Toon̄ Ejit Me Lek Jioba, Awaji Ogwu Obebene Ichit

1. Usini ufialek echi owa ke Jobu oje itibi?

JOBU, ogwu enerieen̄ okakaan̄ ichechieek ichichini owuwa ufialek. Ichep otutuuk nsabọn mè mkpọ nkaan̄ kan̄, ifiak orukan̄ si. Isọkọ me lek si, bak me lek otutuuk ijo inu echi orọrọ ọmọ, ebi ene kpeyaka ikijeen̄ ọmọ ulibi. Owuwa me lek inu ebi unene kan̄ etumube ikatap efuuk me owot kè Jobu. Nwa kan̄ si itumu inyi ogọt ibe ‘igbo Awaji mè ikwu.’ (Jobu 2:9; 15:​4, 5; 19:​1-3) Ufialek chi kè okọt orọ ibe Jobu ikayaka itoon̄ ejit me lek Awaji mè ikaan̄ cheche ibe ke Awaji ikpokọt ibem ebi imama mè ikiriaak ọmọ.

2-3. Eji esikibọkọ ukwook, keke ke eji ebekọt ibene ikikeek, keke si ke eji ebekween̄ inan̄a me lek ikpa Jobu?

² Eji ekiluk ‘me mgburudun̄ mgbọ, mgbọ ebekichichini owuwa ufialek.’ (2 Tim 3:1) Ọmọ orọ, kubọk Jobu, eji mekọt ikichichini owuwa ufialek. Owuwa ufialek isinu inyi eji me okike mgbọ ge, eji mekọt ikifieek ejit mè ikaan̄ sasaak enenen ire lek eji mebenebe ikikeek ibe ke ugwem kiji ikpoyaka inwọn. Eyi mokọt irọ ibe eji ebene ekekeek ibe ke Jioba ikayaka ima eji, ke ọmọ si ikaweek itatap ubọk inyi eji.

³ Ire inu iwuuk lek ikup owu me lek ikeya, kawọ lek. Jobu inikween̄ ibe ke Jioba ikakijuuk ebi ikigbe utoon̄-ejit inyi ọmọ itele. Eji si mekọt itoon̄ ejit inye me lek Jioba mè ichieek inye ibe ke ọmọ motap ubọk inyi eji mè ikpe eji mkpukpe si. Inyi eji ekọt erọ eyi, eji mekween̄ ubọk ikpa Jobu osabe ijeen̄ eji ibe eketoon̄ ejit me lek Jioba mgbọ geelek mije irebe Awaji Ogwu Obebene Ichit. Eji mekween̄ si ubọk isabe ijeen̄ eji ibe ke Awaji kiji ogwu okakaan̄ unye geelek mokọt inwene mkpọ okibọkọ irek me inyọn̄ yi me chereyi inyi nkeek kan̄ irọ iso mè ibem si ebi eyi kan̄ me irek geelek.

SETAN SI OGỌGỌỌK EMA INU

4. Me chinichini ekaan̄be me emen inyọn̄ ike ikpa Jobu okpabe, ebi owa egbaan̄ ititiin̄?

⁴ Usen ge, “ebi osat Awaji enunu inikeke me isi” Awaji me emen inyọn̄. “Setan si ogọgọọk ema inu.” (Jobu 1:6) Eyi ore adasi mgbọ erieen̄ yi “Setan” osibibe me emen Baibul. Egwen Yọk erieen̄ yi mije, ọmọ ore okpan okpan ogwu ochicha Jioba mè ire si ogwu okikeke ikeme ọmọ. Awaji itele ibe Setan igọọk ikup me chinichini ya ubọk geelek ibe ke ikayaka ikigbe utoon̄-ejit inyi ọmọ. Setan ikana ogwu ochicha Jioba, ebi osat mè ebilene. Eji eriọọn̄ ibe ke Setan ikayaka ire ge me lek ebi ototun̄ ukan̄ Jioba me emen inyọn̄ bak me lek inu Jioba otumube ofolek kan̄ me ikpa Ibebene 3:15. Eya orọ, Setan ikare ge me lek ebi osat me emen inyọn̄ ebi “ogwu enenwaan̄ ya” okekebe ichit chieen̄.

5. Me chinichini ekaan̄be me emen inyọn̄, keke ke eji ekween̄ me lek inu Setan otumube mè ubọk Jioba osabe ifọọk ogọt otu?

