Kè Ubọk Okijeen̄ Mkpọ me Uko Ikinwọn Igbaalek

1. Keke okup ufiak ibe eji ekween̄, bak me lek keke? (Timọti Eyi Òso Iba 4:2) (Kpọ si ogugo.)

JISỌS itumu inyi ebi udun̄ kan̄ ibe: “Ìje ìsi ìrọ inyi otutuuk ebi ido geelek me linyọn̄ ekana ebi ìkigọọk emi me udun̄, . . . mè ìjeen̄ ema inu, inyi ema ekerọ otutuuk inu geelek ntumube ibe enyi ekerọ.” (Mat 28:​19, 20) Ntọ-ubọk yi ikijeen̄ ibe ke igbe ibe otutuuk ebi eyi Karais ere ebi ikijeen̄ ebi ene mkpọ. Me atikọ, Jioba okitaba ebi ikiweek irọriọọn̄ ọmọ iriaak me lek kan̄, ebi osat si ekitap ubọk inyi eji eweek ema emun̄. (Ikwaan̄ 13:48; Jọn 6:44; Ichi 14:6) Ikerere ikeya, eji merọ inu ogbegbe ibe eji erọ. Keek-nu mkpọ ofolek ebi otuchieen̄ Pọọlu mè Banabas. Baibul ibe ke mgbọ ema esibe uwu ntitiin̄ ebi Ju me Aikoniọm, “ema mîtumu ikọ Awaji me unye me uwu ntitiin̄ ya. Owuwa ebi ene echechieek me lek kè Jisọs, ebi Ju mè ebi ekarege ebi Ju.” (Ikwaan̄ 14:1) Ikpọk mbum ibe ke Pọọlu mè Banabas mikween̄ ubọk ekijeen̄ ebi ene mkpọ ijaan̄. (Fuk Timọti Eyi Òso Iba 4:2.) Ikup ufiak ibe otutuuk ebi eyi Karais ekween̄ ubọk ekijeen̄ mkpọ ijaan̄.

2. Keke orọ ikikup me lek usini bọn ute kubọk ke ema kpebekọt ire ata ebi ijejeen̄?

² Usini ene mekọt ikikeek ibe ke ema kpebekọt ijeen̄ mkpọ ijaan̄ bak lek ema kpesi ikpa mè iyaka ire, ema ekikeek ibe ke ema kperiọọn̄ ubọk ekikpa mkpọ ijaan̄ inyi ene. Usini ene me Baibul si mikeek ibe ke ema kpebekọt ijeen̄ ene mkpọ ijaan̄. (Isis 4:10; Jeri 1:6) Usini ene kpekibele ejit me lek ijejeen̄ kiban̄ bak lek ikakisan̄a ata oruru isibi kubọk echi ebi ofifi ife. Ire, oruru eji ebekaan̄ ikayaka imaan̄ me lek gaalek efuuk eji etapbe si. Me atikọ, ikare otutuuk ebi eji emun̄be mè iyaka ire igọọk ikpa usem ebema ibọbọkọ etip kiji itap. Ike ewuukbe lek itumu, ire Jioba mè ebi osat ekitap ubọk inyi eji ekọt ekeweek ife cha emun̄. Ikerere ikeya, ikup ufiak ibe eji ekekpa ata etip enyi ebi ene me oniin̄ onwọnwọn ichit eyi obore ema ejit. Ibot usem yi mokpa mkpọ ita echi obotap ubọk inyi eji ere ata ebi ijejeen̄.

