Tap Ubọk Nyi Ebi Ofifi Ife Inyi Ema Eriọọn̄ Jioba

1. Ikikukup owu me lek osimun̄ ogwu okigọọk ikween̄ mkpọ okikaan̄ nje-nnyi-isi?

IKIKUKUP owu me lek osimun̄ ogwu okigọọk ikween̄ mkpọ onube nkween̄mkpọ ntitiin̄ me adasi mgbọ, ibene ikinyi ufọọk-otu, ikikpa inu ikikween̄ inyi ebi ofifi ife, mè itumu ifieek isasa lek kan̄ inyi Jioba? Kpunu cheche ibe ke okikaan̄ unwọọn̄! Me atikọ, Jioba okitap ubọk irọ inyi ebi eji ekigọọk ikween̄ Baibul ekekaan̄ nje-nnyi-isi me irek emen ekwukwu, ọmọ orọ, eji mikitọn̄ ọmọ.​—1 Kọr 3:​5-9; 3 Jọn 3, 4.

2. Keke ke Jioba oweek inyi ebi ikikween̄ Baibul? (Timọti Eyi Adasi 2:​3, 4)

² Nkeek Awaji ire mè “otutuuk ene ekaan̄ unyan̄a, mè eriọọn̄ atikọ kan̄.” (Fuk Timoti Eyi Adasi 2:​3, 4.) Ike ere Baibul yi okpabe, Jioba iweek ibe ebi ene eneriọọn̄ atikọ, orere, eneriọọn̄ ọmọ mè nkeek kan̄ ejaan̄. (Jeri 9:24) Usem Giris ekababe ‘irọriọọn̄ atikọ’ ikasibi gaalek ikpọkpọ iriọọn̄ mkpọ ofolek Awaji, igọbọ si itetele ibe mkpọ eji ekween̄be ibieen̄ eji ibe erọ mkpọ geelek eji ebekọt irọ inyi eji ekọt etaba lek eriaak me lek Awaji. Ogwu okikween̄ Baibul isiriọọn̄ Jioba ijaan̄, moweek inwenwene eru kan̄ mè ikirọ mkpọ Jioba omabe. Isikirọ ikeya, mokaan̄ ikpọchieen̄ iluluk ire mgbọ geelek.​—Jọn 17:3.

3. Keke ke eji ebekween̄ me ibot usem yi?

³ Jioba inyi eji irek itatap ubọk inyi ebi ofifi ife ibe eneriọọn̄ ọmọ. Me ibot usem yi, eji mekaan̄ ufọọk-otu inyi idodo chi: Keke orọ igbebe ibe ebi ikikween̄ Baibul eriọọn̄ Jioba ejaan̄? Ike owa ke eji ebesa ijeen̄ ema mbet ene Jioba orebe? Ike owa ke eji ebesa itap ubọk inyi ema ibe ekeluk ugwem egọọk iriọọn̄-inu ema ekaan̄be ofolek Jioba?

TAP UBỌK NYI EMA ERIỌỌN̄ JIOBA EJAAN̄

4. Igọọk me lek inu okup me ikpa Mak 12:​30, keke ore okpan okpan inu eji ebekaan̄ me nkeek eji esikigọọk ene ikween̄ Baibul?

⁴ Jisọs itumu ibe ke ikan omimin ichit ire isasa otutuuk ejit, ibot ejit, ekiket, mè unye kiji ima Jioba. (Fuk Mak 12:30.) Ogwu okikween̄ Baibul modasi iriọọn̄ Jioba sabum monima ọmọ. Eji ekiweek ibe ogwu eji ekigọọk ikween̄ mkpọ isa lek kan̄ inyi Jioba mè ikaan̄ ntap-me-mun̄ bak me lek ima ikaan̄be me lek Jioba, ikare bak me lek ikiweek irere ogwu unene kiji, mè iyaka ire ogwu unene ebi eyi Jioba mè iyaka ire bak me lek imabe usini ijejeen̄ Baibul. Eya orọ, okpan okpan inu orọrọ eji ekigọọk ebi ene ikween̄ mkpọ ire itatap ubọk inyi ema eneriọọn̄ mè ema Jioba.

