Eji Mekọt Ikup Inye Ikigbe Utoon̄-Ejit Inyi Jioba Me Mgbọ Ufialek

1-2. Keke obọkọ irek me mgbọ Jisọs okijeen̄ mkpọ me Kapanọm?

“EYI ìre uyọt uyọt ijejeen̄. Ìre ekene obokọt ibọkọ itap?” (Jọn 6:60) Eya ire usem owuwa ebi udun̄ kè Jisọs etumube me mgbọ Jisọs okijeen̄ ema mkpọ me Kapanọm. Jisọs itumu inyi ema ibe: “Ǹkitumu atikọ inyi enyi ibe, ire enyi kpetaka akpalek Gwun̄ Ebilene, mè inwọ eje kan̄, enyi kpebekaan̄ ugwem me emen kinyi kubọk ge.” Itutumu isọkọ ibe: “Ene geelek òtataka akpalek n̄a, mè inwọ eje n̄a, ene ya okaan̄ ugwem ikakaan̄ge itata. Emi mâjomo si ene ya me mkpa me mgburudun̄ Usen ya.”​—Jọn 6:​53, 54.

² Owuwa ebi usem Jisọs onaan̄be etetele ọmọ, kpeyaka ikigọọk ọmọ. Ire bak me lek ema kpekaan̄ ichechieek geege me lek Jisọs ni? Me atikọ, sabum mgbọ keyi, usini ene, ikerere ebi udun̄ kè Jisọs mima inu Jisọs okirọ, eya orọ ema etumube ibe: “Me atikọ, ene yi ore ogwu Nriran ya ogwu òbonu me linyọn̄.” (Jọn 6:14) Eya orọ, isibi utoon̄ ibe ke ebi udun̄ kè Jisọs mikaan̄ ichechieek me lek kan̄. Ire, me mgbọ Jisọs otumube inu ema ekagobobe itet, kpeyaka ikigbe utoon̄-ejit inyi ọmọ.

3. Keke ke ebi otuchieen̄ erọ mgbọ enọbe usem kè Jisọs, bak me lek keke? (Kpọ si ogugo.)

³ Ire, ebi otuchieen̄ kè Jisọs ekukup inye ikigbe utoon̄-ejit inyi ọmọ. Mgbọ Jisọs odobe mè ire ema megọọk itele ọmọ si, Pita ofọfọọk ibe: “Okaan̄-ene, ìre ekene ke eji ebegọọk? Îre owu okaan̄ ikọ òkinyi ene ugwem ikakaan̄ge itata. Eji mîchieek me lek kwun̄, mè iriọọn̄ ibe ke owu ore Ogwu Mbuban ya ònan̄a me lek Awaji inu.” (Jọn 6:​68, 69) Taba iman̄ ibe ke Pita ikatumu ibe ke ọmọ mè ebi otuchieen̄ kechilọ migobo itet ijaan̄ inu Jisọs otumube me mgbọ itumube inyi ema ibe ke ema metaka akpalek kan̄ mè inwọ eje kan̄. Me ekakpọge chieen me lek inu ema egobobe itet me mgbọ ya, ema egogobo ikukup inye ikigbe utoon̄-ejit inyi Jisọs. Bak me lek keke? Bak me lek ibe ke ema miriọọn̄ ibe ke Jisọs ore “ogwu Awaji otọkọbe aran̄ me ibot.”​—Luk 9:​20, 35.

4. Keke obokọt itọ igbegbe utoon̄-ejit kiji inyi Jioba ikpọ?

⁴ Esese esese inu mokọt itọ igbegbe utoon̄-ejit kiji inyi Jioba ikpọ. Kubọk inu njeen̄, ike owa ke ikikup eji me lek esirọ unwene me lek ngobo-ntet kiji ofolek ere Baibul ge mè iyaka ire ubọk ekisa ineen̄ ikwaan̄ ilolook ata etip kiji? Ike owa ke ukwook okikup eji me lek mije eji ekagobobe itet inu orọrọ Jioba otelebe ibe eji ekebọkọ ukwook? Ire ogwu unene kiji irọ mkpọ onanaan̄ eji, mè iyaka ire, ire ikup eji me lek kubọk ke ofifi gwun̄ ute ogwu eji ekaan̄be ulibi me lek irọ eji nnaan̄, eya mokọt itọ ichechieek kiji ikpọ si.

