Ire Okakiriọọn̄ Jioba Ijaan̄ Ni?

1. Eji esikeek mkpọ ofolek ifuk-ibot mè iriọọn̄-inu Jioba mè inu echi irọbe itet, ike owa ke ikikup eji me lek?

IRE owuuk lek ikeek ubọk Jioba okaan̄be ifuk-ibot mè iriọọn̄-inu ire, mè iyaka ire owuwa uyeke uyeke inu irọbe ni? Ikike eji chieen̄ eji esikeek mkpọ ofolek ogwu Ororom eji. Mokọt ikup owu me lek ike ikupbe me lek ogwu otuchieen̄ Pọọlu, ogwu ogege ibe: “Ìre ekene oriọọn̄ ubọk Awaji osabe ibọọn̄ ubọọn̄ iyaka? Sà ìre ekene oriọọn̄ ubọk iriọọn̄-inu kan̄ mè ifuk-ibot kan̄ osabe idọk iyaka? Ìre ekene obokọt igobo itet ubọk îkisa idọmọ inu me nkeek kan̄? Ubọk irọ inu kan̄, kpunu ogwu òbokọt iriọọn̄.”​—Rom 11:​33, 34.

2. Keke okijeen̄ ibe ke eji mekọt iriọọn̄ Jioba?

² Me atikọ, eji kpebekọt iriọọn̄ otutuuk inu ofolek Jioba, ire, eji mekọt iriọọn̄ mbet ene irebe. Ogwu ubọọn̄ Debit itumu inyi ogwu gwun̄ Solomọn ibe: “Riọọn̄ Awaji kè nte kwun̄, mè sa otutuuk ejit kwun̄ mè otutuuk ugwem kwun̄ si ikwaan̄ nyi ọmọ . . . Ire oweek ọmọ, owu môweek ọmọ imun̄.” (1 Mfuf 28:9) Owuwa acha iraraka me lek, ogwu otuchieen̄ Jọn otutumu si ibe ke eji mekọt ikaan̄ iriọọn̄-inu “inyi eji ekọt eriọọn̄ Awaji ogwu òrere atata Awaji.” (1 Jọn 5:20) Jisọs me lek kan̄ si itumu ibe ke iriọọn̄-inu ofolek Jioba ikup inyi “ebi geelek înemebe Gwun̄ ya isasa Nte kan̄ ijeen̄.”​—Mat 11:27.

3. Keke ke eji ebekpa me ibot usem yi?

³ Otutuuk ebi ikitọbọ ebum inyi Jioba mikween̄ owuwa mkpọ ofolek kan̄. Ire, eji ebekukup inye ikikween̄ ayaya mkpọ ofolek Jioba. (Jọn 17:3) Kubọk inu njeen̄, eji mekọt ikikween̄ igbaalek mkpọ okirọ ibe Jioba ibele ejit mè ubọk eji ebesa ikirọ ibe utoon̄-ejit kiji me lek kan̄ ikinye. Kè eji ekpa-nu idodo ita otutuuk kiji ebekigwu nkeek ikom me lek me ekakpọge chieen̄ me lek ujọn̄ọ mgbọ eji etọbọbe ebum inyi Jioba ire: Keke ke irọriọọn̄ Jioba osibi? Keke orọ eji ebekup inye ikiriọọn̄ ọmọ ijaan̄? Ike owa ke eji ebesa ikiriọọn̄ ọmọ ijaan̄?

KEKE KE IRỌRIỌỌN̄ JIOBA OSIBI?

