quimün” (1 Cor. 3:18-20).

9. Tami raquiduam, ¿chumngechi cuñiutucuafimi?

⁹ ¿Chumafuimi petu tami connon tami doi estudiayal? Petu tami doi estudianon, ngüneduamuhuaimi tami feyentuquepen mai Biblia ñi quimeltuel. Feimu ramtuunge: “¿Chemu feyentuquen Dios mu? ¿Chemu maneluuquen Biblia cüpai Chau Dios mu? ¿Chemu feyentuquen ti huercün dungu mülelu Biblia mu doicülei ñi raquiduamquen pu che? Colegio mu quimelngelu evolucion mu, ¿ramtuuquefun ñi rüf mülen Dios? Tañi pu compañ femlu huesaque dungu, ¿cüdautuquefun ñi inayentunoafiel?”. ¿Ayüafuimi quiñeque dungu tami femngechi femnoafel? Fei raquiduamnge chumafuimi feula tami doi nehuentuleal tami feyentun. Eluunge tami cuñiutucual tami raquiduam petu tami estudialen (2 Tim. 2:16-18).b

10. ¿Chumaimi tami cuñiutucunieal tami raquiduam?

¹⁰ Deu conülmi tami estudiayal, quiñeque mu ngüneduamniehuaimi. Ramtuunge: “Ñi femquen pu che ayüquenolu Jehová, ¿müte huesa troquihuelafiñ? Quimelngelu pu che ñi quimün cam coilaque quimeltun, ¿ngüneduamfemquen? ¿Rüf maneluucülen Jehová ñi Gobierno müten cüme elcünutuafi com dungu?”. Tami hueluraquiduamelnoaeteu tami pu compañ ca quimeltufe, ¿chumafuimi? Chillcatuafimi Biblia ca raquiduamaimi tami papeltuel mu. Femülmi tüfa, maneluucüleaimi Biblia ñi feipin tati rüf dungu (1 Tim. 4:15).

CÜME ADCÜNUAFIMI TAMI TIEMPO

11. Petu tami estudialen, ¿chemu cüdaungeafui tami cüme adcünual tami tiempo?

¹¹ ¿Chem dungu mu cuñiutucuhuaimi? Doi estudialmi, doi fentren tiempo duamaimi, doi mai mülealu examen cam ñi femal quiñeque cüdau. Cüme adcünunolmi tami tiempo, fill raquiduamcüleafuimi cam rume cansaleafuimi, feimu cuñiutucuhuaimi tami tremoleal ca cümelcaleal tami raquiduam.

12. ¿Chem dungu tami femal duamimi tiempo? (Efesios 5:15, 16).

¹² (Papeltunge Efesios 5:15, 16). Cüdaungeafui tami cüme adcünual tami tiempo nielu cai fentren dungu tami femal. Duamimi tiempo tami estudiayal, huelu doi falin-ngei tami müleal tami pu che engün ca tati trahunche engün (Sal. 133:1; Prov. 18:1). Hunentucuafimi tami pülleleal Jehová mu (Mat. 6:33). Ca duamimi chi tami quelluntucual ruca mu cam nieimi chi quiñe cüdau. Ca duamimi tiempo tami femal ejercicio, tami cansatual, femngechi tami tremoleal (Ecl. 4:6; 1 Tim. 4:8). Tami famentunoal quiñe no rume feitachi falinque dungu, mülei tami cüme adcünual tami tiempo.

13. ¿Chem chumafuimi tami ngünamcanoal tami tiempo?

¹³ ¿Chumafuimi petu tami connon tami doi estudiayal? Biblia feipi chem ñi cüme adcünungeel cüme tripayai (Prov. 21:5). Feimu petu tami connon ñi estudiayal, cüme adcünuaimi tami tiempo. Ramtuunge: “Petu tañi mülen colegio mu, ¿cüme puhulquefun tañi tiempo ñi femal doi falinque dungu?”. Ngüneduamülmi tami doi cüme femafel quiñeque dungu, raquiduamnge chumafuimi feula tami ngünamcanoal tami tiempo. Cüme adnieaimi tami tiempo, femngechi ñi femal com tami duamnieel.c

14. ¿Chem ramtuhuafuimi?

¹⁴ Deu conülmi tami estudiayal, quiñeque mu ngüneduamniehuaimi. Ramtuhuaimi: “¿Nien tiempo tañi femal ejercicio ca tañi cüme ürcütual? ¿Niepen mai tiempo tañi trür müleal tañi pu peñi ca tañi pu lamngen engün? ¿Entuquen tañi tarea ca caquelu cüdau puuchi antü mu? Pepi femnoli, ¿niepen mai rume fentren duam cam ngünamcaquen tañi tiempo? Tañi pu hueni ca tañi pu che, ¿raquiduamquepei mai tañi cüme adcünuquen tañi tiempo?”. Ngüneduamuhulmi tami cüme adcünunofiel tami tiempo, femcünuulayaimi. Quiñeque che rume cüme adcünuquei tañi tiempo, feimu ngülamtuafen piafuimi (Prov. 11:14).

