Kawuuk Inu Okukup Ufiak Ichit

1-2. Ike owa ke inu okukup ufiak obokọt irọ ibe eji esan̄a chieen̄ me lek inu okukup ufiak ichit?

IRE okeek mgbọ ochubọk iweek itoto chieen̄ me lek inu okirọ? Mokọt ire ibe ke ikaan̄ inu osasan̄a chieen̄ kwun̄ me lek inu okirọ eyi okukup ufiak enenen. Kubọk inu njeen̄, keek-nu ibe ike okikọp uji, fun kwun̄ onenitaan̄ ida. Mokọt ire ibe ke ogwen ya ikup ufiak, ire, oriọọn̄ me okike mgbọ ya ibe ke ogwen ya mosan̄a chieen̄ kwun̄ me lek inu okukup ufiak ichit, orere, uji ya okikọp.

² Otutuuk kiji mikaan̄ owuwa mkpọ echi okukup ufiak irọrọ. Eji miriọọn̄ si ibe ke inu okukup ufiak ichit eji etobe chieen̄ me lek ire irọrọ nkeek Jioba.a (Mat 6:33) Kubọk ebi ikikọp uji, ebi eyi Jioba mikisa ikekeek mkpọ ofolek inu echi obokọt imọnọ mgbọ kiban̄ mè irọ ibe ema esan̄a chieen̄ me lek inu okukup ufiak ichit.​—Urọk 4:25; Mat 6:22.

3. Ike owa ke ibot usem yi obotap ubọk inyi eji?

³ Kpunu ene geege me lek kiji oboweek ibe inu geege isan̄a chieen̄ kan̄ me lek itoto ntọbọ-ebum Jioba kubọk adasi mkpọ me ugwem kan̄. Ire, owuwa mkpọ mokọt irọ ibe eji esan̄a chieen̄ me lek itọtọbọ ebum inyi Jioba. (Luk 21:​34-36) Eya orọ, inyi eji ekup enye eketo itọtọbọ ebum inyi Jioba kubọk adasi inu me ugwem kiji, kè eji ekpa (1) inu echi obokọt irọ ibe eji esan̄a chieen̄ me lek ntọbọ-ebum kiji, (2) ubọk Jisọs osabe itim igak inu echi mogban ọmọ ibe ikarọ nkeek Awaji, mè (3) ubọk eji ebekọt irọ ike Jisọs orọbe me chereyi.

KEKE ORE INU ECHI OBOKỌT IRỌ IBE EJI ESAN̄A CHIEEN̄ ME LEK NTỌBỌ-EBUM KIJI?

4-6. Keke ore inu echi obokọt irọ ibe eji esan̄a chieen̄ me lek ntọbọ-ebum kiji?

⁴ Otutuuk kiji mikaan̄ owuwa mkpọ echi okukup ufiak inyi eji. Kubọk inu njeen̄, eji mekọt ikifiak orukan̄, iweek itatap ubọk inyi ebi ototun̄ ukan̄ kiji mè iyaka ire, irọ ufiak eyi lek kiji. Me atikọ, inu chi ire mkpọ echi okukup ufiak mè iweek mgbọ kiji. Ire, inu chi mokọt ikput eji irọrọ mkpọ inyi Jioba. Eyi mokọt ibọkọ irek ire eji ikikeek mkpọ ofolek inu chi mè ikifiat owuwa mgbọ isasa irọ ema ire lek eji kpebeyaka ikaan̄ mgbọ mè efuuk isasa irọ mkpọ inyi Jioba.

⁵ Isọkọ me lek, owuwa kiji ire ebi iluluk me ere owuwa inu afa okibọkọ irek, ere irek iluk-ugwem oyọtbe enenen, mè ere orukan̄ okitobo ene okigwat lek ichon ikana. (2 Tim 3:1) Eji esije itibi inu chi, mokọt irọ ibe eji ekaan̄ owuwa sasaak mè ekekeek mkpọ ofolek mgbọ geelek.

⁶ Mokọt ire ibe ke eji miriọọn̄ usini ene ebi inu chi orọn̄be itet mè inwene ugwem kiban̄ isan̄a kpai. Eya ire inu obokọt irọ inyi ene ikaan̄ uga sasaak. Jioba ikarom ebilene ibe ekebọkọ ukwook mè iyaka ire ekpọkpọk ekekaan̄ sasaak. Mokọt ikup me lek usini ene kubọk ke kpunu utop me lek ugwem ema ekebiluk bak lek ugwem kiban̄ ikayaka ikije ike ema eweekbe. Eyi irọ ibe usini ene ekerọ owuwa inu isasa inwọọn̄ lek inyi ekọt ewuuk ufialek kiban̄. Keke ke eji ebekọt irọ mè ire eji eweek lek kiji imun̄ me mbet irek chi? Kè eji ekween̄-nu inu otatap ubọk inyi Jisọs itim igak inu echi morọ ibe ọmọ ikakọt irọ nkeek Awaji.