4. Keke ke irọriọọn̄ Jioba ogọbọ?

⁴ Keke ore oniin̄ ge eji ebesa iriọọn̄ Jioba? Eji mekọt ikaan̄ ufọọk-otu inyi idodo yi inan̄a me lek igwugwu nkeek ikom me lek use Jioba ochieekbe ebi Ju ebi igwugwu ikom ika inan̄a me Babilọn, itumu ibe: “Mânyi ema ejit ema mêsabe iriọọn̄ emi, ibe ke emi nre” Jioba. (Jeri 24:7) Kpolọlọ, ebi inanan̄a me Babilọn ika inu me Jeruselem miriọọn̄ owuwa mkpọ ofolek Jioba. Ire, mgbọ keyi ema ekabe, igbe ibe ema etap efuuk inyi eriọọn̄ Jioba ejaan̄, mè etaba lek eriaak me lek kan̄. Ene ge okikween̄ mkpọ ofolek Baibul itumu ibe: “Esese ile omaan̄ me lek irọriọọn̄ mkpọ ofolek Awaji mè irọriọọn̄ Awaji ijaan̄. Mekọt isa itọt me lek esese okup me lek ifufuk mkpọ ofolek ima mè ichuchubọk ima ene.” Eji miriọọn̄ ibe ke Awaji owa me atikọ, ke ikaan̄ si erieen̄. Ire, ikare inu chi gaalek ogbe ibe eji eriọọn̄ ofolek Jioba. Igbe ibe eji eriọọn̄ mbet ene irebe mè eru kan̄ ejaan̄.

5. Keke ke eji ebekọt ikween̄ me lek Ogwu Ubọọn̄ Josaya ofolek mkpọ irọriọọn̄ Jioba osibi?

⁵ Ike eji ekiriọọn̄ Jioba, eji ekikween̄ inu okibele ọmọ ejit mè echi ikakibele ọmọ ejit. Keek-nu mkpọ ofolek Ogwu Ubọọn̄ Josaya. Baibul itumu inyi eji ibe: “Me òso acha jeeta me mkpulu kan̄, mgbọ îrebe si sọn̄ gwun̄, ibebene ikiweek Awaji kè Debit nte nte kan̄.” (2 Mfufuk 34:3) Josaya ikakpọkpọk ikween̄ Baibul gaalek, irọ mkpọ igọọk me lek inu ikween̄be. Eya orọ Jioba otumube itibi me otu ogwu nriran Jerimaya ibe ke Josaya “îrọ inu òtatat mè inu ònenen,” mè îkitap ubọk inyi ebi ugbọọn̄ mè ebi una ebi kpekaan̄ ebi ibetap ubọk inyi ema. Jioba ido si ibe: “Ìre ìkare irọriọọn̄ emi ire eya ni?”​—Jeri 22:​15, 16.

6. Igọọk me lek inu okup me ikpa Okwa Itọn̄ 9:​10, keke obobọkọ irek ike eji ekiriọọn̄ Jioba igbaalek? (Okwa Itọn̄ 9:10)

⁶ Fuk Okwa Itọn̄ 9:10. Ike eji ekiriọọn̄ Jioba igbaalek, ikeya ke utoon̄-ejit eji ekaan̄be me lek kan̄ obokinye. Eya ore inu orọrọ ogwu otuchieen̄ Pọọlu. Me ota mgbọ etapbe ọmọ me mkpọn me ikafiin̄ge sabum ikwube, ige ibe: “Esip geege ìkatet emi, mije, nriọọn̄ ogwu Awaji ogwu nchieekbe me lek orebe.” (2 Tim 1:12) Bak me lek inu ikween̄be ofolek Jioba mè ubọk Jioba osabe itap ubọk inyi ọmọ me ugwem kan̄, Pọọlu ikọt itoon̄ ejit me lek Jioba ojot ojot. Pọọlu ichieek inye ibe ke Jioba ikpobowuuk ọmọ mè igbegbe utoon̄-ejit kan̄, ke mojomo ọmọ me mkpa mgbọ kan̄ isikem.

KEKE ORỌ EJI EBEKUP INYE IKIRIỌỌN̄ JIOBA IJAAN̄?

