Kup Nye Kirọ Mè Nlom Kwun̄ Mè Iyaka Ire Nwa Kwun̄ Ire Ata Ogwu Unene Kwun̄

1. Keke orọ ata unene orebe inyinyi onan̄a mè ubọk Jioba?

ATA unene ire uche onan̄a me ubọk Jioba. (Jemis 1:17) Ema mima Jioba mè ima eji si. Ema ekigọọk eji ibele ejit me mgbọ eji ekibele ejit mè ikikat eji ejit me mgbọ eji ekifieek ejit. Ema mikinyi eji nteme si me mgbọ ikupbe ufiak. Ema mikitap ubọk inyi eji mgbọ geelek mè ire si ebi eji ebekọt itoon̄ ejit me lek. Mbet unene kechi “ìkibele ene ejit” enenen!​—Urọk 27:9.

2. Keke orọ ikupbe ufiak ibe ebi olom mè nwa ekerọ mkpọ echi obotap ubọk irọ ibe unene kiban̄ ikinye? (Matiyu 19:6)

² Ikup ufiak ibe olom mè nwa ere ata unene. Ema ekawuuk ibe ke ikup ufiak ibe ema eketap efuuk erọ ibe mgbaan̄je kiban̄ ikinye. Ire ema kperọ ikeya, ema kpebekaan̄ unwọọn̄, ema mekọt ikimun̄ lek kiban̄ kubọk ebi ikweek agaga si. Ire, ire ema ekup inye ikitaba lek iriaak me lek ge ge, ema mekọt inwọọn̄ mgbaan̄je onyenye ichit ebilene ebekọt ikaan̄. (Fuk Matiyu 19:6.) Me ibot usem yi, eji mekween̄ ubọk ebi irere olom mè nwa ebekọt ikup inye ikirọ inyi ema ere ata unene. Ire, eji medasi ikween̄ ubọk bọn ute irieen̄ mè ibaan̄ ebi ikup agaga ebekọt igobo ogwu obore ata unene kiban̄ me mbat-olom.

UBỌK OBOSA IKAAN̄ NWA MÈ IYAKA IRE OLOM OGWU OBOCHUBỌK IRE ATA OGWU UNENE KWUN̄

3-4. Keke obotap ubọk inyi ene ikọt igobo ogwu obokana ata olom mè iyaka ire nwa inyi ọmọ? (Urọk 18:22)

³ Sabum eji enerọ ntumu-mfieek okukup ufiak, igbe ibe eji ekeek ijo mkpọ mè ata mkpọ obokọt ibọkọ irek ire eji irọ ntumu-mfieek ya. Ntumu-mfieek echi eji erọbe me mgbọ keyi mokọt ikaan̄ mgbaan̄ me lek ugwem kiji me ujọn̄ọ mgbọ, ọmọ orọ, ikup ufiak enenen ibe eji eriọọn̄ ubọk ekeek mkpọ ejaan̄ sabum merọbe ntumu-mfieek geelek.

⁴ Igogobo ogwu obobat mè iyaka ire ido ire ge me lek ntumu-mfieek echi okukup ufiak ichit oborọ mije, ọmọ obore ata unene kwun̄. Ire Jioba odọmọ mbat-olom, ọmọ orọ, igbe ibe ọmọ iban owu me mgbọ oborọ ntumu-mfieek ofolek ogwu obodo mè iyaka ire obobat. Jioba iweek ibe okaan̄ ata nwa mè iyaka ire ata olom. Ọmọ oriọọn̄ mkpọ onwọnwọn ichit inyi eji. (Fuk Urọk 18:22; Asaya 48:​17, 18) Onineen̄ Baibul mokọt itap ubọk inyi ogwu eyi Karais ikọt ikaan̄ ata olom mè iyaka ire ata nwa.

