Kweek Riaak Me Lek Jioba Me Mgbọ Okisi Uwu Ikpa Ilile

1-2. (a) Ire otumu ifieek isisi uwu ikpa igbaalek, keke ogbe ibe okup onye okorọ? (b) Keke ke usem “ekeluk ugwem egọọk me lek atikọ ya eyi eji ewuukbe lek ikaan̄” osibi? (Ebi Filipai 3:16)

USINI ebi usun̄ Jioba mitumu ifieek isisi uwu ikpa igbaalek eyi ema esibibe okpan okpan uwu ikpa okukup ufiak ibe ema esi. Ema mekọt ikikeek ibe ke isisi uwu ikpa igbaalek mokọt itap ubọk inyi ema emun̄ ikwaan̄ obonyi ema ikpoko isasa ikpọ chieen̄ me lek ufiak kiban̄ ike ema ekitọbọ ebum inyi Jioba. Ire otumu ifieek isisi uwu ikpa igbaalek, ike owa ke obokọt imun̄ ijaan̄ ibe ke okup iriaak lek Jioba? (Jemis 4:8a) Kpunu cheche ibe ke ora ichichini ntọ-mkpọ me mgbọ okisi okpan okpan uwu ikpa eyi osibe isan̄a. Mgbọ keyi, moweek si ibe okup onye okoluk ugwem ogọọk me lek atikọ echi okween̄be, orere, ikukup inye ikitọbọ ebum inyi Jioba ike owuukbe lek ikirọ.​—Fuk Ebi Filipai 3:16.

² Usem Giris ekababe ikana “ekeluk ugwem egọọk me lek atikọ ya eyi eji ewuukbe lek ikaan̄” ire usem ebi akọn̄ ekimalek isa irọ mkpọ, usem ya ikikpa mkpọ ofolek ubọk ebi akọn̄ ekigbaan̄ ije ifo isi. Eya orọ, ire otumu ifieek isisi uwu ikpa igbaalek, ikup ufiak ibe okup onye okoje onyi isi me ikwaan̄ Jioba, kakpọkpọk ikeke ibia me ere ge mè iyaka ire ikpebe lek ifo udun̄. Me ibot usem yi, eji mekpa onineen̄ ini echi obotap ubọk inyi owu. Onineen̄ chi ikare ayaya mkpọ inyi owu. Owuuk lek ikisa ema irọ mkpọ me mgbọ oraraka, ikup ufiak si ibe okosa onineen̄ chi orọ mkpọ ike okisi uwu ikpa igbaalek mè ikerere me mgbọ osisibi uwu ikpa.

KWEEK NYE KIRỌ INU ECHI OBORỌ IBE MGBAAN̄JE KWUN̄ MELEK JIOBA IKINYE

3. Keke ore usini rumurumun̄ obokichichini ike okisi uwu ikpa igbaalek?

³ Rumurumun̄. Ike okisi uwu ikpa igbaalek, omokọt ikaan̄ owuwa mkpọ obokirọ usen geelek. Bak me lek okiweek irọrọ ijaan̄ me uwu ikpa okisi, omokọt ikimọnọ mkpọ ofolek uwu ikpa kwun̄ ibene igak ntọbọ-ebum kwun̄ inyi Jioba. Omokọt ibene ikikpọ chieen̄ ilọ me lek isisi nkween̄mkpọ ntitiin̄, ikekigọọk isibi uko, ikakaan̄ nkween̄mkpọ agaga, mè ikekiriaak uriaak.​—Ichi 2:4.

4. Keke orọ ikupbe ufiak ibe ‘okotap lek me lek ikwaan̄ Okaan̄-ene’? (Ebi Kọrint Eyi Adasi 15:58)

⁴ Fuk Ebi Kọrint Eyi Adasi 15:58. Inyi bicycle ikije inyi isi, ogwu okikọp ibokijajak, ubọk yaage si, ufuna mgbaan̄je kiji melek Jioba ikinye, eji ebekitatap lek kiji ojot ojot me ikwaan̄ Okaan̄-ene mgbọ geelek. Ikup ufiak ibe okosan̄a mgbọ osibi osa otap lek me lek ikwaan̄ ntitiin̄. Ire, mkpọ okukup ufiak ichit ire ikekirọ ikeya mije omọnọbe inu echi emen ekwukwu kubọk inu echi okukup ufiak enenen. Kawuuk ibe ke ire itọtọbọ ebum inyi Jioba okup ufiak ichit me ugwem kwun̄, ikare isisi uwu ikpa igbaalek. (Mat 22:37) Gwun̄ ute enenwaan̄ ge ekigwen Samantha itumu ibe: “Ntumu inyi lek n̄a ibe mè ire uwu ikpa n̄a iborọ ibe itọtọbọ ebum inyi Jioba ikiyọt emi me lek, ke matele isisi uwu ikpa ya.”