KEKE KE JISỌS ORỌ ISASA ITO IRỌRỌ NKEEK JIOBA KUBỌK ADASI INU ME UGWEM KAN̄?

7. Keke ore inu echi mogban Jisọs ibe ikarọ nkeek Awaji?

⁷ Owuwa mkpọ mokọt irọ ibe Jisọs isan̄a chieen̄ me lek irọrọ nkeek Jioba, kubọk rumurumun̄ mkpulu mè inu okibọkọ irek me mgbọ ya. Owuwa ebi ene me mgbọ ya ire ebi ugbọọn̄ mè ebi orukan̄. (Mat 14:14; Mak 14:7) Ema mibọkọ ukwook me ubọk ebi Rom mè ebi Ju ogbo kan̄. Me mgbọ ebi ene emun̄be ibe ke Jisọs ikaan̄ unye irọrọ ikwaan̄ ukechieen̄, ema miweek irọrọ ọmọ ubọọn̄. (Jọn 6:​14, 15) Isọkọ me lek, Setan itọ Jisọs ikpọ mè iweek irọrọ ọmọ ogwu ubọọn̄ linyọn̄ yi. Jisọs mokọt ibene ikikeek ibe ke ọmọ mokọt ikpulu linyọn̄ yi ijaan̄. (Mat 4:​8, 9) Jisọs si kè okọt orọ ibe inu ifet me lek kan̄ me mgbọ Pita otumube inyi ọmọ ibe: “Okaan̄-ene, Awaji ikachieek! Inu yi ìkporọ owu!”​—Mat 16:​21, 22.

8. Keke otap ubọk inyi Jisọs ibe ito irọrọ nkeek Awaji kubọk adasi inu me ugwem kan̄?

⁸ Keke otap ubọk inyi Jisọs ibe ito irọrọ nkeek Awaji kubọk adasi inu me ugwem kan̄? Mkpọ ita otap ubọk inyi ọmọ. Ge, ikeek mkpọ kubọk Jioba. (Jọn 8:28; 14:9) Òso iba, itap lek idọk me ijejeen̄ mè ilolook ata etip inyi ebi ene. (Mat 9:35) Òso ita, iriọọn̄ ijaan̄ inu okukup ufiak ichit iborọ. (Jọn 4:34) Jisọs ijit ntọ-mkpọ kè Setan. Ikachieek me lek ikọ Pita otumube inyi ọmọ si ubọk geelek iriọọn̄be ibe ke Pita ikiweek itatap ubọk inyi ọmọ, mije, ikare inu Jioba oweekbe inyi ọmọ ire eya. (Mat 4:10; 16:23) Jisọs ijit itetele ibe inu ebi ene ekikeek, ekitumu, mè iyaka ire ikirọ isan̄a chieen̄ kan̄ me lek irọrọ nkeek Awaji. Me chereyi, inu echi obokọt ikput eji ibe ekarọ nkeek Jioba mokọt ikup esese me lek echi Jisọs ochichinibe. Ire, sa me irọrọ inu ita chi Jisọs orọbe, eji mekọt ikup inye ikirọ nkeek Jioba.

IKE OWA KE EJI EBESA ITO JIOBA KUBỌK ADASI INU ME UGWEM KIJI?

9. Keke ke ikpa Ebi Efesọs 5:17 obe mè eji erọ?

⁹ Kween̄ ikekikeek mkpọ kubọk Jioba. Irọrọ ikeya motap ubọk inyi eji eweek eriọọn̄ inu Jioba okiweek ibe eji erọ. (Fuk Ebi Efesọs 5:17.) Eji mekọt ikween̄ inu okineme Jioba sa me ikekifuk Usem kan̄ mè ikekigwu nkeek ikom me lek. Ikerere me mgbọ Baibul ikatumu mkpọ ofolek irek eji ekije itibi, eji mekọt iweek iriọọn̄ si inu Jioba oweekbe ibe eji erọ. Ike owa ni? Sa me ikwekween̄ ubọk Jioba okikeek mkpọ mè ikukup me mbem-lek itatap inu eji ekikween̄ me ikwaan̄.