5. Keke ke ima ogwu okigọọk ikween̄ mkpọ okaan̄be me lek Jioba obobieen̄ ọmọ ibe irọ?

⁵ Ogwu okigọọk ikween̄ mkpọ isiriọọn̄ Jioba ijaan̄ mè ima ọmọ, eya mobieen̄ ọmọ ibe isiki ibot inyi Jioba. Jisọs ijeen̄ ibe ke ogwu omama Jioba moma si isisiki ibot inyi ọmọ mgbo itumube ibe: “Ǹkiweek ibe ebi linyọn̄ eriọọn̄ ibe ke emi mma Nte n̄a, mè ikirọ otutuuk inu geelek ike Nte n̄a obe emi ǹrọ.” (Jọn 14:31) Ibet lek Jisọs, ima ogwu eji ekigọọk ikween̄ mkpọ okaan̄be me lek Jioba momin igak eyi ikaan̄be me lek ene mè iyaka ire inu geelek, ima ya si mokibieen̄ ọmọ ibe ikisiki ibot inyi Jioba mè ikigbe utoon̄-ejit inyi ọmọ.​—1 Jọn 5:3.

6. Ike owa ke iriọọn̄-inu ofolek Jioba obosa itap ubok inyi ogwu okigọọk ikween̄ mkpọ me mgbọ ikirọ ntumu-mfieek? Nyi inu ntọt-me-lek.

⁶ Ire ene ikikween̄ Baibul mè iriọọn̄ Jioba ijaan̄, ene ya mokirọ ata ntumu-mfieek. Kubọk inu ntọt-me-lek: Ire ene ikiweek ikwekween̄ ubọk ekikọp uji ijọn̄, ikpokọt ikween̄ gaalek sa me ikpọkpọ ubọk ebi ofifi ife ekikọp mè iyaka ire ifuk ikpa okijeen̄ ubọk ekikọp uji ya. Kpan̄asi ikeya, mosa ikọkọp uji ijọn̄ ya owuwa mgbọ inyi ubọk kan̄ inye me lek. Ubọk yaage si, ogwu ekigọọk ikween̄ Baibul ikpokọt iriọọn̄ Jioba ijaan̄ gaalek inan̄a me lek nkween̄mkpọ kan̄, ibokirọrọ ntumu-mfieek ojeje ikike me lek onineen̄ Baibul si mè ikitaba iman̄ me lek ubọk inu okije ijaan̄ me lek kan̄ isirọ ikeya. Ike iriọọn̄-inu kan̄ ofolek Jioba okimin, mè ike ikimun̄ ubọk Nte kan̄ ogwu okup me emen inyọn̄ okitap ubọk inyi ọmọ, ikeya si ke ibokirọ ata ntumu-mfieek me irek geelek me ugwem kan̄.

7. Ike owa ke iriọọn̄-inu ofolek Jioba osa itap ubọk inyi Josefu ibe irọ ata ntumu-mfieek?

⁷ Josefu iriọọn̄ Jioba ijaan̄, ọmo orọ ikọtbe irọ ata ntumu-mfieek me mgbọ nwa kè Pọtifa okiweek ibe igọọk ọmọ ilaak. Mgbọ ikupbe ijija, Josefu ira ikween̄ mkpọ ofolek Adam mè Îfu mè Ebereyam mè Sera. (Ibeb 2:24; 20:​3, 6) Josefu igobo itet nkeek Jioba ofolek mbat-olom mè ilaak inan̄a me lek ukpatu ofolek ife chi. Bak me lek iriọọn̄be Jioba ijaan̄, Josefu ijit nwa kè Pọtifa mè itumu ibe: “M̀bajeje inirọ inu ikpak òkup ikeya, mè irọ Awaji ijo inu?” (Ibeb 39:​7-9) Josefu iriọọn̄ inu echi otatat mè echi olọlọ me chieen̄ Awaji. Iriọọn̄ inu echi oborọ inyi Awaji ikabele ejit. Eya orọ inyi ikọt irọ ata ntumu-mfieek. Ire eji itap ubọk inyi ebi eji ekigọọk ikween̄ mkpọ ibe eriọọn̄ Jioba ejaan̄ mè eriọọn̄ si mbet ene irebe, ema si mekọt ikirọ ntumu-mfieek obokibele ọmọ ejit.

