Ntele Ibe Jioba Ikpukpo Emi

Me lek owuwa inu mmun̄be me ere ya, ire ebi ikisi ikwaan̄ me ere ya ke nkaan̄ ulọk me lek ichit. Bọn ute irieen̄ mè ibaan̄ ikup ijija ekpọkpọk ikirọ chieen̄ ikwaan̄ yaage. Ema kpekup me ere ebekimun̄ ema mè ikitọn̄ ema. Ire, ema ekibebele ejit, mikaan̄ si ujot owot. Akpat ukot kiban̄ ijeen̄ emi inu isibibe isasa me nsikilek ikitọbọ ebum inyi Awaji.

Ike acha okije, Jioba ikukup inye ikikpukpo emi inyi nkana ata ogwu usun̄ kan̄. Ire, madasi ikpa ubọk nsabe ikween̄ atikọ mije, mwuwuuk lek ire Buddhist.

MWEEK ATA AWAJI ME MGBỌ NKUPBE IJIJA

Eman emi mè ikpukpo emi isibi me Chicago, Illinois, U.S.A., emi nre adasi gwun̄ me lek nsabọn ini nga n̄a mè nte n̄a ekaan̄be. Nga n̄a mè nte n̄a enan̄a me Japan inu me Chicago me nkeek ibe ke ugwem monwọn inyi ema. Ema miweek ibe nsabọn kiban̄ esi uwu ikpa mè eluk ata ugwem.

Nte n̄a mè nga n̄a ire atalek ebi Buddhist. Ekpukpo nga n̄a isibi me uwu ekaan̄be ere ekiriaak Buddha, orere, mkpọ ekọkọ mè iyaka ire mkpọmfaka ge. Nte kan̄ mè ebi ngwan̄ ebirieen̄ iba ire ebi ijejeen̄ me uwu uriaak ya. Mgbọ nkupbe ijija, ebi uwu n̄a mimọnọ irariaak Buddha kubọk mkpọ okukup ufiak enenen. Adasi mkpọ nkirọ nsika uwu ikpa ire iwọwọp nsensi mè inyinyi Buddha rice mè mun̄. Me usen Sunday geelek, eji mikisi ere uwu uriaak Buddha ge mè ikirọ inu yaage, ire, esa alata araran̄ ikọ Buddha eyi okup me ere ya, imin si igak eyi okup me uwu kiji.

Me mgbọ nkupbe mkpọ obet lek acha jaaba, ike nkikpọ Buddha okup me uwu kiji, ndodo lek n̄a ibe, ‘Keke oborọ emi nsikwu?’ Ejeen̄ emi me uwu uriaak Buddha ibe ke makana ekwukwu nsikwu. Eya orọ, nrọriọọn̄ ibe ke makwu usen ge. Makọt ikiluk kubọk ekwukwu, ire, mkpabayaka inwọọn̄ ugwem kubọk ebilene. Eyi irọ ibe mfieek ejit! Mgbọ yaage, ibebene ikikup emi me lek kubọk ke kpunu ogwu obokọt itap ubọk inyi emi.

Me mgbọ nkupbe mkpọ obet lek akọp mè acha go, orọmijọn̄ ebi Buddhist mwuukbe lek ikigọọk irọ ikayaka ikup emi me lek kubọk inu geege. Ikup emi me lek kubọk ke ikaan̄ mkpọ okinan me ugwem n̄a. (Mat 5:3) Me emen ejit n̄a, nchieek inye ibe ke ikaan̄ Awaji okup me ugwem mè ikaan̄ unye ichit, mweek si irọriọọn̄ ọmọ. Nkeek si ibe ke Baibul mofọọk idodo nkaan̄be ofolek Awaji, ugwem mè mkpa. Eya orọ, nlelep oka Baibul King James Version ge me orirọ ebi Buddha ge​—ere orirọ ya ikagbe ere enyambe Baibul!

