Respetanieafiyiñ pu che ñi femquen

1, 2. ¿Chemu caquerumequei taiñ femquen?

QUIÑEQUE mu, ¿huesa troquingeimi tami femün mu? Eimi cai, ¿huesa troquifimi tañi femün quiñe peñi cam lamngen? Epe com iñchiñ femngechi rupaqueiñ.

² Afmatulquelaeiñmu caquerumele ñi femquen pu cristiano. ¿Chemu? Com caquerumeiñ, caquerumei taiñ tuhun, chumngechi tañi tremümngen ca chumngechi taiñ rupaquen taiñ mongen mu, feimu caquerumei chumngechi taiñ raquiduamquen. Femfulu rume, eluucüleaiñ taiñ quiñeucüleal ca tüngcüleal trahunche mu (Efes. 4:3).

3. Cümenolu troquifiliyiñ ñi femün quiñe cristiano, ¿chem ayüafuiñ ñi femal?

³ Cümenolu troquifiliyiñ ñi femün quiñe cristiano, ayüafuiñ chi taiñ nütramcayafiel ñi cacünutual ñi femün. Cam nütramcayafuiñ chi caquelu cristiano taiñ huesa troquifiel ñi femün ti peñi cam lamngen. Cüme duam mu femafuiñ chi. Iñchiñ cai duamtuquefilu taiñ pu peñi ca lamngen, ayüqueiñ tañi cüme feleal engün (Prov. 17:17). Feimu cüpa quellufiyiñ tañi cüme hueniyenieafiel Jehová.

4, 5. Quiñe cristiano femle iñchiñ taiñ femnoafel, ¿chumaiñ?

⁴ ¿Cümepeafui mai feipiafiel ti peñi taiñ ayünofiel ñi femün? Quiñeque mu cümeafui, huelu ca quiñeque mu cümelayafui. Quiñe cristiano raquiduamcülele ñi femal quiñe dungu chaftuquefilu Biblia, quelluafiyiñ ñi nor raquiduamal piuqueyefilu cai iñchiñ (Prov. 27:5, 6). Huelu tañi femün chaftunofile ñi feipin Biblia, re calei müten iñchiñ taiñ femafel, ¿chumaiñ? Biblia feipi: “Caquerumei ñi raquiduam pu che, feimu juzgalayafimün” (Rom. 14:1).

⁵ Quiñeque mu cüdautuafuiñ respetayafiel ñi femquen caquelu cristiano. Tüfachi troquiñ mu, peaiñ chemu respetayafiyiñ ñi chumquen caquelu che ca chumngechi respetayafuiñ. Hune peafiyiñ chemu ayüfuiñ chi taiñ juzgacheal.

¿CHEMU AYÜFUIÑ CHI JUZGACHEAL?

6, 7. Quiñeque peñi ca lamngen, ¿chem dungu mu juzgayafui cangelu cristiano?

⁶ Taiñ deu ngüneduampeel, chumngechi taiñ tremümngen ca chem taiñ rupaquen mongen mu raquiduamelafeiñmu chumngechi entual taiñ dungu. Raquiduamafuiñ com che ñi ca femngechi femafel. Huelu feingelai. Peaiñ quiñeque ejemplo. 1) Petu ñi testigongenon, quiñe peñi tañi chau rume pulcutuquefui. Quiñe rupa pefi pu peñi ca pu lamngen petu pütocolu ta pulcu, feimu huesa duamnagi, “cümelai tamün femmequen” pifi engün. 2) Quiñe lamngen contueyu quiñe huesa cutran, huelu llohui quiñe tratamiento, fei tremotui. Ca rupa, quimi quiñe lamngen contueyu ca femngechi cutran. Feimu feipifi inafinge tüfachi tratamiento, femngechi tremotuaimi iñche reque pifi. Feipiafui ñi iyal quiñeque iyael müten, amual doctor cam pütocoal mapu lahuen. 3) Quiñe peñi coneltuquefui coilaque religion mu, feula famentufi com dungu coneltulu feichi iglesia mu. Quimfilu quiñe peñi amui quiñe funeral mu femngelu iglesia mu, rume lladcüi.a

