Biblia ñi ngülam mu pepicanieafiyiñ taiñ raquiduam

1, 2. 1) ¿Chem elungei Adán engu Eva? 2) ¿Chumngechi pengelafuingu ñi mañumcülen?

PU CULLIÑ raquiduamquelaingün ñi chumal. Ca tati pu maquina pepicacünungei chem cüdau tañi femal. Huelu taiñ pu chengen felelaiñ. Taiñ deumaeteu Chau Dios, elueiñmu taiñ dullial chem chumal taiñ mongen mu. Iñchiñ, pu rüf cristiano, rume falintuquefiyiñ tüfa. Chau Dios deumafilu ta Adán, quisu tañi ad mu femcünufi (Gén. 1:26, 27). Adán ca tañi domo Eva elungei quimün ca elungei tañi dullial chem tañi chumal.

² Chau Jehová elulafi ta Adán engu Eva rume fentren ley dungu. Re feipifi engu ñi cuñiutucuafiel ti mapu ca ñi apolafiel tañi pu choyün meu. Chau Jehová ngen-ngei ñi feipiafiel pu che chem ñi femafel ca ñi femnoafel, feimu Adán engu Eva ngelafui ñi doi amulcünuafiel (Gén. 1:28; 2:16, 17). Adán engu Eva, ¿chumngechi pengelafuingu ñi mañumcülen? Jehová am elueteu com tañi niequefel, mülefui ñi inayal engu tañi chem pieteu Chau Dios. Femngechi pengelafui engu ñi piuqueyefiel ca ñi cüpa ayühuelfiel (Prov. 23:15).

3. ¿Chumingu Adán engu Eva?

³ Biblia feipi Adán engu Eva cüme dullilaingu ñi chumal ca inanielafingu tañi chem pieteu Chau Dios. Quisutu duamuhuingu müten. Pengel-laingu ñi piuqueyefiel ca ñi mañumniefiel Chau Dios (Gén. 3:1-7). Tañi huesa dullin mu engu, famülque mu petu cutrancaumequeiñ (Rom. 5:12).

4. 1) Ñi feipin Gálatas 6:5, ¿chumqueiñ fill antü? 2) ¿Ca chem elueiñmu Chau Dios?

⁴ Fachantü cüdaungei ta mongen. Caque rume dungu nieiñ taiñ dullial fill antü, pichique dungu cam fütraque dungu (papeltunge Gálatas 6:5). Fei, ¿chumngechi ayühuelafuiñ Chau Jehová taiñ dulliqueel mu? Hunelu mu loncontucuaiñ: duamnieiñ taiñ quelluaeteu (Prov. 16:3; Jer. 10:23). Jesús ca duamniefui ñi quelluaeteu tañi Chau, culpafengelafui rume (Heb. 5:7). Doyelchi mai iñchiñ duamnieiñ tañi quellun, culpafengelu cai. Chau Jehová ca quiñe dungu elueiñmu taiñ cüme dullial, tüfa taiñ raquiduam. Doi inaduamaiñ tüfachi dungu.

¿CHUMNGECHI QUELLUQUEIÑMU TAIÑ RAQUIDUAM?

5. ¿Chumngechi quelluqueiñmu taiñ raquiduam?

⁵ Taiñ raquiduam quelluqueiñmu taiñ dullial chem ñi cümen ca chem ñi cümenon. Chau Dios femngechi deumafi com pu che, tañi pu quimnoeteu rume (2 Cor. 4:2). Quiñe juez reque nieiñ lonco mu, ngüneduamquei taiñ raquiduamcülen ca taiñ femün, ca feipiqueiñmu ñi cümen cam ñi cümenon (papeltunge Romanos 2:14, 15). Taiñ raquiduam feipiqueiñmu taiñ cüme femal ca famentuafiel huesaque dungu (1 Sam. 26:8-11). Quisutu dulliafuiñ rume, huelu taiñ raquiduam quelluqueiñmu taiñ quimal chem ñi cümen ca chem ñi cümenon. Femngechi, taiñ dulliqueel mu, ayühuelafuiñ ta Chau Jehová.

6. ¿Chumngelu quiñeque mu quellulayafeiñmu taiñ raquiduam?

⁶ Huelu taiñ culpafe chengen mu, quiñeque mu taiñ raquiduam quellulayafeiñmu. Chumngechi taiñ tremümngen, cheu taiñ tuhun ca huesaque illutun huesalcayafui taiñ raquiduam. Feimu Biblia feipilei quiñeque che ñi raquiduam pepicaucülelai, “podcülei”, “yafülei, marcalei reque quiñe cofilechi pañillhue meu” ca huesalcalei (1 Cor. 8:12; Tito 1:15; 1 Tim. 4:2; Heb. 10:22). Femngechi rupale, taiñ raquiduam quellulayafeiñmu. Quiñe romana reque fanefanetunolu, duamfalngei ñi cüme elcünungetual. Ca femngechi, taiñ quelluaeteu taiñ raquiduam, mülei taiñ cüme elcünutuafiel (1 Ped. 3:16). ¿Chumngechi femafuiñ?