5. Keke orọ ikupbe ufiak ibe ogobo ogwu okakaan̄ ntap-me-mun̄ kubọk olom mè iyaka ire nwa?

⁵ Ene isikaan̄ ntap-me-mun̄, ira ikana ogwu unene Awaji. (Itọn̄ 25:14) Eya orọ, ire oweek ikakaan̄ olom mè iyaka ire nwa, igbe ibe ogobo ogwu orere ogwu unene Jioba si. (1 Kọr 7:39) Ire orọ ikeya, okijeen̄ ulibi me lek onineen̄ Jioba, motap ubọk irọ si inyi omun̄ ogwu ogobobe ya kubọk uche onan̄a me ubọk Jioba. (Urọk 19:14) Motap ubọk irọ si ibe okakaan̄ ufialek echi ogwu obabat mè iyaka ire ododo ogwu ikamage Jioba okikaan̄ me mbat-olom kan̄. (2 Kọr 6:14) Ikerere ibe ke kpunu ogwu obodo mè iyaka ire obobat me emen ntitiin̄, katumu ifieek ibabat mè iyaka ire idodo ogwu ikamage Jioba. Kakeek si ibe ke ikalọ igọgọọk ene ya ikirọ mkpọ kubọk ogwu melek kwun̄ ebebat mije okikeek ibe ke ene ya mokọt ikween̄ atikọ me mgbọ okup me isi.

6-7. Idodo echi owa ogbe ibe odo lek kwun̄ ofolek ogwu oboma idodo mè iyaka ire ibabat?

⁶ Me atikọ, ikare otutuuk ebi ikakaan̄ ntap-me-mun̄ ebekọt ire ata olom mè iyaka ire nwa inyi owu. Eya orọ, ire ikaan̄ ogwu okaan̄be ulọk me lek, monwọn ibe odo lek kwun̄ idodo chi: ‘Ike owa ke ikirọ eru me lek ebi uwu kan̄? Ire ikekikeek mkpọ ofolek ebi ofifi ife mè ikijeen̄ ema ulibi ni? Ebi owa ere ebi unene kan̄? Ike owa ke ikirọ mkpọ me mgbọ ebi ofifi ife kpechieek me lek nkeek isan̄abe isibi? Ire ikekiweek ibe ebi ene ekerọ gaalek mkpọ iweekbe ni? Sa ikima irọriọọn̄ mè irọrọ si mkpọ igọọk me lek nkeek ebi ofifi ife ire nkeek kiban̄ ikaje ikeme onineen̄ Baibul? Ike owa ke ikimun̄ ikpoko?’

⁷ Omokọt ido lek kwun̄ si ibe: ‘Ire ogwu nkaan̄be ulọk me lek ikaan̄ udọk udọk ima me lek Jioba ni? Ire ikekitap efuuk ikirọ mkpọ kubọk Jioba ni? Ire motap ubọk inyi emi nkup nnye nkitọbọ ebum nnyi Jioba ni? Ire mkpọ yaage ke eji ene iba eto me isi irọrọ me ntọbọ-ebum kiji inyi Jioba ni? Ire eji mekọt ichubọk ire ata unene me mgbọ eji esibat lek kiji ni?’ (Kọl 3:​9, 10) Ire owu ire gwun̄ ute enenwaan̄, do lek kwun̄ ibe: ‘Ire gwun̄ ute enerieen̄ yi mokọt ikana ata ogwu unene n̄a mè ikirọ ata ntumu-mfieek kubọk ogwu ibot ototun̄ ukan̄ ni?’ (1 Kọr 11:3) Ire owu ire gwun̄ ute enerieen̄, do lek kwun̄ ibe: ‘Ire gwun̄ ute enenwaan̄ yi mobọkọ irek ntọ-ikọ n̄a kubọk ogwu ibot ototun̄ ukan̄ itap ikerere ibe ke makọt ikirọ mkpọ ilọ usini mgbọ ni?’ Ikibọkọ mgbọ ikakaan̄ ufọọk-otu inyi idodo chi. Eya orọ, san̄a mgbọ sibi sa kween̄ mkpọ osilek ogwu okaan̄be ulọk me lek inyi oriọọn̄ ọmọ ojaan̄.

8-9. Keke obotap ubọk inyi ogwu okiweek ikakaan̄ olom mè iyaka ire nwa inyi ikọt irọ ata ntumu-mfieek? (Kpọ si ogugo.)