⁷ Tüfa ca rupayafui. 4) Petu huechengelu quiñe peñi, pu che huesa troquifi pu huentru ñi nieal payun ca pu domo ñi pantalontuleal amun mu falinque trahun mu. Feimu feula quimfilu rume tati hueque dungu ñi feipiel ti quim manelfal cüdaufe, petu feipiquefi pu huentru ñi nienoal payun ca pu domo ñi pantalontulenoal trahun ca amuldungun mu. 5) Cuifi mu, quiñe loncolelu quimfi quiñe cristiano amulu universidad mu, huelu püntütripai Jehová mu. Feula tañi trahunche mu ca quiñe hueche tripalu colegio mu ca ayüquei ñi doi estudiayal, fei ti loncolelu fill raquiduamcülehuei ca nütramcamefi ti hueche ca tañi pu chau ñi doi estudianoal.

8. 1) Quiñe chau, ¿chemu juzgayafui caquelu chau? 2) ¿Chem rupayafui juzgafiliyiñ caquelu cristiano?

⁸ Peaiñ quiñe dungu ñi rupayafel pu chau ca ñuque. 6) Eimi ayünieimi cüme tremümal tami fotüm cam ñahue “chumngechi ayüniei ta Chau Jehová” (Efes. 6:4). Feimu catrütuquefimi ñi femal quiñeque dungu engün, huelu caquelu chau müte femquelaingün. Eluquefi permiso ñi doi tarde huiñotual ruca mu cam elufingün celular petu pichicalu. Feimu tami fotüm cam ñahue feipiafeimu: “¿Chumngelu iñche elungequelan ñi femal? Cümeafui tami femal tañi pu hueni ñi chau reque” piafui. Feimu eimi ayüafuimi chi juzgayafiel ñi femquen feichi pu chau. Tüfa quiñeque dungu müten ñi rupayafel, caquelu dungu mu ca quiñeulayafui taiñ raquiduam. Huesa troquiafuiñ chi tunten rupa ngillacaquei quiñe peñi cam lamngen, chumngechi ñi tucutuuquen ca chumquei ñi cüme rupayal, fei huesa duamafuiñ chi. Huelu doi falintulayafiyiñ taiñ raquiduam, doyümafiyiñ ñi quiñeucüleal ti trahunche.

9. Com iñchiñ, ¿chem mülei taiñ femal? Ca, ¿chem femlayaiñ? (Ca inaduamnge ti adentun).

⁹ Caquerumeafui taiñ femquen, fei caquelu trürnole tañi femquen, feipilayafuiñ ñi huelulcalen (Rom. 14:5). Biblia feipilu “quiñeucülepe tamün raquiduam”, feipi ñi com inañmayafiel Jehová ñi huercün dungu. Feipilai ñi trürcüleal com taiñ femquen (2 Cor. 13:11). Raquiduamnge tüfa: alün che ayüafui ñi amual ca mapu mu, quisuque dulliafui chumngechi puhual, auto mu, tren mu cam avion mu amuafuingün. Quisuque raquiduamafui chumngechi ñi pepi amual ca chumngechi doi ayüquei. Huelu com engün puhuai feiti mapu meu. Ca femngechi com pu cristiano caquerumei tañi femquen, huelu com iñchiñ duamqueiñ ayühulafiel Chau Jehová. Feimu ngelai taiñ juzgayafiel chem ñi femquen pu peñi ca lamngen (Mat. 7:1; 1 Tes. 4:11).

¿CHEMU RESPETAYAFIYIÑ PU CHE ÑI FEMQUEN?

10. Ñi feipin Santiago 4:12, ¿chem elungelaiñ taiñ femal? Ca, ¿chemu?

