Rọ Ata Ntumu-Mfieek Ofolek Isisi Uwu Ikpa Ilile

1-2. (a) Kpasi ntumu-mfieek ke ebi ijija ekirọ? (b) Keke ke isisi uwu ikpa igbaalek osibi? (Kpọ “Usem Ekpabe Iwele.”)

MIKIDO ogbogbo ebi ijija ibe “Keke ke oboma isasa ugwem kwun̄ irọ osimin inin̄ ene?” Mkpọ onwọnwọn ichit obokọt isa ugwem kwun̄ irọ ire isisi ikwaan̄ ojot mgbọ inyi Jioba. Ire, ikup ufiak si ibe osi ikwaan̄ inyi okọt okaan̄ ikpoko obokisa ikpọ chieen̄ me lek ufiak kwun̄. (2 Tes 3:10) Kpunu cheche ibe ke ora ikikeek mbet lek ikwaan̄ oborọ me mgbọ osimin inin̄ ene.

² Inyi ema ekọt egobo mbet lek ikwaan̄ eberọ, usini ebi ijija mikimalek iweek ntọ-ubọk ebi nte kiban̄ mè nga kiban̄ ofolek mbet lek uwu ikpa ilile ema ebesi igbaalek me mgbọ ema esibibe okpan okpan uwu ikpa okukup ufiak ibe esi me agan̄ kiban̄.a Omokọt ikikeek ibe ke monwọn ire osi uwu ikpa ilile igbaalek. Ire ikeya, eyi owa ke obosi? Ibot usem yi mokpa onineen̄ Baibul echi obokọt itap ubọk inyi owu orọ ata ntumu-mfieek ofolek mbet lek uwu ikpa obosi igbaalek. Ikerere ibe ke ibot usem yi ikup inyi ebi ijija, mokọt itap ubọk inyi ogwu eyi Karais geelek okikeek isisi uwu ikpa igbaalek. Onineen̄ chi si motap ubọk inyi ebi ute mè uga eriọọn̄ ntọ-ubọk ema ebenyi nsabọn kiban̄ inyi ekọt erọ ata ntumu-mfieek.

IRE IGBE IBE OSI UWU IKPA OGBAALEK NI?

3. Keke orọ usini ebi eyi Karais ekikeek mkpọ ofolek isisi uwu ikpa igbaalek?

³ Me usini ere, ene mokọt ikaan̄ ata ikwaan̄ ire isi okpan okpan uwu ikpa okukup ufiak ibe isi. Ire, me usini ere, moweek ibe osi uwu ikpa ogbaalek ire okiweek ikwaan̄ ebekikpe owu ikpoko ijaan̄ mè ikwaan̄ eyi okpobokisi me ujọn̄ọ mgbọ. Me mbet ere okup ikeya, ogwu eyi Karais mokọt ikaan̄ mgbọ ibosa ikisibi uko mè iyaka ire ikitap lek me lek ikwaan̄ ntitiin̄. Ire, ebi geelek itutumu ifieek isisi uwu ikpa igbaalek metap efuuk mè ifiat mgbọ mè ikpoko, merọ si usini ntumu-mfieek echi okukup ufiak.

4. Ire ekene obotumu ifieek mè ire ogwu eyi Karais mosi uwu ikpa igbaalek? (Kpọ si inu egebe me agan̄ ijọn̄.)

⁴ Baibul itumu ibe ke “ene geelek ìbobeme akpan eyi kan̄.” (Gal 6:5) Eyi isibi ibe ke ogwu eyi Karais omimin inin̄ ene obotumu ifieek mè ire ọmọ mosi uwu ikpa igbaalek sa ikposi.b Ebi uga mè ute si mikaan̄ akpan itutumu ifieek inyi nsabọn kiban̄ ebi asasa mbet lek kpokpo ebebọkọ. (Efes 6:1) Ema mekọt itap ubọk inyi nsabọn kiban̄ ekọt erọ ata ntumu-mfieek ofolek mbet lek kpokpo ema ebema ikakaan̄ igbaalek ema esimin inin̄ ene.​—Urọk 22:6.

