Kimun̄ Ufialek Kwun̄ Me Oniin̄ Ogbegbe

1-2. Keke ogbe ibe eji erọ inyi eji ekọt ekeme ufialek kiji? (Kpọ si ogugo.)

IRE mikirọ owu nnaan̄ me lek ni? Ire ebi uwu kwun̄ mè iyaka ire ebi ofifi ife ekikeke ikeme owu mè iyaka ire ikitutuku owu bak me lek ichechieek kwun̄ ni? Ire okirurumun̄ me lek orukan̄ mè iyaka ire ufialek acha ukan okisa inu ni? Ire okifieek ejit bak me lek ochepbe ogwu omabe me mkpa ni? Ibet lek owuwa ebi usun̄ Jioba ikukup me unye otu ewe inyi ọmọ, mokọt ire ibe ugwem kwun̄ ijojot me lek “ufialek mè kwulukwulu.”​—Itọn̄ 90:10.

² Eji esikaan̄ owuwa ufialek, igbe ibe eji ekekeek mkpọ ike Jioba oweekbe ibe eji ekekeek inyi eji ekọt ekeme ufialek cha. Keke orọ eyi okupbe ufiak? Kpọ-nu inu njeen̄ yi: Ufialek okichichini me ugwem mokọt ikup kubọk mkpọ unan okup me oniin̄ eyi okichichini me mgbọ okikọp uji ijọn̄. Igọọk me lek mbet lek mkpọ unan irebe, omokọt ikọp ifo ujit mè iyaka ire ulom, ikọp ususuk, mè iyaka ire itet ikaan̄ me okike mgbọ ya. Inyi okọt oriọọn̄ mkpọ oborọ, omodasi imun̄ mkpọ unan irebe ijaan̄. Ire, okpobokọt imun̄ mkpọ ijaan̄ mè ire isi umọọn̄ uji ya ikatoon̄ ijaan̄. Ubọk yaage si, inyi eji ekọt ekeme ufialek eji ekije itibi, igbe ibe eji ekemun̄ ufialek cha ike Jioba okimun̄. Me ibot usem yi, eji mekween̄ (1) oniin̄ ogbegbe ibe eji ekemun̄ ufialek kiji, (2) ubọk ikekimun̄ irek kiji me oniin̄ olọlọ obokọt isak eji unan me lek mè (3) usini mkpọ eji ebekọt irọ inyi eji ekemun̄ mkpọ ejaan̄ me mgbọ ufialek orọn̄be itet eji.

ONIIN̄ OGBEGBE IBE EJI EKEMUN̄ UFIALEK KIJI

3. Keke orọ eji ekikaan̄ ufialek me mgbọ keyi?

³ Uyọrọlek ire mkpọ eji kpebekọt ilibi inwọnọ me ijo ukot yi. Eyi irebe ibe ke eji kpeso, mè ikiluk si me inyọn̄ yi eyi Setan okikpulu, eji ebekikakaan̄ uyọrọlek. Ike ota ijo ukot keyi okigbet, ikeya si ke eji ebekichichini ufialek igbaalek. Mokọt ire mfufiat okpọkpọk ibọkọ irek ikeya mè iyaka ire eyi onan̄a me ubọk ebilene. Mokọt ire si ufialek eyi ebi ene esabe me mkpikpak ikirọ. (Mat 24:8; 2 Tim 3:13) Ire Jioba ikinen̄e ufialek chi isun̄ me mgbọ keyi, ibokup kubọk ikitap ubọk inyi Setan ibe ikikpulu inyọn̄ keyi ijaan̄. Me ukot keyi, eji kpebekọt ifala ufialek chi.​—Etip 9:12.