⁸ Me mgbọ okigọọk ogwu oweekbe idodo mè iyaka ire ibabat irọ mkpọ, sa inyi oriọọn̄ ọmọ ojaan̄. Sa me ikeya, omokọt irọ ata ntumu-mfieek. Week riọọn̄ ubọk ebi ofifi ife ekimun̄ ene ya. Omokọt ido ebi ene mbet eru ene ya okaan̄be mè ubọk bọn ute me ntitiin̄ ekimun̄ ọmọ. Kubọk inu njeen̄, ire ebi ene miriọọn̄ ọmọ kubọk ogwu osisiki lek, ogwu okakaan̄ ata ejit mè ogwu okisa me iriọọn̄-inu irọ mkpọ ni? Ofolek Daniel nlom kan̄, gwun̄ ute Sarah ogwu okup me French Guiana itumu ibe: “Ndo ebi ene mkpọ ema eriọọn̄be osilek Daniel sabum mbatbe ogọt. Usini me lek ebi ngọọkbe ikpa usem ire gwun̄ ute ogwu melek kan̄ egbaan̄be iluk ikigbọ oniin̄ ojot mgbọ, ogwu ugane ntitiin̄ kan̄ ge, ebi irọriọọn̄ eji ene iba ijaan̄ mè usini bọn ute ibaan̄ me ntitiin̄ kan̄.” Ikup ufiak si ibe odo ene ya mè ire ikaan̄ mkpọ echi iwuukbe lek irọ mè iyaka ire ikirọ eyi ogbegbe ibe oriọọn̄. Irọriọọn̄ mkpọ cha ikup ufiak enenen bak me lek usini mkpọ mokọt isan̄a ufialek omimin isibi me mbat-olom.

⁹ Mokọt ire ibe ke okikaan̄ ejit iba ofolek ene ya, mè ire more ata nwa mè iyaka ire ata olom inyi owu. Mokọt ire si ibe ke usini bọn ute ebi imimin inin̄ ene me irek me emen ekwukwu mitumu inyi owu usini ijo eru echi ene ya okaan̄be. Ire ikeya, riọọn̄ ubọk keek mkpọ osilek. Ire okeek mkpọ ofolek, omoriọọn̄ mè ire ijeen̄ iriọọn̄-inu owu ijeje inyi isi ibabat mè iyaka ire idodo ene ya.a Me mgbọ keyi, eji mekween̄ ubọk ebi irere olom mè nwa ebekup inye ikirọ unene me lek ge ge.

IKISAN̄A MGBỌ ISIBI IGBAAN̄ IRỌ MKPỌ ECHI OBOKIRỌ INYI UNENE KINYI IKINYE

10. Keke orọ inwọnbe ibe olom mè nwa ekekaan̄ mgbọ enyi lek kiban̄?

¹⁰ Ebi irere olom mè nwa mekọt ikinama irek mbat-olom kiban̄ inye me mgbọ ema ekikaan̄ mgbọ inyi lek kiban̄, ikerere ibe ke ema mikaan̄ ogbogbo mkpọ ema ekirọ. Eyi ikinyi ema irek itutumu mkpọ ofolek ubọk usen kiban̄ ojebe, mè inu okup ema me nkeek. Ikinyi ema irek isasa ikijeen̄ ima me lek ge ge mè ikinwọọn̄ lek si.

11. Keke obokọt irọ inyi olom mè nwa ekayaka ire ata unene?

¹¹ Olom mè nwa ebi irere ata unene mikima igbagbaan̄ irọ mkpọ, kpan̄asi icheche lek. Ire atikọ ibe ke ikare mgbọ geelek ke olom mè nwa ekigbaan̄ ikup. Ire, ema ikukup ijọn̄ọ ere me lek ge ge me ujọn̄ọ mgbọ mokọt ikana ufe inyi ema. Kubọk inu njeen̄, usini kiban̄ mibọkọ ikwaan̄ me ofifi ido mè ikiluk ijọn̄ọ ere me lek ge ge me ujọn̄ọ mgbọ. Ema mekọt ikaan̄ owuwa ikpoko, ire, ema ikukup ijọn̄ọ ere me lek ge ge me ujọn̄ọ mgbọ mokọt isan̄a ufialek omimin isibi me ototun̄ ukan̄ kiban̄.

12-13. (a) Keke ke usini olom mè nwa erọ inyi ema ekọt ekekaan̄ mgbọ enyi lek kiban̄? (Kpọ si ogugo.) (b) Ike owa ke obosa imọnọ mgbaan̄je kinyi isun̄ ufiak ire? (Kpọ okop “Ubọk Nwa Kwun̄ Mè Iyaka Ire Nlom Kwun̄ Osabe Ikup Ufiak Inyi Owu Ire.”)

