13-19 ABRIL, 2026
ÜLCANTUN 52 Jesús reque, eluhuiyiñ taiñ mongen
¿Chemu fente falin-ngei ti fautizahun?
“Quimeltuafimün iñche tañi inayaeteu engün. [...] Fautizayafimün engün” (MAT. 28:19).
¿CHEM QUIMAIÑ?
Chemu fautizauqueiñ, chem pengelqueiñ fautizahun mu ca chumngechi femqueiñ.
1. ¿Chemu quimnieiñ tati fautizahun rume falin-ngei Biblia mu?
QUIÑE taiñ pu peñi, pu lamngen fautizaulu, rume ayüuqueiñ. Ca femngechi ti pu hunenque cristiano rume ayühuingün fautizaulu alün che ti Pentecostés 33 tripantu mu. Feichi mu, Pedro huli quiñe hueupin feipilu fente ñi falin-ngen tati fautizahun (Hech. 2:38, 40, 41). Rupachi antü mu, apostol Pablo huirintucui tati “fillque fautizahun” coneltulei tati “hunenque quimeltun” Cristo meu (Heb. 6:1, 2). Tati fautizahun quiñe tati doi falin quimeltun mülelu Biblia mu, feimu mülei taiñ cüme adümafiel.
2. ¿Chemu mülei taiñ cüme adümafiel ñi feipin Biblia ti fautizahun mu?
2 Raquiduamnge tüfa: quiñe che ayüle ñi teifünoal tañi ruca rupale quiñe fütra nüyün, mülei tañi cüme anümcünuafiel. Ca femngechi ñi nehuencüleal taiñ feyentun, mülei taiñ cüme anümcünuafiel reque. ¿Chumngechi femafuiñ? Mülei taiñ cüme adümafiel tati hunenque quimeltun tripalu Biblia mu. Quiñe tüfa tati fautizahun. Feimu petu fautizaunoliyiñ cam alün tripantu yenieliyiñ taiñ fautizaucülen, mülei taiñ adümafiel chumngelu fente falin-ngei tati fautizahun. Feimu tüfachi troquiñ mu ngüneduamaiñ tüfachi ramtun: ¿chem pengelquei tati fautizahun? ¿Chumngechi femngequei ca chem coneltulei? Ca, ¿chumngelu fautizangequeiñ Jehová ca Jesús tañi üi mu ca Ngünechen tañi nehuen tañi üi meu?
¿CHEM PENGELQUEI TI FAUTIZAHUN CA CHEMU FALIN-NGEI?
3. Fautizahun mu, ¿chem pengelqueiñ?
3 ¿Chem pengelqueiñ fautizaulu iñchiñ? 1) Maneluhurpuiñ com taiñ quimeltuqueteu Biblia Jehová ca Jesús mu. 2) Repentiutuiñ taiñ culpan mu. 3) Cüme elcünutuiñ taiñ mongen taiñ serfiafiel Jehová. 4) Quimürpuiñ Jehová ñi adniefiel Jesús taiñ montulaeteu. Ca 5) llellipufiyiñ taiñ hultucuafiel taiñ mongen, femngechi feipicünufiyiñ taiñ femal fei tañi ayüqueel tañi troquiñche engün. Deu feipicünuiñ ca fautizahuiyiñ, coneltuiñ taiñ rumel serfinieafiel Jehová ca taiñ nierpual afnoachi mongen.
4. ¿Chem pengelquei taiñ ñamconün co mu ca tripatun? (Ca inaduamnge ti adentun).
4 Fautizaulu iñchiñ, ñamconiyiñ co mu ca tripatuiñ.a Femngechi rüngaltucungeiñ reque ca huiñomongetuiñ (ca ngüneduamafuimi Colosenses 2:12). ¿Chemu feipiafuiñ? Ñamconlu iñchiñ co mu, pengeliyiñ taiñ elcünufiel taiñ cuifi mongen. Ca tripatulu co mu, pengeliyiñ taiñ nietun hue mongen taiñ hunentucuafiel Jehová tañi ayüqueel.
Fautizaulu eimi, pengelimi tami elcünun tami cuifi mongen ca nietuimi hue mongen tami ayühulafiel Jehová. (Inaduamnge parrafo 4).