KAAN̄ ULỌK ME LEK EBI ENE

3. Keke orọ Jisọs okọtbe ire ejit ebi ikigban̄ ọmọ?

³ Baibul itumu ibe ke Jisọs “îriọọn̄ inu geelek òkup ebilene me ejit isan̄a kpai.” (Jọn 2:25) Eyi isibi ibe ke Jisọs iriọọn̄ ubọk ebi ene ekikeek mkpọ mè ubọk mkpọ okikup ema me lek. Jisọs ikọt ire ejit ebi ikigban̄ ọmọ bak me lek igobo ufiak kiban̄ itet. Imun̄ ibe ke ebi ene kpekaan̄ ata inorie emen ekwukwu, ema si ire ebi esabe owuwa orọmijọn̄ mè ikan echi ebilene isa ikeme. Jisọs iriọọn̄ ibe ke ebi ene miweek ukarajit mè ntọ-ubọk. Ebi ibot uwu uriaak misa owuwa orọmijọn̄ mè ikan irọ ibe ugwem iyọt inyi ebi ene. (Mat 9:36; 23:4) Ọmọ orọ, Jisọs itap ubọk inyi ebi ene sa me ijejeen̄ ema mkpọ echi oborọ ibe ugwem kiban̄ inwọn, kubọk ijejeen̄ ijeen̄be me inyọn̄ ogoon̄. Owuwa ebi ene migban̄ Jisọs bak lek ikitumu mkpọ okakaan̄ mgbaan̄ me lek kiban̄.

4. Ike owa ke eji ebesa ijeen̄ ibe ke eji mikaan̄ ulọk me lek ebi ene? (Kpọ si ogugo.)

⁴ Eji ekijeen̄ ibe ke eji mikaan̄ ulọk me lek ebi ene sa me igogobo itet inu okinyi ema sasaak. Owuwa ijo inu ikibọbọkọ irek me inyọn̄ kè Setan yi. Ọmọ orọ, otutuuk ebi eji ekilook ata etip mikaan̄ ufialek okirọ ibe ema ekekaan̄ sasaak mè iyaka ire ekebọkọ ukwook. Eji esikaan̄ eyi me nkeek, motap ubọk inyi eji ekaan̄ njijin me lek ebi eji ekilook ata etip. Kubọk inu njeen̄, ire ikaan̄ inu obọbọkọ irek me agan̄ eji elukbe eyi okinyi ebi ene sasaak ni? Ire ebi irere uga mè ute mikikaan̄ sasaak ibe ke ijo inu mokọt irọ nsabọn kiban̄ me uwu ikpa ni? Ire ikiyọt ebi ene ikakaan̄ ikwaan̄ me agan̄ eji elukbe ni? Keek-nu ubọk ugwem obosa ikup inyi ebi ene ike ema ekichichini mgbọ oyọyọt yi me kpekaan̄ge ikpọchieen̄ bak me lek ekariọọn̄ge ata use echi okup me Baibul.​—2 Tim 3:1; Asaya 65:​13, 14.

5. Kubọk ogwu ijejeen̄, ike owa ke Jisọs osa ikup esese me lek ebi Farisi? (Matiyu 11:​28-30)

⁵ Jisọs ijeen̄ ibe ke ọmọ ikaan̄ ulọk me lek ebi ikigban̄ ọmọ, ema si mimun̄ eyi me lek ubọk isabe irọ mkpọ me lek kiban̄. Jisọs ikup esese me lek ebi Farisi ebi ikikpọ chieen̄ isiki me lek ebi ema ekimun̄ kubọk ebi ikike mè ebi kpekup me lek inu geege! (Mat 23:13; Jọn 7:49) Jisọs ikisa me ata ejit mè ulibi irọ mkpọ me lek ebi ene. Jisọs “ìre ogwu esuuk, mè ire si ogwu òsisiki lek,” eya si irọ ibe ọmọ ire ata ogwu ijejeen̄. (Fuk Matiyu 11:​28-30.) Kè eji si ekesa me ata ejit mè ulibi ekerọ mkpọ me lek ebi eji ekilook ata etip.