⁵ Jioba iweek ibe eji eriọọn̄ inu obọbọkọ irek me chinichini ya erọbe me emen inyọn̄, ọmọ orọ itapbe mfufuk ya me emen Baibul. Mkpọ Setan otumube ijeen̄ ibe ke ọmọ ire atalek ogwu mkpikpak, ke icha si ebi ikitọbọ ebum inyi Jioba. (Jobu 1:9; sa tọt me lek Ichichili 12:10.) Eji mikween̄ inan̄a me lek chinichini ekaan̄be me emen inyọn̄ ya ibe ke Jioba ikisa unye kan̄ irọ mkpọ me oniin̄ onenen mè itat. Ikijeen̄ si ibe ke Jioba, Awaji ogwu okakaan̄ unye ichit mokọt itele ibe ene irọ mkpọ iweekbe irọrọ, mè iyaka ire igban ene ibe ikarọ inu ikaan̄be me ejit irọrọ.

JIOBA IKAKITELE IBE SETAN IRỌ OTUTUUK INU IWEEKBE IRỌRỌ

6. Ike owa ke Jioba osa ijeen̄ ibe ke ire ọmọ okaan̄ unye ntọ-ikọ me chinichini erọbe me emen inyọn̄? (Jobu 1:​7, 8)

⁶ Fuk Jobu 1:​7, 8. Me chinichini ekaan̄be me emen inyọn̄, Jioba ido Setan ibe: “Ìre omun̄ ubọk ogwu ikwaan̄ n̄a Jobu okupbe?” Sa me ibebene usem ikeyi, Jioba ijeen̄ ibe ke ire ọmọ okaan̄ unye ntọ-ikọ me chinichini ya, ke ọmọ iriọọn̄ si inu Setan okaan̄be me ejit. Jioba iriọọn̄ ijaan̄ lek ibe ke Setan ikiweek irọrọ Jobu ijo inu. Kè eji ekpọ-nu ubọk Jioba osabe unye kan̄ itap ubọk inyi Jobu.

7. Igọọk me lek inu okup me ikpa Jobu 1:​10, 11, keke ke Setan otumu ofolek mkpọ orọrọ ebi ene ekitọbọ ebum inyi Jioba?

⁷ Fuk Jobu 1:​10, 11. Jioba ire Awaji ogwu obebene ichit me inyọn̄ mè ijọn̄, ikisa unye kan̄ irọ mkpọ si me oniin̄ geelek iweekbe. (Jeri 32:17; Dan 4:35) Ire, Setan itumu ibe ke Jioba ikakisa unye kan̄ irọ mkpọ me oniin̄ onwọnwọn ichit. Ikup kubọk Setan ikitumu ibe ke Awaji ikinyi ebilene ata mkpọ ufuna etọbọ ebum enyi ọmọ, ike inyibe Jobu. Inu Setan otumube si ikijeen̄ ibe ke ebi ene ekiriaak Jioba gaalek bak me lek mkpọ echi ikirọ inyi ema. Ike owa ke Jioba osa ifọọk ọmọ otu?

8-9. Keke ke Jioba obe mè Setan ikarọ, keke orọ itumube ikeya? (Jobu 1:12) (Kpọ si ogugo.)

⁸ Fuk Jobu 1:12. Jioba inyi Yọk irek ibe irọ mkpọ ikaan̄be me ejit, ire, inyi ọmọ okike iboyaka. Ofolek Jobu, Awaji itataba Yọk ubọk me utọn̄ ibe: ‘Kachak ubọk me lek ugwem kan̄.’ Jioba ikup me isi otutuuk ebi ikup me chinichini ya inyi Yọk ida ya. Setan isiki ibot mije, ikakaan̄ unye ibosa irọ inu eyi Jioba obe mè ọmọ ikarọ, ikachak ubọk me lek ugwem kè Jobu. Ikeya si ke ikup me chereyi, ire gaalek mkpọ Jioba otelebe ibe Setan irọ ke ibokọt irọ. Jioba isa unye ntọ-ikọ kan̄ mè unye ikaan̄be isa ibem Jobu mè ijeen̄ ibe ke ọmọ ire ogwu okirọ mkpọ onenen mè ire si ogwu ima.

⁹ Adasi ntọ-mkpọ Setan ikatet mun̄. Jobu ikukup inye ikigbe utoon̄-ejit inyi Nte kan̄ ogwu okup me emen inyọn̄. (Jobu 1:22) Ire, Setan ikatele itọtọ Jobu ikpọ.