5. Kpa mgbọ ogbe ibe ene ibene ikikeek mè ire mosi uwu ikpa igbaalek, bak me lek keke? (Kpọ si ogugo isi ikpa.)

⁵ Igbe ibe ebi ijija erọ ntumu-mfieek ofolek isisi uwu ikpa igbaalek sabum ema enesibi okpan okpan uwu ikpa okukup ufiak ibe ema esi. Me atikọ, ikijeen̄ iriọọn̄-inu ire ogwu ijija ikpa eyi melek nte kan̄ mè nga kan̄ sabum onorọ ntumu-mfieek kan̄. Eyi monyi ema irek igbagbaan̄ iwọlọ iweek esese esese mkpọ gwun̄ kiban̄ obokọt irọ. Ema mekọt imun̄ ibe ke gwun̄ kiban̄ mokọt ikween̄ ubọk ikwaan̄ eyi obokọt itap ubọk inyi ọmọ ikaan̄ ikwaan̄ mè iyaka ire isi uwu ikpa ilile. Ikamalek ikup ufiak ibe ebi uga mè ute erọ ntumu-mfieek yi sabum gwun̄ ijija kiban̄ obosibi okpan okpan uwu ikpa okukup ufiak ibe isi. (Urọk 21:5) Usini ene migobo isisi okpan okpan uwu ikpa okukup ufiak ibe ema esi, iweek ikwaan̄, mè ibene ikigbọ oniin̄ ojot mgbọ ike ema ekikeek mè ire ema mesi uwu ikpa ilile sa kpesi. Ene mokọt itumu ifieek isisi uwu ikpa igbaalek si ikerere ibe ke acha ije me lek kan̄.

6. Keke obokọt itap ubọk inyi ene ibe irọ ata ntumu-mfieek ofolek isisi uwu ikpa igbaalek?

⁶ Keke obokọt itap ubọk inyi owu ibe orọ ata ntumu-mfieek ofolek isisi uwu ikpa igbaalek? Mun̄ jaan̄ ibe ke obeek uriaak ofolek. Isọkọ me lek si, rọ inu iba chi. (Jemis 1:5) Adasi, sa me atikọ wọlọ nkeek kwun̄ kpọ mè iyaka ire do lek kwun̄ inu orọrọ okiweek isisi uwu ikpa igbaalek. (Itọn̄ 26:2) Òso iba, sa me ugbalachieen̄ wọlọ mbet lek kpokpo okiweek ikakaan̄ kpọ. (Urọk 14:15) Kè eji ekpa-nu inu chi ge ge.

WỌLỌ NKEEK KWUN̄ KPỌ

7. Keke ke ebi eyi Karais ebegbala chieen̄ me lek me mgbọ ema ekirọ ntumu-mfieek ofolek isisi uwu ikpa ilile?

⁷ Ire okikeek isisi uwu ikpa igbaalek, idodo okukup ufiak ibe odo lek kwun̄ ire, ‘Keke orọ nkiweek ikakaan̄ mbet lek kpokpo yi?’ Owuwa ebi ene ekiweek isisi uwu ikpa igbaalek inyi ema mekọt ikaan̄ ikwaan̄ ema emabe mè iyaka ire ikwaan̄ ebekikpe ema ata ikpoko. Ire nkeek chi ilọ ni? In̄-in̄, ikalọ. (1 Tim 5:8) Ire, Baibul itaba eji ubọk me utọn̄ ibe eji ekato ikpoko kubọk inu okukup ufiak ichit me ugwem kiji mè ekakeek ibe ke ire ikpoko gaalek oborọ ibe eji ekaan̄ mbem. (Urọk 23:​4, 5; 1 Tim 6:​8-10; 1 Jọn 2:17) Ire okiweek isisi uwu ikpa igbaalek bak me lek okiweek ikakaan̄ owuwa ikpoko mè iyaka ire itataan̄ etip, okpobokaan̄ ubelejit, omokọt itele ikekitọbọ ebum inyi Jioba si.

8-9. (a) Ike owa ke ogwu eyi Karais obokimun̄ isisi uwu ikpa igbaalek? (Matiyu 6:33) (b) Keke ke okween̄ me lek usem Josefina, Morine, mè Iris etumube?

