Pepicaunge tami fautizahual

1. 1) ¿Chumngechi cümelcaqueiñmu ti fautizahun? 2) ¿Chem ngüneduamaiñ feitachi troquiñ mu?

¿LLELIPUQUEFIMI Jehová tami hultuculelafiel tami mongen ca tami fautizahual? Femülmi, rume cümelcaimi tati. Tami fautizahun mu feipifimi Jehová tami eluaeteu cüme raquiduam (1 Ped. 3:21). Fautizahulmi, quiñe cüme dungu quimeltufimi tati pu petu fautizaunolu. Petu fautizaunolmi, eimi ca piuqueyepelafimi Jehová ca ayüpelaimi tami femal quisu tañi ayüqueel. Eimi quimnieimi, mülei tami fautizahual tami perdonayaeteu Jehová ca tami hueniyeaeteu (Hech. 2:38-40). Femfule rume, quiñeque dungu catrütuafeimu chi tami fautizahual. Feitachi troquiñ rume quelluafeimu. Peaiñ chemu quiñeque che cüdautuquei tañi fautizahual, chemu cümei tami raquiduamal ñi püllelepan Jehová tañi antü ca chumngelu fente falin-ngei alüñmanoal che tañi fautizahual.

¿CHEMU QUIÑEQUE ELUUCÜLELAI ÑI FAUTIZAHUAL?

2. ¿Chemu quiñeque che cüdautuquei tañi fautizahual?

² Quiñeque ayüquefui tañi poyeafiel Jehová, huelu llicalefuingün tañi fautizahual. Quiñeque ayühulnoafilu Jehová troquiuqueingün. Eimi femngechi raquiduamülmi, papeltuafuimi quiñeque texto, femngechi quimaimi Chau Dios tami feipinoeteu tami turpu huelulcaunoal, doi mai ayüucüleai cüme poyefilmi (Sal. 103:13, 14; Col. 3:23). Eimi llicalelmi tami caiñetungeal rupan fautizahulmi, llellipuafuimi Jehová tami nehuentucuaeteu. Femngechi, ti salmista reque feipiafuimi: “Jehová mülei iñche meu, feimeu llicalayan. ¿Chem chumaeneu am ta che?” (Sal. 118:6).

3. ¿Ca chemu quiñeque che cüdautuquei tañi fautizahual? (Ca inaduamnge ti adentun).

³ Quiñeque pichin quimquefilu Biblia troquiuqueingün, feimu eluulaingün tañi fautizahual. Huelu, ¿com quimpeafuiñ mai Biblia taiñ fautizahual? Femlai. Raquiduamnge ñi rupan ti huentru cüdauquelu carcel mu. Pablo engu Silas carcelconcülelu, ruparumei quiñe fütra nüyün, fei lifreletuingu. Rupalu tüfa, Pablo engu Silas amuldungulelfi ti soltau cüdauquelu carcel mu ca tañi familia. Feitachi huentru ca tañi familia inaduamingün Jehová ñi femün quiñe afmatufalchi dungu ñi lifrenentuafiel Pablo engu Silas. Fei, ¿chem rupai? “Müchai müten ti soltau ca com tañi pu che fautizangei engün” (Hech. 16:25-33). ¿Eimi cai? Deu pepicaucüleimi chi tami fautizahual. ¿Quimfimi Jehová? ¿Piuqueyefimi com tami piuque mu? ¿Quimfimi ti doi falinque quimeltun ñi feipin ta Biblia? ¿Nor raquiduamtuimi tami culpan mu? ¿Eluucüleimi tami feyentuafiel Jehová? Femülmi, fautizahuafuimi llemai (Mar. 12:30).

4. Quiñeque che petu fautizaunolu, ¿chem raquiduamcüleingün? (Ca inaduamnge ti adentun).

⁴ Quiñeque ayüqueingün tañi ayühulafiel Jehová ca tañi fautizahual, huelu rume cüdaungelu troquiquefingün. Cümei ñi cüme raquiduamal ta che chem tañi chumal (Luc. 14:27-30). Huelu quiñeque che rume raquiduamqueingün chem ñi elcünual tañi serfiafiel Jehová. Femngechi dungu mu rupai Candace pingechi domo. Pichicalu müten, quimeltulelngei Jehová mu, huelu tati rüf dungu conlai tañi piuque mu. Doi tremlu, ca huiño papeltutui Biblia. Fei feipi: “Iñche quimniefun chumngechi tañi ayühulafiel Jehová, huelu ayüniequefun ti mongen tañi yeniequefel. Raquiduamün tañi cüdautual ñi cüme elcünutual ñi mongen”. Ca quiñeque che cüme inanoafilu Jehová tañi ngülam troquiuqueingün. Feipiqueingün: “Deu fautizauli, fütra culpayafun, fei entungeafun ti trahunche mu”. ¿Chumafuimi eimi raquiduamcülelmi femngechi dungu mu?