6. Ike owa ke eji ebesa ijeen̄ ulibi mè ata ejit me lek ebi ikijit mè iyaka ire ebi ikikup ikeme etip kiji?

⁶ Usini ene mikijit mè iyaka ire ikikup ikeme etip kiji. Ike owa ke eji ebesa ikirọ eru me lek ife chi? Jisọs ijeen̄ eji ibe mè eji ekakirọ me lek ebi ikikup ikeme eji, kpan̄asi ikeya, ema ebi ochicha kiji. Itumu ibe: “Ìkirọ ata inu ìnyi ebi geelek ìchacha enyi. Ìgbana ebi geelek ìgbogbo enyi, mè ìriaak uriaak me ibot ebi geelek ìrọrọ ikeme enyi.” (Luk 6:​27, 28) Mofet me lek kiji ijejeen̄ ebi ikirọ ikeme eji ata ejit ire eji ikeek ibe ke ira ikaan̄ mkpọ orọrọ ema kpeweek igbagban̄ eji. Me atikọ, usini ene kpeweek ibe eji ekelook ata etip. Ire, usini kiban̄ mekọt ikije itibi ufialek me ototun̄ ukan̄ kiban̄, mè iyaka ire ema mikaan̄ sasaak ofolek ofifi ofifi mkpọ. Ebi ene mekọt ijit etip kiji bak me lek eji echichinibe ema me mgbọ ikatatge me lek kiban̄ mè iyaka ire, mgbọ ema ekinaan̄ ejit. Ubọk geelek irebe, kè eji ekegọọk nteme yi: “Ìkisa ida ònwọnwọn, mè ata otu eyi òkibele ebi ene ejit, ìtumu ikọ mgbọ geelek, inyi enyi ekeriọọn̄ ubọk enyi ebekisa ifọọk ene geelek ikọ.” (Kọl 4:6) Ire eji ikaan̄ njijin me lek ebi ene mè ikisa igogobo ufiak kiban̄ itet, eji kpebekinaan̄ ejit inyi ema, eji mere si ata ebi ijejeen̄.

KISA USEM AWAJI JEEN̄ EBI ENE MKPỌ

7. Ike owa ke Jisọs osa ijeen̄ ibe ke ọmọ iyaka lek imaan̄ me lek Usem Awaji me mgbọ ikijeen̄ ebi ene mkpọ? (Jọn 7:​14-16)

⁷ Jisọs ikayaka lek imaan̄ me lek iriọọn̄-inu kan̄. Ikisa Usem Awaji ijeen̄ ebi ene mkpọ me oniin̄ oborọ ibe ema egwat lek egobo etet mè ekekeek. Ofolek Jisọs, Baibul itumu ibe: “Inu îjeen̄be okeke ebi ene chieen̄ enenen, mije, ìkajeen̄ inu ya kubọk ebi ìjeen̄ Ikan ekijeen̄. Ire, ọmọ înye otu ikijeen̄ ikọ Awaji ya kubọk ogwukaan̄ ikọ ya me lek kan̄.” (Mak 1:22) Ebi ìjeen̄ Ikan me mgbọ ya ekijeen̄ inu ebi ibot uwu uriaak ekitumu. Me ntikwo, ijeen̄ ebi ene mkpọ okup me Usem Awaji. Kubọk Gwun̄ Awaji ogwu owuwuuk lek iluk me emen inyọn̄, Jisọs ikasa iriọọn̄-inu ikaan̄be ijeen̄ ebi mkpọ me oniin̄ obotaba nkeek kiban̄ inu me lek kan̄ mè iyaka ire, ijeen̄ ema owuwa mkpọ me mgbọ yaage eyi ema kpekọtbe igobo itet. Kpan̄asi ikeya, isa Usem Awaji ijeen̄ ema mkpọ Awaji oweekbe ibe ema erọ. (Fuk Jọn 7:​14-16.) Jisọs ichubọk ijeen̄ ubọk ebi eyi Karais ebesa ikijeen̄ ebi ene mkpọ.