5. Tañi femün quiñe che tañi fautizahurpual, ¿chumngechi trürümngeafui tañi femün Noé? (1 Pedro 3:18-21).
5 (Papeltunge 1 Pedro 3:18-21). Pepicaulu iñchiñ taiñ fautizahual, trürümngeafui tañi femün Noé ñi deumafiel tati fütra huampo ruca. Pichiñma yenielmi tami quimelngeel Biblia, “rume cüdaungei tañi fautizahurpual” piafuimi chi, trürümafuimi tañi fente cüdahun Noé tañi deumafiel ti fütra huampo ruca. Cüdaungeafui llemai, huelu duamfali tami femal. Raquiduamnge ñi femün Noé. Tañi mongetripayal ti Fütra Mangin Co mu, mülefui ñi inayal com ñi feipieteu Jehová chumngechi ñi deumayafiel ti fütra huampo ruca. Noé tañi feyentun mu ca Jehová tañi quellueteu mu, huechunenturpui chi cüdau (Gén. 6:22). Ca femngechi eimi, Noé reque, huechunenturpuafuimi Jehová tami feipiqueteu tami fautizahual.
6. Ñi feipin Pedro, ¿chumngechi montulqueiñmu ti fautizahun?
6 Versiculo 21 mu, apostol Pedro huirintucui: “Ti fautizahun montulqueimünmeu”. Huelu feita feipilai re taiñ fautizahun mu müten perdonangequelai taiñ culpan. Jesús tañi hulün mu müten tañi mongen, perdonangequeiñ (1 Juan 1:7). Huelu rume falin-ngei taiñ fautizahual Jehová cai feipilu, ca taiñ fautizahun mu ‘llellipuquefiyiñ Jehová taiñ nieal cüme raquiduam’. Fei, ¿chumquei Jehová? Jesús tañi lan mu, ayühunquechi perdonaqueiñmu taiñ culpan ca eluqueiñmu maneluhun taiñ rumel mongeleal. Tati fautizahun ñi duam mu nieafuiñ tüfachi maneluhun, feimu Pedro feipi “ti fautizahun montulqueimünmeu”.
¿CHUMNGECHI FEMNGEQUEI CA CHEM CONELTULEI?
7. ¿Chumngechi femngequei ti fautizahun?
7 ¿Chumngechi femngequei ti fautizahun? Biblia feipi tañi com ñamconal ti che, huelu doi feipiquelai. Huelu eluqueiñmu cümeque ngülam taiñ inayal. Quiñeque tüfa chumngechi ñi tucutuucüleal pu fautizahualu ca chem ñi femal tati pu adquintulelu (1 Cor. 14:40; 1 Tim. 2:9). Quiñe loncolelu elfalcünungei ñi fautizacheal, huelu doi falilu caquelu mu troquingequelai (1 Cor. 1:14, 15). Jehová cüme llouquefi tati fautizahun mülele alün che cam pichin che rume (Hech. 8:36).
8. ¿Chem ramtungequei pu fautizahualu ca chumngelu? (Hechos 2:38-42; ca inaduamnge ti adentun).
8 Biblia pengeli pu cristiano “mülei ñi huldungual” tañi feyentulen tañi montulngeal (Rom. 10:9, 10). Feita femqueiñ taiñ amuldunguchequen mu, huelu ca femqueiñ feichi antü fautizahun mu, tati fautizahun am duamfalngelu taiñ montulngeal. Feimu tati pu fautizahualu ramtungequei 2 dungu. Hunelu mu ramtungequei: “¿Huiñoraquiduamtuimi mai tami culpan mu, ca hultucuimi tami mongen ta Jehová mu, ca feyentunieimi mai Jesucristo ñi lan meu?”. Tüfachi ramtun raquiduamelfi ti che tañi deu femün tañi fautizahurpual. Tüfa trürümngei tañi feipin Pedro Pentecostés mu, feipifi tati pu che ñi nor raquiduamtual ca ñi fautizahual. Tati fautizahualu ca ramtungequei: “Fautizahualu am eimi Dunguquelu Ineingen Jehová ngeaimi ca coneltuaimi Chau Ngünechen tañi troquiñche mu, ¿quimtucunieimi tüfachi dungu?”. Feitachi ramtun raquiduamelfi tati fautizahualu chem ñi femürpual. Mülei tañi inayal com ñi feipin Jehová tañi troquiñche ca serfiafiel Jehová trür tañi pu peñi ca pu lamngen engün. Ca femngechi femi engün pu hunenque cristiano deu fautizaulu feichi Pentecostés mu (papeltunge Hechos 2:38-42). Pu cüpa fautizaulu mai pile tüfachi 2 ramtun mu, fautizahuaingün.
Tami fautizahun mu, caquelu che ñi adquiñ mu pengelimi tami feyentulen. (Inaduamnge parrafo 8).d
9. ¿Chem mülei taiñ femal com iñchiñ taiñ ayühulafiel Jehová?
