Pepicaucüleaimi huesa rupalmi deu fautizahulmi

1, 2. ¿Chem quelluafeiñmu taiñ pülleleal Jehová mu rupaliyiñ huesaque dungu? ¿Chumngechi trürümafuiñ?

RUPAYAFUIÑ huesaque dungu Huecüfü ñi ngünenien mu, feimu Jesús feipifi tañi pu inanieteu ñi rupayal cüdaungechi dungu mu (Mat. 18:7). Ca femngechi iñchiñ rupayafuiñ cüdaungechi dungu mu, huesa duamelafeiñmu chi quiñe taiñ pu peñi ca lamngen, feimu mülei taiñ pepicaucüleal taiñ püntünentunoaeteu Jehová mu.

² Raquiduamnge, Jehová tañi troquiñche acordalelqueiñmu taiñ pepicaucüleal rupale cürüftucu mahun ca fütraque nüyün. ¿Chumngechi pepicauqueiñ? Hunelu mu, ngüneduamqueiñ chem cuñihun-ngechi dungu rupaquei cheu taiñ mülen, feita doi falin-ngeafui hue müleliyiñ feichi lof meu. Epu, ca raquiduamqueiñ chem femal acurumele cuñihun-ngechi dungu (Prov. 21:5). Ca femngechi pepicahuafuiñ chem dungu chaftuafuiñ taiñ deu fautizahun mu. Pepicauliyiñ petu ñi rupanon, quimaiñ chem taiñ femal, femngechi doi cüme chaftuafiyiñ ti dungu ca amuleai taiñ hueniyefiel ta Jehová (Sal. 17:5). Ngüneduamaiñ 3 dungu ñi rupayafel deu fautizauliyiñ ca chumngechi pepicahuafuiñ.a

HUESA DUAMELNGELIYIÑ

3. ¿Chem dungu chaftuafuiñ trahunche mu deu fautizauliyiñ?

³ ¿Acordapelaimi chum duamimi hue amulu eimi trahun mu? ¿Ca ngüneduampelaimi fente tañi piuqueyehun pu peñi ca pu lamngen? Feimu ca ayüimi tami testigongerpual (Juan 13:35; Col. 3:12). Femngechi rupai lamngen Blanca.b Huelu deu fautizaulu rupai quiñe dungu ñi raquiduamquenofel, fei feipi: “Quiñe lamngen rume huesa pieneu ca huesa dunguyequefui ta caquelu. Iñche quimelngefun tañi pu lamngen ñi eluuquen tañi tüng chengeal ca ñi pengeluhual piuqueyehun. Feimu huesa pingelu iñche, rume huesa duameleneu”. Rüfngei, taiñ pu peñi, pu lamngen eluuquei ñi inayentuafiel Jehová, huelu petu culpafe chengeingün, feimu huelulcauqueingün (Efes. 4:23, 24; 1 Juan 1:8). Feimu quiñeque engün huesa duamelafeiñmu tañi feipin ca tañi femün mu (Sant. 3:8). Ñi rupan mu tüfa, fente tañi huesa duamün quiñeque peñi ca lamngen püntütripaingün Jehová mu.

4. ¿Chumngechi pepicahuafuiñ huesa duamelngeliyiñ? (Efesios 4:32).

⁴ ¿Chumngechi pepicahuafuimi huesa duamelelmu quiñe peñi cam lamngen? Yafüluhuaiñ taiñ rumel inanieafiel ñi feipin Efesios 4:32 (papeltunge). Eluucüleliyiñ taiñ füreneafiel caquelu che ca taiñ cutranpiuqueyeafiel, ¿doi cüme yeucülepelayaiñ? Ca petu taiñ huesa duamelngenon rume, feipicünuaiñ taiñ perdonacheal com piuque mu. ¿Chem quelluafeiñmu? Loncontucunieaiñ, iñchiñ fentren rupa perdonaen piquefiyiñ Jehová taiñ huelulcan mu, fei com piuque mu perdonaqueiñmu (Mat. 6:12). Raquiduamfiel mu tunten rupachi taiñ perdonaqueteu Jehová, müte cüdautulayaiñ taiñ perdonayafiel caquelu.

