Huechengelu müten iñche, Jehová quimeltueneu

Petu ñi amulcünunoal chi nütram, feipihuaiñ, iñche choyüngen Calgary, Canadá mapu mu, petu mülefui tati Segunda Guerra Mundial. Petu ñi acunon 1950 tripantu, quiñe hueche precursor Donald Fraser pingelu, amuldungupai taiñ ruca mu. Tañi ñuque eluhui ñi quimelelngeal Biblia. Tañi ñuque rume ayühuleyu ti rüf dungu. Tañi rume cutrancülen mu, pepi amuquelafui com ti trahun meu. Tañi ñuque fautizahui 1950 tripantu mu. Huelu rupalu epe 2 tripantu, larpui. Feichi mu, tañi chau petu testigongelafui, huelu elcünufi quiñe peñi ñi hueupial eluhun meu.

Deu rupalu ti eluhun, quiñe cushe lamngen Alice pingelu, mangeleneu ñi amual trahun mu. Feitachi lamngen dullin cristianangefui. Fei pequefeneu amun mu iñche quiñeque trahun mu tañi ñuque iñchiu, feimu quimniefeneu. “¿Eluafen tañi amual?” pifiñ tañi chau. Mai pieneu, “iñche ca amuan, huelu tüfachi rupa müten tañi mañumafiel ti peñi hueupilu” pieneu. Feichi trahun rume cümefui tañi amual tañi chau, ¿chemu? Tañi chau estudiafui chumngechi ñi hulal hueupin, feimu afmatulehuei allcütun mu rume cümeque hueupin. Femngechi eluhui ñi amual feitachi trahun mu fill semana. Ca rupachi antü mu, com taiñ trahun mu amuquetui.

Feichi mu, ti amulnielu ti trahun üituquefui com pu huirintucunielu ñi üi feichi escuela mu. Feiti allcütulu ñi üi, “fau mülen” piquefui. Quiñe rupa feipifiñ ti peñi ñi ca huirintucual iñche tañi üi, femngechi ñi ca üitungeal cüpalechi trahun mu. Ti peñi piuqueyenquechi saquieneu, huelu feica müten.

Iñche ayüquefun tañi üitungeal müten. Quimlafun tañi elfalcünungeal hueupin. Quiñe semana rupalu, üitungen trahun mu, “¡fau ta mülen iñche!” pin. Aflu ti trahun, rume saquingen. Quiñeque semana rupalu, elungerumen quiñe pichi papel feipilu tañi hulal quiñe hueupin. Tüfachi dungu feipiupeiñ ellaconlu tañi nütram.

¡Rume müllmüllcülefun! Feichi mu inei no rume elfalcünungequelafui ñi papeltuafiel Biblia müten, doi mai mülefui ñi hulal hueupin, 6 cam 8 minuto puuquefui. Tañi chau quellueneu ñi pepicayafiel ti hueupin. ¡Epu mari rupa feipieneu ñi adümcantuafiel! Iñche deu hul-lu tañi hueupin, rume cüme ngülamtungen. Rupachi tripantu mu, Jehová amulei tañi pepicaeteu. Quellueneu tañi chau, adümuucülechi pu peñi ca lamngen ca Jehová tañi troquiñche.

JEHOVÁ AMULEI TAÑI QUIMELTUQUETEU

Lamngen Alice tañi nütramcapeel, quimeleneu chumngechi tañi amuldungual. Feichi mu, mülefui taiñ papeltulelafiel 3 texto tati che, fei hula elelquefuiñ quiñe lifru. Puulu tañi dungual iñche, Alice quelluquefeneu. Fei hune nütramcaquefui, fei hula feipiquefeneu ñi papeltual ti hunen texto. Fei hula, conquefui iñche tañi nütramcayal, fei papeltuquefuiñ ti 2 cangelu texto, fei elquefun quiñe lifru. Rupachi antü mu, quimürpun ñi quisu amulcünuafiel ñi nütramcan. Feiti 1954 tripantu, tañi chau fautizahui, fei coni tañi quimelaeteu tañi amuldungual. Fei quisulefulu rume, eluhui tañi quelluaeteu ñi cüme hueniyeafiel Jehová. Tañi chau rume falintuquefui tati trahun ca tati amuldungun, feimu iñche quimniequefun tayu amual trahun meu ca tayu amuldungual sabado ca domingo pulihuen mu.