JEEN̄ EMA MBET ENE JIOBA OREBE

8. Ike owa ke obokọt isa ikpa Nwọọn̄ Ugwem Re Mgbọ Geelek! itap ubọk inyi ogwu okigọọk ikween̄ mkpọ ibe iriọọn̄ Jioba ijaan̄?

⁸ Ike owa ke obokọt ijeen̄ ogwu okigọọk ikween̄ mkpọ mbet ene Jioba orebe? Jioba itap ubọk inyi Jobu ibe ikween̄ mkpọ ofolek kan̄ igbaalek sa me idodo ọmọ mkpọ oraraka akọp idodo go! (Jobu 38:1–41:34) Eji si mekọt ido idodo me mgbọ eji ekigọọk ene ikween̄. Eneen̄ idodo echi okup me ikpa Nwọọn̄ Ugwem Re Mgbọ Geelek! isasa itap ubọk inyi ebi eji ekigọọk ikween̄ mkpọ ibe ekween̄ mkpọ ofolek ogwu Jioba orebe egbaalek. (Kpọ okop obe “Idodo Echi Okitap Ubọk Inyi Eji Ejeen̄ Mkpọ Ejaan̄.”) Eya orọ, kisa idodo chi sa tap ubọk nyi ebi okigọọk ikween̄ mkpọ inyi eriọọn̄ Jioba ejaan̄.

9-10. (a) Keke obokọt itap ubọk inyi ebi eji ekigọọk ikween̄ mkpọ enwọọn̄ ikekifuk Baibul? (Jemis 5:11) (b) Sa ukpatu Danien kpa usini idodo ogwu okikween̄ Baibul obokọt ido lek kan̄ inyi ikọt iweek iriọọn̄ mkpọ okineme Jioba mè echi ikakineme ọmọ.

⁹ Me mgbọ eji ebenebe ikigọọk ene ikween̄ Baibul, eji mikitap ene ya efuuk me owot ibe ikifuk Baibul egwe geelek.a Ike owa ke eji ebekọt itap ubọk inyi ema ekaan̄ oruru enan̄a me lek inu ema ekifuk? Eji mekọt itumu inyi ema ibe mgbọ geelek ema efukbe ere Baibul ge, ekeek-nu inu orọrọ Jioba otapbe mfufuk ya me Usem kan̄ mè inu ere ya okijeen̄ ema ofolek Jioba. Kubọk inu njeen̄, taba iman̄ me lek ubọk ogwu ikwaan̄ Jemis osabe irọ ikeya me mgbọ ikitumu mkpọ ofolek Jobu. Jemis ikasa nkeek ebi ene isi lek eru ime kè Jobu gaalek, ire, itumu mkpọ ofolek ata ejit mè nsan Jioba okaan̄be si.​—Fuk Jemis 5:11.

¹⁰ Eji ekiweek ibe ebi eji ekigọọk ikween̄ mkpọ ekọt eketaba iman̄ me lek ubọk ukpatu Baibul geelek okikpọk mbum inu echi Jioba omabe mè echi ikamage. Kubọk inu njeen̄, ogwu eji ekigọọk ikween̄ mkpọ mokọt ikpọ ere “Bene Kifuk Baibul” okup me ikpa Nwọọn̄ Ugwem Re Mgbọ Geelek! mè itumu inyi eji ibe ke ọmọ igobo ifufuk ukpatu ofolek Danien me mgbọ ikupbe me emen udọn̄ egbe àtat. Eji mekọt itap ọmọ efuuk me owot ibe igwu nkeek ikom me lek mbet lek idodo chi: ‘Keke orọ Jioba onyan̄abe Danien? Keke ke eyi ojeen̄ emi ofolek inu okirọ ibe Jioba ibele ejit?’ (Dan 6:​10, 22) Mokọt ido lek kan̄ si ibe: ‘Keke orọ ebi ikakan̄ ataak itoon̄ Danien? Keke ke eyi ojeen̄ emi ofolek inu echi Jioba ikamage?’ (Dan 6:​4, 5, 24) Eji mekọt itumu inyi ọmọ ibe ikeek si ofifi mkpọ ibokọt ikween̄ ofolek Jioba inan̄a me lek mfufuk ya.​—Dan 6:​26, 27.

