Gwat Lek Rọ Mkpọ Ofolek Ufialek Okaan̄be Melek Ofifi Ene!
IRE gwun̄ ute enerieen̄ ge mè iyaka ire gwun̄ ute enenwaan̄ ge irọ mkpọ onanaan̄ owu ire lek mgbaan̄je kinyi ofiatbe mgbọ keyi ni? Inyi enyi ekpọk ekana unene, igbe ibe osa me ata nkeek ogwat lek orọ mkpọ osilek ufialek ya.a
Kubọk inu njeen̄, ebegwagwa ogwu ukwuuk ofan̄abe inyi ọmọ ikọt ikaan̄ lek me ubọk mè ikayaka ikaan̄ unaan̄. Ire, ene ya ibokukup inye ikikaan̄ unaan̄ ire kperiọọn̄ ubọk ikpọ chieen̄ ijaan̄ me lek ukwuuk ofafan̄a ya. Eyi osasak ichit, mgbọ isiraka me lek, kpebeyaka ikọt inen̄e ukwuuk ya isun̄.
Ikeya si ke ikup me lek mgbaan̄je kiji melek ebi bọn Nte kiji me ntitiin̄. Igbe ibe eji etap efuuk ekegwat lek erọ esuuk melek ebi bọn Nte kiji inyi eji ekakaan̄ unaan̄ eyi mgbaan̄je ofafiat okisan̄a isibi. Eji mekọt ikikaan̄ uduk mè ifiat mgbaan̄je kiji melek ebi bọn Nte kiji. Jisọs itumu ibe: “Gwat lek rọ esuuk.” (Mat 5:25) Eya orọ, si lek ogwu unene kwun̄ mè sa ata otu tumu inu okisisaak owu nyi ọmọ. Keke orọ eyi obokọt iyọt irọrọ ni? Mokọt iyọt bak me lek mkpọ iba chi.
Adasi, omokọt iweek ikpọkpọ chieen̄ ilọ me lek ufialek ya mije, okaweek ikpakpa mkpọ ofolek ufialek ya.b Mkpọ yaage orọ Euodia mè Syntyche, ebi eyi Karais ikinaan̄ ejit inyi ge ge. Mokọt ire ibe ke gọlọgọlọ okup me etete kiban̄ ikup ifiin̄ mije, ikerere Pọọlu ogwu okup me Rom, ama ojọjọn̄ọ ere me lek ere Euodia mè Syntyche ekupbe inọ mkpọ ofolek. Itumu inyi ema ibe erọ inu geelek ema ebekọt irọ inyi ekpọk ekana unene. (Filip 4:2) Ema mekọt iyaka ire unene ire ema ekaan̄ eru nsikilek, ikpa ubọk inu okupbe ema me lek mè itele inyi ge ge.
Òso iba, omokọt ikikeek ibe ke ire ogwu orọrọ owu ilọ ya obonu me lek kwun̄ initumu inu irọbe isibi mè ibeek owu ibe otele onyi ọmọ. Ire, inu okukup ufiak ichit ire enyi iyayaka ikana unene, ikare ifefieek ene ikọ. Ogwu ofia ebeke okigwa ukwuuk ofafan̄a mosa inenen̄e ukwuuk ya isun̄ kpan̄asi ibokiweek irọrọọn̄ otutuuk mkpọ orọrọ ibe ukwuuk ya ifan̄a. Osikitumu ikọ melek ogwu unene kwun̄ ogwu orọrọ owu ilọ, katumu mkpọ ofolek ogwu obebene ufialek ya. Kpan̄asi ikeya, keek mkpọ ofolek ulọk enyi ekaan̄be me lek ge ge mè inu oborọ ufuna enyi eyaka ekana unene.
Ire okaan̄ ufialek melek Gwun̄ Ute ge, gọọk ọmọ kpa usem chereyi mè tap efuuk inyi okọt okpọk okaan̄ ata mgbaan̄je melek kan̄. Baibul ibe: “Katet unaan̄-ejit ya ìkaan̄ me ejit kwun̄ mege ìfit egwe.” (Efes 4:26) Sa me igwagwat lek irọ mkpọ isasa inen̄e ufialek isun̄, omotap ubọk ikibem “oniin̄ eyi esuuk eyi ògbagbaan̄ enyi ibọp.”—Efes 4:1-3.
a Ire ebi eyi Karais iba ekinaan̄ ejit inyi ge ge bak me lek sọntiik ufialek, igbe ibe ema egbaan̄ ekpa mkpọ ofolek mè ekup me mbem-lek itetele inyi ge ge. (Mat 5:23, 24) Ire, ire ufialek ya imin, ema mekọt ibe mè ebi ugane ntitiin̄ etap ubọk enyi ema inyi ekọt enen̄e esun̄. (Mat 18:17) Sabum obosi lek ebi ugane ntitiin̄, omodasi irọ mkpọ igọọk me lek onineen̄ okup me ikpa Matiyu 18:15, 16.
b Ire ogwu eyi Karais ogbo kiji irọ mkpọ onanaan̄ eji ejit, ire, mkpọ irọbe ya ikafiat mgbaan̄je kiji melek kiban̄, eji mekọt ikpọ chieen̄ ilọ me lek nrọ-nlọ ya.—Urọk 26:20.