Sa Onineen̄ Baibul Kpukpo Nkeek Kwun̄

1-2. (a) Kpasi inyinyi ke Jioba onyi Adam mè Îfu? (b) Ike owa ke ema mejeen̄ ibe ke ema minwọọn̄ inyinyi ya?

EBI kè anam ekirọ mkpọ igọọk me lek ubọk Awaji orombe ema. Okwukwut si ikirọ mkpọ geelek ebi irorom eweek ibe ikirọ. Ire, ebilene kpekup ikeya. Jioba irom eji me oniin̄ osisibi esese mè inyi eji inyinyi eyi ebi eyi Karais emọnọbe ibene enenen. Ire inyinyi ikekirọ ntumu-mfieek inyi lek kiji. Baibul itumu inyi eji ibe ke Jioba irom Adam, orere, adasi enerieen̄ me mbet kan̄. (Ibeb 1:​26, 27) Jioba irom Adam mè Îfu me oniin̄ eyi ema mekọt ikirọ ntumu-mfieek inyi lek kiban̄.

² Jioba ikanyi Adam mè Îfu owuwa ikan ibe esun̄. Ikpọkpọ itumu inyi ema ibe ekpọ chieen̄ me lek inyọn̄ ijọn̄ yi, ekaan̄ bọn, mè ekaan̄ ulibi me lek unye ọmọ okaan̄be isasa itumu inu eyi ema eberọ mè eyi ema kpeberọ. (Ibeb 1:28; 2:​16, 17) Ike owa ke Adam mè Îfu mejeen̄ Ogwu onyinyi ema inyinyi ikekirọ ntumu-mfieek inyi lek kiban̄ ibe ke ema mima mkpọ irọbe inyi ema? Adam mè Îfu kè esiki ibot enyi Jioba mè egọọk ikan ofefet isusun̄ inyibe ema. Sa me ikeya, ema kè ejeen̄ ibe ke ema mima Jioba, mè iweek irọrọ ibe ọmọ ikibele ejit, kè ejeen̄ si ibe ke ema mima unye ikekirọ ntumu-mfieek inyi lek kiban̄ eyi Jioba onyibe ema, mè otutuuk inu geelek inyibe ema ibe enwọọn̄.​—Urọk 23:15.

3. Ike owa ke Adam mè Îfu esa unye ema ekaan̄be isasa irọ ntumu-mfieek irọ mkpọ?

³ Baibul ijeen̄ ibe ke Adam mè Îfu kpesa unye ema ekaan̄be isasa irọ ntumu-mfieek irọ mkpọ ijaan̄. Kpan̄asi ikeya, ema etumu ifieek ikpakpaka ibot inyi Jioba. Ema erọ ntumu-mfieek ya bak me lek ema emabe lek kiban̄ gaalek, kpema Jioba. (Ibeb 3:​1-7) Eji ekibọkọ ukwook me chereyi bak me lek ijo ntumu-mfieek kiban̄.​—Rom 5:12.

4. (a) Igọọk me lek inu okup me ikpa Ebi Galesia 6:​5, keke ke otutuuk kiji kpelọlọ irọrọ? (b) Kpasi inyinyi si ke eji ebekpa mkpọ ofolek me ibot usem yi?

⁴ Ugwem kiji mokọt iyọt enenen bak me lek eji ekaan̄be owuwa ntumu-mfieek irọrọ usen geelek. (Fuk Ebi Galesia 6:5.) Usini ntumu-mfieek chi ire echi ofefet, ire, usini iyọyọt. Ike owa ke eji ebesa ikirọ ntumu-mfieek echi obokineme Jioba ni? Eji medasi ichieek ijaan̄ ibe ke eji miweek ntap-ubọk Jioba. (Urọk 16:3; Jer 10:23) Jisọs ire ogwu ososo, ire, iriọọn̄ ibe ke ọmọ iweek ntap-ubọk Awaji. (Iburu 5:7) Kubọk ebi kpeso, eji miweek ntap-ubọk Jioba igak ubọk Jisọs oweekbe. Kè eji enekpa-nu mgbọ keyi ofifi inyinyi Awaji onyibe eji eyi obotap ubọk inyi eji ekerọ ata ntumu-mfieek​—nkeek kiji.

