Kween̄ Mkpọ Me Ubọk “Awaji Ogwu Òkikat Ene Ejit”

1. Keke orọ igbebe ibe eji ekekat ebi ofifi ife ejit?

“NTỌ-MKPỌ òkup esese esese” okinu inyi eji ge ge, ọmọ orọ, eji mikiweek ukarajit mè ntap-efuuk-me-owot usini mgbọ. (1 Pita 1:6) Ike eji ekima ibe ebi ofifi ife ekekat eji ejit, ikeya si ke eji ebekigwat lek ikat ebi ofifi ife ejit si me mgbọ ema ekibọkọ ukwook. (Mat 7:12) Jioba, “Awaji ogwu òkikat ene ejit me irek geelek,” ijeen̄ eji ubọk ebesa ‘ikikat si ebi ofifi ife ejit mgbọ geelek ema ekupbe me ufialek.’ Eji mekọt igọọk akpat ukot kan̄ sa me ikekikat ge ge ejit. (2 Kọr 1:​3, 4; 1 Tes 4:18) Eji ekichubọk irọ eyi bak me lek ima eji ekaan̄be me lek ebi bọn nte kiji. Me ibot usem yi, eji mekween̄ (1) inu Baibul otumube ofolek ikakat ene ejit (2) ubọk ebekọt isa ikikat ebi ene ejit, mè (3) inu eji ebekọt irọ me mgbọ eji eweekbe ukarajit.

INU BAIBUL OTUMUBE OFOLEK IKAKAT ENE EJIT

2. Baibul isi isa usem ukarajit irọ mkpọ, keke ke isibi?

² Me emen Baibul, usem Giris esabe ikaba “ukarajit” mokọt isibi esese esese mkpọ. Mokọt isibi itatap ene efuuk me owot, itutumu usem obobieen̄ ene ibe erọ mkpọ, mè iyaka ire itutumu usem oborọ ibe ene ikup dii. (Rom 12:8) Usem Giris esabe ikaba ukarajit ire usem ekisa irọ mkpọ me mgbọ ekigwen ene ibe inu me agba lek ofifi ene initap ubọk inyi ene ya. Eyi morọ ibe eji ekeek mkpọ ofolek ene ge ogwagwat lek inu initap ubọk inyi ogwu unene me mgbọ ikebikibọkọ ukwook. Me ekakpọge chieen̄ me lek ntap-ubọk ene obonyi ogwu unene kan̄, momun̄ ibe ke ọmọ itap ene ya efuuk me owot.

3. Keke ke eji ebekọt ikween̄ me lek akpat ukot Banabas ofolek ikakat ene ejit? (Kpọ si ogugo.)

³ Kè eji ekpa-nu inu njeen̄ ge me Baibul. Ogwu eyi Karais ge ekigwen Josefu ijeen̄ ata akpat ukot me itatap ebi ene efuuk me owot mè ikakat ema ejit. Ire mije keya ke ebi otuchieen̄ kè Jisọs ekigwen ọmọ Banabas “eyi òsisibi ogwu òkikat ene ejit.” (Ikwaan̄ 4:36) Erieen̄ yi igbe ọmọ ire lek kpeyaka ikigwen ọmọ Josefu me Baibul, eyaka ikigwen Banabas gaalek. Me esese esese irek, Banabas irọ mkpọ igọọk me lek erieen̄ kan̄ sa me itatap ubọk inyi ebi eyi Karais ogbo kan̄ me mgbọ ema ekaan̄be ufiak. Kubọk inu njeen̄, mgbọ Sọọlu okanabe ogwu udun̄ kè Jisọs, isi Jeruselem ibosichichini melek ebi udun̄ Karais ogbo kan̄. Ire, bak me lek iwuukbe lek ikitutuku ebi eyi Karais, ebi bọn ute cha ekekifieek owot. Ire, Banabas ikakaan̄ ukpook me lek Sọọlu, isa ọmọ isi ijeen̄ ebi otuchieen̄ inyi Sọọlu ikọt iriọọn̄ ema ijaan̄.​—Ikwaan̄ 9:​26-28.