9 Petu tami quimnofiel tati rüf dungu, eimi cüme mongen yeniequefuimi chi ca conquelafuimi fütraque culpan mu. Cam pichicalu müten eimi, tami pu chau quimeltueimu tami piuqueyeafiel Jehová. ¿Duamfalngepei mai tami nor raquiduamtual ca fautizahual tami ayühulafiel Jehová? ¡Felei llemai! Com iñchiñ culpafe chengeiñ, feimu püntüleiñ Chau Jehová mu (Sal. 51:5). Huelu doi quimürpufilu Jehová iñchiñ, eluhuiyiñ taiñ hueniyeafiel. Feimu famentufiyiñ iñchiñ taiñ ayüqueel taiñ femal Jehová tañi ayüqueel. Femngechi repentiutuiñ taiñ cuifique culpan mu ca cüme yenietuiñ taiñ mongen taiñ ayühulafiel Jehová, fei hula fautizahuafuiñ (Hech. 3:19).
10. Deu fautizaucülelmi cangelu religion mu, ¿chem mülei tami femal?
10 Eimi deu fautizahuimi chi cangelu religion mu, huelu ca mülei tami fautizahual tami testigongerpual. ¿Chemu? Fautizaulu eimi tami cuifi religion mu, quimquelafuimi tati rüf dungu Jehová ca Jesús mu. Cuifi llellipufimi Chau Dios tami femal fei tañi ayüqueel, huelu cüme quimquelafuimi chem tañi ayüqueel ta Jehová. Peaiñ chem ñi rupan hunen siglo mu. Quiñeque Éfeso che deu fautizaucülefuingün, huelu quimquelafuingün ti rüf dungu Jesús mu. Feimu Pablo feipieyu tañi huiño fautizautual (Hech. 19:1-5).b Ca femngechi fachantü, ñi fautizahual quiñe che, mülei tañi cüme quimafiel Jehová tañi quimeltun ca tañi ayüqueel, femngechi müten Jehová cüme llohuai tañi fautizahun.
“TI CHAU, TI FOTÜM CA CHAU NGÜNECHEN ÑI NEHUEN TAÑI ÜI MEU”
11. ¿Chem cüpa feipi fautizahual tañi üi meu “ti Chau, ti Fotüm ca Chau Ngünechen ñi nehuen”? (Mateo 28:18-20).
11 Jesús feipi tati pu hueque discipulo ñi fautizangeal “ti Chau, ti Fotüm ca Chau Ngünechen ñi nehuen tañi üi meu” (papeltunge Mateo 28:18-20). Biblia nütramcan mu tati “üi” mu, quiñeque mu pengelquei tunte ñi alüpüralen ca chem autoridad ñi nieel tati yenielu feichi üi. Feimu fautizahun mu iñchiñ Jehová ca Jesús tañi üi mu, pengelqueiñ fei engu müten niei autoridad taiñ feipiaeteu taiñ chumal. Ca fautizahun mu iñchiñ Chau Ngünechen ñi nehuen tañi üi meu, pengelqueiñ taiñ eluucülen taiñ adnieaeteu. Feula doi ngüneduamafiyiñ.
12. ¿Chem pengeli fautizahual tati Chau tañi üi meu? (Apocalipsis 4:11; ca inaduamnge ti adentun).
12 Fautizahuiyiñ tati Chau ñi üi meu. ¿Chem pengeli tüfa? Iñchiñ quimnieiñ Jehová taiñ Huenu Chau ngen, taiñ elueteu mongen. Com nehuen-ngei ca deumafi com tati mülelu (papeltunge Apocalipsis 4:11). Ca quimnieiñ taiñ allcütuñmaqueteu taiñ llellipun. Ca llellipun mu ca amuldunguchequen mu, yamquechi üituquefiyiñ tañi üi (Sal. 65:2). Huelu ca quiñe dungu mülei taiñ quimtucunieal. Raquiduamnge ñi femün pu che allcütufilu Pedro Pentecostés mu. Deu quimquefuingün ta Jehová, huelu feula mülefui tañi quimtucual Jehová tañi montuleteu Jesús tañi duam mu (Rom. 5:8).
Deu fautizahulmi, inanieafimi Jehová ca Jesús ca tami adnieaeteu Jehová tañi nehuen. (Inaduamnge parrafo 12).
13. ¿Chem pengeli fautizahual ti Fotüm tañi üi mu? (Ca inaduamnge ti adentun).