5. Cüdautulmi tami fautizahurpual, ¿chem doi ngüneduamafuimi? (Mateo 13:44-46).

⁵ Raquiduamnge feitachi ejemplo mu: ngillayal mu quiñe chemcün, ngüneduamlayafiyiñ müten tañi chumte falin, ca ngüneduamaiñ chumte taiñ cümelcayaeteu. Falifule rume, huelu rüf duamniefiliyiñ, ¿ngillapelayafiyiñ müten? Ca femngechi raquiduamcülelmi tami fautizahual, ngüneduamlayaimi müten ñi cüdaungen cüme elcünual tami mongen. Doi mai ngüneduamaimi chumte cümelcayaimu tami hueniyefiel Jehová. Jesús entui epu nütram ñi quimeltual tüfachi dungu (papeltunge Mateo 13:44-46). Quiñe huentru ayühunquechi fendei com tañi niequefel ñi ngillayafiel quiñe mapu ñi entual quiñe falin chemcün. Ca femngechi femi cangelu huentru, fendei tañi niequefel ñi ngillayafiel quiñe falin llancatu. Eimi ca femngechi quimürpufilu tati rüf dungu, pefimi quiñe falin dungu. Cüdautulmi tami inayafiel tami quimürpuel, raquiduamnge tañi feipiel Jesús. Ramtuunge: “¿Rüf falintuquepefiñ mai tañi quimürpuel Biblia mu? ¿Rüf falintuquepefiñ mai tañi cüme hueniyeafiel Jehová, ca tañi maneluucülen tañi rumel mongeleal, ca tañi quiñeucülen pu peñi ca pu lamngen iñchiñ?”. Raquiduamcülelmi tüfachi ramtun mu, ngüneduamuhuafuimi chem duamnieimi tami fautizahurpual.

6. ¿Chem quelluafeimu tami inayafiel tami quimürpuel?

⁶ Jesús feipi caquerumei pu che tañi piuque. Feimu quiñeque che allcütulu rume tati rüf dungu, inaquelafi tañi quimürpuel. Huelu ca quiñeque che “cüme piuque mu llouquefi” tati rüf dungu, feimu inaquefi tañi quimürpuel (Luc. 8:5-15). Inaduamülmi epu rume raquiduam tami nieel, huesa duamlayaimi. Jehová quelluafeimu llemai tami nieal hue piuque, femngechi tami inayafiel ñi feipin. Llellipuafimi Jehová tami piuquentucuafiel tami quimürpumequen, fei tami inayafiel tami mongen mu (Ezeq. 18:31; 36:26).

7, 8. ¿Chemu quiñeque hueche fautizauquelai? (Ca inaduamnge ti adentun).

⁷ Quiñeque huechequeche piuqueyefingün Jehová, huelu fautizaulaingün tañi feipieteu mu caquelu che. Colegio mu quiñeque profesor feipiquefi pu hueche ñi cüme llohuafiel chem mongen rume yeniefule pu che, ayünole rume ta Chau Dios. Huelu inafilmi femngechi ngülam, rume huesalcayafeimu (Sal. 1:1, 2; Prov. 7:1-5). Hueche, ¿chumafuimi tami femngechi huelulcaunoal? Ti salmista reque, raquiduamtucuafimi Jehová tañi ngülam. Fei feipifi ta Jehová: “Raquiduamaniequefiñ tami ngülam, feimu doi quim ngüneduamquen com tañi pu quimeltufe mu” (Sal. 119:99).

⁸ Quiñeque chau testigongelu catrütuquefingün reque tañi pu yall ñi fautizahual. Raquiduamqueingün müten tañi estudiayal tañi pu yall ca tañi nieal cüme cüdau cüpalechi antü mu. Cam yafültucuquelafingün tañi pu yall ñi hueniyeafiel Jehová. Hueche, ¿nehue quellunoeteu tami pu chau troquiuqueimi tami fautizahual? Feingele, nütramcayafuimi tami chem raquiduamcülen. Loncontucunieaimi: chumten tripantu niefulmi rume, cüme hueniyeafuimi Jehová (Prov. 20:11).