KEKE ORE NKEEK?

5. (a) Keke ore nkeek? (b) Ike owa ke nkeek kiji okisa itap ubọk inyi eji? (Ebi Rom 2:​14, 15)

⁵ Nkeek kiji okirọ ibe eji eriọọn̄ inu otatat mè eyi olọlọ. Ikerere ogwu ikariọọn̄ inu geege ofolek ikan Awaji ikaan̄ nkeek yi. (2 Kọr 4:2) Nkeek kiji ikup kubọk ogwu oyerebet me emen kiji, ogwu okitumu inyi eji mè ire inu eji ekikeek mè iyaka ire ikirọ itat sa ilọ. (Fuk Ebi Rom 2:​14, 15.) Nkeek kiji ikitaba eji ubọk me utọn̄ ibe eji ekarọ inu eji eriọọn̄be ibe ke ilọ. (1 Sam 26:​8-11) Ikibieen̄ eji ibe ekerọ inu otatat. Bak me lek eji ekaan̄be unye irọrọ ntumu-mfieek inyi lek kiji, ikasibi ibe ke eji ebekirọrọ ntumu-mfieek obokirọ ibe Jioba ibele ejit. Nkeek kiji motap ubọk inyi eji eriọọn̄ mè ire ntumu-mfieek eji ekirọ itat sa ilọ.

6. Kpasi ufialek okup me lek nkeek kiji yi?

⁶ Ire, ikaan̄ ufialek okukup me lek nkeek kiji yi, ikakitap ubọk inyi eji mè iyaka ire ikisi ikwaan̄ ijaan̄ mgbọ geelek. Nkeek kiji ikaso mije, eji kpeso si. Mbet lek ototun̄ ukan̄ eji enan̄abe, ere eji eminbe isibi, mè iyaka ire ijo ulọk okup eji me emen ikikaan̄ mgbaan̄ me lek nkeek kiji yi. Baibul itumu ibe ke nkeek kiji mokọt iwọ, ifiat, mè ikup “kubọk inu esabe nkọm-ochichim ukan̄ otetbe iren̄e iwọp ikpan̄.” (1 Kọr 8:12; Taitọs 1:15; 1 Tim 4:2; Iburu 10:22) Mbet lek nkeek okup ikeya ikpobokọt itap ubọk inyi eji erọ ata ntumu-mfieek. Ikup kubọk inu ekisa itọ mkpọ ofafiat, oweweek ibe eriọọn̄ ubọk enen̄e esun̄. Eya orọ, eji meriọọn̄ ubọk ikpukpo nkeek kiji ijaan̄ inyi ikisi ikwaan̄ ijaan̄ inyi eji. (1 Pita 3:16) Ike owa ke eji ebekọt irọ eyi?

UBỌK EJI EBESA IKPUKPO NKEEK KIJI

7-8. (a) Keke obotap ubọk inyi eji ekpukpo nkeek kiji? (b) Ike owa ke onineen̄ Baibul okitap ubọk inyi eji? Nyi inu ntọt-me-lek. (Kpọ si ogugo.)

⁷ Ike owa ke eji ebesa ikpukpo nkeek kiji? Eji ebekifufuk Baibul mgbọ geelek mè ikikween̄ inu otatat mè eyi olọlọ me chieen̄ Jioba. Ikekikween̄ ikan Jioba motap ubọk inyi eji egobo etet nkeek kan̄. Ire, kubọk eji ekween̄be me ibot usem sabum eyi keyi, usini ikan mokọt ikup inyi usini irek gaalek. Eya orọ, igbe ibe eji ekeweek onineen̄ Baibul echi oborọ ibe eji ekekeek mè ekemun̄ ubọk inu okikup me lek Jioba me esese esese irek.​—Asaya 55:9.