13 Fautizahuiyiñ ti Fotüm tañi üi mu. ¿Chem pengeli? Quimnieiñ Jesús Chau Dios tañi quiñen Fotüm ngen. Ca quimnieiñ Jesús tati rüpü reque felei, fei tañi duam mu müten cüme hueniyeafuiñ Jehová (Juan 14:6). Ca quimnieiñ Jesús ñi lan iñchiñ mu taiñ rumel mongeleal. Quimfiel mu tüfa, inaquefiyiñ fill antü taiñ mongen mu, taiñ fautizahun mu müten no (1 Juan 2:6). Jesús reque ayühunquechi amuldunguchequeiñ, eluuquelaiñ chem no rume taiñ catrütuaeteu (Luc. 4:43). Caiñetungeliyiñ rume, eluucüleiñ taiñ püntütripanoal Jehová mu (2 Tim. 3:12). Ca yamquefiyiñ ‘Cristo ñi loncolen ti trahunche mu’, feimu ayühunquechi inaquefiyiñ taiñ feipieteu pu huentru ñi elcünuel Jesús taiñ adnieaeteu (Efes. 4:8, 11, 12; 5:23).
Deu fautizahulmi, inanieafimi Jehová ca Jesús. (Inaduamnge parrafo 13).
14. 1) Fautizahual Chau Ngünechen ñi nehuen tañi üi mu, ¿chem pengeli? (Ca inaduamnge ti adentun). 2) Pu dullinque cristiano, ¿chem caquelu fautizahun llouqueingün? (Ca inaduamnge ti huichulechi dungu “Caquelu fautizahun ñi coneltulen pu dullinque cristiano”).
14 Fautizahuiyiñ Chau Ngünechen ñi nehuen tañi üi meu. ¿Chem pengeli tüfa? Iñchiñ quimnieiñ ti rüf dungu Chau Ngünechen ñi nehuen mu, feita espíritu santo ca pingelu. Tüfa quiñe che no tati ca coneltulelai quiñe trinidad mu, Chau Dios mai tañi nehuen. Quimnieiñ Jehová tañi nehuen mu quimelelfi tañi pu huerquen chem tañi feipial ca adniefi pu huirintuculu Biblia. Feimu papeltuquefiyiñ Biblia ca inaquefiyiñ tañi feipin (2 Ped. 1:20, 21). Ca eluucülequeiñ taiñ fütra culpanoal. Quimnieiñ fütra culpafuliyiñ, lloulayafuiñ Jehová tañi nehuen ca catrütuafuiñ reque ñi müleal ti trahunche mu (Efes. 4:30).
Deu fautizahulmi, inanieafimi tami adnieaeteu Jehová tañi nehuen. (Inaduamnge parrafo 14).
15. ¿Chem eluucüleaiñ taiñ femal?
15 Eimi deu fautizaucülelmi, raquiduamcüleafuimi chemu fente falin-ngei tati fautizahun.c Ca huechurpuaimi tami feipicünufiel Jehová hultuculu tami mongen ca fautizaulu. Petu fautizaunolmi cai, ¿chem am catrütumequeimu? Cüpalechi troquiñ mu ngüneduamaiñ tami chumal tami fautizahurpual.
ÜLCANTUN 161 Com piuque mu serfinieayu
a Quiñeque religion quimeltuquei ñi fautizangeal quiñe che mülei ñi pachügtuculelngeal co cam hutrulelngeal co. Huelu Biblia mu ti palabra rulpadungungelu “fautizahun” griego quehun mu feipi “ñamconal co mu”. Feimu ñi fautizangeal che mülei ñi ñamümtucungeal co mu.
b Pu huentru Éfeso mu feipingün: “Fautizangeiñ chumngechi ñi quimeltuel Juan” (Hech. 19:3). Pu judio culpaquefuingün tañi inanofiel mu Moisés ñi ley, feimu Juan ti Fautizachefe feipiquefeyu ñi repentiutual engün, fei fautizaquefui pu repentiulu (Mar. 1:4, 5). Huelu duamfalngehuenolu inayal Moisés ñi ley, Jehová cüme llouhuequelafui feitachi fautizahun. Feichi mu ca fantepu mu, Jehová ñi adquiñ mu quiñe fautizahun müten yequefi ta che tañi montual (Efes. 4:5).
c Peafimi ti troquiñ “¿Chem am ti fautizahun?” mülelu jw.org ca JW Library® cheu ñi feipin “Fillque ramtun Biblia mu”.
d ¿CHEM PENGELI TI ADENTUN? Quiñe fütra trahun mu pu fautizahualu pengelmequei tañi feyentulen com pu che ñi adquiñ mu.