4. Keke ore si ofifi inu orọrọ eji ekibọkọ ukwook?

⁴ Eji ekibọkọ ukwook bak me lek eji ekigọọk Jisọs. Jisọs itumu inyi ebi udun̄ kan̄ ibe ke metutuku ema bak me lek ema ekigọọk ọmọ. (Mat 24:9; Jọn 16:2) Irọriọọn̄ eyi motap ubọk inyi eji ejit inu geelek oborọ ibe ichechieek kiji isisik me mgbọ ekitutuku eji. (1 Tes 3:​3, 4) Eji esikime ufialek bak me lek eji ekaan̄be ichechieek onyenye, eji mekọt ichieek inye ibe ke eji mekije me oniin̄ eyi ugwem. Isọkọ me lek si, eji ekijeen̄ ibe ke eji migobo itọtọbọ ebum inyi Jioba, bak me lek ọmọ ore ogwu ubọọn̄ onwọnwọn ichit, mè ikijeen̄ ibe ke Setan ire ogwu ataak. Ge me lek ataak Setan okikan̄ ire ke ebilene kpechubọk ima Jioba, ke ekitọbọ ebum inyi ọmọ gaalek, bak me lek inu ikebinyi ema. Eya orọ Setan okikup ikeme ebi usun̄ Jioba inyi ema ekakọt ikigbe utoon̄-ejit inyi Jioba. (Jobu 1:​9-11) Eji esikime ufialek kiji bak me lek ima eji ekaan̄be me lek Jioba, morọ ibe Jioba ikibele ejit.​—Urọk 27:11.

5. Keke ke eji ebekọt ikween̄ me lek inu okup me ikpa Ogwu Etip 7:​13, 14? (Kpọ si ogugo chi.)

⁵ Jioba ikekitele ibe uyọrọlek ikibọkọ irek. Jioba ikare ogwu mkpikpak, ikakirọ eji nnaan̄ si. (Jemis 1:13) Eya orọ, keke orọ ogwu ubọọn̄ Solomọn ogebe ibe ke “Awaji osun̄ ata mgbọ, mè isun̄ si ijo mgbọ”? (Fuk Ogwu Etip 7:​13, 14.) Ire eyi isibi ke Awaji okirọ ibe ijo mkpọ ikibọkọ irek ni? In̄-in̄, kpan̄asi ikeya, Awaji itetele ibe inu chi ikibọkọ irek. Keke ke eji ebekọt ikween̄ me lek inu okup me ikpa Ogwu Etip 7:​13, 14? Adasi ire, igbe ibe eji egobo etet ibe ke eji kpebekikaan̄ ubelejit usen geelek me inyọn̄ kè Setan yi, usini usen monwọn, ire, usini kponwọn. Eya orọ, usen geelek inu ojebe ijaan̄ inyi eji, kè eji etọn̄ Jioba mije, otutuuk ata mkpọ geelek ikinan̄a me ubọk kan̄ isibi. Òso iba, Solomọn ikikeek eji ibe ke eji kpebekọt iriọọn̄ inu oborọ me iyakwut, mè ire usen kiji monwọn sa mofiek. Eyi isibi ibe ke ufialek ekakeekbe mokọt irọn̄ itet otutuuk ene, mè ire ebi ikirọ ata inu sa ire ebi ikirọ ijo inu.

6. Keke orọ Jioba otelebe ibe eji ekechichini ufialek? (Ebi Iburu 12:​7, 11)

⁶ Ire eji ikimun̄ ufialek kiji me oniin̄ ogbegbe, eji memun̄ ibe ke Jioba ikijeen̄ eji ibe ekeyaka lek emaan̄ me lek kan̄ kpan̄asi ikekisa ibeben ufialek ya eji gaalek. Jioba ikimumun̄ ufialek eji ekije itibi, eyi ikifieek ọmọ ejit enenen. Ikerere ibe ke Awaji ikitele mè ijo mkpọ ikirọn̄ itet eji, ikitap ubọk inyi eji eriọọn̄ mkpọ eji ebekọt irọ me mgbọ ufialek chi isibọkọ irek. Ikijeen̄ eji si ubọk ọmọ osabe ima eji ire mè ikinyi eji unye isasa ime ufialek. (Itọn̄ 23:4) Me mgbọ eji ekikwek isi me lek uyọrọlek, eji mekọt iweek iriọọn̄ ere eji ewọbe, sa me ntap-ubọk Awaji eji mekọt inwene mè ikirọ ijaan̄ si. (Fuk Ebi Iburu 12:​7, 11.) Kubọk inu njeen̄, ikare Jioba orọ ibe Jobu ikaan̄ ufialek, ire, Jioba itele ibe Jobu ije itibi ufialek mè isa me ikeya ijeen̄ ọmọ owuwa mkpọ. (Jobu 42:​1-6) Me ekakpọge chieen̄ me lek inu obokọt irọn̄ itet eji, eji miriọọn ibe ke inu geelek Jioba otelebe ibe irọ ikare inu eji ebebia me emen ire mgbọ geelek. Ire, ọmọ motap ubọk inyi eji ekup enye ekegbe utoon̄-ejit enyi ọmọ, mè igbana eji si.​—Rom 8:​35-39.