⁸ Ike owa ke obokimun̄ isisi uwu ikpa igbaalek? Kpunu inu geege obokup ufiak inyi eji igak itọtọbọ ebum inyi Jioba. (Mat 22:​37, 38; Filip 3:8) Eya orọ, kimun̄ uwu ikpa geelek okisi kubọk inu eyi obotap ubọk inyi owu ike okisa otutuuk ejit kwun̄ ikitọbọ ebum inyi Jioba.​—Fuk Matiyu 6:33.

⁹ Taba iman̄ me lek inu otatap ubọk inyi usini ebi eyi Karais ekọt ekemun̄ isisi uwu ikpa igbaalek ike Jioba okimun̄. Josefina ogwu onan̄a me Chile, itumu ibe: “Nsi uwu ikpa igbaalek inyi nkọt nkaan̄ ata ikwaan̄ obokinyi emi mgbọ isasa itọbọ ebum inyi Jioba ijaan̄. Nsa imumun̄ ibe ke nkato ikwaan̄ n̄a kubọk mkpọ okukup ufiak ichit me ugwem n̄a. Ire irek unene n̄a melek Jioba okup ufiak ichit inyi emi.” Morine igobo isasa acha ge ikween̄ ubọk ekirọ ijeek. Bak me lek keke? Itumu ibe: “Inu ntobe me isi ire isisi ere ufiak ilolook ata etip ominbe. Eya orọ, nsisi ikween̄ ubọk ikwaan̄ obotap ubọk inyi emi nkọt nrọ inu ntobe me isi. Eyi nkween̄be ubọk ikwaan̄ ya isan̄a, mbebene ikirọ ijeek ebi ene inyi nkọt nkaan̄ ikpoko nso eyi mbasa ikọp uran̄ isi ere ufiak ilolook ata etip ominbe. Mkpọ nkween̄be itap ubọk inyi emi nkọt mmun̄ ikwaan̄ me ere nsibe.” Iris, ogwu okwekween̄ mkpọ ofolek ejeek ene me ujọn̄o mgbọ itumu ibe: “Ikerere ibe ke isisi uwu ikpa igbaalek ikaan̄ oruru me lek, ikpobokọt inyi owu ata ubelejit. Inyi eji ekọt ekaan̄ ata ubelejit, igbe ibe eji ekekeek ibe ire eji ito ntọbọ-ebum kiji inyi Jioba kubọk adasi mkpọ me ugwem kiji, ikpolọlọ inyinyi eji ubelejit mè ikpọ chieen̄ me lek ufiak kiji.” Me atikọ, ire eji imọnọ mgbaan̄je kiji melek Jioba kubọk mkpọ okukup ufiak ichit me ugwem kiji, eji ebekirọ ntumu-mfieek echi obokisa ubelejit ijet eji.

WỌLỌ MBET LEK KPOKPO OKIWEEK IKAKAAN̄ KPỌ

10. Ike owa ke obosa itap onineen̄ okup me Ikan Òso Mgbọ Iba 32:29 me ikwaan̄ me mgbọ okikeek mè ire omosi uwu ikpa igbaalek?

