Huesa rupaliyiñ, raquiduamaiñ Jehová reque

1, 2. Rupan mu huesaque dungu, ¿chumafuiñ taiñ nehuencüleal? (Ca inaduamnge ti adentun).

JEHOVÁ rume piuqueyefi tañi pu che. Huelu fentren tañi pu che huesa rupamequeingün (Sal. 90:10). Quiñeque catrütuqueyu tañi pu familia tañi serfinoafiel ta Jehová. Ca quiñeque inantucungequeingün cam carcelconcüleingün tañi amuldunguquen mu. Ca fentren engün cutrancüleingün ca füchaingün. Ca quiñeque layeluhuingün cam rupaingün quiñe fütra huesa dungu tañi mongen mu. Eimi cai, ¿rupamequeimi quiñeque tüfachi dungu mu?

² Taiñ nehuencüleal rupan mu huesaque dungu, mülei taiñ raquiduamal Jehová reque. ¿Chemu? Cüme raquiduamnoliyiñ, quimlayaiñ taiñ chumal taiñ chaftuafiel taiñ huesa rupamequen. Feita trürümafuiñ amuleliyiñ auto mu. Podcülele ti vidrio, cüme pelayafuiñ ñi huesalcalen tati rüpü. Huelu lifcülele ti vidrio, peaiñ ñi chumlen tati rüpü, fei huesalcalerumele, quimaiñ taiñ chumal. Ca femngechi cüme raquiduamliyiñ rupan mu huesaque dungu, quimaiñ taiñ chumal. Feitachi troquiñ mu ngüneduamaiñ: 1) chem ayüquei Jehová taiñ raquiduamal rupan mu huesaque dungu, 2) chem rupayafui raquiduamnoliyiñ Jehová reque, ca 3) chumafuiñ rupan mu huesaque dungu.

CHEM NGÜNEDUAMAIÑ RUPAN MU HUESAQUE DUNGU

3. ¿Chumngelu com iñchiñ rupaqueiñ huesaque dungu mu?

³ Com rupaqueiñ huesaque dungu mu. Feitachi mapu ngünenieyu Huecüfü ca com iñchiñ culpafe chengeiñ, feimu rupaqueiñ huesaque dungu. Cafei doi pichilehuele ñi acual Jehová ñi antü, doyelcülerpuai ti huesaque dungu. Doi müleafui nüyün, fütraque cürüftucu mahun, lüpümtucuhun ca doi huesalcamequeai tati pu che (Mat. 24:8; 2 Tim. 3:13). Jehová com cüme elcünutufule fachantü, quelluafui reque Huecüfü tañi ngünenieal. Feimu Huecüfü petu ngüneniele mapu, rupayaiñ llemai huesaque dungu mu (Ecl. 9:12).

4. ¿Ca chemu cutrancauqueiñ?

⁴ Ca cutrancauqueiñ taiñ inaquefiel mu Jesús. Jesús fentrenque rupa feipifi tañi pu discipulo tañi inacangeal engün tañi feyentun mu (Mat. 24:9; Juan 16:2). Quimfiel mu tüfa, doi eluuqueiñ taiñ inanieafiel Jesús inacangeliyiñ (1 Tes. 3:3, 4). Püntütripanoliyiñ Jehová mu rupan mu rume huesaque dungu, doi maneluucüleafuiñ taiñ amulen ti rüpü taiñ eluaeteu rumel mongen. Ca pengelqueiñ taiñ poyequefiel Jehová, quisu müten felelu am tañi ngünenieal. Ca quimfalcünuqueiñ Huecüfü tañi coilatufengen. Feipiquei pu che ñi poyequefiel Jehová tañi cümelcangeal müten. Tañi pengelal tañi rüfngen tañi feipin, huesalcaquefi Chau Dios tañi pu che (Job 1:9-11). Huelu püntütripanoliyiñ Jehová mu, pengelqueiñ taiñ piuqueyefiel ca ayühulquefiyiñ (Prov. 27:11).

5. ¿Chem quimeltuafeiñmu tañi feipin ta Salomón? (Eclesiastés 7:13, 14; ca inaduamnge ti adentun).