8. Ike owa ke Pita osa igọọk akpat ukot Jisọs?

⁸ Ebi udun̄ kè Jisọs miyaka lek imaan̄ me lek Usem Awaji me mgbọ ema ekijeen̄ ebi ene mkpọ. Kubọk inu njeen̄, Pita isa Usem Awaji irọ mkpọ me mgbọ ikijeen̄ owuwa ebi ene mkpọ me Pentikọs 33 C.E. Pita ikasi uwu ikpa ilile, ire, ikọt ire ejit ebi ikigban̄ ọmọ mgbọ ikpabe iwele ubọk otutuuk nriran ofolek Jisọs me emen Baibul osabe irọ iso. (Ikwaan̄ 2:​14-21, 37) Keke obọkọ irek eyi itumube usem kan̄ isan̄a? Owuwa ene ebọbọkọ ata etip ya Pita olookbe itap, ebi udun̄ kè Jisọs cha etatap ema me mun̄. Ebi ìgwugwu ikom me usen ya, mè inigọọk inin̄ isọkọ me otu ifuk ebi udun̄ kè Jisọs mîso obop ene ita.​—Ikwaan̄ 2:41.

9. Keke orọ igbebe ibe eji ekesa Baibul erọ mkpọ me mgbọ eji ekijeen̄ ebi ene mkpọ?

⁹ Baibul gaalek ore inu obokọt irọ ibe ebi ene enwene ugwem kiban̄ mè erọ mkpọ okineme Awaji. (Iburu 4:12) Eya orọ, igbe ibe eji ekesa Baibul erọ mkpọ me mgbọ eji ekijeen̄ ebi ene mkpọ. Inu eji eweekbe ire ikekitumu “ikọ Awaji” ikare nkeek eyi kiji. (2 Tim 4:2) Ikpa Urọk 2:6 itumu ibe: “[Jioba] okinyi ene iriọọn̄-inu. Otu kan̄ ke ifuk-ibot mè ngobo-ntet okinan̄a isibi.” Eya orọ, eji esikijeen̄ ebi ene mkpọ inan̄a me emen Baibul, eji ekitele ibe ebi ene enọ mkpọ Jioba okitumu. (Mal. 2:7) Eji ekiweek ibe ebi ene eriọọn̄ ibe ke nteme geelek okup me Baibul inwọn igak nteme geelek ebilene ekinyi. Otutuuk usem okup me Baibul inan̄a me ubọk Awaji ogwu ororom eji. Baibul si ikitap ubọk inyi eji ekọt ekerọ inu obokineme Awaji mè inu echi oborọ ibe eji ekebele ejit.​—2 Tim 3:​16, 17.

10. Keke ke eji ebekọt irọ inyi ogwu eji ekigọọk ikween̄ mkpọ igobo itet mkpọ ikikween̄ me emen Baibul?

¹⁰ Ike okineen̄ lek isusun̄ nkween̄mkpọ Baibul, week ere Baibul echi obojeen̄ ogwu okigọọk ikween̄ mkpọ inyi imun̄ mkpọ Baibul okijeen̄. Kè ogwu okigọọk ikween̄ mkpọ igobo itet ibe ke ikerere ibe ke ekisa ogugo mè fidio irọ mkpọ me nkween̄mkpọ kan̄, ke Baibul ore okpan okpan ikpa eji ekikween̄. Eya orọ, ifuk ere Baibul echi obotap ubọk inyi ogwu okigọọk ikween̄ mkpọ igobo itet okpan okpan mkpọ enyi ekikween̄. Isọkọ me lek si, tap ubọk nyi ọmọ ikikeek inu ikween̄be inan̄a me lek ere Baibul cha. Ikerere me mgbọ okisa ogugo mè fidio irọ mkpọ, tap ubọk nyi ogwu okigọọk ikween̄ mkpọ ibe igobo itet onineen̄ Baibul esabe irọ mkpọ me ere ya. Eyi ikasibi ibe ke omotumu usem iwa mè iyaka ire ifuk ere Baibul geelek okup me inu nkween̄ ya. Kpan̄asi ikeya, nyi ogwu okigọọk ikween̄ mkpọ mgbọ inyi ikọt igobo ere geelek ifukbe itet ijaan̄. Usini mgbọ si mokọt ikup ufiak ibe enyi ekpọk efuk ere Baibul ya. Sa me ikeya, kpan̄asi eji ebekijeen̄ ebi ene mkpọ ikpa, ogugo, mè iyaka ire fidio okitumu, ibore mkpọ Baibul okitumu ke eji ebekijeen̄ ema.​—1 Kọr 2:13.

