¿Chumngelu falin-ngei Biblia ñi ngülam?

1, 2. 1) ¿Chumngelu feipiqueiñ rume cuifi tuhun-ngei ti Biblia? 2) ¿Chemu petu quelluchequei Biblia?

TI BIBLIA rume cuifi tuhun-ngei. Ti hunen lifru huirintucungei 3 mil 500 tripantu peno cuifi mu ca ti afchi lifru huirintucungei epe 2 mil tripantu cuifi. Huelu Biblia mu mülei “Chau Ngünechen ñi dungu”, feimu quelluchequei fantepu mu (Heb. 4:12; 2 Tim. 3:16, 17). Rume fentren che feipiqueingün fente tañi quelluqueteu ta Biblia ñi chaftuafiel huesaque dungu fachantü.

² Huelu, ¿chumngelu quiñe cuifi lifru rume quelluquefi pu che fachantü? Mülei 2 dungu. Quiñe, Biblia tañi feipin cüpai taiñ “mongelechi Chau Ngünechen” mu, fei deumaeiñmu ca doicülei tañi quimün (1 Tim. 4:10; Rom. 16:26, 27). Epu, rupalu rume ta tripantu, Biblia tañi ngülam caletuquelai, manelfali. Cafei cuifi ca fantepu mu amulei ñi quellufiel pu che tañi chaftuafiel tañi huesaque dungu.

3. ¿Chem ramtun huiñoldungungeai tüfachi troquiñ mu?

³ ¿Chem am Biblia tañi ngülam? ¿Chumngelu rume falintuquefiyiñ? ¿Chumngechi quimtucuafuiñ papeltufiel mu Biblia? Tüfachi troquiñ huiñoldungungeai tüfachi ramtun. Ca peaiñ chumngechi Jesús tañi quimeltun pengeli fente falin-ngei Biblia ñi ngülam.

¿CHEM AM BIBLIA ÑI NGÜLAM?

4. ¿Chem am Biblia ñi ngülam?

⁴ Biblia ñi ngülam fei ta falinque quimeltun adniequefilu Chau Dios tañi ley dungu, ca pengeli chumngelu ñi mülen fillque ley dungu. Chau Jehová ñi ley dungu cüme quimfalcünuquei chumngelu tañi mülen. Quiñeque mu, quiñe ngülam fei ta quiñe ley (Mat. 22:37). Huelu ti ngülam doicülei tati ley dungu mu. Tati ley dungu pichiquen dungu mu müten quelluchequei, cüme pengeli chem ñi chumal pu che ca chumül tañi inangeal. Huelu Biblia ñi ngülam cüme pengelquei chem raquiduamquei Jehová ca inangeafui fillque dungu mu ca chumül rume (Sal. 119:111). Tati ley dungu cambiarumeafui. Huelu Biblia ñi ngülam turpu afquelai ca rumel quelluchequei (Is. 40:8).

5. Quiñe ngülam ca quiñe ley dungu trürlai, ¿chem ejemplo pengeli tüfa? (Ca inaduamnge ti adentun).

⁵ Taiñ quimal chumngelu ñi trürnon quiñe ngülam ca quiñe ley dungu, peaiñ quiñe ejemplo. Quiñe ñuque feipiafui chi tañi pichi püñeñ: “¡Topalayafimi ti cütral cocina mu!”. Tüfa quiñe huercün dungu cam quiñe ley. Femngechi feipilu ti ñuque, cüpa quimeltufi tañi püñeñ ñi topanoafiel chem no rume cofilelu, femngechi ñi lüfnoal. Tüfachi ngülam ca inangeafui plancha mu, tetera ca chem chemcün rume cofilelu. Cafei inangeafui tüfachi ngülam ruca mu ca cheu rume. Tremle ti püñeñ, feipingehuelayai tañi topanoafiel ti cütral, huelu acordanieai tañi quimeltueteu tañi ñuque. Feimu ti ley duamfalngehuelayafui, huelu ti ngülam mülelu fei mu cambiaquelai.

¿CHUMNGELU FALIN-NGEI BIBLIA ÑI NGÜLAM?

6. 1) Jehová, ¿chumngechi adnieiñmu Biblia mu? 2) ¿Chumngechi Jehová pengeleiñmu taiñ falintueteu?

