Ikpa Asaya Mokọt Ikat Owu Ejit

1-2. Keke ke Jioba okirọ me mgbọ eji esichichini irek okirọ ibe eji ekefieek ejit?

KEEK-NU mkpọ ofolek gwun̄ okifieek ejit enenen mè ikito ito. Mokọt ire ibe ke ebi ototun̄ ukan̄ kan̄ ekinan̄a me ere ema ekiluk ifo aya ere, eyi mokọt isibi ibe ke ema metele ebi unene kiban̄. Mè iyaka ire, gwun̄ ya mokọt ikinaan̄ ejit bak me lek inu ge irọbe ilọ. Me irek okup ikeya, keke ke uga ogwu okakaan̄ ima oborọ? Mokat ogwu gwun̄, iriọọn̄ ubọk igban̄ ubọk ikikpa inu orọrọ ọmọ okito ito, mè itumu inyi gwun̄ ya ubọk isabe ima ọmọ ire.

² Me emen Baibul, Jioba isa lek kan̄ itọt me lek uga omama mè ikikat gwun̄ kan̄ ejit. Itumu ibe: “Ike uga okikat gwun̄ ejit, ikeya si ke emi me lek n̄a mbakat enyi ejit.” (Asaya 66:13) Ima Jioba okaan̄be me lek kiji imin igak eyi ute mè iyaka ire uga geelek obokọt ikaan̄. (Asaya 49:15) Jioba ikisa Usem kan̄ Baibul inyi eji ukarajit mè efuuk eji eweekbe me mgbọ eji ekifieek ejit mè iyaka ire ikikaan̄ sasaak.​—Rom 15:4.

3. Keke ke eji ebekween̄ me ibot usem yi?

³ Ikpa Asaya ijojot me lek usem ukarajit onan̄a me ubọk Jioba. (Asaya 40:1) Jioba, Nte kiji ogwu okakaan̄ ima isa ekwukwu mbuban kan̄ ibieen̄ Asaya ibe ige ikpa yi isa ikat ejit ebi eyi kan̄ iluk me Juda me mgbọ owuwa ufialek okupbe. Eji ekiluk me mgbọ “ufialek òmimin enenen” okupbe, eya orọ, eji miweek ukarajit si. (2 Tim 3:1) Kè eji ekween̄-nu usini ere me ikpa Asaya echi obokọt isiki ejit kiji mè inyi eji efuuk me (1) mgbọ ugwem kiji onwenebe me ekakeekge, (2) mgbọ ejit kiji okifieek eji ikọ bak me lek ijo inu eji erọbe me mgbọ oraraka, mè (3) mgbọ eji ekifieek ejit bak me lek mkpa ogwu ima kiji.

MGBỌ UGWEM KIJI ONWENEBE ME EKAKEEKGE

4. Ike owa ke unwene kpekekeek obokọt isa ikaan̄ mgbaan̄ me lek kiji?

⁴ Ugwem kiji mokọt inwene me mgbọ eji kpekekeek. (Etip 9:11; 1 Kọr 7:31) Eji mekọt ifiak orukan̄ mè iyaka ire ikaan̄ ufialek ikpoko. Ufialek mokọt ibene me ido kiji, mè iyaka ire, ikwaan̄ kiji me ntitiin̄ Jioba mokọt inwene. Unwene chi mokọt irọ ibe eji ekaan̄ sasaak mè iyaka ire ukpook. Inu chi mokọt irọ ibe eji ebene ekekeek ibe: ‘Keke ke mbarọ?’ Kubọk inu njeen̄, Gwun̄ Ute ge ekigwen Joseph isi ikwaan̄ iso mkpọ obet lek akọp mè acha jaaba me Bethel. Mgbọ etumube inyi ogọt ibe ifo isikigbọ oniin̄ ojot mgbọ, Gwun̄ Ute ya itumu ibe: “Iyọt emi me lek enenen ibebene aya ugwem bak me lek nkup ifiin̄ me Bethel. Nkariọọn̄ mkpọ mbarọ, nkarọriọọn̄ si ere mbabene.” Kpasi usem ukarajit okup me ikpa Asaya inyi eji mè ire ugwem kiji inwene me ekakeekbe?