10. Keke orọ Jioba otelebe ibe Setan ikpọk itọ Jobu ikpọ? (Jobu 2:​2-6)

¹⁰ Fuk Jobu 2:​2-6. Setan ichubọk iweek irọrọ ibe Jobu ikayaka itọbọ ebum inyi Jioba. Itumu ibe ke Jobu mogbo Awaji inyi ọmọ ikọt inyan̄a ugwem kan̄. Inyi ikpọk mbum ibe ke inu Setan otumube ire ataak, Jioba itele ibe Setan irọ inyi Jobu ifiak ijo orukan̄. Ire, Jioba ikpọk inyi Setan ida ibe: “Kachak ubọk me lek ugwem kan̄.” Setan ikpokọt ikpan̄ Jobu mije, Jioba ikpochieek ibe irọ ikeya. Jioba ikpọk ijeen̄ ibe ke ọmọ ire Awaji ogwu okakaan̄ unye ichit mije, ikachieek ibe Setan irọ iraka okike inyibe ọmọ ida.

JIOBA IRỌ INYI UFIALEK JOBU ITA

11. Mgbọ Jioba osan̄abe ufialek Jobu isan̄a, ike owa ke isa igbana ọmọ? (Jobu 42:​10-13)

¹¹ Fuk Jobu 42:​10-13. Mgbọ Jobu ojeen̄be ibe ke ọmọ ibokukup inye ikigbe utoon̄-ejit inyi Jioba, Jioba ikayaka ichieek ibe Setan itọ ọmọ ikpọ. Jioba ikachieek ibe Jobu ogwu usun̄ kan̄ ogbegbe utoon̄-ejit ikpọkpọk ikibọkọ ukwook. Setan ikakaan̄ unye isasa igban Jioba ibe ikabem mè igbana Jobu.

12. Nyi inu njeen̄ ge eyi okijeen̄ ubọk Jioba okijeen̄ unye kan̄ me ugwem ebi itotoon̄ ejit me lek kan̄.

¹² Me ota mgbọ yi, Jioba isa unye kan̄ inyan̄a owuwa ebi usun̄ kan̄. Kubọk inu njeen̄, me acha 1945, ebi akọn̄ mitet Ebi Ata-Ikọ Jioba isoso efit ene iba mè akọp ita (230) me unye ibe eje ujọn̄ọ ije enan̄a me uwu mkpọn ge me Germany efo agba okwaan̄ ge mije ekiweek ibe ema ekwaan̄. Ire, ene geege me lek kiban̄ ikakwu. Ema mige mkpọ ofolek inu ema ejebe itibi mè itumu ibe ke Jioba inyan̄a ema ubọk inyan̄abe nsabọn ebi Iburu ita isibi me emen ukan̄ mè ekakaan̄ge olu oduku geege me lek kiban̄. Ke Jioba inyan̄a ema si ubọk inyan̄abe Danien isibi me emen udọn̄ egbe àtat. Inu ema echichinibe isak enenen, ire, Jioba inyi ema unye inyi ekọt eme. Ichechieek kiban̄ si inye igbaalek. Bene me mgbọ ya fo isi, ema etutumu ifieek ikukup inye ikitọbọ ebum inyi Jioba. Ema etumu si ibe ke mkpukpe omimin ichit ema ebekọt ikaan̄ ire ikọkọt ikup inye ikitọbọ ebum inyi Jioba ire mgbọ geelek.​—Sa tọt me lek Danien 3:27; 6:22.

13. Kpasi unye-ejit ke obokọt ikaan̄ ike okichichini ntọ-mkpọ? (Kpọ si ogugo.)

¹³ Eji si mekọt ikibọkọ ukwook bak me lek ufialek eji ekije itibi. (1 Pita 5:​8-10) Usini mgbọ, efuuk mokọt ita eji me owot bak me lek ikup kubọk ufialek kiji ikakita. Eji esiweek lek kiji imun̄ me mbet irek okup ikeya, eji mekọt ikeek inu Jobu ojebe itibi. Eji etoon̄ ejit enye me lek Jioba ibe ke ikaan̄ unye isasa itap uyaka me lek ukwook eji ekibọkọ. Ọmọ morọ ikeya si me mgbọ keyi mè iyaka ire me emen aya inyọn̄ me mgbọ okup me isi. Jioba isun̄ mgbọ ibofiat inyọn̄ mkpikpak yi, mgbọ ya isire, ikpochieek ibe ikerere egwe ge itoon̄ me inyọn̄!