¿CHUMNGECHI PEPICAYAFUIÑ TAIÑ RAQUIDUAM?

7, 8. 1) ¿Chem quelluafeiñmu taiñ pepicayafiel taiñ raquiduam? 2) Biblia ñi ngülam, ¿chumngechi quelluafeiñmu? ¿Chumngechi trürümafuimi tüfa ñi inayal quiñe mapa? (Ca inaduamnge ti adentun).

⁷ ¿Chumngechi cüme pepicacünuafuiñ taiñ raquiduam? Mülei taiñ quimal chem ñi cümen ca chem ñi cümenon Chau Jehová ñi adquiñ mu. Feimu duamfali taiñ papeltuafiel Biblia fill antü. Quimfiliyiñ Chau Dios ñi ley, quimaiñ chumngechi ñi raquiduamquen. Chumngechi ngüneduampeiñ rupachi troquiñ mu, quiñeque ley dungu quiñeque mu müten quelluafeiñmu. Feimu lle mülei taiñ quintual Biblia ñi ngülam, femngechi doi cüme quimaiñ chem raquiduamquei Chau Jehová (Is. 55:9).

⁸ Taiñ mongen trürümngeafui amun mu quiñe mapu mu cheu ñi mülenon rüpü, ca chem no rume señacünungelai. Ti antü ca pu huangülen quelluafeiñmu chumngechi taiñ puhual. Huelu doi cümeafui nieliyiñ quiñe mapa pengelquelu fütraque cura, huincul cam caquelu dungu ñi mülen feitichi mapu mu. Tüfa pengeleiñmu cheu püle taiñ amual. Ca huelulcauliyiñ, quimaiñ chumngechi huiñotual cheu taiñ miyahuafel. Tati mapa, fei tati Biblia. Papeltufiliyiñ, quimaiñ Jehová ñi raquiduam. Fei inafiliyiñ ñi ngülam, maneluhuafuiñ taiñ cüme amulen ca taiñ ayühuelafiel Chau Jehová.

9. Ñi feipin Romanos 9:1, ¿ca chem quelluafeiñmu taiñ pepicacünuafiel taiñ raquiduam?

⁹ Taiñ cüme pepicacünuafiel taiñ raquiduam, duamnieiñ Chau Dios ñi nehuen (papeltunge Romanos 9:1). Chau Dios ñi nehuen mu quimafuiñ chumngechi raquiduamquei Jehová. Cafei quelluqueiñmu taiñ yafüluhual ca taiñ cüpa femal Chau Jehová ñi ayüqueel (Filip. 2:13). Huelu taiñ quelluaeteu Chau Jehová ñi nehuen, ¿chem mülei taiñ femal?

10. ¿Chumaiñ taiñ quelluaeteu Chau Dios ñi nehuen? (Lucas 11:10, 13).

¹⁰ Eluen tami nehuen piafiyiñ ta Chau Jehová (papeltunge Lucas 11:10, 13). Chau Jehová rücüquelai taiñ eluaeteu ñi nehuen (Juan 3:34). Quisu nünacümelquelafi ñi nehuen tañi pu allcütuqueteu (Prov. 1:23; Sant. 1:5). ¿Ca chem duamnieiñ taiñ pepicacünuafiel taiñ raquiduam?

11. 1) ¿Chem doyümaiñ taiñ femal taiñ mongen mu? 2) ¿Chumngelu falin-ngei pepicanieafiel taiñ raquiduam?

¹¹ Rumel eluunge tami ayühuelafiel Chau Jehová (Prov. 8:34, 35). Doyümaiñ taiñ ayühuelafiel Jehová chem rume femliyiñ taiñ mongen mu. Loncontuculiyiñ tüfa, quelluaiñmu taiñ pepicanieafiel taiñ raquiduam. Raquiduamliyiñ Chau Jehová reque ca yafüluuliyiñ taiñ hueñancülnoafiel, cüme pepicaucüleai taiñ raquiduam. Cüdaungei ta mongen, feimu falin-ngei pepicanieafiel taiñ raquiduam. Fentren rupa chem taiñ dullial tripaquelai Biblia meu, taiñ dullial ti cüdau, taiñ educacion, taiñ pu hueni cam chumngechi taiñ rulpaantüleal. Feimu, ¿chumafuiñ taiñ ayühuelafiel ta Chau Jehová taiñ dulliqueel mu? (2 Cor. 1:12).