Me mgbọ nkupbe akọp mè acha jaaba, Gwun̄ Ute ge ekigwen Wilson Bashou ojeje inu emi lek ike nkisa ibo n̄a ije ikana. Idodo emi ibe, “Ire oriọọn̄ inu Awaji ochieekbe me use ibe ke ọmọ morọ me mgbọ okup me isi ni?” Eyi idobe idodo ya isan̄a, eji egbagbaan̄ ikpa Baibul. Wilson ifuk ikpa Ichichili ibot 17:1 inyi emi mè ido emi ibe, ‘Keke ke owuwa okwaan̄ ogwu oje oyet okupbe me inyọn̄ osibi?’ Nkariọọn̄ mkpọ mbafọọk. Ijejeen̄ emi agba eyi 15 eyi obe ke okwaan̄ ya ìkeke inyi urum ebi ene. Itop emi me lek ikwekween̄ ibe ke Ebi Ata-Ikọ Jioba ekisa esese esese ere me Baibul igobo itet agan̄ oyọyọt igogobo itet. Me nkana-ngwook ukpatu kiji, Gwun̄ Ute Wilson onyinyi emi ikpa The Truth That Leads to Eternal Life. Sọntiik ikpa oluku oluku ya onwene ugwem n̄a.

Akọp usen iraraka, nsisi adasi nkween̄mkpọ ntitiin̄ me uwu ntitiin̄. Mkpawuuk ubọk esabe ibọkọ emi itap me usen ya. Karake ya ke mbene ikisi nkween̄mkpọ ntitiin̄. Sọnja mgbọ iraraka me lek, Wilson obebene ikigọọk emi ikween̄ mkpọ. Mma ikwekween̄ Baibul enenen, usini mgbọ, nkween̄mkpọ Baibul kiji ikekibọkọ mbubak mgbọ jeeta. Nga n̄a mè nte n̄a mikaan̄ sasaak enenen ofolek n̄a, ema kpema nkween̄mkpọ nkikaan̄. Ire, ike nkupbe inye ikikween̄ mkpọ, mkpọkpọk ikimun̄ atikọ okup me lek mkpọ nkikween̄. Nkakaan̄ ntap-me-mun̄ me acha 1983.

NTELE UWU IKPA ILILE NKISI MÈ IBENE IKIGBỌ ONIIN̄ OJOT MGBỌ

Me mgbọ nkaan̄be ntap-me-mun̄, nkisi uwu ikpa ilile ge eriọọn̄be ijaan̄, ere nkikween̄ mkpọ inyi nkọt nkana ogwu ofia ebeke. Nte n̄a mè nga n̄a migwa owuwa ngwugwa isasa imun̄ ibe ke nsi uwu ikpa ya. Kè nkọt nkup nnye nkensi uwu ikpa ilile ya, ire, bak me lek nkiweek inyinyi Jioba ntọbọ-ebum onwọnwọn ichit me ikwaan̄ ojot mgbọ, nkayaka isi uwu ikpa ya.

Nte n̄a otutumu inyi emi ibe, “Ire okayaka isi uwu ikpa ilile ya, malap owu isibi me uwu!” Mfieek ejit enenen, nkarọriọọn̄ si mkpọ mbarọ. Mma nte n̄a mè nga n̄a enenen, nkaweek itọtọbọ ema ilọ. Eya orọ, nkimalek isi ere uwu ikpa ya me eririeen̄ isi ibeek uriaak. Me uriaak ya, nkitumu ibe, “Jioba, soso tap ubọk nyi emi me lek ntumu-mfieek yi mbarọ.” Mgbọ ntumube ifieek inanan̄a me uwu ikpa ile, nte n̄a orerieen̄ emi isibi me uwu. Ngwegwen Gwun̄ Ute Wilson mè itumu inyi ọmọ inu obọbọkọ irek. Igwegwen emi ibe nnengọọk ọmọ nluk. Mkpukpulu otutuuk mkpọ nkaan̄be itap me emen akpa ge mè inin̄ uji ijọn̄ isi igọọk Gwun̄ Ute Wilson iluk. Mkpakọt ikpa ubọk lek n̄a osabe ikup dii ire. Nsa me ikeya iriọọn̄ ibe ke ire ata ntumu-mfieek ke nrọ.

Ikup emi me lek kubọk emi ire ofut esan̄abe isibi me emen uwu kan̄! Makọt isa ugwem n̄a itọbọ ebum inyi Jioba mgbọ keyi nkaan̄be lek n̄a. Me acha 1984, mbebene ikigbọ oniin̄ ojot mgbọ.