UBỌK EBEKỌT ISA IKIKAT EBI ENE EJIT

4. Keke ore oniin̄ ge me lek oniin̄ echi onwọnwọn ichit isasa ikat ebi ene ejit? (Ebi Rom 1:​11, 12)

⁴ Ire ifet, si kpọ ema. Jioba ikisa ebi usun̄ kan̄ ikat ebi ofifi ife ejit. Kubọk inu njeen̄, mgbọ Iiaija okaan̄be uga ufieejit, Jioba iria ogwu osat ge ibe isi itap ọmọ efuuk me owot. (1 Ubọọn̄ 19:​4-7) Ogwu otuchieen̄ Pọọlu si iweek ikekisi ikpọ ebi bọn ute irieen̄ mè ibaan̄, inyi ema mekọt ikitap ge ge efuuk me owot. (Fuk Ebi Rom 1:​11, 12.) Ire osi ikpọ ene, kakpọkpọk igwat lek ifo, gọọk ọmọ kweek mè kat ọmọ ejit. (1 Kọr 16:7) Ire okakọt isi imun̄ ene ya isi mè isi, omokọt ikat ọmọ ejit sa me igwegwen, iriaria etip mè iyaka ire igege ikpa ijet ene ya. Jioba iweek isasa owu ikat ebi ofifi ife ejit. Ire omotele ibe Jioba isa owu irọ ikeya ni?

5. Keke orọ ibokọt ikiyọt eji me lek ikakat ebi bọn nte kiji ejit?

⁵ Ike ugwem me ota mgbọ yi okiyọt igbaalek, ikeya ke ibokọt ikiyọt eji me lek isisi ikpọ ebi bọn nte kiji mè ikat ema ejit isi mè isi. Mgbọ Pọọlu okupbe me mkpọn me Rom, Onesiferọs ogwu onan̄a me Efesọs isi iweek Pọọlu inyi ikọt ikat ọmọ ejit. Sa me irọrọ ikeya, Onesiferọs itatap ugwem kan̄ me ufe mije, mekọt itet ọmọ itap me mkpọn mè iyaka ire ikpan̄ ọmọ. (2 Tim 1:​16-18) Kubọk Onesiferọs, bọn ute irieen̄ mè ibaan̄ ebi ikup me Russia mikikat ge ge ejit me mgbọ ekitutuku ema bak me lek ichechieek kiban̄. Esisa gwun̄ ute ge isi uwu ikọ, ebi bọn ute ekigọọk isi uwu ikọ ya si isi itap efuuk me owot ogwu unene kiban̄ ikerere ibe ke mekọt itet ema si. Keke ke obokọt irọ isasa ibem lek inyi okọt okat ebi ikup me irek okup ikeya ejit? Omokọt ikween̄ mkpọ ofolek ubọk ebi usun̄ Awaji me chereyi mè ebi ekpabe mkpọ ofolek me Baibul esabe ikat ge ge ejit. Kween̄ si mkpọ ema erọbe echi otatap ubọk inyi ema ekọt ekup enye ekekaan̄ unwọọn̄ ikerere me mgbọ ekitutuku ema.

6. Ike owa ke eji ebekọt igọọk akpat ukot Jioba ike eji ekikat ebi ofifi ene ejit? (Kpọ si ogugo.)

⁶ Gban̄ ike ema ekikpa ejit kiban̄ isibi. Me mgbọ ogwu nriran Ilaija okitet ukpook ibe ke mekpan̄ ọmọ, ibeek uriaak inyi Jioba mè ikpa inyi ọmọ ubọk inu okupbe ọmọ me lek. Ikerere ibe ke Jioba iriọọn̄ mkpọ Ilaija okije itibi, iriọọn̄ ubọk igban̄ ike Ilaija okikpa sasaak kan̄ isibi. Jioba ikukup inye si ikigban̄ Ilaija ikerere ibe ke ikpọkpọk ikitumu inu yaage inyi ọmọ! (1 Ubọọn̄ 19:​9, 10, 14) Jioba itele si ibe ogwu nriran Abakuk ikpa sasaak ikaan̄be inyi ọmọ ikerere ibe ke Abakuk itumu ikọ me oniin̄ okup kubọk ke ọmọ ikakaan̄ ulibi me lek Awaji. (Abak 1:​2, 3) Me chereyi, Jioba ikigban̄ inu geelek eji ge ge ekikpa inyi ọmọ me uriaak, ikerere ibe ke ọmọ iriọọn̄ ufiak kiji. Eji mekọt igọọk akpat ukot Jioba sa me ikekisa me ulibi ikiriọọn̄ ubọk igban̄ utọn̄ me mgbọ ebi bọn ute irieen̄ mè ibaan̄ ekitumu ikọ inyi eji. ‘Îgbe ibe eji ekegwat lek enọ’ mkpọ ebi ene ekitumu inyi eji. Eji ekabọkọ usem me otu kiban̄ itumu mè iyaka ire itap otu me mgbọ ema ekitumu usem. Eji ekanaan̄ ejit si ikerere me mgbọ ema ekitumu usem nra nra, mè iyaka ire ikpọkpọk ikitumu inu yaage inyi eji.​—Jemis 1:19; Etip 7:9.