¹⁰ Omokọt ikaan̄ ikwaan̄ ge me ejit oweekbe irọrọ. Ire, ikup ufiak ibe okeek mkpọ ofolek ofifi mkpọ echi obokọt irọ. Mokọt ire ikwaan̄ obet lek eyi okaan̄be me ejit mè iyaka ire ofifi ofifi ikwaan̄. (Sa tọt me lek Urọk 18:17.) Me chereyi, mikaan̄ owuwa oniin̄ ekisa ikween̄ mkpọ igak mgbọ oraraka. Kubọk inu njeen̄, omokọt isa fun mè iyaka ire okwukwut nden̄ ikween̄ mkpọ me emen efet me uwu kwun̄. Kawuuk si ikekeek mè ire omokọt ikikpọ chieen̄ me lek ufiak kwun̄ ire otumu ifieek ibe ke okposi uwu ikpa igbaalek. Kubọk inu njeen̄, Johanna ogwu onan̄a me Finland ikasi uwu ikpa igbaalek. Itumu ibe: “Eyi nsibe okpan okpan uwu ikpa okukup ufiak ibe nsi, mbebene ikisi ikwaan̄ me mgbidim mgbọ mè ikigbọ oniin̄ ojot mgbọ. Nrọ esese esese ikwaan̄, ire, mmun̄ ibe ke Jioba ikukup inye ikirọ use ichieekbe ikpọkpọ chieen̄ me lek ufiak n̄a iso.” Kawuuk ibe ke ntumu-mfieek geelek orọbe ofolek isisi uwu ikpa ilile igbaalek mè mbet lek eyi obosi mokọt isan̄a ata mkpọ mè ijo mkpọ isibi. Eya orọ, do lek kwun̄ ibe: ‘Ire ata mkpọ obonan̄a isibi me lek iwa igak eyi ijo kan̄ ni?’ (Fuk Ikan Òso Mgbọ Iba 32:29; 1 Kọr 10:23) Eji ekween̄-nu usini mkpọ okukup ufiak echi obokọt itap ubọk inyi owu okọt ofọọk idodo ya.

11. Keke orọ ikupbe ufiak ikekeek mkpọ ofolek ubọk obokisa mgbọ kwun̄ irọ mkpọ sabum onobene uwu ikpa ya? (Kpọ si ogugo chi.)

¹¹ Mgbọ obokifiat nde geelek. Keek-nu mbubak mgbọ obokisa ikaan̄ kpokpo ya mè iyaka ire isi uwu ikpa ya nde geelek. Ire omokikaan̄ mgbọ isa irọ mkpọ echi obokirọ ibe unene kwun̄ melek Jioba ikinye ni? Ire omokikaan̄ mgbọ isa ikirọ mkpọ eweekbe me ubọk kwun̄ me ototun̄ ukan̄ kwun̄ ni? (Filip 1:10) Ire mkpọ-nrọ me uwu ikpa kwun̄ mowọ owu lek ire lek okpokọt ineen̄ lek iban nkween̄mkpọ ntitiin̄ mè iyaka ire isun̄ nkween̄mkpọ agaga kwun̄ ni? Eyi ore inu orọrọ Jeroz ogwu onan̄a me India. Itumu ibe: “Ikiyọt emi me lek enenen ikekisibi uko mgbọ geelek mè ikiriọọn̄ ubọk igban̄ utọn̄ me nkween̄mkpọ ntitiin̄. Usini mgbọ, nkiban nkween̄mkpọ ntitiin̄. Ike nkikeek mkpọ orọrọ me mgbọ ya, nnimun̄ ibe ke mkpọ nsikween̄ ikagbe okike mgbọ mè efuuk ntapbe.” Usini inu obokween̄ ikpobomọnọ owuwa mgbọ kwun̄; omokọt ikikween̄ me mgbidim mgbọ, usini mgbọ si, kpebekinyi owuwa mkpọ-nrọ me uwu ikpa ya. Kubọk inu njeen̄, Rabeca ogwu onan̄a me Mozambique ibele ejit me lek inu igobobe ikwekween̄. Itumu ibe: “Inu nkween̄be ikimọnọ mbubak mgbọ iba me usen. Eyi itap ubọk inyi emi nkup nnye nkegbọ oniin̄ ojot mgbọ.”

12. Ike owa ke ene obokọt isa mgbọ kan̄ irọ mkpọ ijaan̄ me mgbọ ikisi uwu ikpa igbaalek? Kpasi idodo ogbe ibe odo lek kwun̄ inyi okọt osa mgbọ kwun̄ orọ mkpọ me oniin̄ onwọnwọn ichit? (Ogwu Etip 12:1)