11. Keke orọ ikupbe ufiak ibe eji etap ubọk enyi ebi eji ekigọọk ikween̄ mkpọ emun̄ ibe ke ire Jioba okijeen̄ ema mkpọ?

¹¹ Ikibele eji ejit imumun̄ ibe ke ebi eji ekigọọk ikween̄ mkpọ mima oruru ema ekikaan̄ me lek nkween̄mkpọ kiban̄. Ire, ikup ufiak ibe eji etap ubọk enyi ema eriọọn̄ ibe ke ire Jioba okijeen̄ ema inu cha ema ekikween̄. (Asaya 30:​20, 21) Ebi eji ekigọọk ikween̄ mkpọ mekọt ikitọn̄ eji me lek inu ema ekikween̄ mè ubọk eji ekisa ijeen̄ ema mkpọ. Ikerere ibe ke ikalọ ibe ema etọn̄ eji, eji ekekeek ema ibe ke ire Jioba ke ema ebekinyi itọn̄ me lek otutuuk inu ema ekikween̄, ikare eji.

TAP UBỌK NYI EMA IBE ETAP INU EKIKWEEN̄ ME IKWAAN̄

12-13. Ike owa ke irọriọọn̄ Jioba ijaan̄ obosa itap ubọk inyi ebi eji ekigọọk ikween̄ mkpọ me mgbọ mfufuk Baibul ge oyọtbe me lek kiban̄ igogobo itet? (Kpọ si ogugo.)

¹² Inyi eji ekọt ekaan̄ ojot ojot oruru enan̄a me lek atikọ eji ekikween̄, eji kpelọlọ itatap inu eji ekikween̄ me ikwaan̄. Eya orọ, ike owa ke eji ebesa itap ubọk inyi ebi eji ekigọọk ikween̄ mkpọ ibe ekesa inu ekikween̄ erọ mkpọ me ugwem kiban̄ ni? Oniin̄ ge ire ijejeen̄ ema ibe ekekeek inu ema eriọọn̄be ofolek Jioba me mgbọ efukbe ere Baibul oyọyọt me lek kiban̄ igogobo itet. Kubọk inu njeen̄, ire ogwu okigọọk ikween̄ mkpọ ifuk ubọk Jioba osabe irọ mkpọ melek ebi ene me ukot ikaan̄, mokọt ikikeek inu orọrọ Jioba ofiatbe usini ene mè itele ibe usini eluk. Ike owa ke obokọt isa itap ubọk inyi ọmọ ikọt ikeek mkpọ ijaan̄?

¹³ Omokọt itumu inyi ọmọ ibe ido lek kan̄ ibe: Ire Jioba imọnọ ugwem ene ibene ni? (2 Pita 3:9) Keke ke Jioba orọ isasa inyan̄a eji​—ikerere ibe ke eji ire ebi ijo? (Efes 2:​4, 5) Ire Jioba ikisut ebi kperọ inu geege ilọ osusut ni? Ire, ire ene irọ mkpọ ogbegbe ibe ibọkọ osusut, ire ikpobosulu ene ya ni? (Isis 34:​6, 7) Usini mgbọ, mfufuk Baibul ikakikpa otutuuk inu obọbọkọ irek, eyi obokọt irọ ibe eji egobo etet inu orọrọ Jioba orọbe mkpọ ike irọbe. Ire, ikakup ufiak ibe eji eriọọn̄ otutuuk inu orọrọ. Eji miriọọn̄ Awaji kiji, mè ichieek inye ibe ke ikirọrọ inu otatat mgbọ geelek.