7. Keke obokọt ibọkọ irek ike eji ekitọbọ ebum inyi Jioba me owuwa acha?

⁷ Mgbọ eji ebenebe ikikween̄ Baibul, eji mitap efuuk ikikween̄ mkpọ inyi eji ekọt eriọọn̄ Jioba. Ire, ike acha okije, mokọt ire ibe ke eji kpeyaka ikitap efuuk inyi eji ekọt eriọọn̄ Jioba ejaan̄. Keke orọ ni? Eji esikifuk Baibul me uwu mè iyaka ire me nkween̄mkpọ ntitiin̄, eji mekọt ikikeek ubọk inu eji ekifuk obosa itap ubọk inyi eji me esese esese oniin̄ mè iyaka ire ubọk eji ebekọt isa inu ya itap ubọk inyi ebi ofifi ife. Eya ire ata mkpọ mije, Baibul itumu inyi eji ibe ekerọ ikeya. (2 Tim 3:​16, 17) Ire, Baibul ijeen̄ si owuwa mkpọ ofolek Jioba, ogwukaan̄ Baibul. (Itọn̄ 25:​8-10) Ikare ubọk ere Baibul eji ekifuk obosa isibi oruru inyi eji mè ebi ofifi ife gaalek ke eji ebeto chieen̄ me lek, igbe si ibe etaba iman̄ me lek mkpọ ere ya okijeen̄ eji ofolek Jioba. Eji esifuk ere ge, eji edo lek kiji idodo yi, ‘Keke ke ere yi okijeen̄ emi ofolek Jioba?’

8. Kpasi mgbaan̄ ke irọriọọn̄ Jioba ijaan̄ obokaan̄ me lek mgbaan̄je kiji melek kan̄? (Okwa Itọn̄ 73:​24-28)

⁸ Ike eji ekiriọọn̄ Jioba ijaan̄, ikeya ke mgbaan̄je kiji melek kan̄ obokinye igbaalek. Kubọk inu njeen̄, kpasi mgbaan̄ ke ifufuk Baibul egwe geelek, ikpọkpọ jw broadcast, mè isisi chinichini sekut mè eyi ilile okikaan̄ me lek kwun̄ ni? Inu chi ikitaba eji iriaak me lek Nte kiji ogwu okup me emen inyọn̄. Bak me lek keke ni? Bak me lek inu chi ikinyi eji irek ikwekween̄ mkpọ ofolek Jioba igbaalek. Eyi ikibieen̄ eji ibe eketọn̄ Jioba. Ikikup eji me lek ubọk ikupbe me lek Asafu ogwu ogwugwu nkeek ikom me lek ubọk Jioba okisa ikpọ ọmọ chieen̄ me lek mè itumu ibe: “Awaji ore unye n̄a; ọmọ gaalek ore ogwu mâweekbe ire mgbọ geelek.” (Fuk Okwa Itọn̄ 73:​24-28.) Otutuuk efuuk eji ekitap inyi eji eriọọn̄ Jioba egbaalek ikirọ ibe eji ekejeen̄ itọn̄ me lek irek eji ekaan̄be irere ebi unene kan̄.

9. Kpasi mgbaan̄ ke irọriọọn̄ Jioba obokaan̄ me lek ntumu-mfieek kiji? Nyi inu ntọt-me-lek.

⁹ Baibul itumu inyi eji ibe eriọọn̄ Jioba me oniin̄ kiji geelek. Eyi isibi ibe ke eji mekikeek mkpọ eji ekween̄be ofolek kan̄ mè ubọk mkpọ eji ekirọ okikup ọmọ me lek. Eyi motap ubọk inyi eji ekerọ ata ntumu-mfieek. (Urọk 3:​5, 6) Eji ekpọ-nu inu ntọt-me-lek yi: Owuwa bọn ute irieen̄ mè ibaan̄ mikito ogugo nlom kiban̄ mè iyaka ire nwa kiban̄ me inyọn̄ ikasi kiban̄, mè iyaka ire me ofifi ofifi ere ema ebekimun̄ mgbọ geelek. Eyi ikitap ubọk inyi ema ekekeek mkpọ ofolek nlom kiban̄ mè iyaka ire nwa kiban̄, ekerọ ntumu-mfieek obobele nlom kiban̄ mè iyaka ire nwa kiban̄ ejit, mè ekejit irọrọ mkpọ obotap nlom kiban̄ mè iyaka ire nwa kiban̄ unan me lek. Ubọk yaage si, ike eji ekikeek mkpọ ofolek Jioba mgbọ geelek, ikeya ke eji ebekirọ ntumu-mfieek obokineme ọmọ.​—Itọn̄ 19:​13, 14.