⁶ Chau Jehová rume piuqueyeiñmu, feimu elueiñmu ley dungu taiñ cuñiutucuhual (Sant. 2:11). Cafei quimeltuqueiñmu chem tañi raquiduamqueel ca chemu elueiñmu tati ley dungu. Chau Jehová elcünui fillque ngülam Biblia mu taiñ adnieaeteu. Feita quelluqueiñmu taiñ cüme dullial ca taiñ cüme femal mülenole rume quiñe ley dungu. Chau Jehová eluquelaeiñmu fillque ley, doi mai eluqueiñmu ngülam, femngechi pengeli taiñ falintueteu. Elueiñmu taiñ quisutu dullial, femngechi pengelafuiñ taiñ piuqueyefiel ca taiñ cüpa allcütuniefiel (Gál. 5:13).

7. Feipinge quiñe ejemplo mu chumngelu falin-ngei Biblia ñi ngülam (ca inaduamnge ti adentun).

⁷ Taiñ cüme quimal chumngechi quelluqueiñmu Biblia ñi ngülam, raquiduamaiñ fillque señal de transito. Fentren señal de transito pengeli chem ñi femal ca ñi femnoal pu che amulniefilu auto. Quiñeque tüfa pengeli tañi matu amunoal cam chumül tañi huitracünual ti auto. Ti che inanofile tüfachi señal, multangeafui. Huelu ca quiñeque señal pengelquei ñi mülen cuñihun-ngechi dungu, tüfa pengelafui ti rüpü ñi trayafcülen cam ñi mülen culliñ. Ti amulniefilu auto pefile tüfachi señal, cüme raquiduamai chem ñi chumal ca doi cuñiutucuhuai. Cafei, mahunle, cuñiutucuhuai ñi cüme amulnieafiel tañi auto. Ca femngechi Biblia mu fillque ley chem taiñ femal ca chem taiñ femnoal. Huelu ca mülei fentren ngülam taiñ cuñiutucuhual. Inafiliyiñ, raquiduamlayaiñ ca femlayaiñ chem no rume taiñ yeafeteu taiñ culpayal. Feimu rume falin-ngei Biblia ñi ngülam.

8. Ñi feipilen Romanos 12:1, 2, ¿chumngechi cümelcaqueiñmu Biblia tañi ngülam?

⁸ Quintuliyiñ ngülam Biblia mu mülelu ca inaniefiliyiñ taiñ mongen mu, nieafuiñ falinque cümelcan. Quiñe dungu, quimafuiñ chumngechi raquiduamquei Jehová. Papeltun mu Biblia ñi nütram, entuqueiñ cümeque quimeltun. Fei hula ramtuhuafuiñ: “¿Chumngelu tripai Biblia mu tüfachi quimeltun? Ca, ¿chumngechi inayafuiñ taiñ mongen mu?”. Femngechi quimaiñ chumngechi taiñ serfiafiel ta Jehová ‘com taiñ raquiduam meu’. Cafei cüme quimaiñ “Chau Ngünechen tañi piel, feiti cümelu, ayüfalngelu ca tutelu” (papeltunge Romanos 12:1, 2).a

9. Inanieliyiñ Biblia ñi ngülam taiñ mongen mu, ¿chumngechi cümelcaqueiñmu? (Hebreos 5:13, 14).

⁹ Inaniefiel mu Biblia ñi ngülam, doi cüme inayentuquefiyiñ Jehová. Inaniefiliyiñ Biblia ñi ngülam, doi cüme hueniyefiyiñ Jehová (papeltunge Hebreos 5:13, 14). Pu pichiqueche duamniei fentren ley tañi quimal chem chumal fillque dungu mu, fei inayafuingün chi tañi castigangenoal. Huelu Chau Jehová pichiqueche reque troquiquelaeiñmu, doi mai füchaqueche reque. Chau Dios maneluuquei iñchiñ mu taiñ inayal tañi ngülam ca taiñ cüme dullial. Femngechi femliyiñ, ayühulafiyiñ ñi piuque (Sal. 147:11; Prov. 23:15, 26; 27:11).

¿CHUMNGECHI QUIMTUCUAFUIÑ JEHOVÁ ÑI RAQUIDUAM?

10. ¿Chumngechi quimtucuafuiñ Jehová ñi raquiduam?