14. Ike owa ke obokọt itap ubọk inyi ogwu okigọọk ikween̄ mkpọ mè ire ikiyọt ọmọ me lek igọgọọk ene ge me emen ntitiin̄ igbaan̄ mkpọ irọ?

¹⁴ Kpọ-nu ofifi irek obokọt isa itap ubọk inyi ogwu okigọọk ikween̄ mkpọ ibe ikitap inu ikween̄be ofolek Jioba me ikwaan̄. Mokọt ire ibe ke ogwu okigọọk ikween̄ Baibul ibene ikinu nkween̄mkpọ ntitiin̄, ire, ikaan̄ ene ge me ntitiin̄ orọrọ inu onanaan̄ ọmọ. Tap ọmọ efuuk me owot ibe ikeek-nu ubọk Jioba okisa imun̄ otutuuk ebi bọn ute irieen̄ mè ibaan̄. Kubọk inu njeen̄, ọmọ mokọt ido lek kan̄ ibe: Keke ke Jioba orọ isasa ijeen̄ ibe ke ọmọ ima ebi bọn ute irieen̄ mè ibaan̄? (Jọn 3:16) Ire Jioba iweek ibe eji ekegbaan̄ erọ mkpọ me obọp ge mè esuuk ni? (Itọn̄ 133:1) Ikikukup ọmọ me lek eji esikitap efuuk ikiluk me esuuk melek ge ge me ntitiin̄ ni? (2 Kọr 13:11) Tap ubọk nyi ogwu okigọọk ikween̄ mkpọ igobo itet ibe ke Jioba ikibebele ejit me mgbọ eji ekito chieen̄ me lek ata eru echi ebi ofifi ife ekijeen̄ kpan̄asi nrọ-nlọ kiban̄.

15-16. (a) Ike owa ke ogwu okikween̄ Baibul obosa igọọk akpat ukot Jisọs me mgbọ iborọ ntumu-mfieek omimin? (Jọn 8:29) (b) Ike owa ke Marianne osa itap ubọk inyi ogwu ikigọọk ikween̄ mkpọ ibe irọ ata ntumu-mfieek? (Kpọ si ogugo.)

¹⁵ Tap ubọk nyi ogwu okigọọk ikween̄ mkpọ ibe ikisa inu ikween̄be ofolek Jioba irọ mkpọ sa me ikekirọ ata ntumu-mfieek. Omokọt isa nkeek kan̄ ifo lek ibot usem obe “Ubọk Obosa Ikirọ Ata Ntumu-mfieek” me inu nkween̄ 35 me ikpa Nwọọn̄ Ugwem Re Mgbọ Geelek! Ire, ire ogwu okigọọk ikween̄ mkpọ ifuk mkpọ ofolek ntumu-mfieek ikiweek irọrọ mè ibeek uriaak ofolek, ire, ikariọọn̄ si inu iborọ ye? Mokọt ire ibe ke ikariọọn̄ ere Baibul eyi obochubọk itap ubọk inyi ọmọ. Omokọt itumu inyi ọmọ ibe ikeek akpat ukot kè Jisọs sa me idodo lek kan̄ ibe, ‘Mbet lek ntumu-mfieek okukup ke Jisọs orọ?’ Jisọs itumu ibe: “Inu òkibele ọmọ [Jioba] ejit ke nkirọ mgbọ geelek.” (Fuk Jọn 8:29.) Tap efuuk me owot ogwu okigọọk ikween̄ mkpọ ibe ido lek kan̄ ibe, ‘Igọọk me lek inu mwọlọbe ikpọ mè ikween̄ ofolek Jioba, kpasi ntumu-mfieek obobele ọmọ ejit?’ Tap ubọk nyi ọmọ ibe imun̄ ibe ke ntumu-mfieek geelek oneneme Jioba ire ata ntumu-mfieek.

