Ubọk Ebesa Ikigobo Itet Inu Ntọt-Me-Lek Okup Me Emen Baibul

Baibul iben owuwa inu ntọt-me-lek. Ire, owuwa ebi ene kpekigobo inu ntọt-me-lek chi itet. (Mat 13:13) Keke obokọt itap ubọk inyi owu ogobo inu ntọt-me-lek chi otet ojaan̄? Omokọt irọ inu chi:

• Keek inu ekitumu mkpọ ofolek mè mkpọ ekisa itọt me lek. Kubọk inu njeen̄, me ikpa Ichichili 3:​3, Jisọs itumu ibe ke ọmọ monu kubọk ogwu inọ. Eya orọ, (inu ekitumu mkpọ ofolek) ire inunu kè Jisọs, (mkpọ ekisa itọt me lek) ore, ubọk ogwu inọ okisa inu.

• Keek ubọk inu ekitumu mkpọ ofolek ya mè inu ntọt-me-lek ya osabe ibet lek. Sa mè week riọọn̄ mkpọ orọrọ esabe inu ge itọt me lek ofifi inu, mè mgbaan̄ inu iba cha okaan̄be.

• Mun̄ ibe ke ngobo-ntet kwun̄ ije ikike melek mkpọ inu ntọt-me-lek ya ochubọk isibi. Usini mgbọ, ene mokọt igobo inu ntọt-me-lek ya itet ilọ. Me lek inu njeen̄ esabe irọ mkpọ ya, ikare kubọk Jisos ibonu inichiin̄ inọ kubọk ogwu inọ. Ire, ike ogwu inọ okinu me uwuuk-lek, ikeya si ke Jisọs obonu me uwuuk-lek, ebi ene kpeberiọọn̄ achubọk mgbọ ibonu.