5. Keke ke obokọt irọ inyi okotap lek ojot ojot me lek ikwaan̄ Jioba?

⁵ Inu obokọt irọ sabum obene okosi uwu ikpa ogbaalek. Mun̄ ibe ke irọrọ nkeek Jioba ore adasi inu oboto me isi. Do lek kwun̄ ibe, ‘Kpasi ndọmọ ke nkaan̄ inyi makọt ikisi nkween̄mkpọ ntitiin̄, ikigọọk isi uko, mè ikikaan̄ nkween̄mkpọ agaga mgbọ geelek ni?’ (Jos 1:8; Mat 28:​19, 20; Iburu 10:25) Keek-nu: Keke ke nrọ me mgbọ nsibe okpan okpan uwu ikpa okukup ufiak ibe nsi inyi nkọt nkesi nkween̄mkpọ ntitiin̄, nkesibi uko, mè nkekaan̄ nkween̄mkpọ agaga? Ire omun̄ ibe ke ikaan̄ usini mkpọ okarọbe ijaan̄ me mgbọ ya, kpasi unwene ke obokọt irọ me mgbọ keyi ni? Tumu fieek itatap lek ojot ojot me lek ikwaan̄ Jioba ike okisi uwu ikpa igbaalek. Mọnọ uwu ikpa kwun̄ sun̄ ufiak, ire ikakup ufiak igak ntọbọ-ebum kwun̄ inyi Jioba.a​—Mat 6:24.

6. Kpasi idodo ke obokọt ikido lek kwun̄ isasa iriọọn̄ mè ire okekito ntọbọ-ebum kwun̄ inyi Jioba kubọk adasi inu me ugwem kwun̄? (Kpọ si ogugo.)

⁶ Ike okisi uwu ikpa igbaalek, omokọt ikiwọlọ lek kwun̄ ikpọ inan̄a me mgbọ ire mgbọ, mokọt ire onyan̄ geelek. Kido lek kwun̄ ibe: ‘Ire nkimalek iban nkween̄mkpọ mè iyaka ire ikisi me ulọ mgbọ ni? Ire nkimalek ikeek mkpọ-nrọ enyibe emi me uwu ikpa ike nkween̄mkpọ ntitiin̄ okije inyi isi ni? Ire nkisa fun n̄a isi nkween̄mkpọ ntitiin̄ itibi me lek efet kpan̄asi ikekigọọk bọn ute irieen̄ mè ibaan̄ ititiin̄ isi mè isi ni?’ Omokọt ikido lek kwun̄ si ibe: ‘Ire nkakiwọ me ikekibeek uriaak mè ikekifuk Baibul ni? Ire nkisibi uko gaalek isasa inyi mfufuk ikwaan̄ mè iyaka ire me uran-lek ni? Ire ufọọk-otu kwun̄ isa usini idodo chi ire iin̄, gwat lek rọ unwene. Kachieek ibe uwu ikpa okisi irọ ibe okayaka ikimọnọ itọtọbọ ebum inyi Jioba kubọk adasi inu me ugwem kwun̄.