7. Keke orọ obokibele ejit ikerere me mgbọ ekitutuku owu mije ichechieek kwun̄?

⁷ Eji mekọt ikibele ejit ikerere me mgbọ ekitutuku eji. Ire ekitutuku owu bak me lek ichechieek kwun̄, kakeek ibe ke Jioba ikabele ejit me lek kwun̄ mè iyaka ire ibe ke ikakitap ubọk inyi owu. Kpan̄asi ikeya, kimun̄ ukeme ya kubọk inu okijeen̄ ibe ke okaan̄ nnwọn-isi Jioba. (Mat 5:​10-12) Eji esikikeek mkpọ ofolek tukutuku ikeyi, eji mekibele ejit ike ebi otuchieen̄ ebelebe ejit. (Ikwaan̄ 5:​40-42) Isọkọ me lek si, eji esigbe utoon̄-ejit me mgbọ ekitutuku ejit, mokọt itap ubọk irọ inyi ebi kpekitọbọ ebum inyi Jioba enekween̄ atikọ mè ekemin ọmọ. (1 Pita 2:12) Kubọk Josefu, omokọt ikirọ ijaan̄ me mgbọ okije itibi uyọrọlek, ikare gaalek me mgbọ uyọrọlek ya isita.​—Ibeb 39:​3, 23.

8. Keke si obokọt itap ubọk inyi eji ekeme ufialek kiji?

⁸ Ufialek kiji mota. Ukpatu kè Jobu ikeek eji ibe ke usini ufialek kiji mota me ukot keyi mè mgbọ usini obota me emen aya inyọn̄. Me atikọ, Awaji igbana Jobu “me mgburudun̄ mgbọ igak adasi mgbọ.” (Jobu 42:12) Jioba ichieek owu si use ibe ke ọmọ mogbana owu me mgburudun̄. Omonwọọn̄ ugwem ire mgbọ geelek, ugwem eyi okpokọt isa itọt me lek eyi eji ekiluk me chereyi okukup me mgbidim mgbidim mè ijot me lek uyọrọlek. Eya orọ, kè eji ekup enye ekegbe utoon̄-ejit mè ekeme esi ere ota!​—Mat 24:13.

UBỌK IKEKIMUN̄ IREK KIJI ME ONIIN̄ OLỌLỌ OBOKỌT ISAK EJI UNAN ME LEK

9. Ike owa ke lọlọ nkeek ofolek ukwook kiji obokọt isa unan ijet eji?

⁹ Me mgbọ eji ekichichini ufialek, ire eji kpekimun̄ ufialek ya me oniin̄ ogbegbe, eyi mokọt irọ ibe irek kiji ikifiek igbaalek. Kubọk inu njeen̄, mokọt ikikup eji me lek usini mgbọ kubọk ke ire Jioba okirọ ibe eji ekebọkọ ukwook. Me okike mgbọ ge, Jobu ikikeek ibe ke ire Jioba orọ ibe ọmọ ikibọkọ ukwook. Lọlọ nkeek yi irọ ibe Jobu ikikeek ibe “ke ìnen me ubọk kan̄ mè ilọ me ubọk Awaji.” (Jobu 32:2) Ubọk yaage si, me adasi mgbọ, Nomi itumu ibe ke ire Jioba orọ ibe ọmọ ikibọkọ ukwook. (Rufu 1:​13, 20, 21) More ibe ke Jobu mè Nomi mitet lọlọ nkeek kiban̄ inye, kè ojijaka mgbaan̄je kiban̄ melek Jioba. (Urọk 19:3) Ire, Jioba itap ubọk inyi ema ekaan̄ ata nkeek ofolek ufialek kiban̄, igbana ema mije egbebe utoon̄-ejit si.