¹⁰ Biblia feipieiñmu chemu taiñ respetayafiel caquelu che ñi chumquen. Peaiñ quiñeque dungu. Iñchiñ elungelaiñ autoridad taiñ juzgayafiel pu che ñi chumquen (papeltunge Santiago 4:12). Chau Jehová müten juezngei ca pepicaucülei ñi feipial chem ñi cümen ca chem ñi cümenon. Pu peñi, pu lamngen, quisuque huitraleai Jehová tañi adquiñ mu, iñchiñ taiñ adquiñ mu no (Rom. 14:10). Iñchiñ ayülayafuiñ chi pu che tañi femün, huelu ngelai taiñ juzgayafiel ca huesa dunguyeafiel tañi femquen engün.b

11. ¿Chumafuiñ ñi quiñeucüleal ti trahunche? (Ca inaduamnge ti adentun).

¹¹ Jehová ayüquei ñi caquerumen tañi pu serfiqueteu ca ayüquei ñi quiñeucüleal engün. Femngechi pengeli com tañi deumael mu. Ngelai quiñe tromü no rume trürcülelu ta caquelu. Ca femngechi fentren che mülei mapu mu, huelu trürlaiñ. Quiñe che no rume trürcülelai ñi chumngen tañi ange ca tañi raquiduam. Chau Jehová deumaeiñmu taiñ caquerumeal. Huelu trürcülenofule rume taiñ chumngen, Jehová ayüquei taiñ quiñeucüleal. Feimu cüme yeucüleaiñ taiñ pu peñi ca pu lamngen iñchiñ, ayünofuliyiñ rume ñi femquen quiñeque mu. Falintulayafiyiñ müten iñchiñ taiñ raquiduam ca taiñ ayüqueel, doyümnieafiyiñ mai ñi quiñeucüleal ti trahunche (Rom. 14:19).

CHUMNGECHI RESPETAYAFIYIÑ CAQUELU CHE ÑI FEMQUEN

12, 13. Raquiduamliyiñ ñi cüme miyaunon quiñe che, ¿chem ramtuhuaiñ? (Gálatas 6:1; ca inaduamnge ti huichulechi dungu “Quiñeucülenoli ñi raquiduam caquelu che iñchiñ”).

¹² Quiñe che femfule iñchiñ taiñ ayünoel. Ramtuhuaiñ: “Ñi femün ti peñi, ¿famentuquepefi mai Biblia ñi feipin? Cam, ¿femmequei müten iñche tañi femnoafel?”. Ngüneduamliyiñ ñi cüme miyaunon quiñe peñi, ramtuhuaiñ: “¿Cümepei mai iñche tañi ngülamtuafiel? Cam, ¿caquelu che doi cümeafui ñi femal, quiñe loncolelu chi?”. Eimi pepicaucülelmi tami femal, piuqueyenquechi quelluafimi (papeltunge Gálatas 6:1). Quiñeque mu femngechi rupayafui chi, huelu epe fill rupa cümei ñi femquen taiñ pu peñi ca pu lamngen, caquerumei taiñ raquiduam müten. Feimu chem pilayafiyiñ rume ca huesa dunguyelayafiyiñ. Com che elungei ñi dullial tañi chumal, feimu respetayafiyiñ ca juzgalayafiyiñ taiñ pu peñi ca lamngen (Rom. 14:2-4).

¹³ Raquiduamnge tüfa: quiñe peñi mangelfi tañi hueni imeal cocineria mu, fei feipifi: “Eimi iyaimi iñche tañi iyal”. ¿Cümepei mai tañi feipin? Femlai llemai. Doi cümei tañi hueni ñi quisu dullial chem tañi iyal. Ti peñi ayünofule rume, ilayafi, feimu duamtulayafui chem ñi iyal tañi hueni. ¿Chem quimeltueiñmu tüfa? Obligalayafiyiñ pu che ñi femal iñchiñ taiñ ayüqueel, femngechi pengelafiyiñ taiñ respetaquefiel.

14. ¿Chumngechi quelluntucuafuiñ ñi quiñeucüleal ti trahunche? (1 Corintios 8:12, 13).