5. Huesa duamelngeliyiñ, ¿chem versiculo acordanieaiñ? (Proverbios 19:11; ca inaduamnge ti adentun).

⁵ (Papeltunge Proverbios 19:11). Biblia feipi quim ngüneduamliyiñ,c ngünehuaiñ taiñ illcufemnoal huesa duamelngen mu. Quiñe lamngen Rima pingelu quiñeque tripantu müten yenielu ñi fautizaucülen, rume quellueyu tüfachi ngülam. Fei feipi: “Huesa duameleteu mu pu lamngen, pürüm loncontucuquen Proverbios 19:11. Fei raquiduamquen chem dungu mu chi ta rupai cuifi mu pifun ca chemu chi femngechi femeneu. Ca feipifiñ taiñ trür amuldungual taiñ doi quimuhual”. Rume falin-ngei feula taiñ cüme quimafiel taiñ pu peñi ca pu lamngen. Femngechi huesa duameleliyiñmu, cüdautulayaiñ taiñ perdonayafiel.

6. ¿Chem quelluafeiñmu taiñ nieal cümeque hueni trahunche mu?

⁶ ¿Chem quelluafeiñmu taiñ nieal cümeque hueni trahunche mu? Yafüluhuaiñ taiñ peñmayafiel cümeque dungu taiñ pu peñi, taiñ pu lamngen (ca ngüneduamafuimi Proverbios 10:12; Rom. 12:10; Filip. 2:2, 3). Peafiyiñ ñi rupan quiñe peñi hue fautizaulu Marco pingei. Doi quimfilu pu peñi ca pu lamngen, quimtucui tañi huelulcauquen engün. ¿Chem quellueyu tañi famtripanoal Jehová mu ca tati trahunche mu? Fei feipi: “Quimtucun, rüfngei tañi huelulcauquen pu peñi ca pu lamngen. Huelu chem dungu no troquingeafui trürümfili tañi fente huesa femquen pu poyequenofilu ta Jehová. Feimu eluhun tañi raquiduamnienoafiel tañi pichi huelulcauquen pu peñi ca pu lamngen, doi mai tañi cüme femquen engün ca tañi cüme piuquengen”. Ca femngechi femliyiñ, nieaiñ cümeque hueni trahunche mu.

HUEÑANCÜRUMELMI TAMI ELCÜNUEL MU

7. ¿Chumngelu ayüafuiñ nietual taiñ elcünuel?

⁷ Testigongerpulu iñchiñ, ¿rume ayüupelaiñ taiñ coneltun Jehová tañi pu che mu? Feimu feipiafuiñ chi: “Inei no rume ayülayafui ñi huiñotual tañi cuifi mongen mu”. Huelu rupan mu huesaque dungu, rume raquiduamafuiñ taiñ elcünuel quiñeque dungu taiñ serfiafiel Jehová, fei ayüafuiñ taiñ huiño nietuafiel (ca ngüneduamafuimi Números 11:4-6). Quiñeque peñi ca lamngen niequefuingün quiñe cüdau tañi cullingequefel alün plata, huelu niequelafuingün tiempo, feimu elcünufingün. Ca quiñeque eluulu tañi papeltuafiel Biblia, famentueyu tañi pu hueni. Caquelu elcünuingün quiñe huimtun Jehová tañi ayüquenoel. Famtripaliyiñ Jehová mu taiñ huiño nietual taiñ elcünuel, ¿chum duamafui Jehová? Rume hueñancüafui llemai. ¿Chem quelluafeiñmu taiñ femngechi rupanoal?

8. ¿Chem quimeltueiñmu Abrahán ca Sara ñi femün?

⁸ Biblia nütramcai alün huentru ca domo elcünulu fentren dungu ñi poyeafiel Jehová, quiñeque tüfa Abrahán ca Sara. Ñi femal Jehová tañi feipieteu, elcünuingu tañi cüme felen quiñe fütra huaria, fei mületuingu tolto ruca mu (Heb. 11:8, 9). Quiñeque mu acordaquefuingu chi tañi cüme mongen ñi niequefel feichi huaria mu. Huelu rume raquiduamtucunielafingu tañi elcünuel, feimu eluulai ñi huiñotual. Doi mai raquiduamtucuniefingu ti cümeque dungu tañi eluaeteu Jehová (Heb. 11:15, 16).

9. Pablo, ¿chumngechi troquiquefui tañi elcünuel? (Filipenses 3:7, 8, 13).

⁹ Ca femngechi ti apostol Pablo elcünui fentren dungu tañi serfiafiel Jehová. Petu tañi cristianongenon, quimeltueyu pu judio ñi ley quiñe falin quimeltuchefe Gamaliel pingelu (Hech. 22:3). Pablo inafule feichi rüpü, falin loncongerpuafui pu judio mu (Gál. 1:13, 14). Huelu quimürpufilu Cristo ñi cümeque dungu, com elcünui. Cristianongerpulu, ¿re cümeque dungu rupai tañi mongen mu? Femlai, tati pu judio cütu caiñetueyu, hulelcaeyu ca presuntucueyu (2 Cor. 11:23-26). Raquiduamtucufule tañi huesa rupamequen, ngüneduamafui chi ñi cümenon tañi cristianongerpun. Doi mai loncontucui ñi falintufalngen ñi inaquefiel Jesús ca ñi cümelcangeal cüpalechi antü mu. Pablo quimniefui com tañi llohun doi falin-ngefui chem dungu meu rume tañi elcünuel (papeltunge Filipenses 3:7, 8, 13).