⁸ Eji mekọt isa ugwem kiji itọt me lek ikọkọp uran̄ itibi emen èwè, ere kpunube oniin̄ mè iyaka ire oriọọn̄ okijeen̄ ubọk ebesa ije. Eji mekọt iriọọn̄ agan̄ eji ebegọọk isi ire ere eji ebesi ire eji ikpọ ubọk ura mè iyaka ire ntoronyan̄ okisa ije. Ire, monwọn ire eji ekaan̄ map mè iyaka ire ikpa okijeen̄ ere mè inu ebesa iriọọn̄ ere eji ekisi kubọk ogoon̄ mè iyaka ire okwaan̄. Map mè iyaka ire ikpa ya morọ ibe eji eriọọn̄ mè eji mekije me oniin̄ otatat, mè eriọọn̄ si mgbọ eji ekije ilọ oniin̄. Ibet lek ere eji etobe me isi isisi sabum eji ebene ije kiji, inu eji etobe me isi irọrọ me ugwem ire ikekirọ inu obokibele Jioba ejit. Baibul ibet lek map mè iyaka ire ikpa okinyi eji ntọ-ubọk echi okitap ubọk inyi eji erọ inu eji etobe me isi etet. Ire eji ikisa onineen̄ Baibul irọ mkpọ me ugwem kiji, eji mekọt ikaan̄ utoon̄-ejit ibe ke eji mekigọọk oniin̄ otatat, orere, eji mekirọ ibe ejit Jioba ikibele.

9. Keke ore ofifi inu obokọt itap ubọk inyi eji ekpukpo nkeek kiji? (Ebi Rom 9:1)

⁹ Igbe ibe eji ekebeek Awaji ibe inyi eji ekwukwu mbuban kan̄ inyi eji ekọt ekekpukpo nkeek kiji ejaan̄. (Fuk Ebi Rom 9:1.) Ekwukwu mbuban motap ubọk inyi eji egobo etet ubọk Awaji okikeek mkpọ ofolek esese esese inu. Eyi si mokọt ibieen̄ eji mè itap eji efuuk me emen irọrọ nkeek Jioba. (Filip 2:13) Ire, ike owa ke eji ebekọt ikaan̄ ntap-ubọk ekwukwu mbuban Jioba?

10. Ike owa ke eji ebekọt ikaan̄ ntap-ubọk ekwukwu mbuban? (Luk 11:​10, 13)

¹⁰ Kibeek ntap-ubọk ekwukwu mbuban. (Fuk Luk 11:​10, 13.) Eji mekọt ikaan̄ utoon̄-ejit ibe ke Jioba ikpolọlọ ichichili ubọk inyi eji ekwukwu mbuban kan̄. (Jọn 3:34) Ikinyinyi ebi ikigọọk ntọ-ubọk kan̄ ekwukwu kan̄ mgbọ geelek. (Urọk 1:23; Jemis 1:5) Ire, keke si obokọt itap ubọk inyi eji ekpukpo nkeek kiji?

11. (a) Keke ogbe ibe eji ekerọ mgbọ geelek? (b) Keke orọ eji ebemun̄ ijaan̄ ibe ke nkeek kiji ire eyi ekpukpobe ijaan̄ mè ire si eyi okisi ikwaan̄ ijaan̄?

¹¹ Kweek nye kiweek nnwọn-isi Jioba. (Urọk 8:​34, 35) Eyi ore inu okukup ufiak ichit me ugwem kiji. Ire eji ikaan̄ me ejit irọrọ ibe Jioba ikibele ejit me lek otutuuk inu geelek eji ekirọ, eyi motap ubọk inyi eji ekekpukpo nkeek kiji. Eji mekaan̄ nkeek okisi ikwaan̄ ijaan̄ ire eji ikikeek mkpọ ubọk Jioba okikeek mè ikikeek si ubọk inu okikup me lek kan̄. Eji ekiluk me mgbọ oyọyọt, eya orọ igbebe ibe eji ekaan̄ nkeek obotap ubọk inyi eji. Owuwa mgbọ, eji mikirọ ntumu-mfieek ofolek inu echi Baibul ikatumu mkpọ ofolek. Mokọt ire ntumu-mfieek ofolek inwọọn̄-lek, ikwaan̄, uwu ikpa, mè mgbaan̄je kiji melek ebi ofifi ife. Ike owa ke eji ebesa iriọọn̄ ibe ke Jioba ibọkọ ntumu-mfieek kiji ofolek inu chi itap ni?​—2 Kọr 1:12.

