8-14 JUNIO, 2026
ÜLCANTUN 8 Jehová incañpeaiñmu
Jehová ñi feipicünuel femürpuquei
“Eimi montulen, ahuem, Chau Jehová, eimi tati Dios rüf dunguquelu” (SAL. 31:5).
¿CHEM QUIMAIÑ?
Chemu maneluuqueiñ Jehová ñi femal ñi feipicünuel ca ñi apümafiel Huecüfü ca tañi coilatuquen.
1. Ñi feipin Salmo 31:2-5, ¿chumngelu maneluhuafuiñ Jehová mu?
FACHANTÜ fill püle mülei coilatun dungu ca ngünencan dungu. Quiñeque mu cüdaungeafui peafiel manelfalngechi che. Quiñeque ngen empresa ngünencachequei. Quiñeque fendequelu coilatuquei ñi ngillañmangeal tañi chemcün. Ca quiñeque mu, taiñ pu hueni femlayafui taiñ feipicünueteu. Huelu Chau Dios femquelai, fei am rüf dunguquelu (papeltunge Salmo 31:2-5). Chau Jehová coilangelai, com tañi feipin rüfngei llemai. Feimu maneluhuafuiñ ñi femal com tañi feipin.
2. ¿Chem peaiñ tüfachi troquiñ mu?
2 Feitachi troquiñ mu, ngüneduamaiñ chumngelu maneluhuafuiñ Jehová mu com taiñ piuque mu. Fei hula peaiñ chumai Jehová tañi apümafiel Huecüfü ca com tañi ngünenieel ca chummequei fachantü ñi femtripayal tañi ayüqueel. Com tüfa quelluaiñmu taiñ nehuen piuquecünuhual taiñ quimeltucheal Chau Jehová mu.
¿CHUMNGELU MANELUHUAFUIÑ JEHOVÁ MU?
3. ¿Chumngelu maneluhuafuiñ Jehová mu com taiñ piuque mu?
3 Maneluhuafuiñ Jehová mu taiñ deumaeteu mu. Fei deumai ta huenu, mapu ca itrofill mongen mülelu (Gén. 1:1; Sal. 36:9; Apoc. 4:11). Cafei, Jehová pepicacünufi ti mapu taiñ nieal com taiñ duamnieel taiñ mongeleal. Quisu com ngüneniei. Chau Jehová com quimün niei ca com nehuen niei. Feimu maneluhuafuiñ taiñ cüme adnieaeteu ca taiñ eluaeteu cüme mongen cüpalechi antü mu.
4. Jehová, ¿chumngechi quimfalcünui taiñ piuqueyenieteu?
4 Maneluhuafuiñ Jehová mu taiñ piuqueyenieteu mu. Jehová elufi mongen tati pu che tañi ayüucüleal engün quisu reque. Cafei deumaeiñmu taiñ inayentuñmayafiel ñi cüme chumngen (Gén. 1:26). Elueiñmu taiñ quisutu dullial taiñ chumal. Ca elueiñmu quiñe ayüfalchi mülehue (Sal. 115:16). Elfalcünulelfi ta Adán engu Eva ñi adelcayafiel com chi mapu, ¡afmatufalchi cüdau! (Gén. 1:28; 2:15). Elcünulelfi cümeque iyael, fillque culliñ ca anümca ñi ayüumayal tañi mongen. Femngechi quimfalcünui fente taiñ piuqueyenieteu, fei tüfa fentecünulayai (Sal 103:17).
5. 1) ¿Chumi Jehová ñi caiñetueteu Adán engu Eva? 2) ¿Chem dungu ñi feipicünuel Chau Dios deu femtripai? (Inaduamnge ti huichulechi dungu “Jehová ñi feipin rüf tripaquei”).
5 Maneluhuafuiñ Jehová mu, fei rumel huechurpuquei tañi feipin. Jehová deumafilu mapu, “ngünam deumalafi, huelu mai deumafi ñi müleal tati pu che” (Is. 45:18, 19). Huelu Adán engu Eva caiñetufingu ta Ngünechen, fei condenangei ñi layal. Fei, ¿Huecüfü catrütupefi mai Chau Dios ñi ayünieel? Femlai llemai, chem no rume catrütuquelafi Chau Jehová ñi femtripayal tañi feipin (Is. 46:10, 11). Amulei ñi ayünieel tati pu che ñi rumel müleal mapu meu. Feimu elufi ta Adán engu Eva ñi nieal familia. Ca huercüfi tañi Fotüm Jesús ñi montulafiel Adán ñi pu cüpanche, femngechi ñi nieal afnoachi mongen mapu mu (Juan 3:16).
¿CHUMI JEHOVÁ ÑI HUECHURPUAL TAÑI FEIPICÜNUN?