5. Keke orọ igbebe ibe eji ekerọ inyi ichechieek kiji inye? Nyi inu njeen̄ ge. (Ebi Kọlọsi 1:23)

⁵ Inyi eji ekọt egobo etet ufiak irebe ikekirọ ibe ichechieek kiji inye, kè eji ekeek-nu mkpọ ofolek uwu enamabe me ere sikisik-ijọn̄ okibọkọ irek. Uwu ya ibokakaan̄ ọdọ onyenye inyi ikọt ikeke ida sikisik-ijọn̄ geelek obobọkọ irek. Ubọk yaage si, inyi eji ekọt etim egak inu echi obokọt itọ ichechieek kiji ikpọ kubọk echi eji ewuukbe lek ikpa, igbe ibe ichechieek kiji inye. Ire eji ikup inye ikirọ ibe ichechieek kiji ikinye, eji mekup inye ikire ebi usun̄ Jioba ikigbe utoon̄-ejit inyi ọmọ ikerere me mgbọ eji ekije itibi ufialek.​—1 Kọr 15:58; fuk Ebi Kọlọsi 1:23.

6. Keke otap ubọk inyi ebi otuchieen̄ kè Jisọs ibe ekup enye ekegbe utoon̄-ejit enyi ọmọ?

⁶ Keke otap ubọk inyi ebi otuchieen̄ kè Jisọs ibe ekup enye ekegbe utoon̄-ejit enyi ọmọ me mgbọ owuwa ebi ene etelebe ọmọ? Ebi otuchieen̄ michieek ijaan̄ ibe ke igbe ibe ema etọbọ ebum enyi Jioba bak me lek ire ọmọ orom otutuuk inu. Michieek ibe ke Jisọs ire gwun̄ Awaji, ke ire ema esiki ibot inyi ọmọ, ke ema mekaan̄ ugwem ikakaan̄ge itata. Michieek si ibe ke Jisọs ikirọ inu okibele Jioba ejit. Mgbọ keyi, kpan̄asi eji ebekween̄ owuwa esese inu obokọt itọ ichechieek kiji ikpọ, kè eji eto chieen̄ me lek atikọ ita echi obokọt itap ubọk inyi eji ekup enye me mgbọ eji ekije itibi inu obotọ ichechieek kiji ikpọ. Atikọ cha ire: (1) Jioba orom otutuuk inu. (2) Jioba onyi ebi igege Baibul ekwukwu mbuban. (3) Jioba ikisa ntitiin̄ kan̄ irọ mkpọ me chereyi. Ire eji ichieek inye me lek atikọ ita chi, eji mekup inye ikigbe utoon̄-ejit inyi Jioba ikerere me mgbọ eji ekikwek isi me lek inu obokọt itọ ichechieek kiji ikpọ.

JIOBA OROM OTUTUUK INU

7. Keke ke ikpa Ichichili 4:11 okikeek eji ofolek Jioba, ike owa ke eyi obokọt isa itap ubọk inyi eji me mgbọ eji ekije itibi inu okitọ ichechieek kiji ikpọ?

⁷ Fuk Ichichili 4:11. Ere Baibul yi ikikeek eji ibe ke Jioba orom otutuuk inu. Eyi ire inu okukup ufiak enenen eyi oborọ ibe eji eketọbọ ebum enyi ọmọ. Eji esikigwu nkeek ikom me lek ubọk Jioba osabe inye lek ire, eji menenichieek inye ibe ke ọmọ mokọt inyan̄a eji isibi me emen otutuuk ufialek kiji. Ire, Setan irọ ibe ataak ijot inyọn̄ yi echi okirọ ibe ebi ene ekaan̄ cheche mè ire Awaji owa. Usini ebi science ekitumu ibe ke inyọn̄ yi ikpọkpọk isibi ikeya. Ire, ire eji kpechieek inye ibe ke Jioba orom otutuuk inu mè ichieek si ibe ke ọmọ ima eji, eji mekọt ibene ikikaan̄ cheche mè ire Awaji owa me atikọ, mè ire ọmọ mokọt itap ubọk inyi eji me mgbọ eji ekije itibi ntọ-mkpọ.​—Iburu 11:6.