Amulu colegio mu, re cümeque nota entuquelafun. Huelu tañi quimürpun quellunieneu fantepu mu. Quimürpun matematica ca chumngechi ñi cüme huirintucual iñche tañi quehun mu. Ca quimürpun chumngechi ñi cüme huirintucual rupaelchi dungu. Com feichi dungu ñi quimürpun quellunieneu fachantü tañi cüdauquen ti Troquiñche Pepicaquelu Huirintucun.

Ramtungequen chumngechi fente falinturpufiñ tati musica, feimu nütramcahuaiñ. Tañi pu chau rume ayüquefui tati musica. Regle tripantu nielu iñche, quimelngen tañi dungulafiel ti piano, huelu tañi profesora quimnoalu troquieneu. Feimu feipifi tañi chau tañi entuaeteu ti clase mu. Illcutulafiñ, rüfcünu iñche müte falintuquelafun ñi dungulafiel ti piano.

Rupachi cüyen, tañi chau quintuleneu cangelu profesora. Feichi mu quimelngen tañi dungulafiel ti piano ca tañi ülcantual, feichi mu rume ayürpufiñ ti musica. Petu ñi pichican, cüme ülcantuquefun ca huehun fentren concurso mu. Ayüniefun tañi profesor de musicangerpual tañi mongeluhual ca tañi precursorngeal. Huelu amulerpulu tañi estudian, ngüneduamün epe com antü tañi estudialeal, niehuelafun reque ta tiempo. Femngechi 1963 tripantu, elcünun tañi estudio, fei precursor regularngerpun.

RUME AYÜHULENEU ÑI PRECURSORNGERPUN

Rupalu quiñe tripantu, üitungen tañi precursor especialngeal, fei huercüngen Kapuskasing huaria mu. Tañi compañ Daniel Skinner pingei, alün tripantu hunencülefui iñche mu. Fei quimeltueneu chumngechi ñi adcünungequen ti trahunche. Epu mari tripantu müten nielu iñche, coneltun tati Comite de Servicio trahunche mu. Petu huechengelu cai iñche, mülefui alün dungu tañi quimürpual. Rume ayühulqueneu ñi pefiel, cuifi reque ñi pepicamequengen pu huecheque peñi. Rume cüdaule engün, Jehová eluafeyu fentren cüdau rume huechengefule rume.

Cüdaungefui müleal Kapuskasing huaria mu. Puquem mu, rume hutrengequefui, 33 puulu 44 grado bajo cero mülequefui. Dan iñchiu epe fill püle namuntuquefuyu müten. Femlu rume, fentren cümeque dungu rupaquefuyu. Quiñe tüfa: quimürpufiñ quiñe lamngen Linda Cole pingelu.

Linda rume ayühulquefeyu tañi amuldungual ca huiño pemetuquefui che ayülu ñi doi quimal. Rume cüme piuquengefui, poyechefengefui ca ayüquefui ñi müleal caquelu che engün. Tañi ñuque Goldie pingei, rume cüme hueniyequefui Jehová. Tañi chau Allen pingei, ellaca mu ayüquelafui pu Dunguquelu Ineingen Jehová. Femlu rume, Goldie yequefui tañi 3 püñeñ, John, Gordon ca Linda, Trahunhue Ruca mu ca quimeltuquefui tañi amuldungual. Com engün precursorngerpuingün. Rupachi tripantu mu, Linda tañi chau ca fautizahurpui ca rume cüdahurpui ti trahunche mu.

Feiti 1965 tripantu mu, mangelngen tati Escuela ñi Pepicangeam pu Loncolelu ca pu Quelluquelu. Feichi escuela 1 cüyen puuquefui ca femngequefui ti Betel mülelu Canadá mu. Petu mülelu escuela mu, feipingen ñi apolafiel ti solicitud ñi amual Galaad mu. Pepicaucülenolu ñi misionerongeal troquiuquefun, feimu raquiduamquelafun ñi femal, huelu apolfiñ müten ti solicitud. Mangelngen tati clase 42 Galaad pingechi Escuela mu. Tati escuela mu, quiñeque mu pu instructor feipiquefeiñmu taiñ chum amulen. Ellaca mu feipingen tañi doi cüme quimürpuafiel Jehová ñi troquiñche petu ñi mülen escuela mu. Iñche 21 tripantu müten niefun, feimu rume quellueneu tüfachi ngülam.

Galaad mu quimürpuiñ chumngechi nütramcayal tati radio, television ca tati diario mu. Rume ayüfiñ quimafiel tüfa. Quimlafun fente tañi quelluaeteu cüpalechi antü mu. Müchai hula doi nütramcahuaiñ.