KACHIEEK IBE EBI OFIFI IFE ENWENE UBỌK OKIKEEK MKPỌ

7. Ike owa ke isisi uwu ikpa igbaalek obokọt inwene ubọk okikeek mkpọ?

⁷ Rumurumun̄. Igọọk me lek mkpọ osibe isi ikween̄, mekọt ikijeen̄ owu usini mkpọ igọọk me lek “ujọn̄ọ ifuk-ibot ebilene,” kubọk ijejeen̄ obe ke kpunu Awaji, mè ijejeen̄ obe ke inu geelek ikpọkpọk isibi ikeya. (Kọl 2:8) Inu okebikikween̄ si mokọt ikirọ ibe okoyaka lek omaan̄ me lek iriọọn̄-inu kwun̄ kpan̄asi ikekiyaka lek imaan̄ me lek Jioba. Gwun̄ ute enerieen̄ ge itumu ibe: “Ikare uka gaalek ke ejeen̄ eji; mijeen̄ eji si ubọk eji ebekisa ikeek mkpọ, eyi ikakije ikike me lek ubọk Jioba oweek ibe eji ekekeek mkpọ owuwa mgbọ. Kubọk inu njeen̄, ejeen̄ eji ibe ke eji ebekiyayaka lek imaan̄ me lek inu eji eriọọn̄be inyi eji ekọt erọ ejaan̄ me ugwem. Nkeek yi obebene ikirọ ibe nkenkeek ibe ke nkaweek ntap-ubọk Jioba me ugwem n̄a. Irọ ibe iyayaka lek imaan̄ me lek Jioba ikafet inyi emi.”

8. Keke orọ ikupbe ufiak ibe osun̄ ata nkeek? (Urọk 5:​1, 2)

⁸ Fuk Urọk 5:​1, 2. Baibul itaba eji ubọk me utọn̄ ibe eji esun̄ “ata nkeek.” Eyi ikup ufiak bak me lek Setan mè inyọn̄ kan̄ ekisa irọrọ ibe eji ekekeek mkpọ ike ema ekikeek. (1 Pita 5:8) Mkpọ ebi ene ekikeek ofolek inu echi otatat mè echi olọlọ, ubọk ugwem osabe ibene, mè ijejeen̄ obe ke kpunu Awaji mokọt irọ ibe eji ebene ekekaan̄ cheche ofolek inu Baibul okijeen̄. Ebi ijejeen̄ mè ebi ofifi ife mekọt ikirọ ibe okokeek ibe ke nkeek kiban̄ chi ijeen̄ iriọọn̄-inu mè itat. Ire, nkeek chi “ìre burubut me isi Awaji.”​—1 Kọr 3:​18-20.

9. Keke ke obokọt irọ isasa isun̄ ata nkeek?

⁹ Inu obokọt irọ sabum obene okosi uwu ikpa ogbaalek. Inyi okọt osun̄ ata nkeek, mun̄ jaan̄ ibe ke ochieek inye ibe ke inu Baibul okijeen̄ ire atikọ sabum obene okosi uwu ikpa ogbaalek. Do lek kwun̄ idodo chi: ‘Keke orọ nchieekbe ibe ke Awaji owa? Ike owa ke nsa iriọọn̄ ibe ke Baibul ire Usem Awaji? Keke orọ ibe nchieek nnye ibe ke iluluk igọọk onineen̄ Awaji ofolek inu otatat mè eyi olọlọ inwọn igak eyi inyọn̄ keyi?’ Ofolek mgbọ osibe okpan okpan uwu ikpa okukup ufiak ibe osi, do lek ibe: ‘Ire mbene ikikaan̄ cheche ibe ke Awaji owa me atikọ mè ire si ogwu ororom otutuuk inu geelek mije ebi ene ekitumu ibe ke otutuuk inu ikpọkpọk isibi ikeya ni? Ire mweek irọrọ usini ijo mkpọ ebi uwu ikpa ogbo n̄a ekirọ ni? Ire omun̄ ibe ke okarọ ijaan̄ me mgbọ ya, ike owa ke oborọ ibe nchieek kwun̄ inye me mgbọ keyi ni? Tumu fieek isusun̄ ata nkeek kwun̄ ijaan̄ ike okisi uwu ikpa igbaalek.​—2 Tim 2:​16-18.b

10. Keke ke obokọt irọ inyi okọt otet nchieek kwun̄ onye ike okisi uwu ikpa igbaalek?

¹⁰ Ike okisi uwu ikpa igbaalek, kisa idodo chi wọlọ lek kwun̄ kpọ inan̄a me mgbọ ire mgbọ: Ire nkitele ibe ubọk iluk ugwem ebi kpekisa onineen̄ Awaji irọ mkpọ ikikaan̄ mgbaan̄ me lek n̄a ni? Ire mariọọn̄ mgbọ ekijeen̄ emi inu ikarege atikọ eyi okpọkpọk ire iriọọn̄-inu ebilene ni? Ire nchubọk ichieek inye ibe ke ire Ama Ubọọn̄ Awaji gaalek obokot isan̄a ufialek ebilene isan̄a ni? Inyi okọt osun̄ ata nkeek kwun̄, omotet lek inye ikikween̄ Usem Awaji. Ikekikween̄ Baibul mè ikekigwu nkeek ikom me lek inu okikween̄ motap ubọk inyi owu okakaan̄ cheche ibe ke otutuuk inu okup me Baibul ire atikọ.​—1 Tim 4:15.