10. Eji esikibọkọ ukwook, keke ke eji ebekọt ibene ikikeek?

¹⁰ Ikerere ibe ke eji miriọọn̄ ibe ke ikare Jioba okirọ ibe eji ekebọkọ ukwook, eji mekọt ibene ikikeek mè ire okichubọk ikpọ eji chieen̄ me lek. Lọlọ nkeek okup ikeya mokọt irọ ibe eji ekayaka ikaan̄ efuuk irọrọ inu otatat. (Urọk 24:10) Ogwu ubọọn̄ Debit mè ogwu nriran Abakuk mikaan̄ owuwa ufialek, usini mgbọ si, ikup ema me lek kubọk ke Jioba ikanọ ida uriaak kiban̄. (Itọn̄ 10:1; Abak 1:2) Ire, ema ekukup inye ikibeek uriaak. Jioba ifọọk otu uriaak kiban̄ mè ikup inye ikitap ubọk inyi ema. Ikeya ke ibokup inye ikitap ubọk inyi owu si.​—Itọn̄ 10:17.

11. Keke obokọt irọ ire eji kpekaan̄ ata nkeek ofolek ufialek kiji?

¹¹ Ire eji kpekaan̄ ata nkeek ofolek ufialek kiji, eji mekọt ikikeek ibe ke ikare eji ke ufialek cha monu inyi. (1 Pita 4:12) Eji mekọt ikween̄ mkpọ inan̄a me lek ebi udun̄ kè Jisọs. Mgbọ Jisọs otumube inyi ema ibe ke metutuku mè ikpan̄ ọmọ, ema kpechieek ibe ke mbet mkpọ okup ikeya mokọt irọ Jisọs. (Luk 18:​33, 34) Ikerere ibe ke usem Jisọs ofolek mkpọ oborọ ọmọ isibi utoon̄, ogwu otuchieen̄ Pita ikikeek ibe ke Jioba ikpobotele ibe Jisọs ije itibi mbet lek inu okup ikeya. Jisọs iriọọn̄ ibe ke nkeek okup ikeya ikaje ikike me lek nkeek Jioba, eya orọ, igagana inyi Pita. (Mak 8:​31-33) Ikerere me mgbọ ekpan̄be Jisọs, ebi udun̄ kan̄ kpegwat lek igobo itet inu orọrọ ekpan̄be ọmọ. Ire, Jisọs ikawọ lek me lek kiban̄. Mgbọ ijomobe me mkpa, igọọk ema ikpa usem mè itap ubọk inyi ema ekaan̄ ata nkeek ofolek ukwook ibọkọbe sa me ikpakpa iwele inu egebe me Ikpa Mbuban inyi ema.” (Luk 24:​25-27, 32, 44-48) Ikekikeek idọk inu Jisọs okijeen̄ ema motap ubọk inyi ema eneen̄ lek enyi ukeme ema ebechichini sọnja mgbọ. Ikekikween̄ atikọ Baibul mokọt itap ubọk inyi eji eneen̄ lek enyi ufialek si.