QUIMCHE ENGU MIYAHUAIMI

15. Petu tami estudialen, ¿chem dungu mu cuñiutuculeaimi?

¹⁵ ¿Chem dungu mu cuñiutucuhuaimi? Petu tami estudialen, tami pu compañ mangelafeimu tamu trür rupaleal tripan mu clase. Eimi ayüafuimi chi tami amual, eimi ca huechengelu cai. Ca quiñeque dungu mu trürcülei tamün ayüqueel ca fentren hora trürcülequeimi tami pu compañ engün clase mu. Eimi raquiduamafuimi chi: “Doi cüme yeucülen tañi pu compañ engün, femngechi duamcülelan trahunche mu” piafuimi chi. Huelu cuñiutucuhuaimi, eimi trür estudiaqueimi tami pu compañ engün, huelu quiñeulai tamün raquiduam, eimi hueniyefimi Jehová, huelu fei engün femquelaingün. Doi tiempo mülelmi tami pu compañ engün, doi inayenturpuafuimi tañi raquiduam engün (1 Cor. 15:33). Femngechi dungu mu rupai peñi Michael. Meli tripantu estudiai ca entui ñi practica ñi electricistangeal, feipi: “Tañi pu compañ huesa entuquefuingün tañi dungun, allcütuquefingün musica ñi allcütunoafel pu cristiano ca respetaquelafingün pu domo. Alüñma rupaquelu tañi pu compañ iñchiñ, müte huesa troquihuelafiñ ñi femquen”.

16. ¿Chem quimeltuqueiñmu Proverbios 13:20?

¹⁶ (Papeltunge Proverbios 13:20). Biblia ngülamtuqueiñmu nieliyiñ huesaque hueni, huesa triparpuafuiñ. Huelu tati “quimche engu miyauquelu ca quimchengeai”. ¿Chem quimeltuqueiñmu tüfa? Taiñ pu hueni cümelcayafeiñmu cam huesalcayafeiñmu. Feimu cüme hueniyeafimi feichi pu che ayülu tami cüme feleal ca hueniyefilu Jehová, eimi reque (Sal. 101:6, 7; 119:63).

17. ¿Chumafuimi tami nienoal huesaque hueni?

¹⁷ ¿Chumafuimi petu tami connon tami doi estudiayal? Dulliaimi tunten tiempo tami rupayal tami pu compañ engün. Quiñe peñi feipi: “Cüme yeucülen com tañi pu compañ engün, huelu trahuquelan fei engün tripan mu ti clase mu. Fei engün compañyefiñ müten, huelu hueniyequelafiñ”. Eimi, ¿deu raquiduamcüleimi chem tami chumal? Ramtuhuaimi: “Mülelu colegio mu, ¿tunteñma mülequefun tañi pu compañ engün? ¿Ayüfun quiñeque dungu tañi femngechi femnoafel? Conli tañi doi estudiayal, ¿chumngechi doi cüme femafun?”. Eluhuaimi tami miyahual pu quimche engün, hueniyelayafimi pu piuqueyenofilu Jehová.d

18. ¿Chem ramtuhuafuimi? (Ca inaduamnge ti adentun).

¹⁸ Deu estudiamequelmi, quiñeque mu ngüneduamniehuaimi. Ramtuhuaimi: “¿Hueniyerpufiñ tañi pu compañ? ¿Inayenturpufiñ chumngechi tañi dunguqueel, raquiduamqueel ca tañi femquen engün? Jehová pefiel mu chumngechi ñi yeucülen tañi pu compañ engün, ¿chem piafui?” (Sal. 1:1). Quimtuculmi tami cüme elcünutuafel quiñeque dungu, müchai müten femnge. ¿Inei engün doi cüme hueni piafimi? Feichi pu che piuqueyefilu Jehová, eimi reque. Ca llicalayaimi tami amuldungulelafiel tami pu compañ. Tamün alüñma trür rupaquen, quimnieimu, feimu doi cüme quelluafuimi ñi quimafiel engün ti rüf dungu.

CÜME PEPICAUCÜLENGE

19. Petu tami doi estudianon, ¿chumngechi pepicahuafuimi tami chaftuafiel quiñeque dungu? ¿Chumngechi trürümafuimi quiñe che amulu mahuida mu?

¹⁹ Raquiduamnge tüfachi dungu mu: quiñe che amualu mahuida mu, hune pepicauquei, ngüneduamquei ñi yeal com tañi duamnieel ca cüme quimniei cheu tañi puhual. Quimlai com tañi rupayal petu tañi amulen, huelu cüme pepicaule, quelluayu tañi cüme puhual. Tati ayülu ñi doi estudiayal ca femngechi pepicahuafui tañi cüme tripayal. ¿Chumngechi femafuimi? Cüme hueniyeniefinge Jehová, inaniefinge com tami eluqueteu Jehová tami cuñiutucuaeteu. Ca acordayaimi: quintulayaimi tami ricungeal cam tami falin chengeal, doi mai tami püramyeafiel Jehová com tami femquen mu (Efes. 6:11-13; 1 Cor. 9:26, 27; 10:31).

20. ¿Chumngechi inayafuimi ñi feipin 2 Corintios 13:5?

²⁰ Biblia ngülamtuqueiñmu: “Quisu ngüneduamniehuaimün, fei quimaimün ñi nehuencülen tamün feyentun. Ngüneduamniehuaimün tamün chumngechi chengen” (2 Cor. 13:5). ¿Chumngechi inayafuimi feitachi ngülam petu tami estudialen? Ngüneduamniehuaimi chumngechi taiñ peel feitachi troquiñ mu. ¿Femquepeimi mai fillque dungu tami cüme hueniyenieafiel Jehová? ¿Cuñiutucuniefimi tami raquiduam ñi inanoafiel pu che tañi quimün? ¿Cüme adcünuquepeimi mai tami tiempo? ¿Cüme hueniyefimi pu peñi, pu lamngen ca famentufimi pu huesaque compañ? Rumel femngechi ramtuhuaimi, estudialelmi, cüdaucülelmi ca cheu rume tami mülen. Yafüluhuaimi tami cüme hueniyenieafiel Jehová chummequelmi rume tami mongen mu. Jehová rüf quelluaimu llemai (Prov. 3:5, 6).