5. Keke ke Jioba otumu ibe ke ọmọ morọ inyi eji me ikpa Asaya 42:16? (Kpọ si ogugo.)

⁵ Fuk Asaya 42:16. Jioba ichieek eji use ibe ke ọmọ mosa ebi ǹnàan̄ ije me oniin̄ ema kperarak iriọọn̄, mè irọ inyi udun ikana utoon̄. Mekọt isa usem “ǹnàan̄,” “oniin̄ ema kperarak iriọọn̄,” mè “ere òkpukpukpunu” itọt me lek ubọk eji ekimun̄ mgbọ okup me isi kiji ire irek kiji inwene me oniin̄ eji kpekekeek. Mokọt ikup eji me lek kubọk eji ekije me emen oron, me ekariọọn̄ge ere eji ekije isi. Ire, Jioba ichieek eji use ibe ke ọmọ monyi eji ntọ-ubọk eji eweekbe me irek geelek eji eweekbe lek kiji imun̄, ke ọmọ ikpobotele eji si. Jioba motet eji me ubọk mè isa eji ije itibi emen udun, mokijeen̄ eji utoon̄ kan̄ ike eji ekije mè ikirọ si ibe ere òkpukpukpunu irọt. Ike owa ke Jioba okirọ eyi? Ikisa Usem kan̄ mè ntitiin̄ kan̄ inyi eji ata nteme. (Itọn̄ 119:105; Asaya 30:21) Ikisa si ebi bọn ute mè ebi ofifi ife itap ubọk inyi eji me esese esese oniin̄. Ikerere ibe ke ugwem iyọt enenen me eji kperiọọn̄ge inu oborọ eji me mgbọ okup me isi, eji mekọt itoon̄ ejit ibe ke Jioba mokup inye ikitap ubọk inyi eji mije, ima eji enenen mè igobo itet si ubọk inu okikup eji me lek.​—Asaya 41:10; 1 Pita 5:​6, 7.

6. Ire irek kiji inwene me ekakeekge, keke ke Jioba oborọ inyi eji?

⁶ Joseph, ogwu ewuukbe lek ikpa mkpọ ofolek itumu ubọk Jioba osabe itap ubọk inyi ọmọ mè ogwu nwa mgbọ ema enan̄abe me Bethel. Itumu ibe: “Eji mimun̄ ima mè ntap-ubọk Jioba me mgbọ enwenebe ikwaan̄ kiji. Isa bọn ute irieen̄ mè ibaan̄ itap ubọk inyi eji. Itap ubọk inyi eji ekaan̄ inu mè ukarajit eji eweekbe me mgbọ ogbegbe, mè ikup inye ikirọ ikeya si.” Ire irek kwun̄ inwene me oniin̄ okakeekbe, omokọt ikaan̄ utoon̄-ejit onyenye ibe ke Jioba monyi owu efuuk mè ntọ-ubọk oweekbe me ekakpọge chieen̄ me lek ubọk unwene ya osabe iyọt ire. (Asaya 54:10; 58:11) Joseph itumu si ibe: “Mma okwa kiji ge eyi obe, ‘Nkariọọn̄ ubọk usen iyakwut obokup, ire, nriọọn̄ ibe ke Jioba mokup melek n̄a.’a Ikerere ibe ke mkpọ ikakibọkọ irek ubọk eji ekeekbe mgbọ geelek, eji michieek ijaan̄ ibe ke Jioba mokup inye ikitap ubọk inyi eji.”