12. Keke obotap ubọk inyi eji eriọọn̄ mè ire nkeek kiji okitap ubọk inyi eji ekerọ mkpọ otatat? (Ebi Efesọs 5:10)

¹² Kikeek dọk inu okifuk me emen Usem Awaji. (Itọn̄ 49:3) Eji esikifuk Baibul, igbe ibe eji ekeweek onineen̄ echi obotap ubọk inyi eji egobo nkeek Jioba etet. (Fuk Ebi Efesọs 5:10.) Ike eji ekije itibi ufialek me linyọn̄ yi, igbe ibe eji eweek onineen̄ okup me Baibul echi obotap ubọk inyi eji eriọọn̄ mè ire nkeek kiji okitap ubọk inyi eji erọ ata ntumu-mfieek ofolek ufialek eji ekije itibi. (Urọk 2:​4-9, 11-13) Onineen̄ chi mokọt itap ubọk inyi eji enen̄e esun̄ mè enwene nkeek kiji ike igbebe inyi eji ekup enye ekerọ inu otatat.​—Iburu 5:14.

13. Keke ke eji kperọ mgbọ eji eberọ ntumu-mfieek? Nyi inu njeen̄.

¹³ Karọ ntumu-mfieek mè ibene ikiweek onineen̄ Baibul obosa ibieen̄ inye. Eji kpeweek ikukup kubọk ebi Ijeren ebi iluluk me Juda sabum efiatbe Jeruselem me 607 B.C.E. Ema etumu inyi Jerimaya ibe: ‘Riaak Jioba, Awaji kwun̄ be itumu inyi eji agan̄ eji ebenin̄, mè inu eji eberọ.’ (Jeri 42:​3-6) Ire, ema miwuuk lek itumu ifieek inu ema eberọ. Me mgbọ ntọ-ubọk Jioba ikajege ikike me lek ntumu-mfieek kiban̄, ema kpesiki ibot inyi Jioba. Eya isa mfiat ijet ema. (Jeri 42:​19-22; 43:​1, 2, 4) Eya orọ, sabum eji enerọ ntumu-mfieek, igbe ibe eji edasi ewọlọ eweek onineen̄ Baibul echi okpakpa nkeek Jioba ikpọk mbum mè erọ mkpọ egọọk inu eji eweekbe imun̄.

14. Keke orọ igbebe ibe eji ekesa onineen̄ Baibul ekerọ ntumu-mfieek kiji?

¹⁴ Kisa onineen̄ Baibul rọ ntumu-mfieek. (Mat 7:​24-29; Jemis 1:​23-25) Eji esirọ ntumu-mfieek igọọk me lek onineen̄ Baibul, eji ekitele ibe Jioba isa ekwukwu mbuban itap ubọk inyi eji. Ire eji ikirọ ikeya, Jioba mokup inye ikinyi eji ekwukwu mbuban kan̄. (Ikwaan̄ 5:32) Ire, ire eji ikikpọ chieen̄ ilọ me lek ntọ-ubọk ekwukwu Jioba, eji mekọt ikirọ ikeme ekwukwu mbuban ya. (Efes 4:30; Asaya 63:10; Ikwaan̄ 7:51) Jioba mokọt isan̄a ekwukwu kan̄ isan̄a me emen kiji. (Itọn̄ 51:11; 1 Tes 5:19) Eya mosak enenen mije, eji miweek unye mè efuuk ekwukwu mbuban okinyi eji.​—Efes 3:16.

UBỌK OBOSA IMUN̄ ONINEEN̄ BAIBUL ECHI OBOTAP UBỌK INYI OWU

15-16. (a) Ike owa ke eji ebesa imun̄ onineen̄ Baibul obokọt itap ubọk inyi eji? (b) Kpasi onineen̄ Baibul obokọt itap ubọk inyi ogwu okikween̄ Baibul ibe ikaan̄ efuuk isasa itap uyaka me lek ikekinwọ siga?