8-9. Keke ke oborọ ire obene ikikaan̄ cheche ibe ke ire Jioba orom otutuuk inu? (Kpọ si ogugo.)

⁸ Ire obene ikikaan̄ cheche ibe ke ire Jioba orom otutuuk inu, gwat lek rọ mkpọ ofolek. Wọlọ ikpa kiji kpọ jaan̄ mè week inu okijeen̄ ibe ke ire Jioba orom otutuuk inu. Omokọt imun̄ mkpọ echi oborọ ibe ichechieek kwun̄ inye me esese esese ibot usem okup me emen broshọ Was Life Created? mè The Origin of Life​—Five Questions Worth Asking. Isọkọ me lek si, mikpa esese esese inu okijeen̄ ibe ke Jioba orom otutuuk inu me ibot usem echi ekisan̄a isibi me “Was It Designed?” okup me jw.org. Gwun̄ ute enenwaan̄ ijija ge ekigwen Jessica onan̄a me United States itumu ibe: “Eyi mfukbe broshọ Origin of Life isan̄a, nnenichieek ijaan̄ ibe ke ikaan̄ ogwu ororom mè iriọọn̄ ubọk ineen̄ otutuuk inu. Mwuuk lek iriọọn̄ eyi, ire, mgbọ mfukbe ikpa ya isan̄a, nkayaka ikaan̄ cheche geege.” Owuwa ene mikaan̄ oruru si inan̄a me lek ikwekween̄ ikpa Is There a Creator Who Cares About You? Owu ora ifuk ikpa yi, ire, omokọt ikpọk ifuk.

⁹ Me ofifi nkween̄mkpọ agaga kwun̄, omokọt iweek atikọ okijeen̄ ibe ke Awaji owa. Mkpọ oboweek imun̄ morọ inyi ichechieek kwun̄ inye ibe ke Jioba owa, morọ si inyi oriọọn̄ ogọt ojaan̄. (Rom 1:20) Isọkọ me lek si, omokọt isa inu okween̄be itap ubọk inyi ebi ofifi ife ebi ikakaan̄ cheche ibe ke Awaji owa. Okpan okpan inu ire: Jioba inyi eji inu eji ebesa ichieek inye ibe ke ọmọ ore ogwu ororom eji.

Nebula: IAC/RGO/David Malin Images; fish and car: Mercedes-Benz USA; plane: Kristen Bartlett/University of Florida

JIOBA ONYI EBI IGEGE BAIBUL EKWUKWU MBUBAN

10. Keke orọ Baibul okupbe ufiak enenen inyi eji? (Timọti Eyi Òso Iba 3:​16, 17)

¹⁰ Fuk Timọti Eyi Òso Iba 3:​16, 17. Baibul ire etip onan̄a me ubọk Jioba isa inyi ebilene. Ifọọk idodo echi okukup ufiak me ugwem, ikpa si nkeek Jioba inyi eji mè inu iweekbe ibe eji erọ. Eji michieek ibe ke Jioba ore ogwukaan̄ Baibul, ọmọ orọ, Baibul ire ikpa okukup ufiak ichit me ugwem kiji. Eji memun̄ ijaan̄ ibe ke eji migobo Usem Awaji itet ijaan̄, mè ikitap inu eji ekikween̄ me ikwaan̄.