7. Ike owa ke eji ebekọt isa iriọọn̄ ufiak ene okaan̄be?

⁷ Week riọọn̄ inu obokọt irọ isasa itap ubọk. Eji kpebekọt iriọọn̄ inu okup me ejit ebi ene ike Jioba oriọọn̄be. Eya orọ, kiriọọn̄ ubọk gban̄ me mgbọ ebi ene ekikpa nkeek kiban̄ isibi, inyi okọt oriọọn̄ inu ema echubọk iweek. Kakeek ibe ke ire mkpọ owu oboweek ire owu okup me irek ene ya ke ene ya oboweek si. Eji ekup esese, eya orọ, riọọn̄ ubọk gban̄ jaan̄ me mgbọ ogwu unene kwun̄ okitumu usem, jeen̄ ata ejit, mè sa me irọọn̄-inu do idodo obotap ubọk inyi owu oriọọn̄ inu ichubọk iweek.​—Urọk 20:5.

8. Ike owa ke Jisọs osa ikat Mata mè Meri ejit mgbọ Lajarọs okwube? (Kpọ si ogugo chi.)

⁸ Keek-nu ubọk Jisọs osabe ikat Mata mè Meri ejit me mgbọ ngwan̄ kiban̄ Lajarọs okwube. Mata mè Meri mifieek ejit enenen mgbọ Lajarọs okwube. Ire, Jisọs ikakat ema ejit me oniin̄ yaage. Eyi Mata ogọọkbe Jisọs ikpa usem isan̄a, Jisọs okpakpa inyi Mata atikọ ofolek njomo-me-mkpa mè itap ubọk irọ mè ichechieek kan̄ me lek use ya inye. Mokọt ire ibe ke Jisọs ikakpa atikọ ofolek njomo-me-mkpa inyi Meri. Ire, igọọk Meri ito ito, mè ido ọmọ ere emaan̄be Lajarọs. (Jọn 11:​20-35) Keke ke eyi okijeen̄ eji? Eji esikikat ebi ikibọkọ ukwook ejit, eji meweek iriọọn̄ mkpọ ema echubọk iweek kpan̄asi ikekikat otutuuk ene ejit me oniin̄ yaage.

9. Ike owa ke eji ebekọt isa Baibul ikat ebi ofifi ife ejit? (Ebi Rom 15:​4, 5)

⁹ Sa Baibul rọ mkpọ. Osifuk ere Baibul inyi ene, omokọt itap ubọk irọ mè ikpọchieen̄ ene ya inye. (Fuk Ebi Rom 15:​4, 5.) Ikpọchieen̄ onyenye mokọt ikat ene ejit mè itap ene ya efuuk me owot. (Asaya 40:31) Ike owa ke obokọt iriọọn̄ ere Baibul echi okitap ene efuuk me owot? Omokọt iweek ibot usem echi obokọt itap ene efuuk me owot me jw.org. Osimun̄ ere Baibul echi obokọt ikat ene ejit me emen ibot usem cha, omokọt ige isibi. Beek Jioba ibe itap ubọk inyi owu okọt osa Usem kan̄ otap ene efuuk me owot me oniin̄ onwọnwọn ichit. Jioba mokọt isa ekwukwu mbuban kan̄ itap ubọk irọ inyi owu okeek ere Baibul obosa ikat ene ejit.​—Jọn 14:26.