¹⁶ Ogwu enenwaan̄ ge me Chile ogwu okikween̄ Baibul ichichini irek oweweek ibe ọmọ irọ ntumu-mfieek okukup ufiak. Ebi ototun̄ ukan̄ kan̄ miweek ibe ọmọ isi ikwaan̄ ebekikpe ọmọ owuwa ikpoko, ire, ikwaan̄ ya ikponyi ogọt irek ikọkọt ikisi nkween̄mkpọ ntitiin̄ mgbọ geelek. Gwun̄ Ute Marianne ogwu okigọọk ọmọ ikween̄ mkpọ itumu ibe: “Ntap ọmọ efuuk me owot ibe igwu nkeek ikom me lek ubọk ntumu-mfieek kan̄ obokup me lek Jioba. Ire mobele ọmọ ejit sa ikpobele? Ntap ọmọ efuuk me owot si ibe iriaak uriaak inyi Jioba mè itaba iman̄ me lek ubọk Jioba obosa ifọọk ọmọ otu. Ikabọkọ ikwaan̄ ya itap, sọnja mgbọ iraraka me lek, imumun̄ ofifi ikwaan̄ obonyi ọmọ irek isisi otutuuk nkween̄mkpọ ntitiin̄.” Taba iman̄ ibe ke Marianne ikarọ ntumu-mfieek inyi ogwu enenwaan̄ ya, kpan̄asi ikeya, itatap ubọk inyi ọmọ ibe igwu nkeek ikom me lek inu iriọọn̄be ofolek Jioba. Irek yi irọ ibe mgbaan̄je ogwu okikween̄ Baibul ya okaan̄be melek Jioba mè ogwu melek kan̄ ekikween̄ mkpọ inye igbaalek. Ofolek ogwu enenwaan̄ ya, Marianne itumu ibe: “Ikween̄ ibe ke Jioba ikikpọ eji chieen̄ me lek ire eji ito ntọbọ-ebum kiji inyi ọmọ kubọk adasi inu me ugwem kiji.”

UGBANA OMAAN̄ INYI EBI IRỌRIỌỌN̄ JIOBA IJAAN̄

17. Keke ochubọk ikup ufiak ibe ebi ikikween̄ Baibul eriọọn̄?

¹⁷ Ebi eji ekigọọk ikween̄ mkpọ mikikween̄ owuwa inu okukup ufiak me nkween̄mkpọ Baibul kiban̄. Kubọk inu njeen̄, ema mikikween̄ inu okibọkọ irek ene isikwu, inu orọrọ Jisọs okwube me ibot kiji, mè inu Ama Ubọọn̄ Awaji oborọ. Ema mikikween̄ si mkpọ ofolek ntitiin̄ Jioba​—kubọk ubọk esabe ineen̄ ntitiin̄, ikwaan̄ ebi ugane ntitiin̄ ekisi, mè ikwaan̄ Akpalek Okikpọ Ntitiin̄ ekisi. Ire, eji miweek ibe ebi eji ekigọọk ikween̄ mkpọ eriọọn̄ egak inu chi. Eji miweek ibe ema eriọọn̄ Jioba ejaan̄.

18. Kpasi ugbana okup inyi ebi irọriọọn̄ Jioba ijaan̄?

¹⁸ Kpọ-nu irek ilile eji ekaan̄be ijejeen̄ ebi ofifi ife mkpọ ofolek Jioba! Ebi irọriọọn̄ mè ikitọbọ ebum inyi Jioba ekibele ejit ichit me chereyi. (Itọn̄ 25:​12-15) Me mgbọ okup me isi, otutuuk ebi irọriọọn̄ Jioba, “Awaji ogwu òrere atata Awaji” menwọọn̄ ugwem ikakaan̄ge itata. (1 Jọn 5:20) Ire, ikaan̄ ofifi ugbana eji ebekọt ikaan̄ me mgbọ keyi. Baibul ijeen̄ ibe ke ire ebi ikisa irọriọọn̄ mè imama Jioba ke Jioba oriọọn̄ kubọk bọn kan̄. (1 Kọr 8:3) Iin̄, Awaji Obebene Ichit ikimun̄ eji mè ikigwen eji ebi unene kan̄. Ugbana yi ichubọk ire ugbana omimin enenen eji ebekọt ikaan̄ gaalek mè ire eji eriọọn̄ ogwu ọmọ gaalek orebe Awaji me atikọ!