¹² Ujọn̄ọ mgbọ iboben owu isisi uwu ikpa ya isan̄a. Ofifi inu ogbegbe ibe okeek mkpọ ofolek ire otu ifuk onyan̄ mè iyaka ire acha iboben owu isisi uwu ikpa ya isan̄a. Keek-nu: ‘Ire ikakaan̄ kpokpo yi mè iyaka ire isisi uwu ikpa yi mojeen̄ ibe ke okisa mgbọ kwun̄ irọ mkpọ ijaan̄ ni? (Efes 5:​15-17) Ire ogobo isisi uwu ikpa igbaalek, ire monyi owu irek inyinyi Jioba inu onwọnwọn ichit obokọt inyi ọmọ, kubọk igbọgbọ oniin̄ ojot mgbọ ni? (Fuk Ogwu Etip 12:1.) Ire ikaan̄ mkpọ obokọt ikween̄ me mgbidim mgbọ eyi obokọt itap ubọk inyi owu me lek ikwaan̄ okiweek isisi ni? Kubọk inu njeen̄, omokọt isa mgbidim mgbọ mè sọntiik ikpoko isa ikween̄ mkpọ me usini uwu ikpa ilile mè iyaka ire ere ekikween̄ ubọk ikwaan̄. Mario ogwu onan̄a me Chile itumu ibe: “Ngobo isasa acha iba isi ikween̄ ubọk ikwaan̄ bak me lek mkpafiat owuwa ikpoko ike mafiat ire nsi uwu ikpa ilile. Nkisi ere nkikween̄ ubọk ikwaan̄ usen ini me nde ge. Eyi inyi emi mgbọ isasa igbọ oniin̄ ojot mgbọ me mgbọ nkikween̄ ubọk ikwaan̄ ya.”

13. Keke obokọt ibọkọ irek ire ere okiluk ikakup iriaak lek uwu ikpa okisi?

¹³ Ere obosi uwu ikpa ya. Omokọt iweek ere obokọt ikaan̄ kpokpo eyi okup iriaak lek uwu kwun̄. Ire, ire omun̄ ere obokaan̄ kpokpo yi me ofifi ama ye? Mè iyake ire, ire iweek ibe okoluk me uwu ikpa ya ye? Riọọn̄ ibe ke ikukup ijọn̄ọ ere me lek ebi ototun̄ ukan̄ kwun̄ mè ebi imama Jioba mokọt ifiat mgbaan̄je kwun̄ melek Jioba. (Urọk 22:3; 1 Kọr 15:33) Matias onan̄a me Mozambique isa acha ge isi ikween̄ mkpọ me uwu ikpa ge, ire, ibọnọ lek me lek ntumu-mfieek irọbe. Bak me lek keke? Itumu ibe: “Otutuuk mgbọ nkisi uwu ikpa ya, nkukup ida ibọkọ me lek ebi ototun̄ ukan̄ n̄a. Nkichichini ntọ-mkpọ irọrọ mkpọ ikatatge owuwa mgbọ, eya orọ, matumu ibe mè okagobo uwu ikpa eyi odada ibọkọ me lek ebi uwu kwun̄.” Gwun̄ ute enenwaan̄ ge okup me Russia itumu ibe: “Mfala owuwa mkpọ unan mè nto-mkpọ bak me lek nkinan̄a me uwu isi uwu ikpa, kpan̄asi isisi iluk me uwu ikpa ya.” Omokọt iweek imun̄ si mkpọ obokọt isa fun mè iyaka ire okwukwut nden̄ ikup me uwu kwun̄ ikikween̄ itibi me emen efet.