12. ¿Chumngechi quimafuiñ taiñ amulen ti cüme rüpü mu? (Efesios 5:10).

¹² Papeltuafiyiñ Biblia ca cüme raquiduamnieafiyiñ (Sal. 49:3). Papeltun mu ta Biblia, quintuaiñ fillque ngülam taiñ quimal chumngechi raquiduamquei Chau Jehová (papeltunge Efesios 5:10). Femngechi, cüdaungele ta mongen, quimaiñ ñi chumlen taiñ raquiduam. ¿Quelluquepeiñmu mai taiñ cüme dullial taiñ chumal? (Prov. 2:4-9, 11-13). Ca duamfalngele, Biblia ñi ngülam quelluaiñmu taiñ cüme elcünutuafiel taiñ raquiduam, fei taiñ famtripanoal ti cüme rüpü meu (Heb. 5:14).

13. ¿Chem dungu inayentulayafiyiñ pu Israel che?

¹³ Petu taiñ dullinon, quintuaiñ Chau Jehová tañi ngülam. Inaduamaiñ chem ñi femün pu Israel che ca chumngelu inayentulayafiyiñ engün. Feichi apümcangelu Jerusalén 607 tripantu mu, quiñeque Israel che mülenagingün Judá mapu mu. Fei feipifingün ta Jeremías: “Tami Chau Ngünechen Jehová feipipe chem rüpü taiñ inayal ca chem taiñ chumal” (Jer. 42:3-6). Huelu deu dullirquefuingün tañi chumal. Feimu ayülafingün chem ñi feipieteu Chau Jehová, femingün tañi ayünieel müten. Fei rume huesa tripaingün (Jer. 42:19-22; 43:1, 2, 4). Inayentulayafiyiñ engün. Doi mai, petu taiñ dullinon, hunelu mu quintuaiñ Biblia ñi ngülam taiñ quimal chem raquiduamquei Jehová. Fei hula eluhuaiñ taiñ femal.

14. Taiñ dullial, ¿chumngelu inayafiyiñ Chau Jehová tañi ngülam?

¹⁴ Taiñ dullial, inayafiyiñ Chau Jehová tañi ngülam (Mat. 7:24-29; Sant. 1:23-25). Femün mu tüfa, eluuqueiñ taiñ adnieaeteu Chau Jehová ñi nehuen. Femngechi amuleai taiñ elunieaeteu ñi nehuen (Hech. 5:32). Huelu eluunoliyiñ taiñ quelluaeteu, chaftuafiyiñ Chau Jehová tañi nehuen, hueñancülafiyiñ reque (Is. 63:10; Hech. 7:51; Efes. 4:30). Fei niehuetulayafuiñ Chau Dios tañi nehuen (Sal. 51:11; 1 Tes. 5:19). Tüfa rupale, rume huesa triparpuafuiñ, duamnieiñ Chau Jehová tañi nehuen taiñ cüme amuleal (Efes. 3:16).

¿CHUMNGECHI QUINTUAFUIÑ BIBLIA ÑI NGÜLAM?

15, 16. 1) ¿Chumngechi peafuiñ fillque ngülam Biblia mu? 2) Quiñe che cüdautule ñi ngüneniehual putun dungu mu, ¿chem ngülam Biblia mu quelluafeyu?

¹⁵ Püneafiyiñ fillque quellu taiñ chillcatual. Taiñ inayal Chau Jehová ñi ngülam, mülei taiñ quimal chumngechi peafiel Biblia mu. Raquiduamnge tüfa: quiñe che tami chillcatulelquefiel Biblia cüdautuquei ñi ngüneniehual putun dungu mu. Fei tañi cüme dullial putun dungu mu, ¿chumngechi quelluafuiñ ñi peal cümeque ngülam Biblia mu? Rume quelluafeyu INTERNET MÜLEYECHI LIFRU Watchtower. Cheu ñi feipilen “Huirintucunge tami quintual”, huirintucuafui “pulcu”. Fei tripayai quiñe troquiñ feipilelu “Inayafimi Jehová ñi raquiduam pulcu meu” (ngüneduamnge Ti Huerquen diciembre 2023).

¹⁶ Inaduamaiñ 5 cümeque ngülam huiriconcülelu feichi troquiñ mu. 1) Biblia catrütuquelai taiñ putual pulcu (Sal. 104:5; Ecl. 10:19). 2) Ngelai taiñ ngollicahual (1 Cor. 6:10; Efes. 5:18). 3) Pu che huimtulele rume ñi ngollicahual, mülei taiñ inayal Jehová ñi raquiduam (Éx. 23:2; 1 Cor. 10:31). 4) Taiñ dullin mu huelulcalayafiyiñ caquelu (Rom. 14:21; 1 Cor 10:24). 5) Mülei taiñ inayal ñi chem pin ti gobierno pulcu dungu mu (Rom. 13:1-5). Feimu Biblia feipinole rume tunte ñi putual caque quiñeque che, tüfachi ngülam quelluafi ti che ñi quimal chem raquiduamquei Chau Jehová putun dungu mu.