6. Deu püntütripalu Adán ca Eva, ¿chem feipicünui Jehová ñi rupayal?
6 ¿Inei ngüchaltucufi Adán engu Eva ñi caiñetuafiel Jehová? “Tati cuifi fütra filu, Huecüfü ca Satanás pingelu” (Apoc. 12:9; Gén. 3:4, 5; Juan 8:44).a Feimu Jehová feipi ñi puhual chi antü tañi apümcangeal tati Huecüfü (Gén. 3:15). Ca feipi fentren che inayafiel tati Huecüfü ca ñi huesa femün. Huelu ca feipicünui ñi müleal che ñi püntütripanoal Jehová mu.
7. ¿Inei engün inaniefi tati Huecüfü? Huelu, ¿chumngeai engün?
7 ¿Inei engün inaniefingün tati Huecüfü? Pu huesaque püllü caiñetuquefilu ta Chau Dios ca tati pu che feyentuquenolu. Caiñetuquefingün ta Jehová, feimu quiñehuingün tati Huecüfü engün. Huelu Jehová deu elcünui chi antü ñi apümcayafiel engün (Dan. 2:44; Rom. 16:20).
8. ¿Chumi Jesús 1914 tripantu mu? (Ca inaduamnge ti adentun).
8 ¿Chumngelu rüf maneluucüleiñ Jehová ñi apümafiel Huecüfü ca tañi pu inanieteu? 1914 tripantu, Jehová loncocünufi Jesús ñi ngünenieal, fei Jesús eluhui ñi hueichayafiel ta Satanás ca pu huesaque püllü. Fei hueucünufi engün ca ütrüfnacümpafi mapu meu (Apoc. 12:7-9). Huenu meu rupai com tüfachi dungu, huelu mapu mu quimfali ñi ütrüfnacümngepan Huecüfü. Feimu Biblia feipi: “¡Aungei ti mapu ca ti lafquen! Huecüfü nagpui ta eimün meu. Fütra illculei, quimniei ñi pichilehuen tañi antü” (Apoc. 12:12). Puulu feichi 1914 tripantu, Satanás doi nehuentu amulei ñi ngüchaltucuafiel pu che tañi inayaeteu. Feimu llemai doyelcülerpui ta huesaque dungu mapu meu. Huelu pichiñma mu, Jesús famentuafi tati Huecüfü ca apümcayafi tañi pu inanieteu (Apoc. 6:2). Feichi mu, Jesús cüme quimfalcünuai ñi huesa piuquengen ta Huecüfü ca ñi dalluntucufiel ta Chau Dios (Sal. 45:4-6). Femngechi com pu che quimürpuai ñi rüf dunguquen ta Chau Jehová (Ezeq. 38:23).
World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images
Conlu 1914, doi huesalcalerpui dungu mapu meu. (Inaduamnge parrafo 8).
JEHOVÁ TRAHULQUEFI PU PIUQUEYEFILU TI RÜF DUNGU
9. ¿Inei engün trapümmequefi Jehová?
9 Jehová trapümmequefi “com dungu Cristo ñi duam mu: tati dungu huenu mu mülelu ca tati mapu mu mülelu” (Efes. 1:10). Feichi dungu huenu mu mülelu fei tüfa tati pu dullingelu ñi ngünenieal Cristo engu huenu meu. Ca tati mapu mu mülelu fei tati pu che rumel mülealu hue mapu mu. Com pu serfiquefilu ta Jehová cüdaucüleingün ñi quelluafiel caquelu che ñi quimafiel ti rüf dungu, femngechi pengelqueingün Huecüfü ñi fütra coilangen.
10. Jehová, ¿chumngechi quelluquefi pu che ñi quimal ti rüf dungu? (Apocalipsis 14:6, 7).
10 ¿Chumngechi trahulmequefi Jehová feichi pu che falintuquefilu ti rüf dungu? Tati doi fütra amuldungun cüdau com mapu mu (papeltunge Apocalipsis 14:6, 7). Jehová adcünui tañi pu che ñi amuldungual, huelu pu cümeque püllü ca quelluqueingün ñi conal ti trahunche meu pu cüme piuquengelu. Tañi amuldungun mu, Jehová ñi pu che quimfalcünui Huecüfü ñi duam mu pu religion quimeltuquei coilaque dungu Jehová mu (Apoc. 18:2, 4). Pichiñma mu, pu coilaque religion com apümcangeai. Femngechi Jehová, Ngünechen rüf dunguquelu, püramyengeai (Apoc. 17:16).
11. ¿Chumngechi quimfalngequei pu rüf poyequefilu Jehová?
11 Jehová cüpalquefi itrofill che tañi troquiñche mu (Apoc. 7:9, 10). Fei engün allcütulu ti cümeque dungu, tüfa tati rüf dungu piqueingün, feimu ayühunquechi conquei Jehová ñi troquiñche mu (Mar. 13:10). Fachantü doi quimfalngerpui inei tañi poyequefiel Jehová chumngechi tañi ayüqueel. Ti profeta Malaquías feipicünui: “Eimün ca huiño ngüneduamaimün ñi trürnon quiñe nor che ca quiñe huesa che, ñi trürnon quiñe poyequefilu ta Chau Dios ca quiñe femquenolu” (Mal. 3:18). Chumngechi tañi yenieel tañi mongen ca tañi amuldungun meu, pu testigo pengelqueingün ñi rüf poyequefiel Jehová.