¹⁴ Iñchiñ dulliliyiñ chem taiñ femal. Cüme raquiduamaiñ chem taiñ femal, fei taiñ huesa duamelnoafiel pu peñi ca pu lamngen. Femngechi quelluntucuaiñ ñi quiñeucüleal ti trahunche (papeltunge 1 Corintios 8:12, 13). Cümefule rume chem tañi femal, huelu huesa duamelfile quiñe peñi, ¿cümepeafui mai tami femal? (1 Cor. 10:23, 24).c “Iñche felei tañi dullial chem tañi femal” pilayaimi, doi cümeafui tami raquiduamal caquelu che tañi chum duamafel (Rom. 15:1). Quimnieiñ, taiñ pu peñi ca lamngen mülei ñi respetayafiel taiñ femquen, chumngechi iñchiñ respetaquefiyiñ. Huelu cafei mülei taiñ loncontucual ñi feipin Biblia: “Tamün cümelcaucüleal com pu che engün, femaimün tunte tamün pepi femün” (Rom. 12:18). Feimu femaiñ com taiñ pepi femün taiñ quiñeucüleal iñchiñ ca huesa duamelnoafiel taiñ pu peñi ca lamngen.

15. ¿Chumquei pu loncolelu ñi quiñeucüleal ti trahunche? (1 Corintios 4:6).

¹⁵ Pu loncolelu respetaquefingün ñi femquen caquelu pu che. Entuquelaingün quisu ñi feipin, doi mai inaduamqueingün Chau Dios ñi huirintucuel Biblia mu müten, fei ñi ngülamtucheal. Femngechi quelluntucuqueingün ñi quiñeucüleal ti trahunche (papeltunge 1 Corintios 4:6). Ca doi amulcünuquelai ñi chem pin taiñ publicacion. Quiñe peñi feipifiel mu tañi quelluaeteu, pu loncolelu entuquelaingün ñi ngülam quisu ñi rupan mu, doi mai ñi chem pin ta Biblia (Is. 48:17, 18).

16. Pu loncolelu, ¿chumquei ñi respetayafiel ñi feipin ti troquiñ loncolelu?

¹⁶ Caque quiñeque loncolelu respetaquefingün ñi feipin ti troquiñ loncolelu. Trahuluhun mu pu loncolelu ñi dullial chem tañi femal, llellipuqueingün Chau Jehová ñi adnieaeteu tañi nehuen, ca cüme ngüneduamqueingün ñi chem pin Biblia. Epe com pu loncolelu quiñeucülele ñi raquiduam, fei feipingün chem ñi femngeal trahunche mu. Feimu quiñe loncolelu quiñeucülenole ñi raquiduam caquelu loncolelu mu, ca mülei ñi quelluntucual ñi cüme tripayal ti dungu (Efes. 5:17). Pu loncolelu cüme inaduamqueingün ñi chem pin Chau Jehová ñi troquiñche, fei ñi cüme adümafiel ca doicünunoafiel ñi feipin. Com cüme inaduamqueingün ñi feipin ti publicacion, entuquelaingün quiñe feipin müten ñi raquiduamelafiel pu che ñi rüfngen quisu ñi raquiduam.

17. Respetafiliyiñ pu che ñi femquen, ¿chumngechi cümelcangeaiñ?

¹⁷ Deu peiñ tüfachi chillcatun mu, com iñchiñ caquerumeiñ. Caquerumei taiñ raquiduam ca taiñ ayüqueel. ¡Müna ayüfali ñi caquerumen Chau Jehová tañi troquiñche! Trürlai taiñ tuhun ca taiñ chumngen, huelu tüfa quelluqueiñmu taiñ cüme feleal trahunche mu. Taiñ trürnon mu püntüulayaiñ, doi mai hueluconque respetahuaiñ. Femngechi cüme feleaiñ, ayüucüleaiñ ca doi quiñeucüleai ti trahunche (Sal. 133:1; Mat. 5:9).