11. Keke orọ ochieekbe ijaan̄ ibe ke Jioba ore ogwukaan̄ Baibul?

¹¹ Keke orọ eji echieekbe ijaan̄ ibe ke Jioba ore ogwukaan̄ Baibul? Bak me lek owuwa inu. Inu Baibul otumube ofolek mkpọ echi obọbọkọ irek me mgbọ oraraka ire atikọ. (Luk 3:​1, 2) Mkpọ Baibul otumube ofolek inu nrom itat si. (Jobu 26:7) Baibul ire ikpa osibi esese bak me lek ikerere ibe ke Setan isa ifafiat, kpunu ikpa geege owawa ibet lek Baibul, eyi okup me esese esese ida usem. Akọp ebirieen̄ ini ege Baibul me mkpọ ososo obop acha ge mè efit acha gweregwen; ire, etip ene ge ikaje ikeme eyi ofifi ene. Ikerere ibe ke ege Baibul me ujọnọ ujọnọ mgbọ oraraka, nteme okup me emen okitap ubọk inyi efie efie ebi ene me chereyi. (Urọk 13:20; 15:21; Mat 7:12) Isọkọ me lek si, owuwa nriran okup me Baibul irọ iso, eyi okijeen̄ ibe ke Baibul ire ikpa ebekọt itoon̄ ejit me lek. (Jos 23:14) Me atikọ, Baibul ichubọk ire ikpa onan̄a me ubọk Awaji!

12. Keke ke eji eberọ mè ire eji ebene ikikaan̄ cheche ibe ke Awaji okaan̄ Baibul?

¹² Keke ke eji eberọ mè ire eji ibene ikikaan̄ cheche ibe ke Awaji okaan̄ Baibul? Igbe ibe eji ebeek uriaak enyi Jioba mè ekpa enyi ọmọ ubọk inu okupbe eji me lek, ebeek ibe itap ubọk inyi eji mè ekween̄ mkpọ edọk ofolek inu yi. Gwun̄ ute enerieen̄ ge ekigwen Jordan, ogwu okwekween̄ mkpọ ofolek Jioba me ubọk nte kan̄ mè nga kan̄ itumu ibe: “Nkakpọkpọk ikichieek me lek mkpọ bak me lek ire mkpọ nte n̄a mè nga n̄a mè iyaka ire ebi ofifi ife etumube inyi emi. Nkimun̄ ijaan̄ ibe ke inu nkichieek me lek ichubọk ire atikọ. Usini mgbọ, nkikaan̄ cheche ofolek usini mkpọ nkifuk mè iyaka ire inọ. Isikup ikeya, nkiwọlọ ikpa kiji ikpọ inyi nkaan̄ ufọọk-otu nnyi idodo n̄a mè ntim ngak cheche ya.” Ike eji ekup inye ikirọ ibe utoon̄-ejit kiji me lek Baibul ikinye, ikeya si ke ichechieek kiji obokinye igbaalek.​—1 Kọr 3:​12, 13.

JIOBA IKISA NTITIIN̄ KAN̄ IRỌ MKPỌ ME CHEREYI

13. Keke ke eji eberọ mè ire eji ebene ikikaan̄ cheche ofolek ebi irere ebi eyi Awaji me chereyi?

¹³ Ire eji ibene ikikaan̄ cheche mè ire Ebi Ata-Ikọ Jioba ke Jioba okisa irọ mkpọ me chereyi, igbe ibe eji egwat lek erọ mkpọ osilek. Kubọk inu njeen̄, eji mekọt ikeek idodo chi: ‘Ebi owa echubọk ikitap efuuk ikiluk igọọk onineen̄ Baibul? Ebi owa ekiyaka nchieek kiban̄ imaan̄ me lek Baibul gaalek ni?’ (2 Tim 4:​3, 4) ‘Ebi owa ekirọ nkeek Jioba me chereyi?’​—Mat 7:​20, 21.

14. Ike owa ke Jioba okisa Ebi Ata-Ikọ kan̄ irọ inu okup me ikpa Matiyu 24:14 iso?

¹⁴ Kubọk inu njeen̄, Awaji iweek ibe ebi ene me otutuuk ere enọ ata etip kan̄ sabum mofiatbe inyọn̄ mkpikpak yi. Eya orọ, eji mekọt ido lek kiji, ‘Ire ebi owa ekilook ata etip yi me chereyi?’ (Mat 24:14) Ufọọk-otu idodo yi isibi utoon̄. Awaji ikisa ebi eyi kan̄​—Ebi Ata-Ikọ Jioba​—irọ ikwaan̄ ilolook ata etip yi. Eji gaalek ekilook ata etip Ama Ubọọn̄ Awaji me mkpọ oraraka efit ido iba mè akọp ini. Eji mekirọ ikwaan̄ yi iraka efit acha ge. Me atikọ ikwaan̄ ilolook ata etip yi okup ufiak ichit inyi ebi eyi Awaji.​—Mat 28:​19, 20.