EJIT KIJI ISIKIFIEEK EJI IKỌ

7. Keke ke usini ene ebekọt ikirurumun̄ me lek bak me lek ijo inu ema erọbe me mgbọ oraraka?

⁷ Eji esikpa ijo inu omimin eji erọbe inyi ebi ugane ntitiin̄, ema metap ubọk inyi eji bak me lek ima ema ekaan̄be me lek kiji. Eya isiraka, eji mesa inyi eji ekayaka irọ ijo inu ya. (Urọk 28:13; Jemis 5:​14-16; 1 Jọn 1:9) Ire, ikerere ibe ke Jioba itele inyi eji, ejit kiji mokọt ikifieek eji ikọ. Eji mekọt ikikeek ibe, ‘Ike owa ke Jioba obosa itele inyi emi me lek mbet lek ijo inu ya nrọbe ni?’ (2 Kọr 2:7) Me atikọ, ijo inu eji ewuukbe lek irọ mokọt ilobo me ejit kiji mè ikisisaak eji me ujọn̄ọ mgbọ. Ogwu ubọọn̄ Debit ige ibe: “Otu ukwuuk n̄a îwọ emi, mije ijo inu n̄a . . . Mgbugba îtet emi; mkpukpuku igwook, mè ikito mfi, bak me lek ufiak òkup emi me ejit.” (Itọn̄ 38:​3, 8) Ire okikeek mkpọ ikeyi usini mgbọ bak me lek ijo inu owuukbe lek irọ me mgbọ oraraka, inu okup me ikpa Asaya mokọt ikat owu ejit.

8-9. Keke ke ikpa Asaya 1:18 otumu ofolek ubọk Jioba okisa itele inyi eji?

⁸ Fuk Asaya 1:18. Jioba isa inu njeen̄ ikpa ubọk ọmọ okisa itele inyi eji. Itumu ibe ke ikerere ijo inu kiji ìnin̄ “ikup eje eje,” ke ọmọ mogwọk ema itana “okuket kubọk abalara.” Ikiyọt igwọgwọk inu okup eje eje isan̄a me lek ofọnti. Ire, Jioba itumu inyi eji ibe ke ọmọ isitele inyi eji, ke eji kpebeyaka ikaan̄ okpa onan̄a me lek ijo inu ya me otutuuk ugwem kiji.

⁹ Keek-nu mkpọ ofolek ogwu ubọọn̄ Debit. Ikerere ibe ke igan nwa ene mè ikpan̄ ene, Jioba itele inyi ọmọ. Ike mgbọ ojebe si, Jioba igwen Debit ogwu enerieen̄ okirọ atikọ (okigbe utoon̄-ejit). (2 Sam 11:​3, 4, 14, 15; 12:13; 1 Ubọọn̄ 9:​4, 5) Jioba isikikeek mkpọ ofolek Debit, ikikeek ubọk Debit ogbebe utoon̄-ejit inyi ọmọ, ikare ijo inu irọbe. Ubọk yaage si, Jioba ikisa me ima itele inyi eji me mgbọ eji egwube ikom me lek ijo kiji, ikitap ubọk inyi eji ekaan̄ si utọn̄ọ nkeek ike eji ekitọbọ ebum inyi ọmọ. Kpasi ofifi usem ukarajit ke eji ebekọt imun̄ me ikpa Asaya me mgbọ ejit kiji okifieek eji ikọ?