10. ¿Chem dungu meu raquiduamaiñ? (Marcos 10:29, 30; ca inaduamnge ti adentun).

¹⁰ ¿Chem quimeltueiñmu? Raquiduamcülelmi chem tami elcünuel, acordayaimi chumngelu tami elcünufiel (Ecl. 7:10). Ca ngüneduamafuimi fente tami cümelcaeteu tami quimfiel Jehová, feula cüme hueniyefimi (Prov. 3:32). Ca coneltuleimi quiñe fütra familia mu tami rume piuqueyenieteu (papeltunge Marcos 10:29, 30). Ca cüpalechi antü mu, Jehová eluaimu doi fentren cümeque dungu (Is. 65:21-23). Doi raquiduamülmi tami rume cümelcaeteu serfifiel mu Jehová, doi falintuhuelayaimi tami elcünuel.

11. ¿Chem quimeltuafeiñmu ñi rupan ta Rosemary?

¹¹ Peaiñ tañi rupan ta Rosemary, fautizahui doi 50 tripantu nielu. Quisu feipi: “Ellaca mu, rume hueñancüquefun tañi celebrahuenon ta Navidad. Iñche müna ayüquefun tañi müleal tañi familia iñchiñ, taiñ celebrayal Navidad ca taiñ hueluquentu eluhual regalo. Iñche ayüuquefun tati pu pichiqueche inalfülcülen arbol de pascua mu ayühunquechi nülamequelu tañi regalo”. ¿Chem quellueyu? Taiñ lamngen ca feipi: “Fill tripantu elcünuquen ca antü tañi trahuluhual tañi pu familia iñchiñ. Eluquefiñ regalo ca feipiquefiñ fente tañi piuqueyefiel engün”. Huelu taiñ lamngen ca dungu mu rupai. Quisu feipi: “Quimfilu tati rüf dungu, tañi pu hueni quisucünueneu. Quiñeque mu echamenoquefun tañi pu hueni, feimu quisulelu troquiuquen”.d ¿Chumi taiñ lamngen? Feipifi quiñeque tañi pu lamngen tañi trür amuldungual engün. Fei feipi: “Nietun hueque hueni, rume piuqueyefiñ engün”. ¿Chem quimeltuafeimu tañi rupan ta Rosemary? Eimi echamenofilmi tami ayühulquefeteuchi dungu petu tami quimnofiel Jehová, loncontucuaimi: feula femafuimi caquelu dungu tañi ayüqueel Jehová, fei doi ayühulafeimu (Filip. 4:8, 9). Chem rume elcünufilmi tami poyeafiel Jehová, fei doi eluaimu llemai.

CAQUELU PÜNTÜTRIPAFULE JEHOVÁ MU

12. ¿Chem doi cüdautuafuiñ?

¹² Eimi testigongerpulu, ¿rume ayüupelaimi tami cüme elcünutun tami mongen? Feula coneltuleimi Jehová tañi troquiñche mu (Is. 65:14). Quiñeque mu allcürumeafuimi chi quiñe peñi cam lamngen ñi huesa culpan, cam entungei chi ti trahunche mu (1 Cor. 5:13). Quiñe lamngen Samar pingelu feipi: “Iñche hue fautizaucülefun, quiñe loncolelu fütra culpai, fei entungei ti trahunche mu. Raquiduamlafun rume quiñe loncolelu ñi culpayal Jehová mu ca ñi hueñancülafiel ti trahunche”. Iñchiñ maneluucüleiñ taiñ pu peñi ca lamngen tañi piuqueyefiel Jehová ca ñi püntütripanoal engün Jehová mu (1 Cor. 13:4, 7). Huelu ca quimnieiñ fill tripantu quiñeque testigo entungequei trahunche mu. Huelu doi cüdaungeafui llemai enturumengele quiñe hueni, quiñe taiñ familia cam quiñe che taiñ rumel respetaquefiel.

13. ¿Chumngechi pepicaucüleafuiñ quiñe taiñ piuqueyenieelchi che elcünufile ta Jehová?