HUERCÜNGEN SENEGAL MU

Deulu Galaad, Michael Höhle iñchiu misionerongerpuyu. Huercüngeyu Senegal mapu mu, África mu mülelu. Feichi mu, 100 amuldunguquelu müten mülefui Senegal mu.

Quiñeque cüyen rupalu, mangelngen ñi fill semana cüdaumeal 1 antü Betel mu. Huelu Betel fütra rucangelafui, quiñe oficina müten quiñe hogar misional mu. Peñi Emmanuel Paterakis adniequefui ti cüdau Betel mu. Quisu acordalelqueneu üye mu ñi adcünungequen Jehová ñi cüdau com ti pais mu, pichingefule rume ti oficina. Quiñe rupa, peñi Emmanuel ayüfui taiñ huirintuculelafiel quiñe carta com pu misionero taiñ yafültucuafiel. Feichi mu, cüdaungefui ñi copiangeal ti carta ca rume falifui, feimu huirintucufiyiñ maquina mu. Feichi antü fentren carta huirintucufiyiñ. Pichi huelulcaufuliyiñ rume, mülefui taiñ ca huiño huirintucuafiel, feimu fentren cüdau tripai.

Petu tañi amutunon tañi ruca mu, peñi Emmanuel elueneu quiñe carta ca feipieneu: “David, Jehová tañi troquiñche mandaleimu tüfa”. Fei hula papeltufilu iñche, ngüneduamün iñche ñi huirintucufiel feichi carta. Tüfa quimeleneu, pichifule rume cam alüfule rume ti Betel, mülei tañi yamnieafiel Jehová tañi troquiñche.

Fentren hueni nierpun trahunche mu. Sabado nagantü, trahuquefuiñ taiñ cüme rupayal, piuquentucuniefiñ feichi antü. Petu hueniyehuiyiñ. Senegal mu dungungequei frances quehun, feimu ca quimürpun. Feita rume quellueneu huitrancontufiel mu caquelu Betel cheu ñi dungungequen frances.

Feiti 1968 tripantu mu, Linda iñchiu feipicünuhuiyu tayu niehual. Alün cüyen quintun cüdau rangi antü müten, femngechi tayu mür precursorngeal Senegal mu. Huelu pu ngen empresa eluquelafui cüdau ca tuhun che, feimu huiñotun Canadá mu. Nieulu iñchiu, precursor especialngerpuyu, fei huercüngeyu quiñe pichi huaria Edmundston pingelu, püllelefui Quebec mu.

PRECURSORNGEYU EDMUNDSTON CA QUEBEC MU

Feichi huaria mu ngequelafui testigo, mülefui pichin che müten estudiaquelu Biblia. Fentren catolico mülefui, feimu ti religion catolica ngüneniequefui reque pu che tañi mongen. Epe com ruca mu mülefui quiñe letrero feipilu: “Conpaquilpe ti pu testigo”. Huelu feichi mu müte duamtuquelafuiñ tati letrero, feimu conpuquefuiñ müten com ruca mu. Fill semana, quiñe iglesia catolica huirintucuquefui tati diario mu: “Nüafiyiñ tati pu testigo ca llicalcatuafiyiñ tañi huiñohuenoal engün”. Tati huaria mu 4 testigo müten mülequefui, Victor ca Velda Norberg ca Linda iñchiu, feimu quimniefuiñ iñchiñ taiñ feipimequeteu.

Rumel acordanien ti hunen rupa taiñ pepaeteu ti huitran-ngepaquechi loncolelu. Quiñe semana rupalu tañi trür mülen iñchiñ mu, feipieiñmu: “Mülepalmün tüfa mu, quiñe dungu müten femafuimün chi: quelluafuimün tati pu che ñi cüme raquiduamal pu testigo mu”. Eluhuiyiñ taiñ femngechi femal, fei cüme tripai. Tati pu che ñochiquechi inaduamürpuingün pu testigo ñi ñom piuquengen, feimu trürlaingün tati pu loncolechi religioso mu mallma piuquengelu. Fachantü, quiñe pichi trahunche mülei feichi huaria mu.

Rupalu quiñe tripantu peno taiñ mülen fei mu, mangelngeyu tayu quelluconal quiñe fütra trahunche Quebec huaria mu. Cayu cüyen ayühunquechi rupaquefuiñ pu peñi ca pu lamngen iñchiñ, fei elfalcünungen tañi huitrancontuafiel pu trahunche.