10. Ike owa ke eji ebekọt iriọọn̄ ubọk Jioba okisa ikeek mkpọ?

¹⁰ Eji mekọt ikween̄ mkpọ ofolek ubọk Jioba okikeek mkpọ sa me ikekikween̄ Baibul mè ubọk ikisa irọ mkpọ me lek ebilene. (Jeri 45:5) Ike eji ekifuk mfufuk chi, eji mekọt ikido lek kiji idodo kubọk: ‘Keke ke inu yi okijeen̄ emi ofolek Jioba? Ike owa ke mbasa irọ inyi nkọt nkemun̄ mkpọ ike Jioba okimun̄?’ Me atikọ, ike Jioba okimun̄ mkpọ ibene igak eyi kiji. (Asaya 55:9) Eya orọ, eji mebeek ọmọ ibe ijeen̄ eji ubọk eji ebesa ikirọ nkeek kan̄. (Itọn̄ 143:10) Eji mebeek si ibe itap ubọk inyi eji ekọt ekekeek mkpọ kubọk kan̄.​—1 Jọn 5:14.

11. Keke ke Jioba oweek ibe eji erọ?

¹¹ Jioba iweek ibe eji ekup me mbem-lek ekekpọ mgbọ ukot yi obonu me nkana-ngwook. Ọmọ orọ, ikaweek ibe eji esan̄a chieen̄ me lek inu echi okukup ufiak ichit. (Mat 24:44) Ikaweek ibe eji emalek ekaan̄ sasaak ofolek inu geege. (Mat 6:​31, 32) Eya orọ inyibe eji ata nteme ofolek inu eji eberọ eji esikaan̄ sasaak ofolek akpalek kiji, ikwaan̄ kiji, uwu kiji, mè iyaka ire ebi ototun̄ ukan̄ kiji. Ire eji ido Jioba ibe inyi eji iriọọn̄-inu mè efuuk isasa ime ufialek kiji, monyi eji.​—Itọn̄ 55:22; Urọk 3:​5-7.

12. Keke obotap ubọk inyi eji ekọt ekebele ejit ikerere me mgbọ ijo mkpọ okibọkọ irek me inyọn̄ yi? (Matiyu 5:3)

¹² Tap lek dọk me lek ikwaan̄ kè Jioba. Otutuuk kiji mikikaan̄ sasaak ofolek inu okibọkọ irek me inyọn̄ yi, ire, eji kpekaan̄ unye itatap uyaka me lek. Eya orọ, eji mekup inye ikitọbọ ebum inyi Jioba, mije, eyi mokitap ubọk irọ inyi eji ekamalek ikaan̄ sasaak ofolek inu chi. Ire eji ikup inye ikirọ ibe mgbaan̄je kiji melek Jioba inye, eji mekaan̄ ubelejit bak me lek ire inu Jioba oweekbe ibe eji ekerọ ire eya. (Fuk Matiyu 5:3.) Eji mekọt ikpọ chieen̄ me lek ufiak emen ekwukwu kiji, orere, ufiak irọriọọn̄ Awaji sa me ikekikween̄ Usem kan̄, mè ikekitap efuuk ikirọ inu geelek eji ebekọt irọ me ikwaan̄ kan̄. Ikekirọ inu chi ikineme Jioba, mè ire ata oniin̄ isasa mgbọ kiji irọ mkpọ ijaan̄.​—Urọk 23:15.

13. Ike owa ke eji ebekisa mgbọ kiji irọ mkpọ me oniin̄ onwọnwọn ichit?

¹³ Kubọk ebi eyi Karais, eji metumu ifieek ikekisa irek geelek eji ekaan̄be isi ata ikwaan̄. (Efes 5:​15, 16) Baibul ikakpọkpọk ikitumu mkpọ eji ebekisa mgbọ kiji irọ egwe geelek. Ire, ikiteme eji si ibe ke ikup ufiak ibe eji ekekeek ejaan̄ ubọk eji ekisa mgbọ kiji irọ mkpọ sabum Jioba mofiatbe ijo ukot keyi. Ike owa ke eji ebesa mgbọ kiji ikirọ mkpọ me oniin̄ onwọnwọn ichit? Ire eji ikifiat owuwa mgbọ ikifuk mè ikigban̄ etip ofolek otutuuk ijo inu okibọkọ irek, eji kpebekito chieen̄ me lek inu echi okukup ufiak ichit. Morọ si ibe efuuk ita eji me owot, eji kpebekaan̄ si uyok uyok ejit me lek ntọbọ-ebum kiji. Inwọn ibe eji ekamalek ikifiat owuwa mgbọ ikifuk, ikikpọ, mè iyaka ire ikigban̄ ijo etip chi! Eji mejit ikekitele ibe etip chi ikimalek inyi eji sasaak. Sa me irọrọ ikeya, eji mekaan̄ mgbọ mè efuuk irọrọ mkpọ inyi Jioba. Eji miriọọn̄ ibe ke ikup ufiak ibe eji ekekeek inu eji ebekọt irọ igbaalek me ikwaan̄ uko kiji, kubọk ikekigọọk owuwa ebi ene ikween̄ Baibul. Eji migobo itet ibe ke ikup ufiak ibe eji ekesa irek geelek etap ubọk enyi ebi ene inyi ema ekọt ‘eriọọn̄ atikọ mè ekaan̄ unyan̄a.’​—1 Tim 2:4.