17. Epu noviohuen ñi adcünual tañi mafün, ¿chumngechi peafuingu cümeque ngülam?

¹⁷ Epu noviohuen testigo, ¿cheu peafuingu cümeque ngülam ñi cüme adcünual tañi mafün? Ca quelluafeyu ti INTERNET MÜLEYECHI LIFRU Watchtower. Cheu ñi feipilen “Huirintucunge tami quintual”, huirintucuafuingu “mafün”. Tripayai quiñeque troquiñ pengelquelu Biblia ñi ngülam. Inaduamaiñ 6 ngülam. 1) Com ñi femngeal mafün mu, mülei ñi püramyengeal Chau Jehová (1 Cor. 10:31, 32). 2) Tamu tacun quimfalngepe tamu mallmangenon ca cuñiutucuhuaimu ñi huelulcanoafiel caquelu che (1 Tim. 2:9; 1 Ped. 3:3, 4). 3) Inayentulayafimu pu poyequenofilu Chau Jehová, feimu quintuquilmu tamu rume afmatungeal (1 Juan 2:15, 16). 4) Com cüme adcünungepe (1 Cor. 14:40). 5) Fiesta mu ngelai ñi ngollicahual ca pofolcahual pu che (Gál. 5:21). 6) Elfalcünungeafui quiñe che ñi ngüneduamafiel ti fiesta, fei ñi ayühuelafiel Chau Jehová (Juan 2:8, 9).

18, 19. 1) ¿Ca chem quelluafeiñmeu? 2) ¿Chem ngülam nütramcalu fillque fiesta mu peafuiñ tüfachi lifru mu? (Inaduamnge ti huichulechi dungu “¿Quintupeafuiñ mai Biblia ñi ngülam tüfachi dungu mu?”).

¹⁸ Cangelu quellu taiñ nieel, fei tati lifru Biblia ñi ngülam adniequeiñmeu pingelu. Tüfachi lifru niei fentren quimeltun. Caque quiñeque quimeltun mu mülei fillque ramtun ca troquiñ Biblia, tüfa quelluqueiñmu taiñ quimal chem raquiduamquei Jehová. Quiñe dungu, quiñe cristiano ramtuhuafui ñi amual cam amunoal quiñe fiesta mu. Tüfachi lifru niei quiñe quimeltun feipilelu “Fiestas ca falinque trahun”. Ca tüfa mu mülei quiñe troquiñ feipilelu “Fillque fiesta ñi famentuquefiel pu cristiano”.

¹⁹ Tüfa mu mülei quiñe ramtun feipilelu “¿Chumngelu cümelai coneltuleal quiñe fiesta nüucülelu coilaque religion meu? (1Co 10:21; 2Co 6: 14- 18; Ef 5: 10, 11)”. Tüfa mu ca üitungei quiñeque fiesta ñi ayüquenoel Chau Dios. Cafei cheu ñi feipilen “Quiñeque fiesta püramyequefilu quiñe pais”, mülei caquelu falinque texto. Tüfachi ngülam quelluafeiñmu fiestañmangele quiñe gobierno ñi femün, quiñe pais ñi hueichan cam püramyengele quiñe che Chau Jehová reque. Chau Jehová ñi troquiñche eluqueiñmu fillque quellu taiñ pepicayafiel taiñ raquiduam. Feimu rume mañumcüleiñ.

CÜME PEPICAUCÜLEPE TAIÑ RAQUIDUAM

20. ¿Chumngechi pengelafuiñ taiñ cüme pepicanieafiel taiñ raquiduam?

²⁰ Chau Dios elueiñmu taiñ quisutu dullial taiñ chumal. Rume falintuquefiyiñ. Huelu ca falin-ngei pepicayafiel taiñ raquiduam taiñ cüme dullial. Femngechi püramyeafiyiñ Chau Jehová ca inayafiyiñ ñi ayünieel. Taiñ femal, duamnieiñ Chau Dios tañi nehuen. Feimu lle llellipunieafiyiñ taiñ eluaeteu ñi nehuen ca eluucüleaiñ taiñ adnieaeteu. Biblia ñi ngülam ca quelluaiñmeu taiñ pepicanieafiel taiñ raquiduam. Com tüfachi cümeque dungu elueiñmu Chau Jehová, feimu ngünamcalayafiyiñ. Femngechi ngüneduamaiñ tunte taiñ quellunieteu ta Biblia (2 Tim. 3:16, 17; Heb. 4:12).