Amulechi 14 tripantu mu huitrancontufiyu fentren trahunche Quebec mu mülelu. Cüme rupafuyu llemai. Quebec mu rume cüme tripaquefui ti amuldungun cüdau. Quimfiyu fentren familia papeltumequelu Biblia, pepicaumequefuingün tañi fautizahurpual.

PIUQUENTUCUNIEFIÑ ÑI FENTE CÜDAUQUEN PU PEÑI CA LAMNGEN

Quiñe troquiñ Canadá mapu mu, pu peñi ca pu lamngen dunguqueingün frances quehun. Fei engün cüdaungelai tañi piuqueyengeal. Cüme piuquengefuingün ca ayühunquechi cüdauquefuingün. Huelu quiñeque mu cüdautuquefuingün tañi llohual ti rüf dungu. Quiñeque engün caiñetuquefeyu tañi pu che. Quiñeque huechequeche feipiquefeyu tañi pu chau: “Papeltuhuelayaimi Biblia pu testigo engün. Femnolmi, cañpüle amutuaimi” piquefeyu. Huelu quisu engün püntütripaquelaingün Jehová mu, feimu rume ayühulquepelafingün.

Cafei piuqueyenquechi acordaniefiñ pu precursor regular ca especial mülequefulu Quebec mu. Epe com feitachi pu peñi ca pu lamngen tuulafuingün Quebec mu, feimu mülefui tañi quimcantual frances dungun. Ca mülefui tañi adümal engün pu che ñi huimtun ca tañi raquiduamquen nüucülelu pu catolico mu.

Pu precursor especial huercüngequefui camapulechi lof cheu ñi mülenon testigo. Tati pu che mülelu fei mu ayüquelafui tati pu testigo, feimu rume cüdaungefui ñi peal engün ruca ca ñi peal cüdau rangi antü mu müten. Tañi alquilayal quiñe ruca engün, mülefui ñi trür müleal caquelu testigo engün. Quiñe ruca mu müten müleafui 4, 6 cam 8 che. Pu hue nieulu cütu eluucülefuingün ñi femal. Com feitachi pu peñi ca pu lamngen rume cüdahuelquefuingün ta Jehová. Pefiel mu quiñe che tañi quimeltulelafiel Biblia, com piuque mu quellufingün. Fachantü, Quebec mu mülerpui fentren amuldunguquelu, feimu fentren feitachi pu precursor huiñamtuhuingün cheu ñi doi duamniengeel amuldunguquelu.

Huitrancontufiel mu pu trahunche, sabado pulihuen trür amuldunguquefuiñ pu huechequeche iñchiñ, femngechi taiñ nütramcayaeteu chem dungu tañi rupamequen engün. Fachantü, quiñeque engün misionerongetuingün caque mapu mu. Ca quiñeque nieingün caquelu cüdau Jehová ñi troquiñche mu.

Feichi mu, quiñeque trahunche pepi quelluquelafeiñmu taiñ cullial tati bencina ca tati iyael. Feimu quiñeque mu, afchi cüyen mu niehuelafuiñ plata. Femngechi dungu rupan mu, mülefui taiñ maneluhual müten Jehová mu. Quisu müten quimniefui chem taiñ duamnieel. Turpu quisucünuquelaeiñmu llemai. Faltalequelafuiñ taiñ huitrancontumeafiel pu trahunche.

QUIMELENEU PU PEÑI

Iñche feipiupeiñ nga, rume quellueneu tañi quimel Galaad mu ñi nütramcayal radio mu, television mu ca tati diario mu. Quebec mu fentren rupa femngechi amuldungun. Fentren rupa trür cüdahun peñi Léonce Crépeault iñchiu, fei huitran-ngepaquechi loncolelu, rume adümuuquefui ñi nütramcayafiel pu periodista. Quisu nütramcafiel mu quiñe jefe tati noticiero mu, pengelquelafi tañi rume quimün, doi mai feipiquefui: “Iñche tañi compañ iñchiu amuldunguchequeyu Chau Dios tañi dungu müten, müte adümuuquelayu chumngechi ñi nütramcayal television ca radio mu. Huelu feipingeyu tañi mangelafiel com che quiñe fütra trahun mu tañi nieal pu Dunguquelu Ineingen Jehová. Rume mañumuhuafuiñ quellumuliyiñ”. Tañi ñom piuquengen mu feitachi peñi, fentren che quellueiñmu.