Me okike mgbọ nkigbọ oniin̄ ojot mgbọ, Jioba itap ubọk inyi emi nkọt nkween̄ owuwa ata eru kubọk, itetet lek inye. Usen ge, ikup kubọk mkpakọt isibi uko. Efuuk itata emi owot mije, kpunu ogwu obogọọk emi isibi uko me ikarek usen ya. Ire, nsa mè ikọt isibi uko mè ikup iso mbubak mgbọ iba. Ntutumu ifieek ibe ke ota ere mbasi ire uwu ilile ge okakaan̄ ogbogbo agwut. Lek iwọ emi enenen, ikup me lek n̄a si kubọk ibot iborerep. Mbebene ikikeek mè ire machit sa mkpachit. Ike nkinene otitop uwu ya, mmumun̄ ogwu enerieen̄ Filipino ge. Otutuuk ejit n̄a ire ke ogwu enerieen̄ ya ikpochieek igbagban̄ etip nsabe inu, ire, nkeek ilọ mije, ogwu enerieen̄ ya igban̄ utọn̄ mè ikana ogwu okitọbọ ebum inyi Jioba.

NKWEEN̄ OWUWA ATA MKPỌ ME BETHEL OKUP ME BROOKLYN

Eyi ngọọkbe Gwun̄ Ute Wilson iluk iso acha iba, egwegwen emi inu me Bethel me Brooklyn me acha 1985. Kubọk mwuukbe lek itumu me adasi mgbọ, ebe mè nsi ikwaan̄ me ere ekigon ikpa. Usen ge, ike nkisi ikwaan̄ me lek okwukwut ekisa itap udun̄ me lek ikpa egonbe, ngege ibot usem obokup me udun̄ ikpa cha egonbe ilọ. Eyi irọ ibe efiat owuwa ikpa. Bọn ute ebi nkigọọk isi ikwaan̄ etutumu inyi emi ibe mkpa nnyi ogwu okikpọ chieen̄ me lek ikwaan̄ me ere ya. Mkpakpa otutuuk inu orọrọ nrọbe inu ya ilọ, ire, ikaan̄ inu ge okukup ufiak eyi nkatumu. Ogwu okikpọ chieen̄ me lek ikwaan̄ ya osasa me ata ida ikeek emi ibe, “Igbe ibe okotumu kpukpa.” Mgbọ ya, nkwekween̄ ibe nsirọ ilọ, igbe ibe nchieek ibe ke nrọ ilọ mè mbe ogwu nrọbe ilọ ikpukpa.

Sa me ikpọkpọ ubọk ebi ininin̄ ugane me Bethel ebi ikigbe utoon̄-ejit ekirọ mkpọ, nkween̄ si ubọk mbakisi ikwaan̄ inyi ebi ofifi ife ijaan̄. Me mgbọ ge, Gwun̄ Ute Milton Henschel, ene ge me lek Akpalek Okikpọ Ntitiin̄ igọọk eji ikweek irek me ikasi me ere eji eberie inorie ikarek. Usen ya, ebi inirie inorie me ere ya miwa igak mkpọ ebi ikisi ikwaan̄ me ere ya ekeekbe, ema si ekpọkpọk ikisa efuuk kiban̄ icheche inorie ikana inyi ebi ene. Eji ebi ijija ikukup me ikasi ya ekpọkpọk ikininaan̄ lek ibe ke ebi ikirọ ikwaan̄ ya ekikukukubọ. Gwun̄ Ute Henschel ikatumu usem geege, ikpọkpọk inan̄a ikeke mè igọọk ebi ikiche inorie cha ikito ekpe mun̄ mè alala fituru mè butter. Mkpabawuuk ikwaan̄ Gwun̄ Ute ya osabe me usikilek irọ. Ikeek emi ubọk Jisọs osabe isi ikwaan̄ inyi ebi otuchieen̄ kan̄.​—Jọn 13:​3-5.

“IGBE IBE OKWEEN̄ IDA USEM EBI JAPAN!”

Me acha 1987, nkọkọp uran̄ isi Japan, mma mbet lek uyok uyok ejit mè nsikilek ebi ikilook ata etip me ere ya ekaan̄be. Mweek itatap ubọk inyi ema ekọt ekelook ata etip ejaan̄, ire, nkakọt irọ ikeya mije, nkariọọn̄ ida usem Japan. Michiko Oda, Gwun̄ Ute enenwaan̄ ge okup me Bethel okpọkpọ emi mè itumu inyi emi ibe, “Igbe ibe okween̄ ida usem ebi Japan!” Eya ore inu nrọbe si. Nkariọọn̄ ibe ke nteme ya monwene ugwem n̄a.