12. Ike owa ke lọlọ nkeek ofolek irek kiji obokikup eji me lek?

¹² Me mgbọ eji ekichichini ufialek, ire eji kpekeek mkpọ me oniin̄ eyi Jioba oweekbe ibe eji ekekeek, eji mekọt ikikeek ibe ke irek kiji ifiek igak ubọk ikupbe. Jisọs ijeen̄ oniin̄ ge eyi obokọt irọ me urọk itobe ofolek ebi ikwaan̄ uko gerep. Usini ebi ikwaan̄ cha mikaan̄ uduk ofolek ikpoko ekpebe ema. Ema mirọ ibe ikup kubọk ikpoko ya ikagbe ikwaan̄ ema esibe. Ire, ogwukaan̄ uko otutumu inyi ene ge me lek kiban̄ ibe: “Une, ǹkafeen̄ owu kubọk ge.” (Mat 20:​10-13) Ebi ikwaan̄ cha ininina lek ekikeek ibe ke ogwukaan̄ uko ya ifefeen̄ ema, ire, ikafeen̄ ema. Ema kpebele ejit mije, ema ekikpọ chieen̄ ikakaan̄ mkpọ eyi kpemekpọ chieen̄ ikakaan̄. Me chereyi, usini bọn ute mikikaan̄ mbet lek nkeek okup ikeya. Mokọt ire bak me lek ema kpekaan̄ irek eyi ema eweekbe mè iyaka ire michep irek ema ewuukbe lek ikaan̄ me ntitiin̄. Keke ore usini inu eji ebekọt irọ inyi eji ekemun̄ mkpọ ejaan̄ me irek oyọyọt?

INU ECHI OBOKỌT IRỌ UFIALEK ISIRỌN̄ ITET OWU

13. Keke obokọt ibọkọ irek ufialek isirọn̄ itet eji?

¹³ Kpolọlọ, oriọọn̄ inu Baibul otumube ofolek ukwook. Mokọt ire ibe ke owuuk lek ifuk usini ere Baibul inyi ebi ene isasa itap ema efuuk me owot inyi ekọt eme ufialek kiban̄. Ire, ufialek isirọn̄ itet owu, mokọt iyọt owu me lek ikekeek mkpọ ubọk Jioba oweekbe ibe okokeek. Kubọk inu njeen̄, mokọt ikup owu me lek kubọk ke Jioba ikisut owu osusut mè iyaka ire ke ikakinọ uriaak kwun̄. Keke ke obokọt irọ inyi okọt okaan̄ ata nkeek?

14. Keke ke obokọt ibeek me uriaak me mgbọ okibọkọ ukwook? (Ebi Filipai 4:13)

¹⁴ Beek Jioba ibe itap ubọk inyi owu. Kpa nyi Jioba mkpọ ofolek ukwook okibọkọ mè mgbaan̄ ukwook ya okikaan̄ me lek kwun̄. Omokọt itumu inyi Jioba ubọk oweekbe ibe itap ubọk inyi owu. Omokọt ibeek ibe inyi owu ekwukwu mbuban kan̄ inyi okaan̄ iriọọn̄-inu mè unye isasa ikime. Kawuuk ibe ke Jioba mokọt ifọọk otu uriaak kwun̄ me oniin̄ eyi okakeekbe. (Efes 3:20) Mokọt iria ebi osat kan̄ mè iyaka ire ebi bọn ute irieen̄ mè ibaan̄ ibe enyi owu ntap-ubọk oweekbe. (Itọn̄ 34:7) Eya orọ, bọkọ ntap-ubọk geelek Jioba osan̄abe isibe me oniin̄ geelek irọbe eyi tap. Ikichichili ubọk inyi ekwukwu mbuban kan̄, eyi oborọ ibe okọt okeke oda ufialek geelek okichichini.​—Fuk Ebi Filipai 4:13.

15. Keke obotap ubọk inyi owu okọt ome ufialek? (Kpọ si ogugo.)

¹⁵ Kweek nye kirọ inu echi oborọ ibe mgbaan̄je kwun̄ melek Jioba ikinye. Sa mè kirọ inu echi obokọt irọ, ikerere ibe ke okakọt irọ usini inu echi owuukbe lek ikirọ. Mgbọ okije itibi “uyọrọlek mè ukwook” ore mgbọ ogbegbe ichit ikekikeek inu ike Jioba okikeek. (Itọn̄ 119:143) Kweek nye kifuk Baibul usen geelek, mè kikeek mkpọ ofolek inu ofukbe. Kilook ata etip ike irek kwun̄ ochieekbe ibe okorọ, kisi nkween̄mkpọ ntitiin̄ mè kigọọk nyi ufọọk-otu. Kigọọk bọn ute irieen̄ mè ibaan̄ kpa usem. Jit ikekikup owu gaalek.​—Urọk 18:1.