11-12. (a) Ike owa ke eji ebesa ijeen̄ ime me lek ebi eji ekigọọk ikween̄ mkpọ? (Ikwaan̄ 17:​1-4) (Kpọ si ogugo.) (b) Keke ore inu ogbegbe ibe usini ene ekween̄ ofolek Baibul, ike owa si ke eji ebekọt itap ubọk inyi ema?

¹¹ Usini mgbọ, mokọt ikiyọt ogwu okigọọk ikween̄ mkpọ igogobo itet mè iyaka ire ibọbọkọ atikọ Baibul ge itap. Eyi isibọkọ irek, eji mekweek inye ikisa me ima ijeen̄ ọmọ inu. Nje-nnyi-isi otutuuk ene ikakire ikike. Usini ijejeen̄ ifet eji me lek igogobo itet, ire, isa inyi usini ene moweek mgbọ isasa igobo itet. Pọọlu ikpa ata etip inyi ebi Ju ikup me Teselonaika mè igọọk ema igwu nkeek ikom me emen Ikpa Mbuban me esese esese mgbọ sabum usini kiban̄ enigobo atikọ itet.​—Fuk Ikwaan̄ 17:​1-4.

¹² Ofifi oniin̄ eji ebesa ijeen̄ ime me lek ebi eji ekigọọk ikween̄ mkpọ ire ikekido ema idodo mè ikitele ibe ema efọọk idodo cha ikerere ibe ke kpegwat lek ifọọk. Riọọn̄ ubọk gban̄ utọn̄ jaan̄ me mgbọ ema ekitumu usem, mè sa inyi ogobo otet nkeek kiban̄ ofolek mkpọ enyi ekikween̄. Fuk mè kpa ere Baibul obotap ubọk inyi ema egobo etet nkeek Awaji ofolek mkpọ enyi ekikpa. Riọọn̄ si ibe ke usini ene kpewuuk lek imun̄ Baibul, ema si kperiọọn̄ mkpọ okup me emen. Ire omun̄ lek mbet lek ebi ikup ikeyi, monwọn ire ojeen̄ ema Baibul eyi egonbe isibi kpan̄asi eyi okup me fun. Omokọt ichak otu me lek ere “Bene Kifuk Baibul” okup me agan̄ udun̄ ikpa Nwọọn̄ Ugwem Re Mgbọ Geelek! isasa ikpa iwele mbet lek owuwa etip okup me emen Baibul. Omokọt irọ ibe ema egobo etet ibe ke Baibul mokọt itap ubọk inyi ema me ugwem kiban̄. Ire otap ubọk inyi ebi okigọọk ikween̄ mkpọ emun̄ unye Usem Awaji okaan̄be, ijejeen̄ kwun̄ motet mun̄ igbaalek.

TAP UBỌK RỌ INYI EMA ERIỌỌN̄ JIOBA

13. Eji esikijeen̄ ene mkpọ, ekene ke eji ebekisa nkeek ebi ene ifolek? Nyi inu ntọt-me-lek.

¹³ Inu orọrọ eji ekigọọk ebi ene ikween̄ mkpọ ire, itatap ubọk inyi ema eneriọọn̄ Jioba mè etaba lek eriaak me lek kan̄. (Jemis 4:8) Bak lek eyi, eji mekọt isa ikwaan̄ kiji itọt me lek ikwaan̄ ogwu okimọnọ ene ogugo. Isibomọnọ ene ogugo, ikakito ukan̄ me lek kan̄, kpan̄asi ikeya, ikito me lek ogwu ikiweek imọmọnọ ogugo ya. Eya orọ, osikijeen̄ ebi ene mkpọ, kisa nkeek kiban̄ folek Jioba kpan̄asi lek kwun̄. Ire eji irọ ikeya, eji ebekup kubọk ogwu okimọnọ ogugo ya.