10. Kpasi usem ukarajit okup me ikpa Asaya 38:17?

¹⁰ Fuk Asaya 38:17. Eji mekọt itumu usem “owu obieen̄ otutuuk ijo inu n̄a ikana ito me udun̄ kwun̄” ikeyi si, “owu osan̄a otutuuk ijo inu n̄a me chieen̄ kwun̄.” Ere yi ikijeen̄ ubọk Jioba okisa iben ijo inu ogwu ogwugwu ikom itọp ito me udun̄ kan̄, ere ikpoboyaka imun̄ mè iyaka ire ikeek mkpọ ofolek. Ikpa ge okikpa ere Baibul iwele ikpa ere Baibul yi ikeyi: “Owu orọ ibe ijo inu n̄a ikup kubọk ikabọbọkọ irek.” Me atikọ, Jioba isitele inyi eji, ikikup me lek kan̄ kubọk eji kperọrọ ijo inu geege. Jioba isitele inyi eji, ikakiyaka ikeek ijo kiji mè ikisa ijo ya isut eji osusut. Ichieek use ibe: “Emi m̀kpayaka ikeek ijo inu kwun̄ ofifi.” (Asaya 43:25) Eyi ikikat eji ejit enenen! Ire Jioba, ogwu oyerebet omimin ichit ikayaka ikikeek ijo kiji, ire igbe ibe eji ekefieek lek kiji ikọ bak me lek ijo inu Jioba otelebe ni?

11. Me ekakpọge chieen̄ me lek ijo inu eji erọbe me mgbọ oraraka, keke okup ufiak inyi Jioba? (Kpọ si ogugo.)

¹¹ Mgbọ geelek ejit kiji isibene ikifieek eji ikọ, igbe ibe eji ekekeek ukarajit Jioba okisa me ima inyi eji. Ntele-nnyi Jioba isoso ikup, eya orọ, esip ikakitet ọmọ bak me lek kiji mè ijo inu eji erọbe me mgbọ oraraka eyi itelebe inyi eji. Jioba ikakitet unaan̄-ejit ikaan̄ me ejit si ike ebilene ekirọ usini mgbọ. (Asaya 57:16) Inu ochuchubọk ikup ufiak inyi Jioba ikare inu eji erọbe me mgbọ oraraka, ire mbet ife eji erebe me chereyi mè inu eji ebekana me iyakwut okup ufiak inyi ọmọ. (Asaya 55:7) Awaji ogwu eji ekitọbọ ebum inyi ichubọk ire ogwu okakaan̄ ima mè ikitele inyi ene me atikọ! Eya orọ, eji ekatele ibe ijo inu eji erọbe me mgbọ oraraka irọ ibe eji ekakaan̄ unwọọn̄ me mgbọ keyi mè iyaka ire ekakaan̄ ugbana Jioba me mgbọ okup me isi.

MGBỌ EJI ECHEPBE OGWU EJI EMABE ME MKPA

12. Ike owa ke ikikup eji me lek ire ogwu eji emabe ikwu?

¹² Ogwu eji emabe isikwu, ufieejit eji ekikaan̄ ikilobo enenen, unaan̄ ichep ya si mokọt ikup ifiin̄ me ejit kiji. Usini mgbọ, eji mekọt ikikeek inu orọrọ Jioba otelebe ibe ogwu ima kiji ikwu. Gwun̄ Ute ge ekigwen Michael ichep nte kan̄ mè nga kan̄ me mkpa mgbọ ukan̄ osemebe me uwu kiban̄. Gwun̄ Ute ya itumu ibe: “Ejit n̄a ikpukpukpuku igwook, nnaan̄ ejit inyi Jioba mije itelebe ibe ema ekwu. Nriọọn̄ ibe ke ikare ọmọ orọ ibe ema ekwu, ire, ikakput ibe ema ekakwu.” Mokọt ire ibe ke inu iwuuk lek ikup owu me lek ikeya. Me mgbọ okifieek ejit, kpasi ukarajit mè ikpọchieen̄ ke Jioba okinyi?