Onyan̄ inen mè inen oraraka, mbebene ikisi ntitiin̄ ere ekisa ida usem Japan irọ mkpọ me New York. Ikwekween̄ ida usem Japan ibook owuwa irek inyi emi me ntọbọ-ebum n̄a isa inyi Jioba. Adasi chinichini ilile nsibe eyi esabe usem ebi Japan irọ mkpọ ire me acha 1989, me Los Angeles, California. Ere ya ke mmun̄ Miwako Onami, Gwun̄ Ute enenwaan̄ okigbọ oniin̄ ojot mgbọ ogwu ogọgọọk irọ drama me chinichini ya.

Emi mè Miwako ebat me acha 1992, eji mikaan̄ irek igbagbaan̄ isi ikwaan̄ kubọk olom mè nwa me Bethel okup me Brooklyn si. Miwako ire ogwu okito chieen̄ me ijọn̄ irọ mkpọ, ikijeen̄ ulọk me lek ebi ene, mè ikikup me mbem-lek itatap ubọk inyi ebi ofifi ife. Inan̄a me lek ata akpat ukot Miwako ojeen̄be emi, nkween̄ ikekisa me ata ejit irọ mkpọ melek ebi ofifi ife. Ọmọ ichubọk ire inyinyi onan̄a me ubọk Jioba, mè ire si ogwu okinyi emi ubelejit mè ukarajit.

EJI MISI IKWAAN̄ ME OTU AGỌỌK IKWAAN̄ ME JAPAN MÈ IGBỌ ONIIN̄ OJOT MGBỌ OSIBI ESESE

Ike mgbọ ojebe, nte mè nga kè Miwako, ebi ikiluk me Japan ebebene ikifiak orukan̄ enenen. Eya orọ, etetele ibe eji esi otu agọọk ikwaan̄ okup me Japan inyi eji mekup iriaak lek kiban̄. Eji esi ere ya me acha 1999.

Ebi ikup me Bethel me Japan mibọkọ eji itap, eji si mirọ ibe ere ya ikana uwu kiji. Nkaan̄ kpokpo igbaalek si ike nkisa igọgọọk ata akpat ukot ebi bọn ute irieen̄ mè ibaan̄ ikup me Japan, kubọk ikekichili ubọk mè ikekibọkọ ene itap. Ema mikito chieen̄ me lek ikwaan̄ kiban̄ mè ikirọ ikwaan̄ kiban̄ ijaan̄. Ema mikirọ ikwaan̄ ijaan̄ si kubọk urum ge. Ike owa ni? Me orọmijọn̄ ebi Japan, mikigon aban me lek ikekisa me ejit ge igbaan̄ isi ikwaan̄ melek ebi ofifi ife, kpan̄asi ikekirọ ikwaan̄ ibot ene ge gaalek. Akpat ukot kiban̄ itap ubọk inyi emi nkensa me usikilek nrọ ikwaan̄ melek ebi ofifi ife mè nkenwọọn̄ ubọk sọntiik inu nkirọ okigọọk itap ubọk irọ nkeek Jioba iso.

Bak me lek orọmijọn̄ n̄a melek eyi ebi bọn ute inan̄a me Japan okupbe esese, ikiyọt emi me lek igogobo itet mkpọ orọrọ bọn ute ebi ikup me Japan ekirọ usini mkpọ. Nkween̄ ibe ke igbe ibe emi nkaan̄ ime, mè nkakitet mkpọ gban̄. Ike mgbọ ojebe, nnwene ubọk nkikeek inu mè iniriọọn̄ si ibe ke Jioba mokọt igbana ntumu-mfieek geelek mè ire eji ikigọọk ntọ-ubọk geelek isabe ntitiin̄ kan̄ inyi eji. Ichubọk ire Jioba okirọ ibe ikwaan̄ kiji ikije ijaan̄.