Tañi quimel Galaad mu ca tañi quimeleteu peñi Léonce rume quellueneu. Rupachi antü mu, Betel elfalcünueneu ñi cüdahual peñi Glen How iñchiu, fei abogadongefui. Mülen mu juician dungu ñi tripayafel noticia mu, iñchiu quelluntucuquefuyu. Feitachi peñi nehuen piuque mu incañpequefui Chau Dios tañi troquiñche, huelu doi quimfalngequefui tañi rume piuqueyefiel Jehová. Rume ayühulqueneu tayu trür cüdahun.

Feiti 1985 tripantu mu, feipingeyu tayu huitrancontuafiel pu trahunche inafülcülelu iñche tañi chau mu, femngechi pepi quellufiyu. Huelu 3 cüyen müten rupalu, lai tañi chau. Amuleyu tayu huitrancontuafiel pu trahunche fei püle mülelu. Fei 1989 tripantu mu, mangelngerumeyu tayu amual Betel Estados Unidos mu mülelu. Femngechi fentepuhui tañi superintendentengeal. Epe 19 tripantu huitrancontufiyu pu trahunche, com feichi tripantu mu fentren peñi ca lamngen piuqueyenquechi umaleiñmu tañi ruca mu. Fentren rupa ayühunquechi trür iquefuiñ. Rume mañumniefiyiñ taiñ poyenieteu mu.

HUIÑAMTUHUIYU ESTADOS UNIDOS MU

Ti Betel mülefui Brooklyn huaria mu. Puulu iñchiu, elfalcünungen ñi quelluntucual ti Troquiñche Adcünuquelu ti Amuldungun. Rume mañumcülen tañi pepicangen mu ta fei mu. Quimürpun ñi rume falin-ngen tañi cüme ngüneduamal ñi rüfngen cam ñi rüfngenon quiñe dungu. Fei 1998 mu ca cüdau elungen, fei quelluntucun ti Troquiñche Pepicaquelu Huirintucun. Petu mülen tüfa mu, amulei ñi quimürpun chumngechi ñi doi cüme entual ñi cüdau. Fentren tripantu mu, quelluniefiñ tañi peñi John Barr, quisu adniequefui ti Troquiñ Adcünuquelu Huirintucun. Rumel piuquentucuniefiñ com tañi quimeltueteu ca tayu trür cüdahun, rume cüme cristianongefui.

Pu peñi ca lamngen cüdauquelu ti Troquiñche Pepicaquelu Huirintucun, rume ñom piuquengeingün, feimu rume ayühulqueneu taiñ trür cüdauquen. Rumel llellipuquefingün Jehová tañi quelluaeteu. Quimnieingün Jehová tañi nehuen mu müten cüme tripaquei chi cüdau, quisu ñi duam mu femlayafuingün.

Linda iñchiu rume ayühuleiñmu tayu amun 110 pais taiñ pemeafiel taiñ pu peñi ca lamngen. Piuqueyenquechi llohueiñmu pu misionero, pu peñi adcünuquelu Betel ruca ca caquelu peñi ca lamngen fill antü cüdahuelquefilu Jehová. Ca afmatuleiñmu inaduamfiel pu peñi pu lamngen ñi nehuencülen engün chem dungu rume rupafule. Müleafui rume quehuan, filla dungu ca inantucungen, serfiniefingün müten ta Jehová. Rume piuqueyepelaeyu Jehová.

Linda rume quelluqueneu tañi cüme yenieal tañi cüdau com feitachi tripantu. Quisu rume piuqueyefi pu che, feimu quintuquei chumngechi tañi quelluafiel. Cheu rume tañi miyahun, quisu cüdautuquelai tañi nütramcayafiel pu che. Quellufi fentrenque che tañi quimafiel Jehová, ca fentren peñi ca lamngen amuhuequenolu trahun mu quellufi ñi huiñotual Jehová mu. Tañi domo quiñe regalo ca müten tañi elueteu Jehová. Fachantü füchayu, feimu rume mañumcüleyu pu huecheque peñi ca lamngen tayu quellueteu fillque dungu mu (Mar. 10:29, 30).

Raquiduamün mu ñi rupan com tüfachi 80 tripantu mu, rume mañumcülen. Ti salmista reque feipiquen: “Ahuem, Chau Dios, eimi quimelelen petu tañi huechengefel mu, ca fantepu meu amulen tañi quimeltufiel tami afmatufalchi cüdau” (Sal. 71:17). Eluucülen tañi femngechi femal tunte puule tañi mongen.