14. Ike owa ke eji ebekọt itap ubọk inyi ebi eji ekigọọk ikween̄ mkpọ ibe ekerọ inu obokineme Jioba?

¹⁴ Tap ubọk nyi ogwu okigọọk ikween̄ mkpọ ibe ikween̄ imama Jioba. Mgbọ ya ke ibokirọ mkpọ obokibele Jioba ejit. (Urọk 27:11) Okakpọkpọk ikijeen̄ ebi ene ibe ekerọ inu otatat mè ekejit inu olọlọ inyi enekana Ebi Ata-Ikọ Jioba. Kpan̄asi ikeya, okijeen̄ ema inu chi inyi ekerọ inu obokineme Jioba. Kubọk inu njeen̄, ire ogwu okigọọk ikween̄ mkpọ ikisa ititim igak ijo eru ge, do ọmọ idodo chi: “Keke orọ Jioba ochabe eru yi? Keke orọ iweekbe ibe okayaka irọ inu okup ikeya? Ike owa ke Jioba ibebe mè okarọ inu yi osa ijeen̄ ibe ke ọmọ ima owu?” Ike okitap efuuk me owot ogwu okigọọk ikween̄ mkpọ ibe ikikeek mkpọ ofolek Jioba, ikeya ke ibokimun̄ mbet lek ata Ute eji ekaan̄be. Eya motap ubọk inyi ọmọ ibe iweek ikekirọ inu obokineme Jioba.

KWEEK NYE KIRỌ IBE IJEJEEN̄ KWUN̄ INWỌN

15. Keke ke obokọt irọ inyi okọt okojeen̄ mkpọ ojaan̄?

¹⁵ Omokọt ibeek Jioba me uriaak ibe itap ubọk inyi owu okeek ubọk obosa ikijeen̄ ebi ene mkpọ ofolek kan̄ ijaan̄. (1 Jọn 5:14) Osibeek uriaak isan̄a, igbe ibe orọ mkpọ ogọọk uriaak kwun̄. Kubọk inu njeen̄, kigban̄ utọn̄ ijaan̄ me nkween̄mkpọ ntitiin̄, ere Jioba okijeen̄ eji ubọk ebekijeen̄ ebi ene mkpọ ijaan̄. Omokọt ibe mè gwun̄ ute ge ogwu orọriọọn̄ ijeen̄ mkpọ ijaan̄ igọọk owu isun̄ nkween̄mkpọ. Omokọt ibe mè itumu inyi owu ere obokọt irọ ijaan̄ igbaalek. Keek si mkpọ ogwu okigọọk ikween̄ mkpọ oriọọn̄be ofolek ibot usem ge mè echi ikariọọn̄ge si. Ikerere ibe ke oriọọn̄ ibot usem ya ijaan̄, kawuuk ibe ke ogwu okigọọk ikween̄ mkpọ ikariọọn̄, eya orọ, kikeek ubọk ibot usem ya obosa ikup me lek kan̄ ike enyi ekikpa mkpọ ofolek. Tap ubọk nyi ogwu okigọọk ikween̄ mkpọ ibe imun̄ ubọk etip kiji osabe ire ata etip me atikọ. Tap ubọk inyi ọmọ si ibe itaba lek iriaak me lek Jioba mè ikaan̄ ata unwọọn̄ si.​—Itọn̄ 1:​1-3.

16. Keke orọ inwọnbe ibe eji ekup enye ekekween̄ ubọk ebekisa ijeen̄ mkpọ ijaan̄?

¹⁶ Ijejeen̄ ebi ene mkpọ ofolek Jioba ire inu ge omimin ichit okinyi eji unwọọn̄. Ikwaan̄ ijejeen̄ ebi ene mkpọ yi ire eyi eji eberọ igbaalek me emen aya inyọn̄ okinu. Kè eji ekup enye ekejeen̄ ulọk me lek ebi ene, ekeyaka lek emaan̄ me lek Usem Awaji, mè eto chieen̄ me lek Jioba ike eji ekilook ata etip. Sa me irọrọ ikeya, eji mejeen̄ ibe ke eji ire ebi ikijeen̄ mkpọ ijaan̄.