¹⁵ Sa inu ekisa ikween̄ mkpọ rọ mkpọ. Sabum eji mesabe onineen̄ Baibul irọ mkpọ, eji medasi iweek ema imun̄ me emen Baibul. Kubọk inu njeen̄, mokọt iyọt me lek ogwu okigọọk ikween̄ mkpọ igogobo itet inu orọrọ ikanwọnge ibe ikinwọ siga. Mokọt ikikeek ibe: ‘Kpunu ere geege me Baibul otutumu ibe ke inwọnwọ siga ilọ. Eya orọ, ike owa ke eji esa iriọọn̄ ibe ke ilọ?’ Ike owa ke obokọt itap ubọk inyi ọmọ ibe iweek imun̄ onineen̄ Baibul echi obotap ubọk inyi ọmọ iriọọn̄ ibe ke inwọnwọ siga ilọ? Research Guide for Jehovah’s Witnesses ire ikpa ge obokọt isa irọ mkpọ. Omokọt ijeen̄ ogwu okigọọk ikween̄ mkpọ ya ibot usem obe “Tobacco and Smoking.” Me irak ibot usem ya, omomun̄ lek ofifi ibot usem obe “What is God’s view of smoking?” (Kpọ The Watchtower eyi June 1, 2014.) Ike ene ya okifuk ibot usem yi, onineen̄ Baibul echi owa ke ibomun̄ me ere ya?

¹⁶ Kpọ-nu onineen̄ go ekpabe mkpọ ofolek me emen ibot usem ya. (1) Eji ekakana usun̄ inyi mkpọ obosa mkpa ijet eji. (Rom 6:16) (2) Eji ejit inu geelek obosak eji unan me lek. (2 Kọr 7:1) (3) Jioba iweek ibe eji esa otutuuk ejit kiji etọbọ ebum enyi ọmọ. (Mat 22:37) (4) Eji ekasak ebi ofifi ife unan me lek bak me lek inu eji ekirọ. (Mat 22:39; 1 Kọr 10:24) (5) Jioba mokọt inyi eji efuuk irọrọ inu otatat. (Filip 4:13) Eya orọ, ikerere ibe ke Baibul ikatumu mkpọ ofolek inwọnwọ siga, onineen̄ okup me emen Baibul mokọt itap ubọk inyi ogwu okigọọk ikween̄ mkpọ ya ibe imun̄ nkeek Jioba ofolek eru ya.

17. Ike owa ke ebi eyi Karais ikitọt ibabat lek kiban̄ ebesa imun̄ onineen̄ Baibul echi obotap ubọk inyi ema?

¹⁷ Ike owa ke ebi eyi Karais ikitọt ibabat lek kiban̄ ebesa imun̄ onineen̄ Baibul eyi obotap ubọk inyi ema erọ ata ntumu-mfieek me mgbọ ema ekineen̄ orirọ mbat-olom kiban̄? Ikpa Research Guide mokọt itap ubọk inyi ema si. Me irak ibot usem obe “Weddings and Receptions,” ikaan̄ esese esese ibot usem obeben onineen̄ Baibul. Kpọ-nu onineen̄ Baibul echi ebi ikitọt ibabat lek kiban̄ ebekeek mkpọ ofolek. (1) Otutuuk inu obobọkọ irek me orirọ ido-nwa ire inu obosa itọn̄ ijet Jioba. (1 Kọr 10:​31, 32) (2) Ofọnti kiji ikup okem-okem, inwọn mè ijaan̄. (1 Tim 2:9; 1 Pita 3:​3, 4) (3) Eji ekakisa mkpọ eji ekaan̄be isa ikigugo lek kubọk ebi ene ekirọ me inyọn̄ Setan yi. (Jọn 17:14; Jemis 1:27; 1 Jọn 2:​15, 16) (4) Ijọk ya ikup me onineen̄, me oniin̄ ògbegbe. (1 Kọr 14:40) (5) Esikinwọọn̄ lek me ijọk ido-nwa, igbe ibe eji ekatap lek me lek ijo ifit miin̄. (Gal 5:21) (6) Ebi ikitọt ibabat lek kiban̄ ekaan̄ ogwu obokpọ chieen̄ me lek ijọk ya.​—Jọn 2:​8, 9.