KISA MGBỌ KWUN̄ RỌ MKPỌ JAAN̄

11. Ike okisi uwu ikpa igbaalek, keke ore usini rumurumun̄ obokọt ichichini ofolek ubọk okisa mgbọ kwun̄ irọ mkpọ?

¹¹ Rumurumun̄. Ike okisi uwu ikpa igbaalek, mokọt iweek ibe osa owuwa mgbọ orọ mkpọ, ogakge me mgbọ oboge ule mè iyaka ire irọ ikwaan̄ eweekbe me ubọk kwun̄. Ire okariọọn̄ ubọk obokisa mgbọ kwun̄ irọ mkpọ ijaan̄, morọ ibe okokaan̄ owuwa sasaak eyi oborọ mè efuuk ikita owu me owot owuwa mgbọ. Eya orọ ikupbe ufiak ibe okokpọ chieen̄ ojaan̄ me lek akpalek kwun̄.

12. Keke ore usini inu echi ogbegbe ibe osan̄a mgbọ onyi? (Ebi Efesọs 5:​15, 16)

¹² Fuk Ebi Efesọs 5:​15, 16. Mokọt iyọt ikekisa mgbọ kwun̄ irọ mkpọ ijaan̄ bak me lek omokọt ikaan̄ owuwa mkpọ obokirọ. Igbe ibe osan̄a mgbọ onyi inu okikween̄ me uwu ikpa, ire, ikup ufiak enenen si ibe okosan̄a mgbọ osibi osa ogọọk ebi ototun̄ ukan̄ kwun̄ mè ebi bọn ute ogbaan̄ okup. (Itọn̄ 133:1; Urọk 18:1) Eyi okukup ufiak ichit, kisan̄a mgbọ sibi sa kirọ inu echi obokitaba owu iriaak me lek Jioba. (Mat 6:33) Omokọt ikaan̄ mkpọ okirọ inyi ebi ototun̄ ukan̄ kwun̄ mè ikaan̄ ikwaan̄ okisi isasa ikikpọ chieen̄ me lek ufiak kwun̄. Ikup ufiak ibe okotap efuuk mè okorọ mkpọ isasa ikpọk lek kwun̄. (Etip 4:6; 1 Tim 4:8) Inyi okọt orọ otutuuk inu chi, moweek ibe oneen̄ mgbọ kwun̄ ojaan̄.

13. Keke ke obokọt irọ inyi osa mgbọ kwun̄ orọ mkpọ ojaan̄?

¹³ Inu obokọt irọ sabum obene okosi uwu ikpa ogbaalek. Baibul itumu ibe ke inu moje ijaan̄ inyi eji mè ire eji ekitọt inu eberọ. (Urọk 21:5) Eya orọ, kaan̄ ata onineen̄ ofolek ubọk obokisa mgbọ kwun̄ irọ mkpọ sabum onobene okosi uwu ikpa ogbaalek. Inyi okọt orọ eyi, keek-nu: ‘Ike owa ke nsa mgbọ n̄a irọ mkpọ me adasi mgbọ nsibe uwu ikpa sabum mgbọ keyi nkiweek isisi uwu ikpa igbaalek? Ire omun̄ ibe ke okarọ ijaan̄ me mgbọ ya, kpasi unwene ke obokọt irọ me mgbọ keyi ni? Mun̄ ibe ke oneen̄ mgbọ kwun̄ ijaan̄ inyi okaan̄ mgbọ isasa irọ otutuuk inu ogbegbe ibe orọ.c

14. Idodo echi owa obokọt itap ubọk inyi owu owọlọ lek kwun̄ okpọ?

¹⁴ Ike okisi uwu ikpa igbaalek, kisa idodo chi wọlọ lek kwun̄ kpọ inan̄a me mgbọ ire mgbọ: ‘Ire nkikaan̄ mgbọ isa itap efuuk mè ikirọ mkpọ isasa ikikpọk lek ni? Ire nkikaan̄ mgbọ ikigọọk bọn ute irieen̄ mè ibaan̄ igbaan̄ ikup ni? Ire makọt ikirọ mkpọ-nrọ enyibe emi me uwu ikpa me enen mgbọ ni? Ire ikare ikeya, ire bak me lek nkaan̄be owuwa mkpọ nkirọ sa ire bak me lek nkakisa mgbọ n̄a irọ mkpọ ijaan̄? Ire ebi ofifi ife mè ikerere ebi uwu n̄a mechieek ibe ke igbe ibe nrọ unwene ni?’ Ire omun̄ ibe ke igbe ibe orọ unwene me lek ubọk okisa mgbọ kwun̄ irọ mkpọ, kafiat mgbọ irọrọ ikeya. Omokọt igọọk ebi ikisa mgbọ kiban̄ irọ mkpọ ijaan̄ ikpa usem si.​—Urọk 11:14.