10. Keke ke ikwekween̄ mkpọ ofolek Jioba obotap ubọk inyi eji ekọt ekerọ?

¹⁰ Ire bak me lek Awaji orombe eji me mbet kan̄ ke eji ekikọt irọ eru kubọk kan̄. (Ibeb 1:26) Ike eji ekikween̄ eru echi Jioba okaan̄be igbaalek, ikeya ke eji ebekigobo itet ubọk eji ebesa ikigọọk akpat ukot kan̄. Jisọs itumu inyi ebi ìjeen̄ Ikan mè ebi Farisi ibe ke môfieek inyi ema bak me lek ema kpejeen̄ mbet lek eru echi Awaji okijeen̄. Ikerere ibe ke ema miriọọn̄ Ikan kè Mosis ijaan̄, ema ‘ekpọkpọ chieen̄ ilọ me lek ikpele inu òkukup me uyọt me emen Ikan ya, kubọk irọrọ atikọ, mè ikakaan̄ ejit nsan, mè igbegbe utoon̄-ejit.’ (Mat 23:23) Eji kpeweek ikukup kubọk ebi ibot uwu uriaak cha. Kpan̄asi ikeya, eji mekikeek mkpọ ikan mè onineen̄ echi eji ekikween̄ me emen Baibul okijeen̄ eji ofolek eru Jioba. Ire eji ekirọ ikeya, motap ubọk inyi eji ekọt ekegọọk akpat ukot kan̄.​—1 Jọn 4:​8, 11.

IKE OWA KE EJI EBESA IKIRIỌỌN̄ JIOBA IJAAN̄?

11. Ike owa ke osa ibene ikikween̄ mkpọ ofolek Jioba?

¹¹ Ire ekene odasi ijeen̄ owu mkpọ ofolek Jioba? Mokọt ire nte kwun̄ mè iyaka ire nga kwun̄. Ema mira isa mfufuk Baibul mè iyaka ire inu echi Jioba orombe ijeen̄ owu mbet ene ọmọ orebe. Mokọt ire ogwu Ata-Ikọ Jioba ge ojeen̄ owu mkpọ ofolek Jioba ike enyi ekigbaan̄ ikween̄ Baibul. Ene ya ira itap ubọk inyi owu okween̄ ata eru echi Jioba okaan̄be inan̄a me lek mfufuk echi okup me Baibul ofolek mkpọ irombe. Ira isa ikpa eji ekisa igọọk ebi ene ikween̄ mkpọ, kubọk ikpa Nwọon̄ Ugwem Re Mgbọ Geelek! igọọk owu ikween̄ mkpọ.a (Neyem 8:8; Ikwaan̄ 14:17) Mgbọ keyi, kè eji ekpa-nu ubọk eji ebekọt ikup inye ikikween̄ mkpọ ofolek Jioba.

12-13. Keke ke eji ebekọt ikween̄ ofolek Jioba sa me ikekifuk Baibul? Nyi inu njeen̄ ge. (Jerimaya 39:​15-18) (Kpọ si me adasi isi ikpa yi.)

¹² Adasi, eji mekọt ikween̄ mkpọ ofolek Jioba igbaalek sa me ikekifuk mè ikekikween̄ Usem kan̄ Baibul. Usini mgbọ, Baibul ikitumu eru Awaji ikpọk mbum. (Isis 34:​6, 7) Ire, owuwa mgbọ, Baibul ikitumu mkpọ ofolek ebi ene mè ntumu-mfieek echi ema erọbe. Osikifuk mfufuk okup ikeya, kikeek mkpọ ikijeen̄ owu ofolek ogwu Jioba orebe.