10. Keke orọ igbebe ibe eji ekesa me ata ejit etumu usem me mgbọ eji ekikat ene ejit?

¹⁰ Sa me ata ejit tumu usem. Usini mgbọ, eji mekọt ikat ebi unene kiji ejit sa me itatap ubọk inyi ema enwene ubọk ema ekimun̄ ufialek kiban̄. Ire, riọọn̄ ubọk keek inu obotumu jaan̄ sabum onotumu, inyi usem kwun̄ ikọt igwa ene mè iyaka ire itap ene efuuk me owot kpan̄asi ibotap ene unan me lek mè iyaka ire iwọ ene lek. (Urọk 12:18) Jioba ijeen̄ ata akpat ukot me mgbọ ikitumu ikọ melek Ilaija, ogwu okikeek ibe ke ire ọmọ gaalek okup inye ikitọbọ ebum inyi Jioba, ke ikwaan̄ ikebirọ kubọk ogwu nriran ikakisan̄a ata oruru geege isibi. Jioba ikatumu inyi Ilaija ibe ke nkeek kan̄ ilọ, ire, itap ubọk inyi ọmọ ikọt inen̄e nkeek kan̄ isun̄. (1 Ubọọn̄ 19:​15-18) Omokọt itap ubọk inyi ebi bọn ute si ire osa me ata ejit mè ugbalachieen̄ itumu ikọ. Mgbọ geelek okinyi usem mè iyaka ire ikifọọk ikọ me nkween̄mkpọ ntitiin̄, kisa me ata ejit mè nkeek onwọnwọn tumu usem obokitap efuuk me owot ebi bọn ute irieen̄ mè ibaan̄.

11. Keke ke ebi ikibọkọ ukwook echubọk iweek? (1 Jọn 3:18)

¹¹ Nyi ema inu ema echubọk iweek. Owuwa mgbọ, ikigbe ibe eji erọ mkpọ esa etap ubọk enyi ebi ikibọkọ ukwook, ekakpọkpọk itumu usem ukarajit gaalek. (Fuk Jọn Eyi Adasi 3:18.) Banabas ijeen̄ ata akpat ukot me mgbọ inyambe ijọn̄ uko kan̄ mè inyi ikpoko ikaan̄be inan̄a me lek ibe esa etap ubọk enyi ebi bọn ute irieen̄ mè ibaan̄ ikakaan̄ ufiak. (Ikwaan̄ 4:​36, 37) Owuwa bọn ute irieen̄ mè ibaan̄ mikigọọk ata akpat ukot Banabas sa me ikekitap ubọk inyi ebi ikakaan̄ ufiak. Gabriela ogwu onan̄a me Poland ifieek ejit enenen mè ikaan̄ sasaak me mgbọ mun̄ ile ofiatbe uwu kiban̄. Itumu ibe: “Emi melek nte n̄a mè nga n̄a mikaan̄ ukpook mè sasaak. Nkariọọn̄ ubọk eji ebesa inen̄e uwu kiji isun̄. Ire, bọn ute ebi ikup me ntitiin̄ echi okukup iriaak lek kiji, enunu inirọ owuwa ikwaan̄ me lek uwu kiji me usen ge gaalek. Inu yi obọbọkọ irek irọ ibe ichechieek n̄a inye ibe ke Jioba okikpọ chieen̄ me lek ebi eyi kan̄ mè ikikat ebi ikibọkọ ukwook ejit.”

12. Ire ogbe utoon̄-ejit mè ijeen̄ ime me mgbọ ekitutuku owu, ike owa ke eya obosa itap ubọk inyi ebi eyi Karais ogbo kwun̄?

¹² Kigbe utoon̄-ejit nyi Jioba. Pọọlu itumu inyi ebi eyi Karais ikup me Teselonaika ibe ke ọmọ ikaan̄ ukarajit mgbọ inọbe ubọk ema ekigbe utoon̄-ejit inyi Jioba mè ikikaan̄ ime me irak tukutuku. Pọọlu ibele ejit ibe ke efuuk ọmọ otapbe isasa itap ubọk inyi ema ekọt ekup enye me ichechieek ikachep me ikike. (1 Tes 3:​5-8) Pọọlu iriọọn̄ ibe ke ire ọmọ ikup inye ikigbe utoon̄-ejit inyi Jioba me mgbọ ikije itibi uyọrọlek, ke akpat ukot kan̄ motap ubọk inyi ebi bọn ute ekup enye ekegbe utoon̄-ejit si enyi Jioba. (Kọl 2:​1, 2) Ubọk yaage si, igbegbe utoon̄-ejit kiji me mgbọ ekitutuku eji mokọt itap efuuk me owot ebi bọn nte kiji. Mokọt irọ si ibe ema ekaan̄ ichechieek onyenye me lek Jioba ibe ke ọmọ motap ubọk inyi ema ekọt eme ike itapbe ubọk inyi eji.