⁵ Jehová com catrütuquelafi ñi rupayal huesaque dungu. Jehová huesa femquelai ca turpu huesalcaquelaeiñmu (Sant. 1:13). Huelu Salomón feipi “Chau Dios ñi elcünuel cümeque antü ca cüdaungechi antü” (papeltunge Eclesiastés 7:13, 14). ¿Chemu feipi? Tüfa feipilai Jehová ñi adcünuel tati huesaque dungu, doi mai feipilei catrütuquelafi tañi rupayal. ¿Chem quimeltueiñmu Salomón ñi feipin? Huecüfü petu ngüneniele tüfachi mapu, quiñeque mu ayüucüleafuiñ ca quiñeque mu hueñancüleafuiñ. Feimu cümeque dungu rupaliyiñ, mañumafiyiñ Jehová quisu am taiñ ayühulqueteu. Salomón ñi feipin ca quimeltuqueiñmu quimlaiñ ñi chumleal taiñ mongen, acurumeafui cümeque dungu ca huesaque dungu. Feimu inei no rume montulayafui ñi rupanoal huesaque dungu, cüme chengele cam huesa chengele.

6. ¿Chumngelu Jehová com catrütulayafui taiñ huesa rupaquen? (Hebreos 12:7, 11).

⁶ Rupamequeliyiñ huesaque dungu mu, Jehová quimeltuafeiñmu taiñ maneluhual fei meu, iñchiñ meu no. Fei com quimniei taiñ rupamequen. Huesa rupaliyiñ, quisu hueñancüquei. Jehová catrütulayafui taiñ huesa rupayal, huelu adniequeiñmu, eluqueiñmu nehuen ca pengelqueiñmu taiñ piuqueyeteu (Sal. 23:4). Cüdaungechi dungu rupan mu, doi inaduamqueiñ taiñ chumngen, fei Jehová quelluqueiñmu llemai taiñ doi cüme cristianongerpual (papeltunge Hebreos 12:7, 11). Femngechi dungu mu rupai Job. Duamniefui tañi doi ñom piuquengeal. Jehová huesalcalaeyu, huelu catrütulai ñi rupayal huesaque dungu mu. Femngechi Job quimürpui falinque dungu (Job 42:1-6). Feimu, Jehová catrütunole rume taiñ huesa rupayal, quelluaiñmu llemai taiñ püntütripanoal fei mu ca cümelcayaiñmu (Rom. 8:35-39).

7. ¿Chemu ayüucüleafuiñ inantucungeliyiñ rume?

⁷ Inantucungeliyiñ rume, ayüucüleafuiñ. Caiñetungelmi tami serfiniefiel mu Jehová, raquiduamquilnge Jehová tañi ayüucülenon eimi meu. Doi mai acordayaimi: caiñetungelmi tami femquen Jehová ñi ayüqueel, ayühulquefimi (Mat. 5:10-12). Raquiduamtucuniefiliyiñ tüfachi dungu, ayüucüleafuiñ caiñetungen mu rume pu apostol reque (Hech. 5:40-42). Cafei amulele tami serfiquefiel Jehová, quelluafuimi caquelu ñi quimürpuafiel Jehová ca ñi püramyeafiel (1 Ped. 2:12). Acordayaimi tañi rupan José. Jehová üngümlai tañi lifreletual tañi cümelcayafiel, doi mai cümelcafi petu tañi huesa rupamequen. Eimi ca femngechi cümelcayafeimu Jehová huesa rupamequelmi rume (Gén. 39:3, 23).

8. Rupan mu huesaque dungu, ¿chem raquiduamtucuafuiñ taiñ nehuencüleal?

⁸ Rumel cutrancaulayaiñ. Job rume cutrancahui, huelu Biblia feipi: “Jehová cümelcafi ta Job ñi mülehuechi tripantu tañi mongen mu, doi ñi femfiel ellaca meu” (Job 42:12). Iñchiñ cafei, fachantü fentepuafui quiñeque dungu taiñ huesalcaqueteu. Huelu femnole rume, tati hue mapu mu Jehová apümcayafi com taiñ cutrancaqueteu. Feimu raquiduamliyiñ fente taiñ cümelcaletual taiñ afnoachi mongen mu, pichin-ngelu troquiafuiñ taiñ huesa rupalen. Raquiduamün mu tüfa, nehuentucuqueiñmu taiñ püntütripanoal Jehová mu (Mat. 24:13).

NOR RAQUIDUAMNOLIYIÑ, DOI HUESALCALERPUAFUIÑ

9. ¿Chumngechi doi huesalcalerpuafui taiñ rupamequen nor raquiduamnoliyiñ?

⁹ Huesa rupamequeliyiñ, doi huesalcalerpuafuiñ nor raquiduamnoliyiñ. Raquiduamafuiñ chi Jehová taiñ cutrancamequeteu. Femngechi raquiduamürpui Job, feimu eluhui tañi pengelal tañi doi norngen Chau Dios mu (Job 32:2). Ca femngechi Noemí conlu tañi cutrancahun, culpatufui ta Jehová (Rut 1:13, 20, 21). Job ca Noemí amulefule ñi femngechi raquiduamün, hueniyehuelayafuingu ta Jehová (Prov. 19:3). Huelu Jehová quellueyu tañi norümtual tañi raquiduam ca cümelcafi tañi püntütripanon mu engu.