¹³ Kpọ-nu inu njeen̄ ge. Ike okifuk Jerimaya 38:​6-13, omokọt ikween̄ mkpọ ofolek Ebedi-melek, ogwu onyanyan̄a ogwu nriran Jerimaya. Me kpunube cheche, owu ora igwat lek imun̄ mè ikeek esese esese oniin̄ obokọt igọọk akpat ukot Ebedi-melek ogwu osasa me ukarajit mè ima itap ubọk inyi Jerimaya ikerere ibe ke ikafet me lek kan̄ irọrọ ikeya. Ire, ire omun̄ si mkpọ obokọt ikween̄ ofolek Jioba me mfufuk yi ni? (Fuk Jerimaya 39:​15-18.) Kubọk inu njeen̄, ere owa me lek ere Baibul chi okijeen̄ ibe ke Jioba ikinwọọn̄ ata mkpọ ene orọbe? Keke okijeen̄ ibe ke Jioba ikirọrọ inu onenen mgbọ geelek? Keke okijeen̄ si ibe ke Jioba ikibọkọ ebi ife geelek itap me ekakpọge chieen̄ me lek ere ema enan̄abe? Keke si ke okween̄ ofolek Jioba inan̄a me lek mfufuk yi? Kitaba iman̄ me lek eru Jioba ojeen̄be me ere Baibul okifuk mè kitọn̄ ọmọ me lek eru cha.

14. Keke ke eji ebekirọ inyi eji ekọt ekaan̄ oruru me lek inu echi Awaji orombe?

¹⁴ Òso iba, eji mekọt ikween̄ mkpọ ofolek Jioba igbaalek sa me ikekikeek mkpọ ofolek inu echi irombe. (Itọn̄ 145:​9, 10) Ikare gaalek ibe ke eji mekikpọ mkpọ echi Jioba orombe, eji merọ ofifi inu si. Usini ene mikisa otutuuk ugwem kiban̄ ikween̄ mkpọ ofolek inu nrom, ire, ema kperiọọn̄ ibe ke ikaan̄ Awaji ogwu ororom inu cha, ogwu okakaan̄ si owuwa ata eru! Ogwu otuchieen̄ Pọọlu ige ibe: “Inu òfo me lek Awaji, echi chieen̄ ene ìkpokọt imun̄, îsibi utoon̄ me chieen̄ ebilene . . . Ebilene esa me lek inu Awaji orombe igobo inu chi itet.” (Rom 1:20) Me Baibul ge, ekaba ere yi ikeyi, ‘Ene geelek okekeek mkpọ ijaan̄ momun̄ eru Awaji me lek inu irombe.’ Eya orọ, eji ebekikekeek mkpọ ofolek inu echi Jioba orombe mè mkpọ inu cha okijeen̄ eji ofolek kan̄.

15. Keke ke Patrick orọ inyi ọmọ ikọt iriọọn̄ Jioba ijaan̄, ike owa ke obokọt igọọk akpat ukot kan̄? (Kpọ si ogugo.)

¹⁵ Owuwa ebi ene ekiluk me uga ama, ọmọ orọ, kpekimalek imun̄ owuwa inu nrom kubọk uti, inwan̄ mè anam. Ire mbet ere okup ikeya ke oluk, ire mofet ibe okween̄ mkpọ ofolek Jioba inan̄a me lek inu nrom ni? Gwun̄ Ute Patrick, ogwu oluk me Brazzaville, ama ile ge okup me Congo itumu ibe: “Nkisa ikpọkpọ inu nrom usen geelek. Nkimalek imun̄ asabọn inu òkinyinyọnọ mè asabọn ofut okiweek inorie mè ere iluluk. Mgbọ ge, mmun̄ ubọk ebi kè ofut ekinama uwu kiban̄. Ema eweweek mè isa inu echi onwọnwọn inama uwu mè itap nsabọn kiban̄ me emen.” Gwun̄ Ute Patrick ikakpọkpọ ikpọ ofut cha, ikeek mkpọ idọk ofolek Ogwu ororom ofut cha. Itumu ibe: “Nkween̄ ibe ke Jioba ikikpọ chieen̄ me lek inu irombe, ikerere echi osisip ichit. Eyi itap ubọk inyi emi nchieek nnye ibe ke ọmọ mokup inye ikikpọ emi chieen̄ me lek, mè ikisan̄a si inu okukup ufiak isibi inyi emi.”