15. Ike owa ke Ebi Ata-Ikọ Jioba ekisa imin erieen̄ Awaji me chereyi? (Matiyu 6:9; Asaya 43:10)

¹⁵ Fuk Matiyu 6:9 mè Asaya 43:10. Ire mkpọ umin irere ge me lek Ebi Ata-Ikọ Jioba. Ogbogbo ene me inyọn̄ yi me chereyi kperiọọn̄ ibe ke erieen̄ Awaji ire Jioba. Ire, eji misa mè ikaan̄ Baibul obeben erieen̄ yi ike ikupbe me adasi ikpa esabe ige Baibul. Me adasi ikpa yi, erieen̄ Awaji iwa iraka obop mgbọ jaaba.

16. Keke orọ eji ebekọt itumu ibe ke Ebi Ata-Ikọ Jioba mikiluk igọọk ikan okup me ikpa Jọn 13:​34, 35? (Kpọ si ogugo.)

¹⁶ Fuk Jọn 13:​34, 35. Me chereyi, owuwa ebi ene kpekichieek inyi ge ge, mikikaan̄ si ochicha ejit me lek ebi ofifi ife. Ire, ebi eyi Jioba kpekup ikeya. Ema michubọk ima ge ge mè ikup me obọp ge. Ebi Ata-Ikọ Jioba enan̄a me esese esese ido mè ikaan̄ esese esese irek iluk ugwem. Ire, eji mikaan̄ esuuk mè ima me eden̄ kiji. Ire owuuk lek isi ntitiin̄ me ofifi ere ni? Ofifi mgbọ, osisi ntitiin̄ me ofifi ere, keek mkpọ ofolek ima mè mgbaan̄-mbọp okup me etete bọn ute irieen̄ mè ibaan̄. Eyi ikijeen̄ ibe ke Jioba ikisasa ebi Ata-Ikọ kan̄ irọ nkeek kan̄ iso me chereyi. Ire eji ikikeek ibe ke Jioba omaan̄ melek ebi eyi kan̄, motap ubọk inyi eji ekup enye ekegbe utoon̄-ejit enyi ọmọ ikerere me mgbọ ufialek.

KATELE JIOBA MGBỌ GEEGE

17-18. Keke ore usini ufialek eji ebekọt ichichini, kubọk Pita, keke ke eji ebekọt itumu?

¹⁷ Eji ekiluk me mgburudun̄ mgbọ, me mgbọ ufialek òmimin enenen okupbe, eya orọ, mgbọ yi moyọt inyi otutuuk kiji. (2 Tim 3:​1, 13) Eji mekọt ichichini ofifi irek oyọyọt. Ntitiin̄ Jioba mokọt irọ ntumu-mfieek eyi eji kpegobo itet ijaan̄. Mè iyaka ire, gwun̄ ute ge mokọt irọ inu oborọ ibe eji ebọkọ ukwook. Usini mgbọ, eji kpebegwat lek imun̄ inu eji ebekọt irọ isasa inan̄a me emen ufialek kiji, mè iyaka ire eji kpebegobo itet inu orọrọ eji ekije itibi usini ufialek.

¹⁸ Ikerere ibe ke eji mekọt ikifieek ejit mè ikikaan̄ sasaak bak me lek inu okibọkọ irek me ugwem kiji, eji mekọt ikup inye ikigbe utoon̄-ejit inyi Jioba. Bak me lek keke ni? Bak me lek eji miriọọn̄ ibe ke ọmọ ore ogwu Orom mè ire si Ogwukaan̄ Baibul, eji miriọọn̄ ibe ke Ebi Ata-Ikọ Jioba ire ebi eyi kan̄. Kubọk Pita otumube inyi Jisọs, eji mekọt itumu si inyi Jioba ibe: “Ìre ekene ke eji ebegọọk? Îre owu okaan̄ ikọ òkinyi ene ugwem ikakaan̄ge itata.”