14. Me oniin̄ okukup ke ikekisa mgbọ kiji ikitọbọ ebum inyi Jioba ijaan̄ okitap ubọk inyi eji? (Kpọ si ogugo.)

¹⁴ Eji esikisa mgbọ kiji ikitọbọ ebum inyi Jioba ijaan̄, motap ubọk irọ inyi eji ekawuuk atikọ eji ekween̄be ofolek inu orọrọ owuwa ijo mkpọ okibọkọ irek. Eji kpebemalek ikaan̄ sasaak eji esimun̄ afa, ugbọọri, mè iyaka ire orukan̄ bak me lek, eji miriọọn̄ ibe ke inu chi ekirọ nriran Baibul iso. Eji miriọọn̄ si ibe ke Jioba motap uyaka me lek inu chi sọnja mgbọ mè isa Paradais inu. Eji miriọọn̄ ibe ke Jioba motap ubọk inyi eji ekeme ufialek cha mè ekup dii ike eji ekiyaka lek imaan̄ me lek kan̄.​—Itọn̄ 16:8; 112:​1, 6-8.

15. Igọọk me lek mkpọ okukup me ikpa Pita Eyi Adasi 4:7 keke ke eji eberọ, bak me lek keke?

¹⁵ Kawuuk inu ochuchubọk ikup ufiak. Owuwa ebi ene me chereyi mikifiat mgbọ kiban̄ me lek inwọọn̄-lek, ema kpekikeek ibe ke inyọn̄ yi okinu me nkana-ngwook. Inwọnwọọn̄ lek ikalọ, ire, igbe ibe eji ejit ikekikeek mkpọ ubọk ebi ene me linyọn̄ yi ekikeek. (Fuk Pita Eyi Adasi 4:7.) Eji mekimun̄ inwọọn̄-lek me oniin̄ ogbegbe mè ikirọ si ata ntumu-mfieek kpan̄asi eji ebekifiat owuwa mgbọ mè efuuk kiji ikisa inwọọn̄ lek. Eji esikisa mgbọ kiji irọ mkpọ ijaan̄, mojeen̄ ibe ke eji ekikeek mkpọ kubọk Jioba. Mojeen̄ si ibe ke eji miriọọn̄ inu echi okukup ifiak ichit mè echi ikakup ufiak.​—2 Tim 1:7.

16. Keke ke eji ebekọt ikween̄ inan̄a me lek inu Jisọs orọbe sabum ikwube?

¹⁶ Jisọs ikawuuk mkpọ okukup ufiak ichit me ugwem kan̄. Ikerere me ikakwun̄ ikwube, iriọọn̄ ibe ke inu okukup ufiak ichit ire ọmọ igbegbe utoon̄-ejit inyi Jioba mè irọrọ nkeek kan̄. Eya orọ ibeekbe uriaak enenen. Ire, kpan̄asi ebi udun̄ kan̄ ebekup me ugwọk chieen̄ ikibeek uriaak, ema elalaak bak me lek uwọ-lek mè ufieejit.​—Luk 22:​39-46; Jọn 19:30.

17. Keke orọ owuwa ebi ene ekifiat mgbọ kiban̄ me Internet, keke obokọt irọ ema? (Kpọ si ogugo.)

¹⁷ Kubọk ebi udun̄ kè Jisọs, eji mekọt ikaan̄ ufieejit usini mgbọ. Bak me lek inu okibọkọ irek me mgburudun̄ mgbọ yi, eji mekọt ikaan̄ sasaak. Inyi ewuuk ufialek kiban̄, owuwa ebi ene ekifiat mgbọ kiban̄ me Internet ikiria ogugo inyi ebi unene kiban̄ mè ebi ototun̄ ukan̄ kiban̄, mè ikitumu inyi ema inu okibọkọ irek me ugwem kiban̄. Ekikpọ si owuwa fidio mè ikifit esese esese ifit. Ema ekifiat owuwa mgbọ mè efuuk kiban̄ egwe geelek mije ekiweek ayaya mkpọ ebefuk mè iyaka ire, ikpọ. Inyi eji ekarọn̄ inin̄ ufe yaage, eji mekido lek kiji idodo yi, ‘Ire inu nkirọ mè ikikpọ me Internet ikekitap ubọk inyi emi ni, mè iyaka ire, ire ikisan̄a chieen̄ n̄a me lek inu echi okukup ufiak ichit ni?’