KIRỌ UNENE MELEK EBI IMAMA JIOBA

15. Ike okisi uwu ikpa igbaalek, keke ore rumurumun̄ obokọt ichichini?

¹⁵ Rumurumun̄. Ike okisi uwu ikpa igbaalek, ebi uwu ikpa ogbo kwun̄ mekọt igwen owu ibe ogọọk ema orọ inu echi ikakaan̄ mgbaan̄ me lek uwu ikpa. Omokọt iweek ichechieek ogwen ya, mije, owu melek kiban̄ mikaan̄ owuwa mkpọ echi enyi ekigbaan̄ irọ, ogakge eyi irebe ibe ke enyi ekigbaan̄ ikup owuwa mgbọ me uwu ikpa. Omokọt ibene ikikeek ibe ke mkpọ owu mè ebi uwu ikpa kwun̄ egbaan̄be ima iwa igak mkpọ owu mè ebi bọn Nte kwun̄ emabe. Ire, ikup ufiak ibe okup me ugwọk-chieen̄. Ikerere ibe ke owu mè ebi uwu ikpa kwun̄ ekigbaan̄ ikween̄ mkpọ me uwu ikpa, enyi kpekaan̄ nchieek yaage ofolek mkpọ onwọnwọn mè echi olọlọ. Ike okigọọk ema igbaan̄ irọ mkpọ si, ikeya ke obobene ikikeek mkpọ kubọk kiban̄. (1 Kọr 15:33) Michael, ogwu osasa acha ini ikween̄ ubọk ikwaan̄ electric, imun̄ ibe ke inu yi ire atikọ. Itumu ibe: “Nkigọọk ebi melek n̄a ekigbaan̄ ikween̄ ikwaan̄ ikup iraka akọp mbubak mgbọ ini nde geelek. Nkeek kiban̄ ofolek ugwem barabat, mbet okwa ema ekigban̄, mè ijo usem ema ekitumu obebene ikikaan̄ mgbaan̄ me lek n̄a.”

16. Keke ke igọgọọk “ebi ìriọọn̄ inu ije” osibi? (Urọk 13:20)

¹⁶ Fuk Urọk 13:20. Baibul itaba eji ubọk me utọn̄ ibe ke ijo mgbaan̄je mokọt isa owuwa ufialek ijet eji. Ire, “ogwu ògọọk ebi ìriọọn̄ inu ije, môriọọn̄ inu.” Usem yi isibi utoon̄ mije, ebi eji ekigọọk irọ mkpọ mikikaan̄ ata mè iyaka ire ijo mgbaan̄ me lek kiji. Eya orọ, rọ unene melek ebi imama Jioba kubọk kwun̄ mè ikiweek inu onwọnwọn ichit inyi owu.​—Itọn̄ 101:​6, 7; 119:63.

17. Keke ke obokọt irọ isasa ijit ijo mgbaan̄je?

¹⁷ Inu obokọt irọ sabum obene okosi uwu ikpa ogbaalek. Tumu fieek okike mgbọ mè ubọk obokigọọk ebi uwu ikpa ogbo kwun̄ igbaan̄ irọ mkpọ. Gwun̄ ute enerieen̄ ge ekigwen Trenton itumu ibe: “Nkisa me ata ejit irọ mkpọ melek ebi uwu ikpa ogbo n̄a, ire nkakimalek ikigọọk ema ikup uwu ikpa isisibi. Nkimun̄ ema kubọk ebi uwu ikpa ogbo n̄a, ikare ebi unene n̄a.” Keke ke oborọ inyi okamalek ikup iriaak lek kiban̄? Inyi okọt ofọọk idodo yi, do lek kwun̄ ibe: ‘Ike owa ke nsa imun̄ ijaan̄ ibe ke nkọt irọ eyi itet me mgbọ nsibe okpan okpan uwu ikpa okukup ufiak ibe emi nsi? Ire omun̄ ibe ke okarọ ijaan̄ me mgbọ ya, kpasi unwene ke obokọt irọ me mgbọ keyi ni? Tumu fieek ikekigọọk “ebi ìriọọn̄ inu ije” mè jit ikekigọọk ebi kpema Jioba ije.d