JIOBA IMA EBI USUN̄ KAN̄ IGBEGBE UTOON̄-EJIT

14-15. Ike owa ke ikpekpe ebi usun̄ kan̄ igbegbe utoon̄-ejit mkpukpe okikup me lek Jioba? (Jobu 14:15) (Kpọ si ogugo okup me adasi isi ikpa yi.)

¹⁴ Fuk Jobu 14:15. Nte kiji ogwu okup me emen inyọn̄ ichubọk ima ebi igbegbe utoon̄-ejit inyi ọmọ. Imọnọ ema ibene enenen ire lek iweekbe ijojomo ema me mkpa inu me ugwem. Mojijaka mkpa mè unaan̄ geelek ikisa ijet ebi ene.​—Asaya 65:17.

¹⁵ Ikerere ibe ke ufialek Jobu ita, iluluk si me ijo inyọn̄ eyi Setan okikpulu. Ire, Baibul itumu inyi eji ibe ke Jioba ikpe Jobu mkpukpe me oniin̄ okup uyeke uyeke. Igwa Jobu mè inyi ọmọ owuwa ata mkpọ igak echi iwuukbe lek ikaan̄. Ire, ugbana cha ire sọntiik me lek ugbana echi Jioba obogbana Jobu me mgbọ okup me isi. Jioba ijeen̄ ibe ke ọmọ ichubọk iweek ibe ebi igbegbe utoon̄-ejit inyi ọmọ ekebele ejit mè enwọọn̄ si ugwem. Me atikọ, Jioba mokpe otutuuk ebi igbegbe utoon̄-ejit inyi ọmọ mkpukpe, ema menwọọn̄ ugwem me aya inyọn̄ ire mgbọ ikakaan̄ge itata. (Ichi 21:​3, 4) Jioba ichubọk iweek irọrọ ikeya, kpunu si ogwu obokọt igban ọmọ mije, ọmọ ire Awaji ogwu obebene ichit me emen inyọn̄ mè inyọn̄ ijọn̄. Ikekeek ubọk Jioba obosa igbana eji mokọt ikat eji ejit me mgbọ eji ekichichini ufialek!

16. Keke si oborọ ibe eji etoon̄ ejit me lek Jioba kubọk Awaji ogwu obebene ichit?

¹⁶ Ubọk geelek ibe ke Jioba igbana Jobu sa me inyinyi ọmọ ujọn̄ọ ugwem, Jobu ikwu si. Ire, Jioba mokọt ijomo Jobu inu me ugwem mije ọmọ ire Awaji ogwu obebene ichit mè ikaan̄ unye ichit. (Ikan 32:39) Jioba isun̄ mgbọ ibojomo ebi ima kan̄ ikwakwaan̄ inu me ugwem. Mgbọ ya isikem, kpunu ene geege obogban Jioba ibe ikajomo ema.​—Rom 8:​38, 39.

KAAN̄ UTOON̄-EJIT ONYENYE ME LEK JIOBA

17. Keke okijeen̄ ibe ke Setan ikpokọt ikpan̄ otutuuk ebi eyi Jioba mgbọ yaage?

¹⁷ Inan̄a me lek mfufuk Jobu okup me Baibul, eji mikween̄ owuwa inu orọrọ igbebe ibe eji etoon̄ otutuuk ejit kiji me lek Jioba. Ejit ibele eji enenen ibe ke Setan ikpokọt ijijaka otutuuk ebi eyi Jioba mgbọ yaage! Me chereyi, mkpọ ososo efie ene onaan̄ge ekigbe utoon̄-ejit inyi Jioba kubọk ebi usun̄ kan̄. Eyi okijeen̄ ibe ke Jioba, Awaji ogwu obebene ichit ichubọk ikaan̄ unye enenen. Owuwa mgbọ, eji mikimun̄ ibe ke nroon̄ akọn̄ geelek erombe isasa itim ebi usun̄ Jioba akọn̄ me lek ikakireke. (Asaya 54:17) Owuwa ebi mkpulu mè ebi ibot uwu uriaak misa igbagban ebi usun̄ Jioba ibe ekayaka itọbọ ebum inyi ọmọ mè ekayaka ilook ata etip si. Ire, ema kpekọkọt irọ inu ema ekaan̄be me ejit bak me lek Jioba ikitatap ubọk inyi eji. Ikakaan̄ mkpọ geege obokọt igban eji ibe ekalook ebi ofifi ife ibe ke ire Jioba ore ata Awaji me atikọ, ke Setan ire ogwu ataak mè ogwu okikpan̄ ene. Ikerere mkpa ikpokọt igban eji mije, Jioba mojomo ebi geelek igbegbe utoon̄-ejit inyi ọmọ inu me ugwem.​—Osia 13:14.