14. Ike owa ke ikọ Jisọs otumube me ikpa Luk 14:28 obosa itap ubọk inyi owu orọ ata ntumu-mfieek?

¹⁴ Otu ifuk ikpoko iboben. Me usini ere, usini inu ekikween̄ ikakimalek inye ewe mè iyaka ire, ebi mkpulu ekekikpe ikpoko iboben isasa ikween̄. Eya orọ, omokọt ikween̄ ubọk ikwaan̄ obotap ubọk inyi owu okọt okaan̄ ikwaan̄ me okafiatge owuwa ikpoko. Ire, me owuwa ere, isisi uwu ikpa igbaalek ikinye ewe enenen. Omoweek ikpoko isasa irọ owuwa mkpọ, kubọk ikpekpe ogwu okinu inijeen̄ owu mkpọ me uwu inyi ekọt ebọkọ owu etap me uwu ikpa ogobobe isisi. Ikaan̄ usini ebi uwu ikpa ikikup me emen urieek me ujọn̄ọ acha bak me lek mbet lek kpokpo ema ebọkọbe. Adilson ogwu oluk me Mozambique ibọnọ lek enenen me lek mbet lek kpokpo igobobe inyi lek kan̄. Itumu ibe: “Nte nga n̄a mè nga nga n̄a ekpukpo emi isibi me irek oyọyọt. Usini mgbọ, ema kpekikọt ikaan̄ usini mkpọ echi okukup ufiak inyi emi me otuuk acha ini mbọkọbe kpokpo ya.” Ike okikeek mkpọ ofolek mbet lek kpokpo obobọkọ, do lek kwun̄ ibe: ‘Ikpoko inen ke kpokpo yi oboben? Ire emi mè ebi ototun̄ ukan̄ n̄a mekọt ikpe ikpoko mweekbe isasa ikaan̄ kpokpo yi ni? Ire ofifi kpokpo omaan̄ eyi ikanye ewe kubọk eyi keyi ni?’ (Fuk Luk 14:28.) ‘Ire nkaan̄ ene urieek, ujọn̄ọ mgbọ okukup ke iboben emi ikpekpe isan̄a? Ire makọt isa ikpoko ebekikpe emi me lek ikwaan̄ mbasi ikpọ chieen me lek ufiak n̄a mè ikọt ikpe si oke urieek nkaan̄be isan̄a ni?’​—Urọk 22:7.

15. Keke orọ ikupbe ufiak ibe okeek mkpọ ofolek ikwaan̄ echi okifet imumun̄ me ere olukbe sabum onotumu ofieek mbet lek kpokpo obokaan̄?

¹⁵ Mkpọ ikakaan̄ ikwaan̄ ya obogọbọ. Keek mkpọ ofolek mbet lek ikwaan̄ okukup me ere olukbe mè iyaka ire ere okiweek iluluk. Ire kpokpo obobọkọ mokọt itap ubọk inyi owu okaan̄ ikwaan̄ ni? Esikijeen̄ ebi ene usini mkpọ, ekikpọkpọk ijeen̄ mkpọ ya ubọk ikupbe me ikpa inyi ebi ene ekaan̄ iriọọn̄-inu ofolek, kpekijeen̄ me oniin̄ eyi ebi ikikween̄ ebechubọk iriọọn̄ ubọk ekirọ mkpọ ya. (Kọl 2:8) Gwun̄ ute enenwaan̄ ge onan̄a me India itumu ibe: “Kpokpo mbọkọbe ikatap ubọk inyi emi nkọt nkween̄ inu okukup ufiak ibe nriọọn̄ isasa irọ ikwaan̄ nkaan̄be me ejit irọrọ.” Usini inu ekijeen̄ ire eyi kpekimalek ikaan̄ ikwaan̄ inyi. Sublime ogwu onan̄a me Central African Republic ogwu okwekween̄ ubọk ekirọ mkpọ okitọọk ere (AC) ofafiat, itumu ibe: “Me ere nlukbe, owuwa ene mikisa ubọk kiban̄ irọ AC kiban̄ isifiat, eya orọ, ikiyọt imumun̄ ikwaan̄.”