¹³ ¿Chumngechi pepicaucüleafuiñ quiñe taiñ piuqueyenieelchi che elcünufile ta Jehová? Fentecünulayaiñ taiñ doi hueniyeafiel ta Jehová (Sant. 4:8). Loncontucunieaiñ, caque quiñeque iñchiñ eluhuiyiñ taiñ serfiafiel Jehová chumle rume caquelu che. Iñchiñ papeltuquefiyiñ Biblia ca ngillatuqueiñ taiñ familia iñchiñ ca tati trahunche mu, huelu caque quiñeque iñchiñ mülei taiñ llellipuafiel Jehová ca papeltuafiel Biblia (Sal. 1:2; 62:8).

14. ¿Chem quimeltuafeiñmu Pedro ñi femün? (Juan 6:66-68).

¹⁴ Ti apostol Pedro ñi rupan ca quelluafeiñmu. Quiñe rupa fentren discipulo inahuelafingün ta Jesús, ¿chemu femingün? Jesús ñi feipin adümlafingün. Pedro ca femngechi adümlafi chi, huelu püntünentuulai Jesús mu (papeltunge Juan 6:66-68). Pedro quimniefui Jesús ñi quimeltuquen tati rüf dungu, feimu inayentulafi caquelu. Ca femngechi caquelu püntütripafule rume Jehová mu, iñchiñ ta femquelaiñ, quimnielu am Jehová taiñ quimeltuqueteu ti rüf dungu tañi troquiñche mu. Rume falintuquefiyiñ tati rüf dungu, feimu püntütripaquelaiñ Jehová mu. Lamngen Samar taiñ nütramcapeel parrafo 12 mu feipi: “Raquiduamquen, huesa femün mu quiñe lamngen, com ti trahunche huesalcamequei pingelayafui ca Jehová tañi troquiñche norngelai pingelayafui. Jehová turpu ayüquelai ti huesaque dungu”.

15. ¿Chem quimeltueiñmu Emily ñi rupan?

¹⁵ Peaiñ ñi rupan ta Emily. Quiñe semana rupalu müten tañi fautizahun feitachi lamngen, tañi ñuque elcünui tañi familia, fei entungei trahunche mu. Emily feipi: “Raquiduamlafun rume tañi ñuque tañi huesa femal, feita rume huesa dungu fel tati. Rume echamenoquefiñ tañi ñuque”. ¿Chem quellueyu Emily? Quisu feipi: “Quisulelan, tañi chau piuqueyeneu ca cüme cuidaqueneu ca tañi pu lamngen trahunche mu quiñe familia reque feleingün. Com iñchiñ chaftuquefiyiñ huesaque dungu, feimu rume falin-ngei taiñ quiñeucüleal ca taiñ hueluquentu yafültucuhual” (1 Ped. 5:9). ¿Chem quimeltun entuafuiñ? Huesa rupamequeliyiñ müten, quintulayaiñ hueni trahunche mu. Doi mai petu tañi acunon huesaque dungu, quimafiyiñ taiñ pu peñi ca lamngen ca hueniyeafiyiñ. Femngechi chem huesaque dungu rume rupafuliyiñ, quisulelu troquiulayaiñ.

16. ¿Chem acordanieaiñ? (Ca inaduamnge ti adentun).

¹⁶ Acordanieaiñ, Chau Jehová ngülamtuquefi feichi pu che ñi piuqueyeniefiel (Heb. 12:6). Jehová ayüniei ñi huiñotual com pu entungelu ti trahunche mu (2 Ped. 3:9). Feimu quiñe hueni cam quiñe familia entungele ti trahunche mu, quimnieiñ pu loncolelu com piuque mu quelluafingün ñi huiñotual Jehová mu (2 Tim. 2:24, 25).

17. ¿Chem dungu cüme quimnieiñ?

¹⁷ Inaduamiyiñ quiñeque huesaque dungu tami rupayafel deu tami fautizahun. Huelu cüdaungefule rume, serfinieafuimi Jehová. Fentrenque dungu femafuimi tami pepicaucüleal. Quisulelaimi llemai, Chau Jehová afcadinieimu. Jehová deu quelluqueimu cuifi ca femngechi quellunieaimu cüpalechi antü mu (1 Ped. 5:10). Nehuentucuaimu ca quelluaimu chem dungu rume rupafulmi. Eluucüleaimi tami quelluaeteu Jehová, femngechi chem huesa dungu no rume püntünentulayaimu Jehová mu (Sal. 119:165; Rom. 8:38, 39).