¹⁰ Papeltufiel mu Biblia, cümei taiñ ngüneduamal chem raquiduamquei Jehová fillque dungu mu. Ca raquiduamaiñ chumngelu Chau Jehová elcünui quiñeque ley. Femngechi doi cüme quimafuiñ Jehová ñi raquiduam. Petu estudialiyiñ, llellipuafiyiñ ta Chau Dios taiñ quelluaeteu ca yafüluhuaiñ taiñ doi cüme raquiduamal taiñ papeltun mu (Prov. 2:10-12). Cafei ramtuhuafuiñ: “¿Chumngelu elcünui Chau Dios tüfachi ley? Huesa dungu troquifile Jehová tüfachi femün, ¿chem raquiduamafui cangelu femngechi dungu mu? ¿Chem quimeltun entuafun tüfachi nütram mu? Ca, ¿chumngechi inayafun tañi mongen mu?”. Cüme ngüneduamliyiñ chumngelu Jehová elcünui quiñeque ley ca chem quimeltuqueiñmu Biblia ñi nütram, femngechi cüme dulliaiñ taiñ chumal taiñ ayühulafiel Jehová.

11. Jesús ñi hueupin, ¿chumngechi quimeltueiñmu quimtucual Jehová ñi raquiduam? (Ca inaduamnge ti adentun).

¹¹ Jesús hueupilu huincul mu, quimeltui chumngechi quimtucual Jehová ñi raquiduam. Peaiñ 3 dungu. Quisuque dungu mu, Jesús hune nütramcai tati ley mu, fei hula nütramcai chumngelu Chau Dios elcünui tüfachi ley. Raquiduamün mu chem ñi feipin, quimafuiñ chumngechi inayal feitachi ngülam taiñ cüme dullial fachantü.

12. Tati ley mülelu Mateo 5:21, 22, ¿chem quimeltuafeiñmu? (Ca inaduamnge ti adentun).

¹² (Papeltunge Mateo 5:21, 22). Jesús feipi: “Langümchelayaimi”. ¿Chem quimeltun entuafuiñ feitachi ley mu? Chau Jehová ayüquelai taiñ üdeafiel pu che taiñ femün ca feipin mu, ca ayüquelai taiñ huesa raquiduamal caquelu che mu. Jesús feipi quiñe che langümchelayafui rume, huelu üdeniefile tañi peñi, inalayafui chem ñi quimeltuel feitachi ley, feimu ca culpayafui Jehová mu. Jesús ca feipi “inei rume illcutuniefile tañi peñi” cam “illamcadungufile tañi peñi”, Chau Dios ‘ramtucadunguayu’. ¿Chemu? Quiñe che femngechi femlu, yeafeyu tañi langümcheal (1 Juan 3:15).

13. Fachantü, ¿chumngechi inayafuiñ ti ngülam mülelu Mateo 5:21, 22? (Ca inaduamnge ti adentun).

¹³ Fachantü, ¿chumngechi inayafuiñ ti ngülam mülelu Mateo 5:21, 22? Huesa femngeliyiñ, quiñepülecünuafiyiñ taiñ huesa duamcülen ca taiñ rume illculen (Lev. 19:18; Job 36:13). ¿Chemu? Illcutuniefiliyiñ ti che, üderpuafuiñ, fei huesa duamelafuiñ taiñ feipin ca taiñ femün mu (Prov. 10:12). Illculeliyiñ, huesa dunguyecheafuiñ ca coila dungu feipiafuiñ caquelu che mu. Tüfachi dungu podüñmayafui quiñe che ñi cüme üi (Prov. 20:19; 25:23). Jesús ñi antü mu, ngelafui ti redes sociales, internet, celular cam computador. Huelu ñi feipin quimeltueiñmu taiñ huesa dunguyechenoal celular cam computador mu. Iñchiñ turpu langümchelayafuiñ, ca femngechi turpu feipilayafuiñ ca huirintuculayafuiñ chem huesa dungu rume ñi huesalcayafiel pu che.

14. Tati ley mülelu Mateo 5:27, 28, ¿chem quimeltuafeiñmu? (Ca inaduamnge ti adentun).

¹⁴ (Papeltunge Mateo 5:27, 28). Jesús feipi: “Ñihuaquelayaimi”. ¿Chem quimeltun entuafuiñ feitachi ley mu? Chau Jehová üdequefi ti pod cudumuhun, cafei chem raquiduam rume taiñ yeafeteu conal pod cudumuhun mu. Jesús feipi quiñe huentru niele afcadi, huelu adquintuniefile cangelu domo ca illurpufile, deu culpai. Feimu cüdaungele rume, com nehuen mu famentuafiyiñ huesaque raquiduam (Mat. 5:29, 30). Tüfachi ngülam ca mülei ñi inayal pu cristiano nienolu afcadi.