9. ¿Chumngelu quiñeque üngümquei tañi fautizahual?

⁹ Quiñeque che pepicaucülefule rume tañi fautizahual engün, femlaingün. Quiñeque tañi pu hueni cam tañi pu che feipieyu chi tañi pichi üngümnieal tañi trür fautizahual engün. Huesa dungu no tañi trür fautizahual, huelu ¿cümeafui tami fautizaunoal tami üngümafiel caquelu che? Femlai llemai. Feipicünufilmi Jehová tami serfiafiel, coneltulelai caquelu che. Caque quiñeque che mülei tañi dullial chumül tami fautizahual, feimu ngüneduamlayaimi chumül tañi fautizahual ta caquelu (Rom. 14:12).

ACORDANIEAIÑ JEHOVÁ TAÑI ANTÜ PÜLLELEPAI

10. ¿Chumngelu quiñeque che cüme elcünutuquelaingün ñi mongen?

¹⁰ Ca quiñeque che raquiduamqueingün petu ñi mülen fentren tiempo tañi acual Jehová tañi antü, feimu cüme elcünutuquelaingün ñi mongen tañi fautizahual. ¿Cüme raquiduamquepeingün mai? ¡Femlai llemai! Jesús feipifi tañi pu discipulo: “Quiñe hora tamün raquiduamcülenon cüpayai ti Huentru ñi Fotüm. Feimu rumel pepicaucülemün” (Luc. 12:40).

11. Doi quimfiel mu Jehová, ¿chem ayüqueiñ taiñ femal? ¿Chemu? (Salmo 119:60).

¹¹ ¿Chemu eluuqueiñ taiñ hultucual taiñ mongen Jehová mu ca taiñ fautizahual? Taiñ piuqueyefiel mu Jehová ca tañi cümeque ngülam. Doi quimfiel mu Jehová, doi inaduamqueiñ fente taiñ piuqueyenieteu ca com tañi ngülam cümelcaqueiñmu. Feimu eluuqueiñ taiñ pürüm inanieafiel (papeltunge Salmo 119:60). Discipulo Santiago ca feipieiñmu chemu fente falin-ngei pürüm inayafiel Jehová tañi huercün dungu: quimlaiñ tañi chumleal taiñ mongen ta hule. Feimu ngünamcalayaiñ quiñe antü no rume taiñ femal Jehová tañi ayüqueel (Sant. 4:13-17).

12. ¿Chem quimeltueiñmu Jesús tañi feipin tati pu cüdaulu ofadentu mu?

¹² Pichi ngüneduamaiñ ñi nütramcael Jesús tati ofadentu mu. Tati pu cüdaulu quiñe hora müten ca cullingei quiñe antü cüdau. Huelu, ¿chemu quiñe hora müten cüdahuingün? Chofüngelafuingün. Ayülefuingün tañi cüdahual, huelu inei no rume elulafeyu cüdau. Huelu mütrümngelu tañi cüdahual engün, pürüm amufemingün (Mat. 20:1-16). Fachantü Jesús mütrümqueiñmu taiñ inayafiel ca taiñ coneltual amuldungun cüdau mu. Feimu allcütufiliyiñ müten, amufemaiñ.

13. ¿Chem quimeltueiñmu ñi rupan Lot tañi domo?

¹³ Quiñeque che raquiduamquei: “Epe puucülele Jehová tañi antü, fei hula cüme elcünutuan tañi mongen tañi fautizahual”. Huelu cuñiutucuhuaimi, doi alüñmalmi, doi cüdautuafuimi tami femal. Feimu Jesús feipi: “Loncontucuniemün ñi rupan Lot tañi domo” (Luc. 17:31-35). Quisu cüme quimniefui tañi pürüm apümcangeal Sodoma ca Gomorra, huelu eluulai ñi elcünual tañi nieel (Gén. 19:23-26). Tüfachi nütram ca raquiduamelqueiñmu Jehová rumel esperalayai pu che tañi serfiaeteu, puhuai chi antü tañi pepi montunoal engün (Luc. 13:24, 25).

14. ¿Chemu ngüneduamafuimi ñi huechurpumequen ti profecia mülelu Biblia mu?