¹² Keke ke usini olom mè nwa erọ inyi ema ekọt ekekaan̄ mgbọ enyi lek kiban̄? Leah ogwu oluk me Guam itumu ibe: “Emi mè nlom n̄a mikinwọọn̄ igbagbaan̄ irọ owuwa mkpọ. Ikawa mkpọ echi eji kpekigbaan̄ irọ mè iyaka ire orirọ eji kpekigbaan̄ isi.” Roxanne ogwu oluk me United States itumu ibe: “Bak me lek eji ekaan̄be owuwa mkpọ eji ekisa mgbọ kiji irọ, eji minimun̄ ibe ke ikup ufiak ibe eji ekeneen̄ mgbọ eji gaalek ebegbaan̄ ikup ike eji ekineen̄ si ofifi ofifi mkpọ echi eji ekigbaan̄ irọ.” (Sa tọt me lek Emọs 3:3.) Damien ogwu oluk me France ikpa ibe: “Eji mikween̄ ibe ke ikup ufiak ibe eji ekaan̄ ulọk me lek mkpọ ogwu melek kiji okima irọrọ. Ike mgbọ okije, eji mibene ikima irọrọ mkpọ cha si.” (Matiyu 7:12) Katie, ogwu oluk me United States itumu si ibe: “Usini mgbọ, eji mikito fun kiji ijọn̄ọ ere me lek kiji inyi eji ekọt enwọọn̄ mgbaan̄-nkup kiji me ojot ojot.”

¹³ Eyi okukup ufiak ichit, kubọk olom mè nwa, ikigbaan̄ irọ mkpọ echi emen ekwukwu. Myriam oluk me France ibe: “Eji ekibene usen kiji sa me ifufuk Baibul agaga mè ikpakpa inyi ge ge mkpọ eji ekween̄be echi eji ebetap me ikwaan̄ me ugwem kiji. Ikibele emi ejit enenen eji isikirọ eya. Nkima si mgbọ eji ekigbaan̄ ibeek uriaak kubọk ototun̄ ukan̄. Ikijeen̄ emi ubọk nlom n̄a osabe ima Jioba ire.” Katie, ogwu ewuukbe lek ikpa mkpọ ofolek ibe: “Mgbọ eji ekinwọọn̄ ichit ire mgbọ eji ekigbaan̄ isibi uko. Eji mima igbagban̄ ge ge ike eji ekilook ebi ene etip ofolek Jioba. Eji mikikween̄ aya mkpọ inan̄a me lek ge ge si eyi okirọ ibe mgbaan̄je kiji ikinye igbaalek.”​—Urọk 27:17.

IKITABA LEK IRIAAK ME LEK GE GE IKERERE ME MGBỌ ENYI EKICHICHINI UFIALEK

14-15. Keke orọ ikupbe ufiak ibe ebi olom mè nwa etap efuuk eketim egak ufialek geelek osisibi me mbat-olom kiban̄? Nyi inu ntọt-me-lek.

¹⁴ Bak me lek ekasoge kiban̄, ebi irere olom mè nwa mekọt ikikaan̄ ufialek usini mgbọ. Baibul ikpa ikpọk mbum ibe ke “ebi ìkaan̄ olom mè ebi ìkaan̄ nwa mêbọkọ owuwa ufialek me linyọn̄ keyi.” (1 Kọr 7:28) Olom mè nwa esikaan̄ ufialek me mbat-olom kiban̄, igbe ibe ema etap efuuk etim egak ufialek cha mè ekup enye ekere ata unene. Bak me lek keke ni?

¹⁵ Keek-nu inu ntọt-me-lek yi. Ire ikpele uwu ge mè iyaka ire ogugo egwookbe ojajaan̄ enenen ifiat, kpolọlọ, ebikaan̄ metap efuuk isi ikwaan̄ me lek ufuna iyaka ikup ubọk ikupbe me adasi mgbọ ikerere ibe ke irọrọ ikeya mobọkọ owuwa mgbọ mè ikpoko kiban̄. Kpebewọ lek me irọrọ ikeya ikerere ibe ke owuwa acha mokọt iraka sabum mekọtbe irọ ikwaan̄ isan̄a me lek uwu ya mè iyaka ire ogugo ya. Keke orọ ni? Bak me lek uwu ya mè iyaka ire ogugo ya ichubọk ikup me unye otu ewe inyi ema. Ubọk yaage si, otutuuk mbat-olom ikup me unye otu ewe. Ikerere olom mè nwa ebi imama lek kiban̄ enenen ekekikaan̄ ufialek usini mgbọ. Ike ebekọt isi ikwaan̄ me lek uwu mè iyaka ire ogugo ya ufuna iyaka inwọn, ikeya si ke olom mè nwa ebi ikakaan̄ ufialek me mbat-olom kiban̄ ebekọt iyaka ikana ata unene. Irọrọ eya mokọt imọnọ mgbọ mè efuuk, ire, Jioba mobele ejit enenen ire olom mè nwa itap efuuk imun̄ ibe ke ema mikirọ mè mbat-olom kiban̄ ikinye mè ikup me obọp ge. (Mal 2:16) Sa me irọrọ ikeya, ema mejeen̄ ibe ke ema mikaan̄ ulibi mè ima me lek ge ge. Mejeen̄ si ibe ke ema mikaan̄ ulibi mè ima me lek Jioba, ogwu osasan̄a ndọmọ mbat-olom isibi.