12. ¿Chumngechi coneltulei ti amuldungun ñi femtripayal Jehová tañi ayüqueel?
12 Taiñ amuldungun mu ti cümeque dungu, inaquefiyiñ Jesús ñi huercün dungu ca quelluntucuqueiñ ñi femtripayal ñi feipicünuel Jesús (Mat. 24:14; 28:18-20). Taiñ amuldungun ñi duam mu, fentren che huall mapu mu inarpuquefi Jesús ca maneluhui tañi rumel poyenieafiel Jehová. Femngechi quelluntucumequeiñ ñi femtripayal Jehová tañi ayüqueel. Feita, ¡rume falin cüdau!
RÜF MANELUUCÜLEIÑ JEHOVÁ MU
13. Satanás, ¿inei am doi caiñetuquefi ca chumngelu?
13 Satanás fütra illculei, quimnielu cai ñi pichilehuen tañi antü (Apoc. 12:12, 13). Feimu doi caiñetuquefi Jehová ñi dullielchi pu che tañi ngünenieal ñi Gobierno mu. “Tüfa engün inaniequei Chau Ngünechen ñi huercün dungu ca elfalcünulelngei ñi huldungual Jesús meu” (Apoc. 12:17; 14:12). Satanás ca caiñetufi tati pu quelluntucuquefilu pu dullingelu.
14. Satanás lefcontufile Jehová ñi pu che, ¿chem rupayai? (Ca inaduamnge ti adentun).
14 Deu apümcangele ti Fütra Babilonia, tati pu quelluntucuquefilu Satanás eluhuai tañi apümcayafiel Jehová tañi pu che. Fei mu müten conai tati Armagedón hueichan (Apoc. 16:13, 14, 16). Jesús ca tañi pu hueichafe mülelu huenu mu montulafi Jehová tañi pu che ca apümcayafi com pu nüucülelu Satanás ñi ngünenieel (Apoc. 19:19-21). Ngehuetulayai huesaque che ca coilatuquelu (Apoc. 21:8). Femngechi com pu che quimai Chau Dios tañi norngen ca tañi rumel rüf dunguquen.
Armagedón pingechi hueichan mu, Jesús ca tañi pu hueichafe mülelu huenu mu hueichafi Chau Dios ñi pu caiñe. (Inaduamnge parrafo 14).
15. ¿Chumngelu maneluuqueiñ ñi femtripayal Jehová ñi feipicünuel? (Isaías 65:16, 17; ca inaduamnge ti adentun).
15 Fachantü, tati pu che hueluquentu quehuamequei ca coilatuuqueingün. Huelu Jehová ñi duam mu, fei tañi pu che quiñeucülei. Jehová trahulmequefi pu che poyequefilu tati rüf dungu. Chem rume catrütulayafui Jehová ñi cümelcaquefiel tañi pu che ca ti cüdau ñi femqueel (papeltunge Isaías 65:16, 17). Maneluuqueiñ ñi femtripayal Jehová ñi feipicünuel. ¿Chemu maneluuqueiñ? Tañi feipin Pablo: “Chem no rume catrütulayafi Chau Ngünechen taiñ piuqueyeaeteu: lan no rume, mongen no rume, chem püllü no rume, chem gobierno no rume, ti müleyechi dungu ca cüpaleyechi dungu no rume, chem nehuen no rume, tati alüpüralechi dungu ca tati alüconlu no rume, chem no rume ñi deumael Chau Ngünechen. Chem no rume catrütulayafui Chau Ngünechen taiñ piuqueyeaeteu. Ca femngechi piuqueyenieiñmu taiñ Ñidol Cristo Jesús” (Rom. 8:38, 39).
Tati hue mapu mu, fachantü müleyechi huesaque dungu acordangehuelayai. (Inaduamnge parrafo 15).
16. ¿Chumngelu maneluuqueimi Jehová mu com tami piuque mu?
16 Nieiñ fentren dungu taiñ maneluhual Jehová mu. Deumaeiñmu ca rume piuqueyeiñmu. Fei trahulmequefi itrofill che ñi conal tañi troquiñche mu (Is. 60:22; Zac. 8:23). Jehová com femürpuquei tañi feipicünuel ca pichin mu apümcayafi Satanás ca tañi coilatuquen. Feimu lle, David reque feipiafuiñ: “Püramyengepe Chau Dios Jehová [...]. Fei müten afmatufalchi dungu femquei. Rumel püramyengepe tañi fütra üi, tañi afmatufalngen puupe com mapu mu” (Sal. 72:18, 19).
ÜLCANTUN 2 “Jehová pingei tami üi”
a Biblia feipilai inei pingen tüfachi huesa püllü. Huelu Biblia Huecüfü piquefi. ¿Chem pifel tüfa? “Fütra coilatufe”. Satanás ca pingequei, tüfachi üi cüpa feipi “Chau Dios ñi caiñe”.