16. Keke orọ igbebe ibe okeek ojaan̄ mbet lek ikwaan̄ obokaan̄ osikween̄ ikwaan̄ mè iyaka ire isi uwu ikpa ilile isan̄a?

¹⁶ Keek si mbet lek ikwaan̄ oborọ osibọkọ kpokpo isan̄a. Ire omonwọọn̄ ikwaan̄ ya ni? (Etip 3:​12, 13) Ike owa ke ere ikwaan̄ ya obokup? Mbet lek ife okukup ke obokigọọk isi ikwaan̄? Ire mbet ikwaan̄ eyi obokisak ene unan me lek ni? Ire ebi obokigọọk isi ikwaan̄ mè iyaka ire ebi obokisi ikwaan̄ inyi mekinyinyan̄a irek onwọnwọn ichit mè ikisa ikwaan̄ ikeme ebi ikisi ikwaan̄ inyi ema ni? Ikpoko inen ke ebekikpe owu me ikwaan̄ ya? Ire moso mkpọ obosa ikikpọ chieen̄ me lek ufiak kwun̄ ni? Ire isisi uwu ikpa igbaalek ikup ufiak inyi okọt okaan̄ ikwaan̄ ya ni? Eyi okukup ufiak ichit, ire ikwaan̄ ya motele ibe okoto ntọbọ-ebum kwun̄ inyi Jioba kubọk adasi inu me ugwem kwun̄ ni? (Etip 12:13) Me atikọ, ikwaan̄ isinan, ikakimalek ifet ikọkọt igobo mbet lek ikwaan̄ eji mema isisi. Ire, inu ogobobe irọrọ ofolek mbet lek uwu ikpa obosi mokọt ikaan̄ mgbaan̄ me lek mbet lek ikwaan̄ echi obokọt ikaan̄ me mgbọ okup me isi. Tabitha ogwu onan̄a me India igobo isasa onyan̄ gweregwen ikween̄ ubọk ekichim ofọnti. Itumu ibe: “Ntumu ifieek ikekichim mkpọ mije, motap ubọk inyi emi nkọt mgbọ oniin̄ ojot mgbọ. Ire ikwaan̄ eyi ebi ene ebekiweweek, eyi obonyi emi mgbọ, ikpoweek owuwa ikpoko isasa ibene si.” Bak me lek ubọk ikwaan̄ Tabitha okween̄be, imun̄ ikwaan̄ ibosa itap ubọk inyi lek kan̄ ike ikigbọ oniin̄ ojot mgbọ.

17. (a) Ike owa ke obosa iweek etip obotap ubọk inyi owu orọ ata ntumu-mfieek ofolek isisi uwu ikpa igbaalek? (b) Ere Baibul echi owa obokọt itap ubọk inyi owu okọt orọ ata ntumu-mfieek? (Kpọ okop “Onineen̄ Baibul Obokeek Mkpọ Ofolek.”)

¹⁷ Me ibot usem yi, eji mikween̄ owuwa inu okukup ufiak echi eji ebekeek mkpọ ofolek. Ike owa ke obokọt iweek etip obotap ubọk inyi owu okọt orọ ata ntumu-mfieek? Wọlọ week inu ofolek mkpọ okiweek ikwekween̄ sa me isisi uwu ikpa ya mè iyaka ire ikpọ me emen efet. Week riọọn̄ mè ire mofet ikakaan̄ ikwaan̄ osikween̄ inu okiweek ikwekween̄ isan̄a. Omokọt ido ebi ikirọ ikwaan̄ ya, mè iyaka ire ebi ikwekween̄ mkpọ ofolek ikwaan̄ ya. (Urọk 13:10) Do ema ibe, “Keke ore inu onwọnwọn mè isak ofolek ikwaan̄ ya mè iyaka ire kpokpo ya?” Gọọk ebi ikisa me unwọọn̄ itọbọ ebum inyi Jioba kpa mkpọ ofolek inu yi. (Urọk 15:22) Kpasi kpokpo mè ikwaan̄ ke ema ekikeek ibe ke monwọn? Ema mekọt itumu mbet lek ikwaan̄ okakeek mkpọ ofolek.

18. Keke obochubọk ikinyi eji unwọọn̄?

¹⁸ Ike eji ekween̄be, isisi uwu ikpa igbaalek ikaan̄ nnwọn kan̄ mè mkpọ unan si. Eya orọ, beek uriaak mè keek mkpọ ofolek inu oborọ. Isọkọ me lek, isisi uwu ikpa igbaalek mokọt irọ ibe okaan̄ ikwaan̄ mè ikpoko obosa ikikpọ chieen̄ me lek ufiak kwun̄, ire, inyi okaan̄ ata ubelejit, omokaan̄ ata mgbaan̄je melek Jioba. (Itọn̄ 16:​9, 11) Jioba ikikpọkpọ chieen̄ me lek ebi eyi kan̄, me ekakpọge chieen̄ me lek mbet lek uwu ikpa ema esibe. (Iburu 13:5) Ire otumu ifieek isisi uwu ikpa igbaalek ye? Keke obokọt itap ubọk inyi owu okup oriaak lek Jioba ike okisi uwu ikpa igbaalek? Eji mekpa eyi me ibot usem ogọgọọk.