10. ¿Chem ramtuhuafuiñ rupan mu huesaque dungu?

¹⁰ Quimlu rume iñchiñ Jehová taiñ huesalcaquenoeteu, ramtuhuafuiñ chi taiñ petu duamtunieteu. Feichi raquiduam ngañhuadelafeiñmu (Prov. 24:10). Tati rey David ca ti profeta Habacuc rupaingu alün huesaque dungu mu, fei quiñeque mu ramtuuquefuingu Jehová ñi allcütuqueteu tañi llellipun (Sal. 10:1; Hab. 1:2). Huelu elcünulaingu ñi llellipuquefel. Jehová huiñoldungufi tañi llellipun ca quellufi. Ca femai iñchiñ meu (Sal. 10:17).

11. Nor raquiduamnoliyiñ taiñ huesa rupamequen mu, ¿chem rupayafui?

¹¹ Nor raquiduamnoliyiñ taiñ huesa rupamequen mu, iñche rupanoafulu femngechi dungu piafuiñ, fei doi hueñancüafuiñ (1 Ped. 4:12). Raquiduamaiñ ñi femün Jesús tañi pu discipulo. Fei engün adümlafuingün Jesús tañi fente cutrancahual ca tañi layal (Luc. 18:33, 34). Jesús feipifui rume tañi cutrancahual, Pedro raquiduami Jehová ñi catrütuafiel tañi femngechi rupanoal. Jesús quimniefui Jehová ñi feipicünuel fei tañi cutrancahual ca tañi layal. Feimu tañi hueluraquiduamelnoaeteu Pedro, norümdungufi (Mar. 8:31-33). Deu lalu Jesús, tañi pu discipulo petu adümlafuingün chemu Jesús mülefui ñi cutrancahual ca tañi layal. Huelu Jesús piuqueyeniefui tañi pu discipulo, feimu huiñomongetulu, quellufi tañi adümal engün tüfachi dungu (Luc. 24:25-27, 32, 44-48). Raquiduamfule engün Jesús tañi quimeleteu, pepicaucüleafuingün tañi ca cutrancangeal engün. Iñchiñ ca femngechi raquiduamafuiñ ñi feipin Biblia taiñ caiñetungeal, femngechi pepicaucüleaiñ.

12. Ngüneduamnoliyiñ taiñ rupaquen chumngechi ñi femquen Jehová, ¿chum duamelafeiñmu?

¹² Ngüneduamnoliyiñ taiñ rupaquen Jehová reque, quisutu cutranpiuqueyehuafuiñ cam doi amulcünuafuiñ reque taiñ rupan. Quiñeque peñi, lamngen norngenolu troquiafui tañi elungenon cam tañi elcünuafiel quiñe elfal cüdau trahunche mu. Raquiduamaiñ Jesús ñi nütramcael tati pu cüdauquelu quiñe ofadentu mu. Quiñeque huesa duamcülefuingün, cüme cullingenolu troquihuingün, huelu tati ngen cüdau huiñoldungueyu: “Hueni, huesa femlaeyu” (Mat. 20:10-13). Tati pu cüdaufe huesalcangelafuingün, doi mai tuduamcülelafuingün. Iñchiñ ayülaiñ taiñ femngechi duamal. Feula peafiyiñ chem femafuiñ rupaliyiñ cüdaungechi dungu.

¿CHEM FEMAFUIÑ RUPAN MU HUESAQUE DUNGU?

13. ¿Chem raquiduamafuiñ rupan mu huesaque dungu?

¹³ Cüme quimnieiñ chem quimeltuquei Biblia cutrancahun dungu mu. Caquelu huesa rupamequelu, papeltulelquefiyiñ quiñeque versiculo taiñ yafültucuafiel. Huelu iñchiñ rupamequeliyiñ huesaque dungu mu, doi cüdautuafuiñ chi taiñ raquiduamal Jehová reque. Raquiduamafuiñ chi Chau Dios taiñ castigamequeteu cam tañi allcütuquenon iñchiñ taiñ llellipun. Fei, ¿chem femafuiñ? Peafiyiñ.