13. Keke ogbe ibe eji ekup enye ekerọ ike eji ekikat ebi ofifi ife ejit?

¹³ Kaan̄ ime. Usini mgbọ, ikpore mgbọ yaage eji ekatbe gwun̄ ute ge ejit ke ibokaan̄ ntap-efuuk-me-owot. Baibul itumu ibe: “Ìkikat ebi melek kinyi ejit.” Eyi isibi ibe ke ikare mgbọ ge gaalek ke eji ebekat ebi ene ejit, ire mkpọ eji ebekup inye ikirọ. (1 Tes 5:11) Ọmọ orọ, igbe ibe eji ekup enye ekekat ebi ene ejit mè ekesa me ime erọ ikeya. (1 Tes 5:14) Me atikọ, eji ge ge mikiweek ukarajit usini mgbọ. Keke ke eji ebekọt irọ me mgbọ eji eweekbe ukarajit?

ME MGBỌ OWEEKBE UKARAJIT

14-15. Keke ke eji eberọ me mgbọ eji ekaan̄be sasaak mè iyaka ire ufialek?

¹⁴ Kibeek uriaak nyi Jioba. Osikifieek ejit mè iyaka ire ikaan̄ sasaak, beek Jioba ibe inyi owu ukarajit. (Itọn̄ 94:19) Kpa ubọk inu okupbe owu me lek nyi Jioba. (Itọn̄ 62:8) Jioba iriọọn̄ ubọk inu okikup owu me lek sabum okibeek uriaak inyi ọmọ. Ire, osikpa inyi ọmọ ubọk mkpọ okupbe owu me lek, okijeen̄ ibe ke okaan̄ ichechieek ibe ke ọmọ ima owu mè ikigban̄ uriaak kwun̄. Jioba ikitatap ubọk inyi ebi geelek ikisa me ichechieek ibeek ntap-ubọk kan̄. (Mak 11:24) Ikpa Ebi Filipai 4:​6, 7 itumu inyi eji ibe: “Ìkpa inu geelek òkup enyi me uyọt ìnyi Awaji me uriaak. . . Ire enyi ikirọ ikeya, esuuk Awaji, eyi ebilene kpebekọt igobo itet, môbem ejit kinyi mè ekiket kinyi.”

¹⁵ Beek ntap-ubọk ebi ofifi ife. Kpa ubọk inu okupbe me lek kwun̄ nyi ogwu unene kwun̄ omimin inin̄ ene mè iyaka ire ogwu ugane ntitiin̄ ge otoon̄be ejit me lek. Ebi bọn ute irieen̄ mè ibaan̄ mekọt inyi owu ukarajit okebikiweek, ire, usini mgbọ, ema kpeberiọọn̄ ubọk inu okikup owu me lek mè iyaka ire inu ochuchubọk ire ufiak kwun̄, itata okpakpa inyi ema. (Urọk 14:10) Omokọt itumu inyi ema ibe egban̄ ike okikpa ubọk inu okup owu me lek inyi ema. Mè iyaka ire, omokọt ibe mè ema ekpa enyi owu ere Baibul ge mè iyaka ire ibot usem ge eyi obokọt ikat owu ejit.

16. Keke obokọt ibọkọ irek me mgbọ ene okiweek itatap owu efuuk me emen, ire, keke ke okpowuuk?

¹⁶ Kikaan̄ ime mè kitele nyi ene. Bọn ute irieen̄ mè ibaan̄ mekọt irọ owu ilọ me mgbọ ema ekiweek itatap owu efuuk me owot. Kubọk inu njeen̄, ema mekọt itumu mè iyaka ire irọ mkpọ eyi oborọ ibe okofieek ejit ogbaalek. Ire inu okup ikeya irọ, kaan̄ ime me lek kiban̄. (1 Kọr 13:​4, 7) Kawuuk usem okup me ikpa Jemis 3:2 obe: “Ire, ikaan̄ ogwu ikarọge ìlọ me otu itumu-ikọ, ene ya înwọn isan̄a.” To chieen̄ me lek ata nkeek bọn ute irieen̄ mè ibaan̄ ekaan̄be isasa itap ubọk inyi owu. Ibet lek kwun̄, ema mekọt irọ ilọ usini mgbọ, ikerere ibe ke ema ekiweek irọrọ inu otatat.​—Mat 26:41.

17. Keke ke eji ebekup inye ikirọ?

¹⁷ Otutuuk kiji miweek ukarajit mè ntap-efuuk-me-owot, ogak ge eyi mgburudun̄ ota usen chi okiriọọn̄ iyọt, mè eyi ebi ochicha Awaji ekinaan̄ ejit igbaalek. Eya orọ, kè eji ekup enye ekekat ge ge ejit.