15. Fachantü, ¿chumngechi inayafuiñ ti ngülam mülelu Mateo 5:27, 28? (Ca inaduamnge ti adentun).

¹⁵ Fachantü, ¿chumngechi inayafuiñ ti ngülam mülelu Mateo 5:27, 28? Famentuafiyiñ fillque podngechi raquiduam (2 Sam. 11:2-4; Job 31:1-3). Feimu pu cristiano cüme hueniyefilu ta Jehová famentuquefingün ti pornografia. Feipiquelaingün: “Re leliniefiñ müten, huelu conquelan pod cudumuhun mu”. Iñchiñ trürlaiñ pu poyequenofilu ta Jehová, fei engün raquiduamquei ñi mülen pornografia huesalcaquenolu. Jesús ñi antü mu, ngelafui electronico chemcün, pelicula ca foto no rume. Huelu tüfachi ngülam quelluqueiñmu taiñ quimal chem ñi raquiduamqueel Jehová, fei ayüquelai taiñ huercülelafiel caquelu che video cam foto pengelquelu pod cudumuhun, cafei ayüquelai taiñ nütramcayal ca huirintucual podngechi dungu taiñ celular mu. Jesús ñi ngülam quelluquefi pu nieulu ñi ñihuañpenoafiel tañi afcadi (Mal. 2:15). Rüfcünu, quelluquefi com pu cristiano, pu nielu afcadi cam pu nienolu, tañi connoal pod cudumuhun mu (Prov. 5:3-14).

16. Tati ley mülelu Mateo 5:43, 44, ¿chem quimeltuafeiñmu? (Ca inaduamnge ti adentun).

¹⁶ (Papeltunge Mateo 5:43, 44). Jesús feipi: “Piuqueyefinge tami chafche”. ¿Chem quimeltun entuafuiñ feitachi ley mu? Chau Jehová ayüniei taiñ piuqueyeafiel com pu che. Jesús ñi antü mu, pu judio inaquelafuingün tüfachi huercün dungu ca quimeltuquefuingün pu che tañi üdeafiel tañi pu caiñe. Huelu Jesús cüme quimniefui ti ley femngechi dungu feipiquelai. Cüme quimniefui chem ñi ayünieel tañi poyen Huenu Chau, fei ayüniei taiñ piuqueyeafiel com pu che chem tuhun-ngele rume (Mat. 5:45-48).

17. Fachantü, ¿chumngechi inayafuiñ ti ngülam mülelu Mateo 5:43, 44? (Ca inaduamnge ti adentun).

¹⁷ Fachantü, ¿chumngechi inayafuiñ ti ngülam mülelu Mateo 5:43, 44? Taiñ piuqueyefiel taiñ pu chafche coneltuquelaiñ hueichan ca caiñetuhun mu (Is. 2:4; Miq. 4:3). Cafei fürenequefiyiñ pu che caque tuhun-ngelu ca chem religion niele rume (Hech. 10:34, 35). Taiñ piuqueyechen quelluqueiñmu taiñ perdonayafiel taiñ pu huesa femeteu iñchiñ ca taiñ familia (Mat. 18:21, 22; Mar. 11:25; Luc. 17:3, 4).

ELUHUAIÑ TAIÑ INAYAL BIBLIA ÑI NGÜLAM

18. 1) ¿Chem eluhuaiñ taiñ femal? 2) ¿Chem ngüneduamaiñ cüpalechi troquiñ mu?

¹⁸ Chau Jehová troquiquelaeiñmu pichiqueche reque, doi mai fütaqueche reque, ¡rume mañumniefiyiñ! Quisu ayüniei taiñ inayal Biblia ñi ngülam, fei taiñ cüme dullial fill antü (1 Cor. 14:20). Femngechi femlu iñchiñ, eluhuaiñ taiñ loncontucual “chem ñi ayünieel ta Chau Jehová” (Efes. 5:17). Ayünieiñ cüme dullial chem chumal fente taiñ piuqueyefiel ta Jehová ca taiñ ayühulafiel. Femquelaiñ llicaniefiel mu taiñ castigangeal. Taiñ cüme femal, Chau Dios elueiñmu quiñe regalo: taiñ raquiduam. Fei ngüneduamaiñ cüpalechi troquiñ mu.