16. Keke otap ubọk inyi Meri nga kè Jisọs ibe iriọọn̄ Jioba ijaan̄, ike owa ke eji ebekọt igọọk akpat ukot kan̄? (Kpọ si ogugo.)

¹⁶ Òso oniin̄ ita eji ebekọt iriọọn̄ Jioba ijaan̄ ire ikekikeek mkpọ ofolek inu eji ejebe itibi me ugwem. Eya ore inu Meri, nga kè Jisọs orọbe. Iriọọn̄ Jioba ijaan̄ mè ikaan̄ si nnwọn-isi kan̄. (Luk 1:30) Ire, Jioba itumu inyi ọmọ ibe irọ inu ge okukup ufiak enenen mè iyọt irọrọ​—irere nga Gwun̄ Awaji. Jioba isa ogwu osat Geberen mè ogwu ngwan̄ Elisabet irọ ibe Meri iriọọn̄ ibe ke ọmọ itoon̄ ejit me lek kan̄, ke motap ubọk inyi ọmọ si. Meri igwu nkeek ikom me lek inu obọbọkọ irek me ugwem kan̄ eyi ojejeen̄ ọmọ mbet lek ene Jioba orebe, imun̄ si ibe ke Jioba ire ogwu okakaan̄ unye, ikisa ata ejit irọ mkpọ me lek otutuuk ene, mè ikikpọ chieen̄ me lek ebi ebi ofifi ife ekimun̄ kubọk kpekup ufiak. (Luk 1:​46-55) Meri ijeen̄ itọn̄ me lek ntap-ubọk Awaji, eji si mikibele ejit Jioba isitap ubọk inyi eji “mgbọ geelek eji ekupbe me una.” (Iburu 4:16) Osikaan̄ ntap-ubọk Jioba, do lek kwun̄ ibe: ‘Keke ke eyi okijeen̄ emi ofolek Jioba? Eru owa ke Jioba ojeen̄ emi me lek inu yi njebe itibi?’

EJI EBEKUKUP INYE IKIKWEEN̄ MKPỌ OFOLEK JIOBA

17-18. Keke orọ eji ebekọt itumu ibe ke eji ebekukup inye ikikween̄ mkpọ ofolek Jioba?

¹⁷ Keek-nu owuwa mkpọ eji ebekween̄ igbaalek ofolek Jioba me emen aya inyọn̄. Eji mekaan̄ ayaya ikpa echi obojeen̄ eji inu Jioba oweekbe ibe eji erọ. (Ichi 20:12) Eji mekween̄ owuwa mkpọ ofolek Jioba igbaalek ike eji ebekinwọọn̄ inu echi irombe. (Asaya 11:​6-9) Eji mekiriọọn̄ Nte kiji Jioba ijaan̄ me oniin̄ echi eji kpewuuk lek iriọọn̄ ọmọ. Kubọk inu njeen̄, eji mekigobo Jioba itet ijaan̄ ike eji ekimun̄ ubọk ikijomo ebi ima kiji me mkpa mè ikirọ ibe eji ekana ebi isoso ifuk egwe geelek.

¹⁸ Kpunu mgbọ eji kpekaan̄ mkpọ eji ebekween̄ ofolek Jioba. Awaji ikiluluk ire mgbọ geelek, eya orọ, “iriọọn̄-inu kan̄ kpebekọt itọ iriọọn̄ ikeke.” (Itọn̄ 90:2; 147:5) Eji kpebekọt “iriọọn̄ inu Awaji orọbe bene me ibebene isi ire òta kan̄.” (Etip 3:11) Eya orọ, me ekakpọge chieen̄ me lek ujọn̄ọ mgbọ eji ekupbe me atikọ, kè eji ekesa irek geelek eji ekaan̄be esa ekekween̄ mkpọ ofolek Nte kiji ogwu omama eji.