13. Kpasi use ke Jioba ochieek eji me ikpa Asaya 25:8?

¹³ Fuk Asaya 25:8. Jioba ichieek use ibe ke ọmọ “môjijaka mkpa ire mgbọ ikakaan̄ge itata.” Keek-nu mgbọ mkpa ikpoboyaka ikup ofifi! Okpoboyaka ikifieek ejit bak me lek ochepbe ebi omabe me mkpa. (Asaya 35:10) Okpoboyaka ikikaan̄ unaan̄ ebi ene ekikaan̄ esimun̄ oriọọn̄ okijeen̄ ere efuun̄be ogwu ima kiban̄. Kpan̄asi ikeya, ebi ima kwun̄ ebeluluk melek kwun̄ me unye akpalek ire mgbọ geelek. Use yi ikare urọk, ikare si inu ekpọkpọk itumu ikeya, ire inu oborọrọ iso mije, ire Jioba ochieek use yi, ọmọ gaalek si obokọt irọ iso.​—Ichi 21:​4, 5.

14. Ikikukup owu me lek osikeek mkpọ ofolek ikpọchieen̄ njomo-me-mkpa? (Asaya 26:19) (Kpọ si ogugo.)

¹⁴ Fuk Asaya 26:19. Ikare gaalek ibe ke Jioba motap uyaka me lek mkpa, ire, mojomo ebi ima kiji inu me ugwem. Baibul ibe ke “ebi kan̄ ìkwukwu” megat ugwem. Eyi isibi ibe ke Jioba imọnọ ema kubọk ebi eyi kan̄, kubọk ọmọ okaan̄ ema. Jioba ikawuuk ebi ima kiji ikwakwaan̄, mgbọ kan̄ isikem, mojomo ema me mkpa. Ike mbat otu ewelegwe okirọ ibe inu ewopbe ochachiaak ikisek, ikeya ke Jioba, ogbuuruk ere otutuuk ugwem okinan̄a isibi obosa itimi ebi ima kiji ikilaak me mkpa. Ibọbọkọ ebi ejomobe me mkpa itap mochubọk ire mkpọ unwọọn̄!​—Sa tọt me lek Mak 5:42.

15. Ike owa ke use nnan̄a-nkeke me mkpa obosa itap ubọk inyi eji me mgbọ eji ekifieek ejit?

¹⁵ Ikerere ibe ke use Awaji ofolek ijojomo ene me mkpa ikakisan̄a ufieejit kiji isan̄a, eji mekọt ikaan̄ ukarajit me irọriọọn̄ ibe ke Jioba ikawuuk ebi ima kiji ikwakwaan̄. Ikpọchieen̄ yi okat Michael ogwu ewuukbe lek ikpa mkpọ ofolek ejit. Itumu ibe: “Ikpa Asaya 26:19 itap ubọk inyi emi ngobo ntet ibe ke nte n̄a mè nga n̄a mikup ufiak inyi Jioba enenen. Ema emaan̄ me nkeek kan̄, ikpowuuk ema mege ire mgbọ mosabe ema inu me ugwem. Eyi ikinyi emi ukarajit mè ikitap emi efuuk me emen.” Eji ekekeek mgbọ eji ebekpọk imun̄ ebi ima kiji ikwakwaan̄. Irọrọ ikeya mokat eji ejit mè itap ubọk irọ inyi eji ekọt ekeme unaan̄ eji ekikaan̄.

16. Ire kpasi ere Baibul ochubọk ikat owu ejit me mgbọ okije itibi irek oyọyọt ni?

¹⁶ Eji mikween̄ usini ere me ikpa Asaya echi obokọt ikat eji ejit me mgbọ ugwem kiji onwenebe me ekakeekbe, me mgbọ ejit kiji okifieek eji ikọ bak me lek ijo inu eji erọbe me mgbọ oraraka, mè mgbọ eji ekifieek ejit bak me lek mkpa ogwu eji emabe. Eji mibele ejit enenen ibe ke Jioba ikisa Usem kan ikat eji ejit! (Itọn̄ 94:19) Ire ikaan̄ ere Baibul ochuchubọk ikat owu ejit me mgbọ okije itibi irek oyọyọt ni? Kawuuk ere Baibul ya, ge tap me ikpa, mè iyaka ire to me ere obokigwat lek imun̄. Kè Usem Jioba, Nte kiji okup me emen inyọn̄ ikat owu ejit.