16. Kpasi cheche ejit ke obokọt ikaan̄ me mgbọ uyọrọlek isirọn̄ itet owu, keke ke obokọt irọ? (Ebi Kọrint Eyi Òso Iba 10:​4, 5)

¹⁶ Sa Baibul nwene nkeek kwun̄. Uyọrọlek isirọn̄ itet owu, ikup ufiak ibe otim ogak “ijo ekiket ebilene geelek” eyi ogọgọbọ lọlọ nkeek ofolek kwun̄ mè iyaka ire Jioba. (Fuk Ebi Kọrint Eyi Òso Iba 10:​4, 5.) Eya orọ, keke obokọt itap ubọk inyi owu? Igbe ibe owọlọ inu okup me Baibul mè ikpa kiji okpọ. Kubọk inu njeen̄, ire ikikup owu me lek kubọk ke Jioba ikayaka ikibele ejit me lek kwun̄ ni? Ire ire ikeya, sa mè kween̄ mkpọ ofolek ogwu otuchieen̄ Pọọlu. Ije itibi owuwa ufialek me ugwem kan̄. Ire, ikpọkpọk itet lek inye ikilook ata etip. Bak me lek ikọtbe ikilook ata etip ikerere me irek oyọyọt cha, Pọọlu ichieek ijaan̄ ibe ke ọmọ ikaan̄ nnwọn-isi Jioba mè Jisọs. (2 Kọr 11:​23-27) Ire okikeek mè ire Jioba ichubọk itele ijo inu orọbe me mgbọ oraraka mè igwu ikom me lek ni? Ire ire ikeya, omokọt ige isibi usini ere Baibul echi obokikeek owu ibe ke Jioba ichubọk itele inyi owu. (Asaya 43:25) Fuk ere Baibul cha mè gwu nkeek kom me lek. (Itọn̄ 119:97) Ire ikaan̄ ufialek ochichinibe eyi orọrọ ibe okaan̄ cheche mè ire Awaji ikirọ iso use ichieekbe ibebem ebi usun̄ kan̄ ni? Wọlọ ibot usem okikpa mkpọ ofolek inu orọrọ Awaji okitele ibe eji ebọkọ ukwook mè ubọk ikisa ibem eji me irek emen ekwukwu me ekakpọge chieen̄ me lek inu orọrọn̄ itet eji kpọ. (Itọn̄ 91:​9-12) Mè fuk si mfufuk ofolek bọn ute irieen̄ mè ibaan̄ ebi ijeje itibi irek oyọyọt enenen mè inu otatap ubọk inyi ema ekọt ekup enye ekesa me unwọọn̄ etọbọ ebum enyi Jioba.a

17. Keke ke eji eberọ me mgbọ eji ekichichini ufialek?

¹⁷ Mokọt ire ibe ke okakaan̄ ufialek okpikup unye unye me mgbọ keyi. Ire ire ikeya, kitọn̄ Jioba mè kisa irek yi kikeek mkpọ ofolek ata mkpọ ikebirọ inyi owu. (Etip 7:14) Ire, ufialek isibọkọ irek, sa inyi okomun̄ irek ya ojaan̄ mè kweek nye kirọ ibe utoon̄-ejit kwun̄ me lek Jioba inye. Ike okirọ ikeya, Jioba ‘mônyi owu unye isasa ikeke inye, mè isan̄a oniin̄ isibi me emen ntọ-mkpọ ya inyi okọt otim ogak.’ (1 Kọr 10:13) Ire, ofolek bọn nte kiji ye, ike owa ke eji ebesa itap ubọk inyi ema me mgbọ ema ekichichini ufialek? Eji mekween̄ eyi me ibot usem ogọgọọk.