18. Keke orọ ikupbe ufiak ibe eji ekesa me iriọọn̄-inu egobo mkpọ eji ekisa inwọọn̄ lek?

¹⁸ Inwọn inwọnwọọn̄ lek mè itatap efuuk usini mgbọ. Ire, igbe ibe eji esa me ugbalachieen̄ ekegobo inu eji ebekikpọ mè ikifit me TV mè Internet. Ebi ikijeen̄ fidio chi mikisan̄a echi ayaya isibi echi okijeen̄ inu afa mè eru barabat. Gwun̄ ute ge me Asia idasi ikikpọ mgbidim mgbidim fidio, sabum iriọọn̄be, ibebene ikikpọ fidio echi okijeen̄ eru barabat. Ike mgbọ ojebe, ibebene ikikpọ ogugo njak. Ire, ebi ugane ntitiin̄ mè ebi unene kan̄ me ntitiin̄ mitap ubọk inyi ọmọ irọ unwene. Gwun̄ ute ya isan̄a app echi ikisa ikpọ fidio cha me fun kan̄ mè itap okwukwek me lek mgbọ ikifiat me lek fun kan̄. Ukpatu yi ijeen̄ eji ubọk isabe ikup ufiak ire isasa me ugbalachieen̄ ikigobo inu eji ebesa inwọọn̄ lek.

19. Keke obokọt irọ ire eji imalek ifiat mgbọ ikinwọọn̄ lek?

¹⁹ Igbe ibe eji ekesa me iriọọn̄-inu erọ ata ntumu-mfieek ofolek inu eji ebesa inwọọn̄ lek mè mkpọ eji ebesa mgbọ iwọ-efuuk kiji irọ. Igbe ibe otutuuk kiji ekesan̄a mgbọ me lek ikwaan̄ eji ekirọ esa etap efuuk. Eyi morọ ibe eji ekekaan̄ unye akpalek. Ire, ire eji imalek ikifiat mgbọ ikinwọọn̄ lek, morọ ibe eji ekayaka ito chieen̄ me lek inu echi okukup ufiak ichit. (Filip 1:10) Otutuuk kiji metumu ifieek inu eji ge ge ebesa mgbọ kiji irọ mè ubọk eji ebesa irọ. Me mgbọ eji ebekirọ ntumu-mfieek chi, eji medo lek kiji ibe: ‘Ire mgbọ nkifiat me lek inu inwọọn̄-lek mè mkpọ nkisa mgbọ iwọ-efuuk n̄a irọ ikijeen̄ ibe ke nkup me ugwọk-chieen̄ ni? Ire nkimun̄ ijaan̄ ibe ke ndasi irọ inu echi okukup ufiak ichit ni? Ire mbem lek inyi nkana-ngwook ukot keyi ni?’

20. Kpasi oruru ke eji ebekaan̄ ire eji ikito chieen̄ kiji me lek inu okukup ufiak ichit?

²⁰ Eji mekaan̄ oruru ire eji itap efuuk ikitim igak inu geelek oborọ ibe eji ekayaka irọ inu okukup ufiak ichit, orere, itọtọbọ ebum inyi Jioba. (Asaya 48:17) Sa me ntap-ubọk Jioba, eji mekọt ime ufialek eji ekichichini me ugwem. Eji kpebemalek ikaan̄ sasaak bak me lek inu okibọkọ irek me inyọn̄ yi. Eji mekọt ijit si ikekifiat owuwa mgbọ me lek inu inwọọn̄-lek. Eya orọ, kè eji etumu efieek ikekikeek mkpọ kubọk Jioba, itatap lek me lek inu emen ekwukwu, mè ikekijeen̄ inan̄a me lek mkpọ eji ekirọ ibe ke eji miriọọn̄ inu echi okukup ufiak ichit. Sa me irọrọ ikeya, eji mekọt ito Jioba kubọk adasi inu me ugwem kiji, mè “ikaan̄ ugwem eyi òrere ugwem me atikọ.​—1 Tim 6:19.