16. Igọọk me lek inu okup me ikpa Ebi Kọrint Eyi Òso Iba 13:​4-8a, keke obokọt itap ubọk inyi olom mè nwa ebi ikikaan̄ ufialek me mbat-olom kiban̄? (Kpọ si ogugo mè okop obe “Inu Obotap Ubọk Irọ Mè Mgbaan̄je Kinyi Ikinye.”)

¹⁶ Ire ufialek isibi me mbat-olom kwun̄, kagwat lek ikeek mkpọ ofolek icheche lek. (1 Kọr 7:​10, 11) Kpan̄asi ikeya, do lek kwun̄ ibe, ‘Ire ikaan̄ mkpọ mbakọt irọ inyi mbat-olom kiji ikinye?’ Kween̄ mkpọ Baibul otumube ofolek ima mè do lek kwun̄ ubọk obokọt isa ikijeen̄ nlom kwun̄ mè iyaka ire nwa kwun̄ ima ike ekpabe me ikpa Ebi Kọrint Eyi Adasi 13:​4-8a. (Fuk.) Kpan̄asi obokiweek ubọk obosa itele nwa kwun̄ mè iyaka ire nlom kwun̄, tap efuuk kirọ mkpọ echi obotap ubọk irọ mè enyi ekpọk ekana ata unene. Kpan̄asi obokikeek mkpọ nlom kwun̄ mè iyaka ire nwa obokọt irọ, kikeek inu echi owu obokọt irọ mè kirọ inu cha si inyi enyi eyaka ekaan̄ ubelejit. Kibeek Jioba ibe itap ubọk inyi owu. Week mè fuk mè kpọ ikpa mè fidio echi obotap ubọk inyi owu oriọọn̄ mkpọ oborọ. Omokọt ibọkọ nteme me ubọk ebi ugane ntitiin̄ mè ofifi ebi eyi Karais ikisa nteme Baibul irọ mkpọ me mbat-olom kiban̄. Jioba ore òso ene ita me mbat-olom kwun̄, ọmọ si onye lek ichit. Ọmọ orọ, ire okiyaka lek imaan̄ me lek kan̄, mbat-olom kwun̄ mokup kubọk ‘olik mgbugbak ita eyi ìkakigwat lek ìfieek.’​—Etip 4:12.

17. Ike owa ke ebi ikitọt ikakaan̄ olom mè iyaka ire nwa mè ebi irere olom mè nwa ebesa ikikaan̄ ubelejit?

¹⁷ Jioba iweek ibe otutuuk ebi usun̄ kan̄ ekebele ejit, ikerere ebi ikitọt ikakaan̄ olom mè iyaka ire nwa mè ebi irere olom mè nwa. Eya orọ, ire okup agaga mè iweek ikakaan̄ olom mè iyaka ire nwa, riọọn̄ ubọk gobo ogwu obokaan̄ mè isa irọ ata unene. Ire okaan̄ nwa mè iyaka ire olom, kup nye kinama mgbaan̄je kwun̄ melek nlom kwun̄ mè iyaka ire nwa kwun̄ nye. Sa inyi otim ogak ufialek echi obokọt inan̄a isibi me mbat-olom kwun̄ sa me iyayaka lek imaan̄ me lek Jioba ibe itap ubọk inyi owu. Sa me irọrọ inu chi, omonwọọn̄ ugwem melek nwa kwun̄ mè iyaka nlom kwun̄ ogwu ochubọk ima!​—Etip 9:9.