18. Keke orọ eji ebesa me unye-ejit ikikup ikpọ mgbọ okinu me isi?

¹⁸ Ikekigwu nkeek ikom me lek inu eji efukbe me ikpa Jobu morọ inyi ichechieek kiji inye eyi obotap ubọk inyi eji ekọt esa me unye-ejit ekekup ekpọ mgbọ okinu me isi mè ekakaan̄ ukpook geege. Me mgbọ ufialek ilile, ebi eyi Awaji mekup kubọk ebi kpekaan̄ge ogwu obotap ubọk inyi ema, mokup kubọk ke Setan mè ebi melek kan̄ ebetitim igak ema si. Ire, ike ikupbe me mgbọ kè Jobu, Jioba mojeen̄ ibe ke ire ọmọ okaan̄ unye ntọ-ikọ, ikpochieek ibe Setan itap eji unan me lek eyi obobia ire mgbọ geelek. Mgbọ Jioba obotap uyaka me lek ufialek echi Setan okirọ ibe ebilene ekeje etibi iriaak enenen. Jisọs motap Yọk mè ebi ijo ekwukwu kan̄ me emen udọn̄ ikakaan̄ge okputut me obop acha ge. (Luk 8:31; Ichi 20:​1-3) Me ota kan̄, Jisọs mojijaka Setan mè otutuuk ebi melek kan̄. (Ichi 20:10) Ike Jioba otumube, Jisọs mokpukpuku ibot kè Setan. Iin̄, Jisọs mojijaka Setan ire mgbọ geelek.​—Ibeb 3:15; Rom 16:20.

19. Ike owa ke Jioba obosa igbana ebi geelek itotoon̄ ejit inye me lek kan̄? (Kpọ si ogugo.)

¹⁹ Eji ekikup ikpọ mgbọ inyọn̄ yi obokana ayaya, mgbọ eji ebenwọọn̄ ugwem ososo mè ikaan̄ ata ubelejit si. Ugwem motop enenen igak ubọk eji ekeekbe. Jioba ichieek use ibe: ‘Kpọ, nkakirọ inyi otutuuk inu ikana ayaya.’ (Ichi 21:5) Keke ke inu yi Jioba otumube osibi? Isibi ibe ke Setan mè ebi ijo ekwukwu kan̄ kpebeyaka ikọt irọ ebilene mkpikpak geege, kpebekọt ibieen̄ ebi ene ibe erọ inu ikpak si. Mgbọ ya, eji mekaan̄ ata utelelek! Eji kpebeyaka ikaan̄ sasaak geege eyi oborọ ibe eji ekalaak me eririeen̄. Ebi ibenwọnọ akọn̄ Amagedọn memun̄ owuwa inu ukechieen̄. Megwa otutuuk ebi lek ikanyege. Isọkọ me lek si, ebi ima kiji ebi ikwakwaan̄ mejomo me mkpa. Me mgbọ ya, eji mechubọk inwọọn̄ ugwem ike Jioba, Nte kiji ogwu okup me emen inyọn̄ oweekbe!

20. Keke ore ntumu-mfieek kwun̄?

²⁰ Ike eji ekisa me ukarajit ikime ufialek geelek eji ekichichini me ota mgbọ yi, kè eji etumu efieek ikukup inye ikitoon̄ ejit ojot ojot me lek Jioba mè ekejeen̄ ibe ke eji miweek ibe ọmọ ikikpulu eji. Kè eji ekup enye ekejeen̄ ibe ke eji mima Jioba Nte kiji mè ekejeen̄ si ibe ke mkpọ Setan okitumu ofolek Jioba mè ebi usun̄ kan̄ ire ataak. Me atikọ, eji mekọt ikikpọ chieen̄ iluluk mgbọ Jioba, Awaji ogwu obebene ichit, ogwu ochuchubọk iweek igbagbana ebi igbegbe utoon̄-ejit inyi ọmọ obokpulu eji me mgbọ okup me isi!