18-19. (a) Kpasi ikpa si obokọt itap ubọk inyi eji? (b) Kpasi onineen̄ Baibul ke obokọt imun̄ me emen ikpa ya obotap ubọk inyi owu orọ ata ntumu-mfieek ofolek esese esese ijọk? (Kpọ okop obe “Ire Omokọt Iweek Iriọọn̄ Mkpọ Jioba Okikeek Ofolek Inu Chi Ni?”)

¹⁸ Ofifi ikpa owuwa ebi ene ekaan̄be oruru me lek ire Scriptures for Christian Living. Ikpa yi iben esese esese ere Baibul okup me irak esese esese ibot usem. Osigobo ibot usem obokween̄, omomun̄ esese esese idodo melek ere Baibul obotap ubọk inyi owu okween̄ mkpọ ofolek onineen̄ Baibul. Kubọk inu njeen̄, ogwu eyi Karais mokọt ikikaan̄ cheche ejit mè ire ọmọ mokọt isi orirọ ge sa ire ikposi. Ire ikpọ me irak ibot usem “Celebrations,” momun̄ gwun̄ ibot usem ge okikpa mkpọ ofolek mbet lek ijọk ikagbege ibe ogwu eyi Karais isi.

¹⁹ Kpọ usini mkpọ ekpabe me irak ibot usem okikpa mkpọ ofolek inu orọrọ ikanwọnge itatap lek me lek orirọ okakaan̄ mgbaan̄ me lek ataak uwu uriaak. (1 Kọr 10:21; 2 Kọr 6:​14-18; Efes 5:​10, 11) Ibot usem ya igo usini me lek orirọ cha. Me irak ibot usem obe “Nationalistic celebrations,” ogbogbo inu nkween̄ omaan̄ echi obokọt itap ubọk inyi ogwu eyi Karais irọ ata ntumu-mfieek me mgbọ egwenbe ọmọ ibe inu orirọ ekisa ikeek mkpọ ebi mkpulu ekọtbe irọ itet kubọk akọn̄, mè iyaka ire orirọ echi ekisa umin ogbegbe Jioba inyi ebilene. Ire mkpọ unwọọn̄ ibe ke ntitiin̄ Jioba isan̄a isibi ogbogbo mkpọ okitap ubọk inyi eji ekpukpo nkeek kiji!

MUN̄ IBE KE OKAAN̄ NKEEK EKPUKPOBE IJAAN̄

20. Ike owa ke eji ebesa ijeen̄ ibe ke eji mikpukpo nkeek kiji ijaan̄?

²⁰ Eji mibele ejit ikakaan̄ unye isasa ikirọ ntumu-mfieek inyi lek kiji. Ire, eji miriọọn̄ ibe ke eji kpelọlọ ikpukpukpo nkeek kiji inyi eji ekọt ekerọ ntumu-mfieek obokineme Jioba. Nkeek ekpukpobe ijaan̄ motap ubọk inyi eji ekerọ ntumu-mfieek echi obokisa umin ijet Jioba mè ekerọ nkeek kan̄. Inyi eji ekọt erọ eyi etet, eji miweek ntap-ubọk ekwukwu mbuban Jioba. Eya orọ, eji mekup inye ikibeek ibe eji ekaan̄ ekwukwu mbuban yi, mè ikitele ibe ikitap ubọk inyi eji. Onineen̄ Baibul motap ubọk inyi eji ekpukpo nkeek kiji si. Kè eji ekup enye ekesa inyinyi chi, orere, unye irọrọ ntumu-mfieek inyi lek kiji mè nkeek kiji erọ mkpọ ejaan̄. Mgbọ ya ke eji ebekikaan̄ ntap-ubọk inan̄a me Usem Awaji.​—2 Tim 3:​16, 17; Iburu 4:12.