Nkimalek isa kpokpo mbọkọbe me Bethel itọt me lek kpokpo ogwu nriran Mosis obọkọbe. Jioba itap ubọk inyi Mosis ikọt ikaan̄ ejit osisiki me akọp acha ini isibe ikwaan̄ kubọk ogwu okpukpo arọọn̄. Kubọk Mosis, mbọbọkọ kpokpo me uwu ikpa ilile. Ire, ntele ibe kpokpo ya irọ ibe nkengumu lek mè nkeyaka lek mmaan̄ me lek iriọọn̄-inu n̄a. Bethel ijeen̄ emi ibe nkensiki lek mè nkeyaka lek mmaan̄ me lek Jioba. Jioba isa me ime ikikpukpo emi me otutuuk acha chi oraraka ike ikpukpobe Mosis.

Eji mikpọ chieen̄ me lek nte mè nga Miwako me mkpọ oboso akọp acha iba mè ini mege ema ekwube. Eji migwen nte mè nga Miwako mè ebi ofia ebeke ikikpọ ema chieen̄ me lek owuwa mgbọ, eji mikaan̄ sasaak ofolek kiban̄, mè ikọp uran̄ isi uwu ugwun̄ owuwa mgbọ si. Lek isisaak Masako, nga kè Miwako enenen ire lek ikakikọkọt inan̄a ikeke. Isisi nkween̄mkpọ ntitiin̄ mè isisibi uko ikafet inyi ọmọ. Me nde inen mè inen sabum Masako okwube, ekisasa ikasi ekisa ibieen̄ ebi kpekikọt ije iben ọmọ. Ire, me ekakpọge chieen̄ me lek otutuuk inu chi ijebe itibi, ima Masako okaan̄be me lek Jioba ikawọ. Ikikakaan̄ unwọọn̄ mgbọ geelek ikitumu mkpọ ofolek atikọ Baibul. Masako itọbọ ebum inyi Awaji, ikaan̄ si ujot owot mè ubelejit me ekakpọge chieen̄ me lek inu ijebe itibi. Nchubọk iweek igọgọọk akpat ukot kan̄.

Eji misi ikwaan̄ me Bethel iraka akọp acha ita. Ugwem kiji inwene me acha 2024 mgbọ ebe mè eji efo esi ekelook ata etip. Mgbọ keyi, eji ekigbọ oniin̄ ojot mgbọ eyi osibi esese me achọ Okinawa. Eji mikaan̄ irek ilolook ata etip inyi ebi ikiluk me ere ebi akọn̄ ekupbe. Ata kpokpo eji ebọkọbe me Bethel otap ubọk irọ inyi unwene yi ifet me lek kiji. Eji mikisa ineneen̄ mkpọ eji ekaan̄be irọrọ ijaan̄ mè ikisa mgbọ kiji irọ mkpọ me oniin̄ onwọnwọn ichit sa me itoto chieen̄ me lek ikwaan̄ uko kiji. Jioba igbana eji sa me inyinyi eji ebi eji ekigọọk ikween̄ Baibul, ebi ikup kubọk ebi ototun̄ ukan̄ kiji. Eji mekikween̄ igbaalek mgbọ keyi ufiak irebe ikekima ebi ene. Emi mè Miwako mikitọn̄ Jioba egwe geelek bak me lek ata ikwaan̄ yi eji ekisi inyi ọmọ.

NTUMU IFIEEK ITETELE IBE JIOBA IKIKPUKPO EMI IGBAALEK

Ebi uwu n̄a kpeyaka ikikeke ikeme emi, ire, kpenunu inigọọk emi itọbọ ebum inyi Jioba. Ikerere ikeya, Jisọs ichieek ebi itetele ebi uwu kiban̄ mè inikana ebi udun̄ kan̄ use ibe ke ema mekaan̄ efit efit ebi ototun̄ ukan̄ me mgbọ keyi. (Mak 10:​29, 30) Eyi ichubọk ibọkọ irek inyi emi. Mkpabakọt ifuk otu ifuk esese esese ototun̄ ukan̄ ikukup ikana otutuuk linyọn̄ yi imama emi mè ikpọ chieen̄ me lek n̄a me owuwa acha chi oraraka.

Nkaan̄ ikpa Truth yaage Gwun̄ Ute Wilson onyibe emi. Ikpa oluku oluku ya ikikeek emi ubọk Jioba osabe irọ ibe mweek ọmọ mmun̄. (1 Mfuf 28:9) Ntumu ifieek ikukup inye ikitele ibe Jioba ikikpukpo emi mè ikekitap ubọk inyi ebi ofifi ife eneriọọn̄ atikọ oborọ ibe ema ekaan̄ ugwem ikakaan̄ge itata.