¹⁴ Com tañi ruparupangen fachantü pengeli ñi femtripamequen Biblia ñi feipicünuel ñi rupayal afaelchi antü mu. Eimi tami mülemum rupamequelai chi quiñeque dungu ñi feipicünuel Biblia. Huelu pefiel mu ñi rupamequen caque mapu mu, eluhuafuimi tami cüme elcünutual tami mongen ca tami fautizahual. Raquiduamnge tañi rupan hunen siglo mu. Apostol Pedro feipifi pu cristiano: “Deu püllelepai ñi afal com ti müleyechi dungu. Feimu [...] rumel pepicaucülequeaimün” cam “llihuatulequeaimün” (1 Ped. 4:7; nota). Feita mu Pedro feipipelafui tañi apümcangeal Jerusalén ca tañi ngillatuhue ruca. Feitachi pu cristiano camapulefuingün Jerusalén mu, feimu apümcangele ti huaria, quisu engün cutrancalayayu (1 Ped. 1:1). Huelu pefile engün ñi huechurpumequen feitachi profecia, doi maneluhuaingün ñi femtripayal com tañi feipicünuel Jehová. Fachantü ca huechurpumequei tañi feipin ta Jehová, tüfa pengeli ñi püllelepan Jehová tañi antü. Quimfiel mu tüfa, eluhuafuimi tami pepicaucüleal ca tami fautizahurpual.

15. ¿Chumngechi pepicahuafuiñ acual Jehová tañi antü? (2 Pedro 3:10-13).

¹⁵ Tañi epungechi carta mu, Pedro quimeltui chumngechi pepicaucüleafuiñ acule Jehová tañi antü. Pedro feipifilu tati pu hunenque cristiano, petu faltalefui fentren tripantu tañi acual Jehová tañi antü. Femfulu rume, Pedro feipifi: “Raquiduamtucunieafimün Chau Jehová ñi antü” cam “rume ayünieaimün ñi acual” (papeltunge 2 Pedro 3:10-13; nota). Iñchiñ ca femngechi raquiduamtucuniefiyiñ Jehová tañi antü loncontucunieliyiñ ñi pichilehuen tañi acual. Ca taiñ pepicahual, femqueiñ lif cümeque dungu ca serfiquefiyiñ Chau Ngünechen com piuque mu. Femngechi femün mu iñchiñ, rume ayühulquefiyiñ Jehová. Huelu doi fütra ayühuafui hultuculmi tami mongen ca fautizahulmi.

PÜRÜMQUECHI FAUTIZAUNGE

16. ¿Chumül doi cümeafui tami fautizahual? (2 Corintios 6:1, 2; ca inaduamnge ti adentun).

¹⁶ Raquiduamcülelmi chumül tami fautizahual, “ca antü hula feman” pilayaimi, feula pepicahuafuimi tami fautizahual (papeltunge 2 Corintios 6:1, 2). Raquiduamaiñ ñi femün ti Etiopía huentru Felipe ñi amuldunguleteu. Fei adümfilu müten tati cümeque dungu Chau Dios mu cüpalu, rulpacünulai antü tañi fautizahual. “Doi quimli hula fautizahuan” cam “cüpalechi antü hula femafun” feipilai tati Etiopía huentru. Doi mai pefilu müten ñi mülen co, ramtufi ta Felipe: “¿Chumngelu fautizangelayafun iñche?” (Hech. 8:26, 27, 35-39). Deu fautizaulu, “ayüucülen amuletui ñi rüpü meu”.

17. ¿Chem dungu meu maneluucüleafuiñ?

¹⁷ Mülele quiñeque dungu tami catrütuqueteu tami fautizahual, maneluhuafuimi Jehová ayüniei tami cüme hueniyeteu (Rom. 2:4). Eimi pichi llicaleimi chi, cam rume cüdaungei tañi fautizahual piqueimi, cam quiñeque che müte quelluquelaeimu tami fautizahual. Huelu loncontucunge: Jehová ayüniei tami quelluaeteu tami fautizahual. Fautizahulmi, rume ayüucüleaimi tami femün Jehová tañi ayüqueel ca müte falintuhuelayaimi tami elcünuel (Filip. 3:8, 13). Ayühunquechi üngümcüleaimi ñi huechurpual Jehová tañi feipicünuel. Jehová eluafi re cümeque dungu ti pu hultuculu ñi mongen fei meu ca pu fautizaulu (Hech. 3:19).