14. Petu cutrancaulu iñchiñ, ¿chem feipiafuiñ taiñ llellipun mu? (Filipenses 4:13).

¹⁴ Feipiafiyiñ Jehová taiñ quelluaeteu. Nütramcayafiyiñ taiñ Chau Jehová chem taiñ rupamequen ca taiñ chum duamcülen. Feipiafiyiñ chumngechi ayüfuiñ taiñ quelluaeteu. Ca cümeafui taiñ llellipuafiel Jehová taiñ eluaeteu ñi nehuen, femngechi nieaiñ quimün ca nehuencüleaiñ. Huelu acordayaiñ: taiñ huiñoldunguaeteu taiñ llellipun, Jehová femafui ca dungu taiñ üngümnienofel (Efes. 3:20). Ca adnieafui tati pu cümeque püllü cam taiñ pu peñi ca lamngen taiñ yafültucuaeteu (Sal. 34:7). Feimu, ngüneduamnieaiñ chumngechi quelluqueiñmu Jehová ca cüme llohuafiyiñ. Chem rupaliyiñ rume, maneluhuafuiñ Jehová taiñ eluaeteu ñi nehuen tunte taiñ duamnieel (papeltunge Filipenses 4:13).

15. ¿Chumaiñ rupan mu cüdaungechi dungu? (Ca inaduamnge ti adentun).

¹⁵ Yafüluhuaiñ taiñ cüme hueniyenieafiel Jehová. Huesa rupaliyiñ, pepi femhuelaiñ chi com taiñ femquefel, huelu feichi mu doi falin-ngei taiñ raquiduamtucunieafiel Jehová tañi raquiduamquen (Sal. 119:143). Feimu papeltunieafiyiñ Biblia fill antü ca raquiduamaiñ taiñ papeltuqueel. Amulepe taiñ amuldunguleal ca taiñ trahuluucüleal. Ca taiñ trahun meu huiñoldunguafuiñ. Huichunentuulayaiñ, doi mai pülleconcüleaiñ taiñ pu peñi ca lamngen mu (Prov. 18:1).

16. Rupan mu huesaque dungu mu, ¿chem raquiduamafuiñ ca chem mülei taiñ femal? (2 Corintios 10:4, 5).

¹⁶ Biblia mu norümtunge tami raquiduamcülen. Huesa rupan mu, raquiduamafuimi quiñeque dungu eimi mu cam Jehová mu, huelu rüfngenolu. Femngechi raquiduam mülei taiñ famentuafiel (papeltunge 2 Corintios 10:4, 5). ¿Chem quelluafeiñmu? Quintuafiyiñ Biblia mu ca taiñ publicacion mu chem ñi raquiduamquen Jehová. Raquiduamülmi Jehová ñi ayüucülenon eimi mu, estudiayafuimi ñi rupan ti apostol Pablo. Conlu ñi amuldungual, rupai alün huesaque dungu, huelu fentecünulai ñi amuldungual. Tüfa pengeleyu Jehová ca Jesús ñi ayüucülen fei meu (2 Cor. 11:23-27). Ca raquiduamülmi Jehová tami perdonanoeteu cuifique culpan mu, ¿chumafuimi? Huirintucuafuimi quiñeque texto feipilu Jehová ñi perdonachequen (Is. 43:25). Fei papeltuaimi tüfachi versiculo ca raquiduamaimi ñi feipin (Sal. 119:97). Cam fente tami huesa rupan mu, ramtuhuafuimi chi: “¿Jehová cuñiutucuquepei mai tañi pu che?”. Quintuafuimi taiñ publicacion mu chemu Chau Dios catrütulai taiñ huesa rupan ca chumngechi cuñiutucunieiñmu taiñ hueniyenieafiel chem rupaliyiñ rume (Sal. 91:9-12). Ca ngüneduamafuiñ ñi rupan quiñeque peñi ca lamngen chaftufilu fentren huesaque dungu tañi mongen mu, fei serfiniefingün Jehová ayühun meu.a

17. ¿Chumaiñ rupan mu huesaque dungu?

¹⁷ ¿Cüme rupaleimi tami mongen mu? ¿Nielaimi huesaque dungu? Mañumfinge ta Jehová ca püramyefinge tami eluqueteu fentren cümeque dungu (Ecl. 7:14). Huelu acule huesaque dungu, acordanienge chem tami quimelqueteu Jehová Biblia mu, ca eluunge tami maneluhual Jehová mu com tami piuque mu. Biblia feipi huesa rupaliyiñ, Jehová quelluaiñmu taiñ hueutripayal ca taiñ nehuentuleal (1 Cor. 10:13). ¿Chumngechi quelluafuiñ taiñ pu peñi, pu lamngen rupan mu cüdaungechi dungu? Peaiñ cangelu troquiñ meu.