18. Idodo echi owa ogbe ibe odo lek kwun̄? (Kpọ si ogugo.)

¹⁸ Inan̄a me mgbọ ire mgbọ, kido lek kwun̄ ibe: ‘Ire nkimalek itaba lek iriaak me lek ebi uwu ikpa ogbo n̄a ni? Ire eru kiban̄, usem kiban̄ mè ubọk irọ mkpọ kiban̄ ibene ikikaan̄ mgbaan̄ me lek usem n̄a, mè ubọk ikeek-mkpọ n̄a ni? Ire Jioba mobele ejit me lek mgbaan̄je n̄a melek ebi uwu ikpa ogbo n̄a ni?’ (Itọn̄ 1:1) Ire omun̄ ibe ke igbe ibe orọ unwene, kafiat mgbọ irọrọ. Mun̄ jaan̄ ibe ke ebi ogobobe ibe ere ata ebi unene kwun̄ ire ebi imama Jioba kubọk kwun̄. Igbaalek si, katet ikaan̄ ilolook ebi uwu ikpa ogbo kwun̄ ata etip. Owu okup me ata irek itatap ubọk inyi ema ekween̄ atikọ ofolek Jioba.

KUP ME MBEM-LEK

19. Ike owa ke obosa ibem lek kwun̄ ititim igak rumurumun̄ emen ekwukwu echi obochichini ike okisi uwu ikpa igbaalek? Nyi inu ntọt-me-lek.

¹⁹ Ata ogwu mbọm okakaan̄ iriọọn̄-inu ikineneen̄ lek kan̄ sabum onoje mbọm. Ikerere ibe ke ikariọọn̄ otutuuk rumurumun̄ ibochichini, ikikukup me mbem-lek me ekiket kan̄, mkpọ itapbe, me mkpọ itobe me isi​—orere mbọm ikisi. Eji mekọt isa eyi itọt me lek inu obotap ubọk inyi owu ike okisi uwu ikpa igbaalek. Kweek nye me ichechieek, mun̄ ibe ke otap “otutuuk nroon̄ akọn̄ eyi Awaji onyibe” owu, mè to inu oborọ itet me isi​—ikare ikakaan̄ owuwa ikpoko mè iyaka ire, irere ogwu osisibi isi me linyọn̄ yi, kpan̄asi ikeya, kè inu otobe me isi ire ikekirọ inu echi obokisa itọn̄ mè umin ijet Awaji mgbọ geelek.​—Efes 6:​11-13; 1 Kọr 9:​26, 27; 10:31.

20. Ike owa ke obosa itọ lek kwun̄ ikpọ mè ire owu òwa me emen ichechieek?

²⁰ Baibul itap eji efuuk me owot ibe: “Ìwọlọ ugwem kinyi, mè ìtọ lek kinyi ìkpọ, mè ìre enyi òwa me emen ichechieek.” (2 Kọr 13:5) Omokọt irọ eyi ike okisi uwu ikpa igbaalek. Kiwọlọ lek kwun̄ kpọ nan̄a me mgbọ re mgbọ me oniin̄ echi ekpabe me ibot usem yi. Kido lek kwun̄ idodo chi: ‘Ire nkekirọ inu echi oborọ ibe mgbaan̄je n̄a melek Jioba inye ni? Ire nkekibem nkeek n̄a isan̄a me lek inu echi ebi inyọn̄ yi ekigwen iriọọn̄-inu ni? Ire nkekisa mgbọ n̄a irọ mkpọ ijaan̄ ni? Ire nkekigobo ata unene me eden̄ bọn ute mè ikijit ijo mgbaan̄je ni? Idodo chi ire idodo echi ogbegbe ibe eji ekedo lek kiji ge ge, mè ire eji ekup me uwu ikpa, ere ikwaan̄, mè iyaka ire ofifi ofifi ere geelek. Tumu fieek ikekirọ ibe ichechieek kwun̄ ikinye me irek geelek oweekbe lek kwun̄ imun̄ mè riọọn̄ ibe ke Jioba mogbana efuuk okitap isasa irọ ikeya.​—Urọk 3:​5, 6.